1. Lande na kakalɔmbɛ Yeso Jehowa dia kokɛka ambeki ande?

L’OTSHO w’ekomelo ka lɔsɛnɔ lande oko onto, Yeso akakanyiyaka dikambo di’ekakatanu wakahombe ndjohomana l’ambeki ande. L’ɔtɛ wa ngandji kakandokaka ambeki ande, Yeso akalɔmbɛ She dia “mbakokɛ oma le kanga kɔlɔ.” (Jni. 17:14, 15) Yeso akeyaka dia nde aki suke la nkalola otsha l’olongo ndo ɔnɛ Satana Diabolo ayotetemala ndɔsha onto tshɛ lalanga kambɛ Jehowa. Mbokɛmaka hwe dia, ekambi wa Jehowa wayongaka l’ohomba w’ekokelo.

2. Ngande wakokaso ndjashikikɛ dia Jehowa ayokadimolaka alɔmbɛlɔ aso?

² Jehowa akakadimola dɔmbɛlɔ dia Yeso, nɛ dia Nde akawokaka ngandji. Naka sho nsala la wolo dia ngɛnyangɛnya Jehowa, kete nde ayotoka sho la wɔ ngandji ndo ayokadimola alɔmbɛlɔ w’ɔlɔmbaso dia tokimanyiya ndo tokokɛ. Oko Owandji wa nkumbo wayakiyanya dikambo dia nkumbo kande, Jehowa ayotetemalaka nkokɛ anande la ngandji tshɛ. Nde salaka ngasɔ diaha lokombo lande mɔnywama kana lokumu lande ndana!

3. Lande na keso l’ohomba w’ekokelo ka Jehowa ɛlɔ kɛnɛ?

³ Nshi nyɛ mbambotoleka monga l’ohomba w’ekokelo ka Jehowa. Wakatshanya Satana oma l’olongo, “ele la nkɛlɛ k’efula.” (Ɛny. 12:12) Nde ekɔ lo nkonya anto amɔtshi dia mfɔnya ɔnɛ etena katɔhɛnyahɛnyawɔ, vɔ wekɔ lo kambɛ “Nzambi olimu w’ekila.” (Jni. 16:2) Anto akina wele bu la mbetawɔ le Nzambi tɔhɛnyahɛnyaka, nɛ dia sho ntshikitana l’anto wa l’andja ɔnɛ. Oyadi l’ɔtɛ w’ɔkɔkɔ akɔna watɔhɛnyahɛnyawɔ, sho hatoke wɔma. Lande na? Nɛ dia Ɔtɛkɛta wa Nzambi mbutaka ɔnɛ:  “Nkumadiɔndjɔ ekɔ la kɔlamelo ndo nde ayonyokeketsha ndo ayonyokokɛ oma le kanga kɔlɔ.” (2 Tɛs. 3:3) Ngande watokokɛ Jehowa? Nyɛsɔ tɔsɛdingole toho tohende.

4. Lo ndjela Ɛfɛsɔ 6:13-17, kakɔna kakatosha Jehowa dia tokokɛ?

⁴ Jehowa akatosha dihomɔ dia ta diakoka tokokɛ oma l’ɔlɔshɛlɔ waki Satana. (Adia Ɛfɛsɔ 6:13-17.) Dihomɔ dia ta dia lo nyuma sɔ diekɔ la wolo ndo amɛna efula! Koko paka sho ntetemala nkamba la dihomɔ sɔ naka sho nangaka dia diɔ tokokɛ. Naa kitshimudi yele la ehomɔ la ehomɔ? Nyɛsɔ tɔsɛdingole dui sɔ.

5. Oya w’akambo wa mɛtɛ nembetshiyaka na, ndo lande na kahombaso mbɔlɔtaka?

⁵ Oya w’akambo wa mɛtɛ nembetshiyaka akambo wa mɛtɛ wele l’Ɔtɛkɛta wa Nzambi, Bible. Lande na kahombaso ndɔtaka oya ɔsɔ? Nɛ dia Satana ekɔ “she kashi.” (Jni. 8:44) Aya ɛnɔnyi nunu watande kashi ndo nde ambonganyiya “nkɛtɛ k’otondo”! (Ɛny. 12:9) Koko akambo wa mɛtɛ wele lo Bible tokokɛka diaha sho kesama. Ngande walɔtaso oya wa didjidji ɔsɔ? Sho salaka dui sɔ lo mbekaka akambo wa mɛtɛ wendana la Jehowa, lo mbɔtɛmɔlaka “lo nyuma ndo lo mɛtɛ,” ndo lo mongaka la losembwe l’akambo tshɛ.​—Jni. 4:24; Ɛf. 4:25; Hɛb. 13:18.

6. Okombɔ wa losembwe alembetshiyawɔ, ndo lande na kahombaso mbɔlɔtaka?

⁶ Okombɔ wa losembwe nembetshiyaka atɔndɔ wosembwe wa Jehowa. Lande na kahombaso ndɔtaka okombɔ ɔsɔ? Oko watokokɛka okombɔ otema w’ɔsɔlayi, mbele okombɔ wa losembwe kokɛka otema aso wa didjidji, kana lonto laso la l’etei k’otema diaha lɔ sɛngiyama l’andja ɔnɛ. (Tok. 4:23) Jehowa nangaka dia sho mbolanga ndo mbokambɛ l’otema aso tshɛ. (Mat. 22:36, 37) Diakɔ diele Satana salaka la wolo dia tokonya dia ntshika dia kambɛ Jehowa l’otema aso tshɛ lo tokonya dia nanga diangɔ dia l’andja ɔnɛ, diangɔ diele Jehowa dihetshaka. (Jak. 4:4; 1 Jni. 2:15, 16) Ndo naka hatondami lo djonga shɔ, kete nde ayotɔhɛnyahɛnya dia tokonya dia nsala dui dimɔtshi diahangɛnyangɛnya Jehowa.

7. Ngande walɔtaso okombɔ wa losembwe?

⁷ Sho ndɔtaka okombɔ wa losembwe lo nkitanyiya atɔndɔ wa Jehowa wendana la ɔlɔlɔ la kɔlɔ ndo lo nsɛna lo yoho yɔtɔnɛ l’atɔndɔ akɔ. (Os. 97:10) Anto amɔtshi koka mfɔnya dia atɔndɔ wa Jehowa todjɛka elelo ɛmɔtshi. Koko naka sho ntshika nkamba l’atɔndɔ wa lo Bible lo lɔsɛnɔ laso, kete tayonga oko ɔsɔlayi wambonya okombɔ etena kalɔma ta, nɛ dia nde fɔnyaka dia okombɔ akɔ wamboleka wotsho. Ɔsɔ ekɔ mɛtɛ dui di’enginya! Le anto woka Jehowa ngandji, ɛlɛmbɛ ande “bu wotsho,” koko vɔ shimbɛka nsɛnɔ.​—1 Jni. 5:3.

8. Kakɔna kalembetshiya ndɔta osalosalo l’ekolo dia mbewoya lokumu l’ɔlɔlɔ?

⁸ Pɔɔlɔ tokeketshaka nto dia ndɔta osalosalo l’ekolo dia mbewoya lokumu l’ɔlɔlɔ la wɔladi. L’ɛtɛkɛta ekina, sho pombaka nshi tshɛ mongaka suke dia nsambisha lokumu l’ɔlɔlɔ la Diolelo. Etena kewoyaso anto akina losango l’oma lo Bible, mbetawɔ kaso keketshamaka. Ekɔ mɛtɛ dui di’ekeketshelo dia mɛna woho wakamba ekambi wa Jehowa wa l’andja w’otondo la waaso wotshikitanyi dia nsambisha lokumu l’ɔlɔlɔ, ɛnyɛlɔ etena kewɔ l’olimu, la kalasa, lo dihole diandawɔ okanda, etena kasambishawɔ lo luudu la luudu, etena kasombawɔ diangɔ, etena kembolawɔ ewotɔ wele bu ambetawudi, etena kasawolawɔ l’anto weyawɔ ndo kaanga etena kadihamawɔ lo mvudu. Naka sho mboka wɔma ndo ntshika nsambisha, kete tayonga  oko ɔsɔlayi wambokolola sabata yande etena kalɔma ta; ekolo ande koka mpomɔ esadi eto. Etombelo wayonga ele, nde ayonga l’okakatanu dia ndjakokɛ ndo honga l’akoka wa ndjela ɛlɔmbwɛlɔ ka kɔmanda kande.

9. Lande na kahombaso mɛmbaka engawo ka woke ka mbetawɔ?

⁹ Engawo ka woke ka mbetawɔ nembetshiyaka mbetawɔ kele la so le Jehowa. Tekɔ la mbetawɔ ɔnɛ nde ayokotsha alaka ande tshɛ. Mbetawɔ kɛsɔ tokimanyiyaka “dia nyima mpito tshɛ yalombalomba.” Lande na kahombaso mɛmbaka engawo ka woke kɛsɔ? Nɛ dia tɔ tokokɛka oma lo wetshelo wa kashi wa waa apɔsta ndo tɔ tokimanyiyaka diaha sho nkɔmɔ etena katɔnyɔla anto l’ɔtɛ wa dietawɔ diaso. Naka sho bu la mbetawɔ, kete hatotonga la wolo wa nshika tanga etena katɔsɛngiya anto akina dia mɔnyɔla atɔndɔ wa Jehowa. Lo wedi okina, etena tshɛ kashikaso tanga dia mamɛ mbetawɔ kaso l’olimu kana la kalasa, ekɔ oko tekɔ lo mɛmba engawo kaso. (1 Pe. 3:15) Etena tshɛ katonaso nkamba olimu wayowotofuta falanga efula, koko wahotosha diaaso dia ndjasha efula l’olimu wa Jehowa, mbetawɔ kaso tokokɛka. (Hɛb. 13:5, 6) Ndo etena tshɛ kakambɛso Jehowa oyadi ɔlɔshamelo, mbetawɔ kaso tokokɛka.​—1 Tɛs. 2:2.

10. Lofulɛ la panda kɛdikɛdi na, ndo lande na kahombaso lilɔtaka?

 ¹⁰ Lofulɛ la panda ekɔ elongamelo katosha Jehowa, mbuta ate elongamelo k’ɔnɛ nde ayotoshimbɛ oma lo nyɔi ndo ayofuta wanɛ tshɛ wasala lolango lande. (1 Tɛs. 5:8; 1 Tim. 4:10; Tito 1:1, 2) Oko watokokɛka lofulɛ la mɛtɛ mɛtɛ ɔtɛ w’ɔsɔlayi, mbele ndo elongamelo ka panda kokɛka dikoka diaso di’ekanelo. Lo woho akɔna? Elongamelo tokimanyiyaka dia sho mbika washo lo alaka wa Nzambi ndo tokimanyiyaka dia mɛna akambo la so di’ɔlɔlɔ. Lo woho akɔna walɔtaso lofulɛ la panda lɔsɔ? Sho salaka dui sɔ lo ntetemala nsala dia tokanyi taso mbɔtɔnɛ la tokanyi ta Nzambi. Ɛnyɛlɔ, sho kitshaka elongamelo kaso le Nzambi koko aha lo efumbɔfumbɔ k’ɔngɔnyi.​—Os. 26:2; 104:34; 1 Tim. 6:17.

11. Lokuwa la ta la nyuma kɛdikɛdi na, ndo lande na kahombaso nkamba la lɔ?

¹¹ Lokuwa la ta la nyuma kɛdikɛdi Ɔtɛkɛta wa Nzambi, Bible. Lokuwa la ta lɔsɔ lekɔ la wolo wa nkakitola anto oma lo weho wa lokeso tshɛ ndo ntshungola anto oma lo lɔhɔmbɔ la wetshelo wa kashi ndo mbekelo ya kɔlɔ efula. (2 Kɔr. 10:4, 5; 2 Tim. 3:16, 17; Hɛb. 4:12) Sho mbekaka woho wa nkamba dimɛna la lokuwa la ta lɔsɔ lo salaka wekelo w’onto ndamɛ ndo oma l’olowanyelo walongolaso oma l’okongamelo wa Nzambi. (2 Tim. 2:15) Laadiko di’ɛlɔtɔ wa ta, Jehowa toshaka yoho nkina y’ekokelo ya dimɛna efula. Naa yoho y’ekokelo shɔ?

12. Tekɔ l’ohomba w’osukɔ akɔna nto, ndo lande na?

¹² Ɔsɔlayi wele la diewo mbeyaka dia nde hakoke ndɔsha leemba la woke l’asɔlayi ndamɛ ko mbalɛndja; nde ekɔ l’ohomba w’ekimanyielo k’asekande asɔlayi. Woho akɔ waamɛ mbele, hatokoke shoamɛ ndɔsha Satana l’anto ande; tekɔ l’ohomba w’osukɔ w’anangɛso l’akadiyɛso. Jehowa akatosha “nkumbo k’otondo k’anangɛso” wa l’andja w’otondo dia tokimanyiyaka.​—1 Pe. 2:17.

13. Lo ndjela Hɛbɛru 10:24, 25, wahɔ akɔna wakondjaso lo mbɔtɔka nsanganya yaso?

¹³ Yoho mɔtshi yakondjaso osukɔ ele lo mbɔtɔka nsanganya yaso. (Adia Hɛbɛru 10:24, 25.) Etena katotoyaokaka dia tambɔkɔmɔ, oko watotoyaokaka sho tshɛ lo tena dimɔtshi, nsanganya koka tokeketsha. Sho keketshamaka oma lo kɔmatɛrɛ y’oma k’ɛse otema yasha anangɛso l’akadiyɛso. Asawo wohikami lo Bible ndo bɛnyɛlɔ diashawɔ keketshaka yɛdikɔ yaso ya kambɛ Jehowa. Ndo asawo wasawolaso la wɔ la ntondo ndo l’ɔkɔngɔ wa losanganya tokeketshaka. (1 Tɛs. 5:14) Laadiko dia laasɔ, nsanganya yaso toshaka diaaso dia monga l’ɔngɛnɔngɛnɔ waya lo nkimanyiya anto akina. (Ets. 20:35; Rɔmɔ 1:11, 12) Nsanganya yaso tokimanyiyaka lo toho tokina nto. Yɔ tokimanyiyaka dia monga esambisha ndo embetsha woleki amɛna. Ɛnyɛlɔ, sho mbekaka woho wa nkamba dimɛna la diangɔ diele lo Dihomɔ diaso dia mbetsha. Diakɔ diele, lɔngɔsɔlaka nsanganya ya l’etshumanelo dimɛna. Etena keyɛ lo losanganya, yelalɔ la yambalo tshɛ. L’ɔkɔngɔ wa losanganya, nkamba la olowanyelo wakayalongodi. Naka wɛ nsala awui asɔ, kete wɛ ayonga “ɔsɔlayi w’ɔlɔlɔ wa Kristo Yeso.”​—2 Tim. 2:3.

14. Naa ekimanyielo kekina kele la so?

¹⁴ Tekɔ nto l’osukɔ wa miliyara y’andjelo wele la wolo. Ohokanyiya yema kɛnɛ kakoka nsala ondjelo ɔtɔi! (Isa. 37:36) Oma laasɔ, kanyiya yema kɛnɛ kakoka nsala olui a woke w’andjelo wele la wolo. Ndooko onto kana ɔdiɛngɛ wakoka nɛndja olui w’alembe wa Jehowa wele la wolo ɔsɔ. Jehowa mbele onto loleki wolo tshɛ, diakɔ diele naka nde ekɔ lo  wedi aso, kete tayongaka nshi tshɛ la wolo ndeka atunyi aso oyadi lofulo lakɔna lewɔ. (Emb. 6:16) Ɔsɔ ekɔ dui dia mɛtɛ! Lama tokanyi tɔsɔ lo yimba etena kayaokayɛ dia wɛ ambɔkɔmɔ oma lo kɛnɛ kambota kana kambosala osekayɛ la l’olimu, osekayɛ la la kalasa, kana owotɔ ayɛ wele bu ombetawudi. Ohɔ di’aha wɛmɛ mbalɔ ta sɔ. Yela ɛlɔmbwɛlɔ ka Jehowa.

15. Lo ndjela Isaya 54:15, 17, lande na kele ndooko onto lakoka ntshutshuya ekambi wa Nzambi la wolo dia ntshika nsambisha?

¹⁵ Andja walɔmbɔma oma le Satana wekɔ lo tohetsha l’ɔtɛ w’ɛkɔkɔ efula. Sho namaka lomangemange la so l’awui wa pɔlitikɛ ndo hatɔlɔ ata. Sho mbewoyaka anto lokombo la Nzambi, sukɛka Diolelo diande oko tshɔi y’elongamelo dia nkondja wɔladi ndo sho sukɛka atɔndɔ ande wosembwe. Sho mɛnyaka lo sɛkɛ dia ɔnɔmbɔdi w’andja ɔnɛ ekɔ kanga kashi ndo ondjakanyi. (Jni. 8:44) Ndo sho mbewoyaka anto dia ndooko edja andja waki Satana wayanga ndanyema. Koko, Satana nde l’anto ande hawototoshimba pondjo dia nsambisha. Koko tayotetemalaka ntombola Jehowa lo nkamba la toho tshɛ tele la so dia nsala dui sɔ! Kaanga mbele Satana ekɔ la wolo efula, nde bu l’akoka wa nshimba dia losango la Diolelo nkoma le anto wa l’andja w’otondo. Ekɔ ngaasɔ, nɛ dia Jehowa ekɔ lo tokokɛ.​—Adia Isaya 54:15, 17.

16. Ngande wayoshimbɛ Jehowa ekambi ande lo mfɔnu ka woke?

¹⁶ Kakɔna katokongɛ lo nshi yayaye? Lo mfɔnu ka woke, Jehowa ayotoshimbɛ lo toho tohende ta diambo. Ntondotondo, nde ayoshimbɛ ekambi ande wa kɔlamelo etena kayondosala dia nkumi ya dikanga ya la nkɛtɛ ndanya Babilɔna ka woke, mbuta ate tshunda di’ɛtɛmwɛlɔ wa kashi. (Ɛny. 17:16-18; 18:2, 4) Oma laasɔ, nde ayoshimbɛ ekambi ande etena kayondolanya anto akina wayotshikala l’andja wa Satana l’Armangɛdɔna.​—Ɛny. 7:9, 10; 16:14, 16.

17. Wahɔ akɔna wakondjaso lo ntshikala suke la Jehowa?

¹⁷ Naka sho ntshikala suke la Jehowa, kete Satana hokoka tosalɛ kɔlɔ kahakomɛ. Lo mɛtɛ, nde mbayolanyema lo pondjo. (Rɔmɔ 16:20) Ɔnkɔnɛ, nyɛsɔ tokambake la dihomɔ tshɛ dia ta, ndo aha ntshika nkamba la diɔ! Tɔlɔke ta wɛmɛ. Sukɛ anangɛyɛ l’akadiyɛyɛ. Ndo yela ɛlɔmbwɛlɔ ka Jehowa. Naka wɛ nsala ngasɔ, kete wɛ koka monga l’eshikikelo ɔnɛ Shɔ lele l’olongo ayokokeketsha ndo ayokokokɛ.​—Isa. 41:10.