1-2. a) Ngande wakatɛkɛtaka Jehowa l’anto? b) Kakɔna kayotɔsɛdingola lo sawo nɛ?

JEHOWA ngɛnangɛnaka ntɛkɛta la so. Lo nshi yakete, nde akakambe la amvutshi, andjelo ndo Ɔnande Yeso Kristo dia tewoya tokanyi tande. (Amɔ. 3:7; Ngal. 3:19; Ɛny. 1:1) Ɛlɔ kɛnɛ, nde tewoyaka tokanyi tande lo tshimbo y’Ɔtɛkɛta ande, Bible. Nde akatoshatɔ dia sho mbeya tokanyi tande ndo nshihodia mboka yande.

² Etena kaki Yeso la nkɛtɛ, Jehowa akatɛkɛta oma l’olongo lo waaso asato. Tayanga nsɛdingola kɛnɛ kakate Jehowa, wetshelo wakokaso nkondja oma l’ɛtɛkɛta ande ndo woho wakokaso nkondja wahɔ oma lo kɛnɛ kakandate.

3. Oko wotamidiɔ lo Makɔ 1:9-11, kakɔna kakate Jehowa etena kakabatizama Yeso, ndo awui akɔna w’ohomba wakashikikɛ ɛtɛkɛta ɛsɔ?

³ Makɔ 1:9-11 totɛka diaaso dia ntondo diakatɛkɛta Jehowa oma l’olongo. (Adia.) Nde akate ate: “Wɛ ekɔ Ɔnami, ɔnɛ lokami ngandji; dimi lamboketawɔ.” Yeso mɛtɛ akanandema lo mboka dui dia She diakawɛnya ngandji ndo eshikikelo! Ɛtɛkɛta wa Jehowa wakashikikɛ awui asato w’ohomba wendana la Yeso. Dui dia ntondo, Yeso ekɔ Ɔnande. Dui dia hende, Jehowa nangaka Ɔnande. Ndo dui dia sato, Jehowa aketawɔ Ɔnande. Nyɛsɔ tɔsɛdingole la yambalo tshɛ diaaso tshɛ l’atei awɔ.

4. Diɔtɔnganelo diakɔna di’oyoyo diakayala lam’asa Nzambi la Yeso etena kakandabatizama?

⁴ “Wɛ ekɔ Ɔnami.” Lo mbuta ɛtɛkɛta ɛsɔ, Jehowa akɛnya dia Ɔnande la ngandji, Yeso akonge la diɔtɔnganelo di’oyoyo la Nde. Etena kaki Yeso l’olongo, nde aki ɔna Nzambi ɔmɔtshi la lo nyuma. Koko, lo batisimu kande, nde akakitama nyuma k’ekila. L’etena kɛsɔ, Nzambi akɛnya dia  Yeso laki Ɔnande lakakitama esɔ, akayala wonya akɔ la elongamelo ka nkalola l’olongo dia tonga Nkumekanga ndo Ɔlɔmbɛdi a laadiko wakasɔnama oma le Nzambi. (Luka 1:31-33; Hɛb. 1:8, 9; 2:17) Diakɔ diele lo batisimu ka Yeso, She aki l’ɔkɔkɔ w’oshika wa mbuta ɔnɛ: “Wɛ ekɔ Ɔnami.”​—Luka 3:22.

5. Ngande wakokaso mbokoya ɛnyɛlɔ ka Jehowa lo mɛnyaka anto ngandji ndo mbakeketshaka?

⁵ “Wɛ ekɔ . . . ɔnɛ lokami ngandji.” Woho wakɛnya Jehowa ngandji ndo wakandakeketsha Ɔnande toholaka sho lawɔ dia nyanga waaso wa nkeketsha anto akina. (Jni. 5:20) Sho ngɛnangɛnaka etena katɛnya onto ɔmɔtshi layakiyanyaso dikambo diande ngandji ndo katandolande l’ɔtɛ w’awui w’ɛlɔlɔ wasalaso. Woho akɔ waamɛ mbele, anangɛso l’akadiyɛso wa l’etshumanelo ndo ase nkumbo yaso wekɔ l’ohomba wa ngandji ndo ekeketshelo kaso. Etena kandolaso anto akina, sho keketshaka mbetawɔ kawɔ ndo mbakimanyiyaka dia vɔ kambɛ Jehowa la kɔlamelo. Lo yoho ya laande ambutshi pombaka keketshaka anawɔ. Etena kandola ambutshi anawɔ l’otema ɔtɔi, vɔ mbaɛnyaka ngandji kawaokawɔ ndo kimanyiyaka anawɔ dia vɔ mpama.

6. Lande na kakokaso ndjaɛkɛ le Yeso Kristo?

⁶ “Dimi lamboketawɔ.” Ɛtɛkɛta ɛsɔ mɛnyaka dia Jehowa aki l’eshikikelo ɔnɛ Yeso ayosala lolango la She la kɔlamelo tshɛ. Jehowa aki l’eshikikelo kɛsɔ le Ɔnande, woho akɔ waamɛ mbele sho kokaka monga l’eshikikelo tshɛ lo tshɛ ɔnɛ la kɔlamelo tshɛ Yeso ayokotsha alaka tshɛ wa Jehowa. (2 Kɔr. 1:20) Etena kasɛdingolaso ɛnyɛlɔ ka Yeso, sho ndekaka ndjashikikɛ dia mbeka akambo oma le nde ndo ndjela wanya ande. Jehowa  ekɔ l’eshikikelo ɔnɛ oko olui, ekambi ande wayotetemala mbeka akambo oma le Ɔnande.​—1 Pe. 2:21.

7. Lo ndjela Mateo 17:1-5, lo diaaso diakɔna diakatɛkɛta Jehowa oma l’olongo, ndo kakɔna kakandate?

⁷ Adia Mateo 17:1-5. Etena ka hende kakatɛkɛta Jehowa oma l’olongo aki etena ‘kakahilɔ’ Yeso. Yeso akatɛ Petero, Jakɔba ndo Joani dia vɔ mbotshindɛ lo dikona dimɔtshi di’otale. Etena kakiwɔ lɛkɔ, vɔ wakɛnyi ɛnɛlɔ kɛmɔtshi ka diambo efula. Elungi ka Yeso kakangayimaka ndo ahɔndɔ ande wakayala wɛma fifɔ. Anto ahende waki didjidji dia Mɔsɛ la Elidja wakatatɛ nsawola la Yeso lo dikambo dia nyɔi ndo eolwelo kande. Kaanga mbele apɔstɔlɔ ande “wakalalaka djɔ,” vɔ wakɛnyi ɛnɛlɔ ka diambo kɛsɔ etena kakawemɔ. (Luka 9:29-32) Oma laasɔ, dinge diakaakombe ndo wakoke dui dimɔtshi oma lo dinge, mbuta ate dui dia Nzambi! Oko wakadiasalema lo batisimu ka Yeso, Jehowa akɛnya Ɔnande ngandji ndo woho wakandawetawɔ lo mbuta ate: “Ɔnɛ ele Ɔnami la ngandji, ɔnɛ lamometawɔ.” Koko mbala kɛsɔ Jehowa akakotsha ate: “Nyoohokamee.”

8. Shɛngiya yakɔna yakonge la ɛnɛlɔ le Yeso ndo ambeki ande?

⁸ Ɛnɛlɔ kɛsɔ kakasha kanyi ya lotombo layonga la Yeso lo nshi yayaye ndo wolo wayonga la nde oko Nkumekanga ka Diolelo dia Nzambi. Aha la taamu, Kristo akakeketshama lo menda asui ndo nyɔi ka paa kakandahombe mbikikɛ. Ɛnɛlɔ kɛsɔ kakakeketsha nto mbetawɔ k’ambeki wa Yeso ndo kakawakeketsha lo dikambo di’ehemba wendana la kɔlamelo ndo olimu wa wolo wakawahombe nkamba. Ɛnɔnyi oko 30 l’ɔkɔngɔ, ɔpɔstɔlɔ Petero akatɛkɛta dia ɛnɛlɔ k’ohilwelo kɛsɔ dia mɛnya dia ɛnɛlɔ kɛsɔ keke oyoyo oto lo yimba yande.​—2 Pe. 1:16-18.

9. Alako akɔna w’amɛna wakasha Yeso ambeki ande?

⁹ “Nyoohokamee.” Jehowa akɛnya hwe dia nde nangaka dia sho mpokamɛ ɛtɛkɛta w’Ɔnande ndo mbakitanyiya. Kakɔna kakate Yeso etena kakinde la nkɛtɛ? Nde akate awui efula waki ohomba efula mpokamɛ! Ɛnyɛlɔ, la ngandji tshɛ nde aketsha ambeki ande woho wa nsambisha lokumu l’ɔlɔlɔ ndo nde akawaohola mbala la mbala dia vɔ nsungukala. (Mat. 24:42; 28:19, 20) Nde akawatɛ nto dia vɔ mbidja welo w’efula ndo nde akaakeketsha diaha vɔ mpekɔ. (Luka 13:24) Yeso akake epole ɔsɛkɛ lo ohomba w’ambeki ande mbokana ngandji, ntshikala kaamɛ ndo nkitanyiya wadjango ande. (Jni. 15:10, 12, 13) Ɔsɔ mɛtɛ aki alako w’amɛna efula wakasha Yeso ambeki ande! Alako asɔ wekɔ ohomba ɛlɔ kɛnɛ oko wakiwɔ lo nshi yakawasha Yeso.

10-11. Ngande wakokaso mɛnya ɔnɛ sho pokamɛka Yeso?

¹⁰ Yeso akate ate: “Onto tshɛ lele lo wedi w’akambo wa mɛtɛ pokamɛka dui diami.” (Jni. 18:37) Sho mɛnyaka dia tekɔ lo mpokamɛ dui diande etena kakitanyiyaso dako di’ɔnɛ: “Nyotetemale mbikikanɛ kɔlɔ ndo nyodimanyiyanake l’otema ɔtɔi lam’asanyu.” (Kɔl. 3:13; Luka 17:3, 4) Sho mɛnyaka nto dia tekɔ lo mpokamɛ dui diande lo sambishaka lokumu l’ɔlɔlɔ l’ohetoheto “lo tena di’ɔlɔlɔ ndo lo tena dia paa.”​—2 Tim. 4:2.

¹¹ Yeso akate ate: “Ɛkɔkɔ ami pokamɛka dui diami.” (Jni. 10:27) Ambeki wa Kristo mɛnyaka dia vɔ pokamɛka Yeso aha lo mpokamɛ tsho ɛtɛkɛta ande, koko ndo lo nkitanyiya ɛtɛkɛta akɔ. Vɔ hawekola timba tawɔ la “ekiyanu wa lo lɔsɛnɔ.”  (Luka 21:34) Koko, nkitanyiya wadjango waki Yeso mbetshawɔ lo dihole dia ntondo lo lɔsɛnɔ kaanga lo tena diewɔ l’ekakatanu. Anangɛso efula wekɔ lo mbikikɛ ehemba wa wolo, mbidja ndo ɔlɔshamelo w’oma le atunyi, wola w’efula ndo mpokoso y’oma lo diangɔ diakatongama. Kaanga mbele awui asɔ tshɛ, vɔ tshikalaka la kɔlamelo le Jehowa oyadi asui akɔna wakoka mbakomɛ. Yeso mbashaka eshikikelo kayela kɛnɛ: “Onto tshɛ lele la wadjango ami ndo lawakitanyiya, onto ɔsɔ kamboka ngandji.”​—Jni. 14:21.

12. Naa yoho kina yakokaso mɛnya ɔnɛ sho pokamɛka Yeso?

¹² Yoho kina yakokaso mɛnya ɔnɛ sho pokamɛka Yeso ele: Lo kambaka kaamɛ la wanɛ wakandasɔnɛ dia tɔlɔmbɔla. (Hɛb. 13:7, 17) Okongamelo wa Nzambi wambosala etshikitanu efula l’ɛnɔnyi weke kambeta, l’atei awɔ mbele ndo dihomɔ ndo toho t’eyoyo ta nkamba la tɔ l’esambishelo, woho wa nsala nsanganya yaso ya l’atei wa lomingu, woho wa mbika, nɔngɔsɔla ndo nkokɛ Mbalasa yaso ya Diolelo. Tekɔ mɛtɛ la lowando lo ɛlɔmbwɛlɔ ka la ngandji ndo kakakongɛma la lomba kɛsɔ! Sho koka monga l’eshikikelo dia Jehowa ayɔtshɔkɔla welo aso wa ndjela ɛlɔmbwɛlɔ katosha okongamelo ande la wonya.

13. Wahɔ akɔna wakondjaso lo mpokamɛ Yeso?

¹³ Sho kondjaka wahɔ lo mpokamɛ akambo tshɛ wakatetsha Yeso. Yeso akalake ambeki ande dia wetshelo ande wayowakeketsha. Nde akate ate: “Nyu nyayoyakondjɛ ekeketshelo. Nɛ dia osembe ami wekɔ dimɛna ndo oshikɔ ami wekɔ osadi.” (Mat. 11:28-30) Ɔtɛkɛta wa Nzambi, mbidja ndo Evanjiliɔ ɛnɛi watɛkɛta dia lɔsɛnɔ ndo olimu wa Yeso tokeketshaka, toshaka wolo wa lo nyuma ndo tetɛka akanga wa tomba. (Os. 19:7; 23:3) Yeso akate ate: “Ɔngɛnɔngɛnɔ le wanɛ woka ɔtɛkɛta wa Nzambi ndo wawokitanyiya!”—Luka 11:28.

14-15. a) Naa diaaso dia sato diɔtɛkɛtami lo Joani 12:27, 28, diakatɛkɛta Jehowa oma l’olongo? b) Lande na kele ɛtɛkɛta wa Jehowa wakasambe ndo wakakeketsha Yeso?

¹⁴ Adia Joani 12:27, 28. Evanjiliɔ wa Joani mbutaka diaaso dia sato diakatɛkɛta Jehowa oma l’olongo. Nshi ngana la ntondo ka nyɔi kande, Yeso akatshu la Jɛrusalɛma dia tosala dambo diande dia Elekanelo di’ekomelo. Nde akate ate: “Dimi  lambohandjɔ wɔɔngɔ.” Oma laasɔ, nde akalɔmbɛ ate: “Papa, otombole lokombo layɛ.” Dia mbokadimola, She akatɛkɛta oma l’olongo ate: “Dimi lakalitombola ndo layolitombola nto.”

¹⁵ Yeso akatshimbe wɔɔngɔ l’ɔtɛ wa ɔkɛndɛ wa woke waki la nde wa ntshikala la kɔlamelo le Jehowa. Yeso akeyaka dia nde ayosoyama l’esehe tshɛ ndo mvɔ nyɔi ka kɔlɔ efula. (Mat. 26:38) Kɛnɛ kakaleke ele, Yeso akalangaka ntombola lokombo la She. Wakasɔngwɛ Yeso ɔnɛ ambɔtɛnga Nzambi ndo nde akayakiyanyaka diaha nyɔi kande ndjɔtɛngamisha lokombo la Nzambi. Ɛtɛkɛta wa Jehowa wakakeketsha Yeso mɛtɛ! Nde akakoke monga l’eshikikelo ɔnɛ lokombo la Jehowa layotombɔma. Ɛtɛkɛta wa She wakahombe nsamba ndo nkeketsha Yeso efula dia nde mbikikɛ asui wakahombe mbokomɛ. Kaanga mbele ondo Yeso ndamɛ mbakoke kɛnɛ kakate She l’etena kɛsɔ, Jehowa akasale dia ɛtɛkɛta Ande fundama lo dikambo diaso sho tshɛ.​—Jni. 12:29, 30.

16. Lande na kakokaso ndjakiyanya lo tena dimɔtshi lo woho watɛngama lokombo la Nzambi?

¹⁶ L’ɛnyɛlɔ ka Yeso, sho lawɔ mbeyaka ndjakiyanya lo kɛnɛ kendana la woho wɔnyɔma lokombo la Jehowa. Oko Yeso, ondo vɔ tosalɛka akambo aha la losembwe. Kana sho mbeyaka ndjakiyanya l’ɔtɛ wambodianganya atunyi aso awui wa kashi lo dikambo diaso. Sho mbeyaka nkanyiya woho wambokonya awui wa kashi  asɔ dia lokombo la Jehowa ndo okongamelo ande tɛngama. Lo tena dia ngasɔ, ɛtɛkɛta wa Jehowa wekɔ esambelo k’efula le so. Hatohombe ndjakiyanya amboleka. Sho koka monga l’eshikikelo ɔnɛ “wɔladi wa Nzambi woleki tokanyi tshɛ wayolama etema a[so] la timba ta[so] lo tshimbo ya Kristo Yeso.” (Flpɛ. 4:6, 7) Jehowa hahekɔki pondjo ntombola lokombo lande. Lo tshimbo ya Diolelo, nde ayonya awui tshɛ wa kɔlɔ wasalɛ Satana ndo andja ɔnɛ ekambi Ande wa kɔlamelo.​—Os. 94:22, 23; Isa. 65:17.

17. Lo ndjela Isaya 30:21, ngande watɛkɛta Jehowa laso ɛlɔ kɛnɛ?

¹⁷ Jehowa aakatetemala ntɛkɛta laso ɛlɔ kɛnɛ. (Adia Isaya 30:21.) Lo mɛtɛ, sho hatoke Nzambi atɛkɛta laso oma l’olongo. Koko nde akatosha Ɔtɛkɛta ande wakafundama, Bible, lɔkɔ mbatoshande ɛlɔmbwɛlɔ. Laadiko dia laasɔ, nyuma ka Jehowa sɛngiyaka “olami wa kɔlamelo” dia ntetemala mbisha ekambi Ande mbo ya ndɛ efula. (Luka 12:42) Tekɔ mɛtɛ la mbo ya ndɛ ya lo nyuma efula yalongolaso lo tshimbo y’ekanda watondjama, ekanda wa l’Ɛtɛrnɛtɛ, tovidɛo ndo ekanda wakadjama l’eshinga!

18. Ngande wakeketsha ɛtɛkɛta wa Jehowa mbetawɔ kayɛ ndo wakoshawɔ dihonga?

¹⁸ Nyɛsɔ tokime lo yimba ɛtɛkɛta wa Jehowa wakandate etena kaki Ɔnande la nkɛtɛ! Ɛtɛkɛta wa Nzambi wofundami lo Bible watokeketsha ɔnɛ Jehowa sɛdingolaka akambo tshɛ ndo nde ayanga minya awui tshɛ wa kɔlɔ wambosala Satana ndo andja ande wa kɔlɔ. Ndo nyɛsɔ toyashikikɛ dia pokamɛka la yambalo tshɛ dui dia Jehowa. Naka sho nsala ngasɔ, kete tayotondoya dia mbikikɛ okakatanu tshɛ wahomana laso l’etena kɛnɛ ndo ohemba tshɛ wakoka tokomɛ. Bible toholaka ɔnɛ: “Nyekɔ la ohomba w’ekikelo, kele l’ɔkɔngɔ wa nyu nsala lolango la Nzambi, kanyolongole ekotshamelo ka daka.”​—Hɛb. 10:36.