1. Kakɔna keyaso lo dikambo di’anangɛso w’ɛlɔngɔlɔngɔ?

ANANGƐSO w’ɛlɔngɔlɔngɔ le, nyu koka monga ohomba efula l’etshumanelo. Efula ka l’atei anyu nyekɔ la wolo wa lo demba. (Tok. 20:29) Nyu salaka akambo efula dia nkimanyiya anangɛnyu l’akadiyɛnyu wa l’etshumanelo. Ondo nyekɔ lo nkonga l’asolo walomɔlomɔ etena kayonyɔsɔnama oko ekambi wakimanyiya. Koko nyu koka mfɔnya ɔnɛ anto akina wekɔ lo nyɔsa dia nyu nyekekɔ akɛnda kana nyu bu l’akoka wa mɛmba ɛkɛndɛ w’ohomba. Kaanga mbekenyu akɛnda, ekɔ akambo efula wakokanyu nsala nshi nyɛ di’ase etshumanelo mbɛkɛ etema le nyu ndo nyɔlɛmiya.

2. Kakɔna kayangaso nsɛdingola lo sawo nɛ?

² Lo sawo nɛ, tayanga nsɛdingola lɔsɛnɔ laki nkumekanga Davidɛ. Tayanga nsɛdingola nto lo tshena pe awui amɔtshi wakakomɛ nkumi ya dikanga hiende ya Juda, Asa nde la Jɛhɔshafata. Tayɔsɛdingole weho w’ekakatanu wakahomana l’apami asato asɔ, kɛnɛ kakawasale ndo wetshelo wakoka anangɛso w’ɛlɔngɔlɔngɔ nkondja oma lo bɛnyɛlɔ diawɔ.

3. Naa yoho mɔtshi yakoka ɛlɔngɔlɔngɔ nkimanyiya esombe l’etshumanelo?

³ Lam’akinde eke ɔlɔngɔlɔngɔ, Davidɛ aki l’akoka wakɔsaka anto akina la nɛmɔ. Nde mɛtɛ aki la lonyuma la dimɛna, ndo nde aki la diewo l’awui wa mishiki ndo akakambe la diewo sɔ lo wahɔ wa Saolo, nkumekanga kakasɔnama oma le Nzambi. (1 Sa. 16:16, 23) Onde nyu ɛlɔngɔlɔngɔ, nyekɔ la diewo dimɔtshi diakoka ase etshumanelo nkondja wahɔ oma lɔkɔ? Efula ka l’atei anyu, nyekɔ la diewo dimɔtshi. Ɛnyɛlɔ, nyu mbeyaka mɛna di’esombe ɛmɔtshi ngɛnangɛnaka di’onto ɔmɔtshi mbaɛnya woho wa nkamba la tablɛtɛ yawɔ ndo tshulatshula dikina lo wekelo w’onto ndamɛ ndo lo nsanganya. Nyu koka nkimanyiya  esombe ɛsɔ nɛ dia nyu mbeyaka woho wa nkamba la tshulatshula.

4. L’ɛnyɛlɔ ka Davidɛ, waonga akɔna wahomba anangɛso w’ɛlɔngɔlɔngɔ nkɛnɛmɔla? (Enda osato wele lo lohoso.)

⁴ Lo lɔsɛnɔ lande la lushi la lushi, Davidɛ akɛnyaka dia nde akakokaka mɛmba ɛkɛndɛ ndo anto wakakokaka ndjaɛkɛ le nde. Ɛnyɛlɔ, etena kakinde ɔlɔngɔ a pami, nde akakambaka olimu wa wolo dia nama ɛkɔkɔ wa she. Olimu ɔsɔ waki waale efula. L’ɔkɔngɔ diko, Davidɛ akalembetshiya nkumekanga Saolo ate: “Okambi ayɛ akayala olami w’ɛkɔkɔ wa she, ko lushi lɔmɔtshi, ntambwɛ kakande ɔkɔkɔ ndo laondo lakande ɔkɔkɔ. Dimi lakayelana la yɔ, lakayikɔmɔla ndo lakatshungola ɛkɔkɔ akɔ oma l’enyɔ ayɔ.” (1 Sa. 17:34, 35) Davidɛ akeyaka dia nde akahombaka nkokɛ ɛkɔkɔ ndo la dihonga tshɛ, nde akalɔsha dia mbakokɛ. Anangɛso w’ɛlɔngɔlɔngɔ koka mbokoya ɛnyɛlɔ ka Davidɛ lo salaka la wolo dia kotshaka oseka ɔkɛndɛ tshɛ wawashawɔ.

5. Lo ndjela Osambo 25:14, naa dui dioleki ohomba diakoka anangɛso w’ɛlɔngɔlɔngɔ nsala?

⁵ Ɔlɔngɔlɔngɔ Davidɛ aki la diɔtɔnganelo dia ma ma la Jehowa. Diɔtɔnganelo sɔ diaki ohomba efula ndeka dihonga ndo diewo dia mishiki diaki la Davidɛ. Jehowa komonga tsho Nzambi kaki Davidɛ, koko nde aki nto Ɔngɛnyi ande wa ma ma. (Adia Osambo 25:14.) Anangɛso w’ɛlɔngɔlɔngɔ le, dui dioleki ohomba diakokanyu nsala ele, nkeketsha diɔtɔnganelo diasanyu la Shɛnyu lele l’olongo, ndo dui sɔ koka nyokonya dia nongola waɛsɛ akina l’etshumanelo.

6. Naa tokanyi ta kɔlɔ taki l’anto amɔtshi lo dikambo dia Davidɛ?

⁶ Okakatanu ɔmɔtshi waki la Davidɛ ele anto wakɔsaka ɔnɛ nde ekekɔ dikɛnda efula ndo atakoke mɛmba ɛkɛndɛ. Ɛnyɛlɔ, etena kakayakimɔ Davidɛ la lolango dia ndɔ la Ngɔliyatɛ, nkumekanga Saolo akasale la wolo dia mbɔtɛwɔla lo mbotɛ ɔnɛ: “Wɛ eke dikɛnda.” (1 Sa. 17:31-33) La ntondo ka laasɔ, enondo wa Davidɛ akawotɛ dia nde hadje akambo yimba. (1 Sa. 17:26-30) Koko, Jehowa kɔmbɔsa Davidɛ oko onto lahatatshunde kana lahadje akambo yimba. Nde akeyaka Davidɛ dimɛna. Ndo Davidɛ akonge l’akoka wa ndjaka Ngɔliyatɛ, nɛ dia nde akayaɛkɛ le Jehowa laki Ɔngɛnyi ande.​—1 Sa. 17:45, 48-51.

7. Wetshelo akɔna wakokanyu nkondja oma l’ɔkɔndɔ ɔmɔtshi wa Davidɛ?

⁷ Wetshelo akɔna wakokanyu nkondja oma  lo kɛnɛ kakakomɛ Davidɛ? Wetshelo wakondjaso ele sho pombaka monga la solo dia lotutsha. Koka mbɔsa etena di’anto wakakeyaka oma ko dikɛnda, ndjotatɛ kɔɔsa oko opalanga. Koko wɛ koka monga l’eshikikelo, dia Jehowa mɛnaka l’edia k’ɛnamelo kayɛ. Nde mbeyaka woho w’onto weyɛ ndo kɛnɛ keyɛ l’akoka wa nsala. (1 Sa. 16:7) Nkeketsha diɔtɔnganelo diasayɛ la Nzambi. Davidɛ akasale dikambo sɔ lo sɛdingolaka dimɛna diangɔ diakatonge Jehowa. Davidɛ akasɛdingolaka kɛnɛ kakakɛnɛmɔlaka etongelo kɛsɔ lo dikambo di’Otungi. (Os. 8:3, 4; 139:14; Rɔmɔ 1:20) Dui dikina diakokanyu nsala ele, nɔmba Jehowa dia nde nyosha wolo wele lanyu ohomba. Ɛnyɛlɔ, onde asekayɛ amɔtshi wa la kalasa kɔsɔkaka l’ɔtɛ weyɛ Ɔmɛnyi wa Jehowa? Naka ngasɔ, kete lɔmba Jehowa dia kokimanyiya dia mbikikɛ ohemba ɔsɔ. Ndo nkamba l’alako w’ohomba watanema l’Ɔtɛkɛta ande, l’ekanda walembetshiya Bible ndo lo tovidɛo. Etena tshɛ kayoyɛnaka woho wakokimanyiya Jehowa dia mbikikɛ ohemba ɔmɔtshi, wɛ ayotalekaka monga la dihonga. Ndo nto, etena kayɛna anto akina dia wɛ ndjaɛkɛka le Jehowa, vɔ wayoyaɛkɛ le yɛ.

8-9. Kakɔna kakakimanyiya Davidɛ dia kongɛɛ la solo dia lotutsha tshɛ polo lam’akandayonga nkumekanga, ndo wetshelo akɔna wakoka anangɛso w’ɛlɔngɔlɔngɔ nkondja oma l’ɛnyɛlɔ kande?

⁸ Tɔsɛdingole okakatanu okina wakahomana la Davidɛ. L’ɔkɔngɔ wa nde kitama esɔ dia monga nkumekanga, Davidɛ akahombe nkonga ɛnɔnyi efula la ntondo ka nde ndjeyama le anto tshɛ oko nkumekanga ka Juda. (1 Sa. 16:13; 2 Sa. 2:3, 4) L’etena kɛsɔ, kakɔna kakookimanyiya dia nde nkonga la solo dia lotutsha tshɛ? Lo dihole dia nde nkɔmɔ, Davidɛ akayasha dia nsala kɛnɛ kakandakokaka nsala. Ɛnyɛlɔ, etena kakinde yekekɔ l’ɛtshi ka nkɛtɛ ka Filistiya, Davidɛ akakambe la diaaso sɔ dia ndɔsha atunyi w’Isariyɛlɛ. Lo nsala ngasɔ, nde akakokɛ elelo wa nkɛtɛ ya Juda.​—1 Sa. 27:1-12.

⁹ Wetshelo akɔna wakoka nkondja anangɛso w’ɛlɔngɔlɔngɔ oma l’ɛnyɛlɔ ka Davidɛ? Nyokambe la waaso wele lanyu dia kambɛ anangɛnyu. Tɔsɛdingole ɛnyɛlɔ ka ɔnangɛso Ricardo. * Ntatɛ lam’akinde eke kodikotshaka ɛnɔnyi dikumi l’ɛmɔtshi, nde akayadjɛ oyango wa nkoma ombatshi mboka wa pondjo. Koko dikumanyi diakawotɛ dia nde atonge suke. Lo dihole dia nde mpekɔ kana mboka nkɛlɛ, Ricardo akahamiya olimu ande w’esambishelo. Nde mbutaka ate: “Etena kakawoyami washo l’ɔkɔngɔ, dimi koka mɛna dia lakahombe nsala ehamelo ɛmɔtshi. Lakasalaka la wolo dia nkalola dia tenda onto tshɛ lakɛnyaka nsaki ndo lakayalɔngɔsɔlaka dia tosala wendelo w’eyoyo. Lakayokondja onto la ntondo la mbeka la nde Bible. Lam’akamatalekaka monga la diewo, mbakatamɔka wɔma.” Ɛlɔ kɛnɛ, Ricardo aya ombatshi mboka wa pondjo wele l’ohetoheto ndo okambi wakimanyiya.

10. Lo diaaso dimɔtshi, kakɔna kakasale Davidɛ la ntondo ka nde mbɔsa yɛdikɔ mɔtshi y’ohomba?

¹⁰ Tɔsɛdingole ɔkɔndɔ okina wa lo lɔsɛnɔ la Davidɛ. Etena kakandatekekɔka nde l’apami ande, vɔ wakatshike nkumbo yawɔ ndo wakatshu dia tokotsha ɔkɛndɛ ɔmɔtshi. Etena kaki apami asɔ lɛkɔ, atunyi wakalanya mvudu yawɔ ndo wakande ase nkumbo yawɔ oko mfumbe. Lam’ele nde aki ɔndɔshi w’ata waki la diewo, Davidɛ akakoke mbuta dia aki dui dia wɔdu le nde nsala ekongelo ndo totshungola anto wakandama oko mfumbe. Koko lo dihole dia nde nsala ngasɔ, nde akalɔmbɛ Jehowa dia mbɔlɔmbɔla. L’ekimanyielo k’ɔlɔmbɛdi wakawelɛka  Abiyatara, Davidɛ akambola Jehowa ate: “Mbitshanya olui wa dengalenga ɔnɛ?” Jehowa akɛnya Davidɛ dia nde akahombe nsala ngasɔ ndo akoshikikɛ dia nde ayonga l’etombelo w’ɛlɔlɔ. (1 Sa. 30:7-10) Wetshelo akɔna wakokanyu nkondja oma l’ɔkɔndɔ ɔnɛ?

11. Kakɔna kakokanyu nsala la ntondo ka mbɔsa tɛdikɔ?

¹¹ Nyoyangake alako la ntondo ka mbɔsa tɛdikɔ. Kanyɔlɔmbake ambutshi anyu kanyi. Nyu koka nto nkondja alako w’amɛna lo sawolaka la dikumanyi diambohokɔ akambo. Jehowa mbɛkɛka otema le apami wakasɔnama asɔ, ndo nyu lawɔ koka mbɛkɛ etema le wɔ. Jehowa mbaɔsaka oko “weshasha” wakandasha etshumanelo. (Ɛf. 4:8) Nyayɔsa tɛdikɔ t’amɛna naka nyu mbokoya mbetawɔ kawɔ ndo mpokamɛ alako wa lomba wanyoshawɔ. Kakianɛ, nyɛsɔ tɔsɛdingole wetshelo wakokaso nkondja oma le nkumekanga Asa.

12. Waonga akɔna waki la nkumekanga Asa etena kakandatatɛ mbolɛ?

¹² Etena kakinde ɔlɔngɔlɔngɔ, nkumekanga Asa aki l’okitshakitsha ndo la dihonga. Ɛnyɛlɔ, etena kakandahɛnɛ Abidja wa she, nde akatatɛ minya dikishi oma lo wodja. Ndo nto, nde “akatɛ ase Juda dia nyanga Jehowa Nzambi ka watshɛwɔ ndo dia nkitanyiya Ɛlɛmbɛ la wadjango.” (2 Ɛk. 14:1-7) Ndo etena kakaye Zera, ose Etiyɔpiya l’asɔlayi 1 000 000 dia ndɔsha Juda, la lomba tshɛ Asa akakadimɔ le Jehowa dia nyanga ekimanyielo lo mbuta ate: “Jehowa le, le yɛ bu ohomba dia wanɛ wakimanyiyayɛ monga efula kana monga la wolo. Jehowa Nzambi kaso le, otokimanyiya nɛ dia tamboyaɛkɛ le yɛ.” Ɛtɛkɛta w’amɛna ɛsɔ mɛnyaka polo lo yɛdikɔ yakɔna yakayaɛkɛka Asa lo dikoka diele la Jehowa dia mboshimbɛ ndo dia nshimbɛ wodja ande. Asa akayaɛkɛka le She lele l’olongo, ndo “Jehowa akalɛndja ase Etiyɔpiya.”​—2 Ɛk. 14:8-12.

13. Kakɔna kakayokimanyiyaka Asa l’ɔkɔngɔ, ndo lande na?

¹³ Aha la taamu, nyu mbetawɔka dia ndɔshana l’asɔlayi 1 000 000 aki okakatanu wa woke. Koko okakatanu wa ngasɔ mbakatondoya Asa. Koko lonyangu ko, etena kakandahomana l’okakatanu wa tshitshɛ, Asa kondjaɛkɛ le Jehowa. Etena kakawanɛ Baasha, nkumekanga ka kɔlɔ k’Isariyɛlɛ, Asa akalɔmbɛ  ekimanyielo ka nkumekanga ka Suriya. Yɛdikɔ shɔ yakawela mpokoso. Lo tshimbo y’omvutshi ande, Hanani, Jehowa akatɛ Asa ate: “Lam’ele wɛ akayaɛkɛ le nkumekanga ka Suriya ndo wɛ kondjaɛkɛ le Jehowa Nzambi kayɛ, asɔlayi wa nkumekanga ka Suriya wambomɔ oma lo lonya layɛ.” Ntatɛ oma l’etena kɛsɔ, Asa akatetemalaka ndɔshama. (2 Ɛk. 16:7, 9; 1 Ku. 15:32) Ko naa wetshelo?

14. Ngande wakokanyu ndjaɛkɛ le Jehowa, ndo lo ndjela 1 Timɔte 4:12, nyayonga anto wa ngande?

¹⁴ Nyotetemale monga l’okitshakitsha ndo nyotetemale ndjaɛkɛ le Jehowa. Etena kakanyabatizama, nyakɛnya mbetawɔ k’efula ndo wɛkamu anyu le Jehowa. Ndo Jehowa aki l’ɔngɛnɔngɛnɔ efula dia nyolongola lo nkumbo kande. Kɛnɛ kele ohomba l’etena kɛnɛ ele ntetemala ndjaɛkɛ le Jehowa. Koka mɛnama dia ekɔ wɔdu ndjaɛkɛ le Jehowa etena kahombanyu mbɔsa tɛdikɔ tayela etshikitanu lo lɔsɛnɔ, ko kayotota dikambo dia ntena dikina? Ekɔ mɛtɛ ohomba ndjaɛkɛ le Jehowa etena kɔsanyu tɛdikɔ, oyadi tendana la tɔkɛnyɔ, olimu wa l’emunyi ndo eyango wa lo lɔsɛnɔ! Tanyoyaɛkɛke lo lomba lanyu hita. Koko, nyoyange atɔndɔ wa lo Bible wendana la akambo wele lanyu, ndo oma laasɔ, nyosale akambo lo yoho yɔtɔnɛ la ɛlɔmbwɛlɔ kɛsɔ. (Tok. 3:5, 6) Naka nyu nsala ngasɔ, kete nyayɔngɛnyangɛnya Jehowa ndo nyayɔlɛmiyama oma le ase etshumanelo kanyu.​—Adia 1 Timɔte 4:12.

15. Oko wofundamidiɔ lo 2 Ɛkɔndɔ 18:1-3; 19:2, munga yakɔna yakasale nkumekanga Jɛhɔshafata?

¹⁵ Lo mɛtɛ, l’ɛnyɛlɔ kaso sho tshɛ, nyu keema kokele, ndo lo ntena dimɔtshi, nyayosalaka munga. Koko, dui sɔ hahombe nyoshimba dia nsala tshɛ kakokanyu nsala l’olimu wa Jehowa. Tɔsɛdingole ɛnyɛlɔ ka nkumekanga Jɛhɔshafata. Nde aki la waonga efula w’amɛna. Etena kakinde ɔlɔngɔlɔngɔ, “nde akayange Nzambi ka she ndo akayele didjango diande.” Ndo nto, nde akatome ewandji dia mbeteta l’esomba wa Juda dia mbetsha anto awui wendana la Jehowa. (2 Ɛk. 17:4, 7) Koko kaanga mbakinde l’otema ɔlɔlɔ, lo ntena dimɔtshi, Jɛhɔshafata akɔshi tɛdikɔ ta kɔlɔ. Etombelo wakonge la yɛdikɔ mɔtshi ya kɔlɔ yakɔshi Jɛhɔshafata ele, omvutshi ɔmɔtshi wa Jehowa akawongola. (Adia 2 Ɛkɔndɔ 18:1-3; 19:2.)  Wetshelo akɔna wakokanyu nkondja oma l’ɔkɔndɔ ande?

16. Wetshelo akɔna wakokanyu nkondja oma lo kɛnɛ kakakomɛ Rajeev?

¹⁶ Etawɔ alako ndo nkamba la wɔ. Ondo l’ɛnyɛlɔ k’ɛlɔngɔlɔngɔ efula, wɛ lawɔ ekɔ l’okakatanu dia nshikikɛ kɛnɛ koleki ohomba le yɛ. Tɔkɔmɔke. Tɔsɛdingole kɛnɛ kakakomɛ ɔnangɛso l’ɔlɔngɔlɔngɔ lelɛwɔ Rajeev. Lo ntɛkɛta dikambo dia nshi yakinde mangase, nde mbutaka ate: “Lo ntena dimɔtshi, dimi kombeyaka kɛnɛ kakamalangaka nsala la lɔsɛnɔ lami. L’ɛnyɛlɔ k’ɛlɔngɔlɔngɔ efula, lakayashaka l’awui wa tɔkɛnyɔ ndo l’ɛngɛnɔngɛnɔ lo dihole dia ntshɔ lo nsanganya kana l’esambishelo.” Kakɔna kakakimanyiya Rajeev? Ekumanyi kɛmɔtshi k’ɔlɔlɔ akawosha alako amɔtshi. Rajeev mbutaka ate: “Nde akakimanyiya dia nkana yimba la tɔndɔ diele lo 1 Timɔte 4:8.” L’okitshakitsha tshɛ Rajeev akakambe l’alako ndo akanyomɔsɛdingola awui wakandetshaka la ntondo lo lɔsɛnɔ lande. Nde mbutaka ate: “Lakɔshi yɛdikɔ ya mbetsha eyango wa lo nyuma lo dihole dia ntondo.” Etombelo akɔna wakonge? Rajeev mbutaka ate: “Ɛnɔnyi engana eto l’ɔkɔngɔ wa dimi nongola alako, lakasɔnama oko okambi wakimanyiya.”

17. Ngande wɔsa esombe ɛlɔngɔlɔngɔ wakambɛ Jehowa?

¹⁷ Esombe mbɔsaka la nɛmɔ di’efula ɛlɔngɔlɔngɔ wakambɛ Jehowa kaamɛ la wɔ “dihɛka lo dihɛka.” (Zɛf. 3:9) Vɔ ngɛnangɛnaka woho wakambanyu olimu wanyoshawɔ l’ohetoheto ndo la wangasanu. Vɔ nyolangaka efula.​—1 Jni. 2:14.

18. Oko wɛnyamidiɔ lo Tokedi 27:11, ngande wayaoka Jehowa lo dikambo di’ɛlɔngɔlɔngɔ wokambɛ?

¹⁸ Anangɛso w’ɛlɔngɔlɔngɔ le, tanyohɛke pondjo dia Jehowa nyolangaka ndo mbɛkɛka otema le nyu. Nde akate dia lo nshi y’ekomelo, olui w’ɛlɔngɔlɔngɔ wayoyakimɔ la lolango. (Os. 110:1-3) Nde mbeyaka dia nyu mbokaka ngandji ndo nyu nangaka mbokambɛ lo ndjela akoka anyu. Ɔnkɔnɛ, nyonge la solo dia lotutsha otsha le anto akina ndo otsha le nyu nyuamɛ. Naka nyambosala munga, nyetawɔ olowanyelo ndo ohokwelo wayowonyosha,nyɔshi dia vɔ ndja oma le Jehowa. (Hɛb. 12:6) Nyosale la wolo dia kotshaka oseka ɔkɛndɛ tshɛ wanyoshawɔ. Laadiko di’akambo asɔ tshɛ, l’awui tshɛ wayonyosalaka, nyosale dia Shɛnyu lele l’olongo mongaka l’ofunu lo dikambo dianyu.​—Adia Tokedi 27:11.