1. Ehemba akɔna wahomana l’ekambi wa Jehowa ɛlɔ kɛnɛ?

ONDE wɛ ekɔ lo diɛnɛ l’ekakatanu ɛmɔtshi wa wolo? Ondo onto ɔmɔtshi la l’etshumanelo akakonyangiya. (Jak. 3:2) Kana mbeyaka monga ko asekayɛ wa l’olimu kana wa la kalasa kɔnyɔlaka l’ɔtɛ weyɛ okambi wa Jehowa. (1 Pe. 4:3, 4) Kana ondo ase nkumbo kayɛ wekɔ lo nsala la wolo dia koshimba diaha wɛ mbɔtɔka nsanganya kana diaha mbitɛka anto akina awui wendana la dietawɔ diayɛ. (Mat. 10:35, 36) Naka ohemba akɔ wekɔ lo kokiyanya efula, kete wɛ mbeyaka nkɔmɔ. Koko wɛ koka monga l’eshikikelo dia oyadi ohemba akɔna wahomana la yɛ, Jehowa ayokosha lomba la mbɔsa tɛdikɔ t’amɛna ndo wolo wa mbikikɛ.

2. Lo ndjela Rɔmɔ 15:4, shɛngiya yakɔna yakoka monga la wadielo w’Ɔtɛkɛta wa Nzambi le so?

² Jehowa akasale dia bɛnyɛlɔ fundama lo Bible dia mɛnya woho wakakikɛ anto wele keema kokele ehemba wa wolo. Lande na? Dia sho nkondja wetshelo oma lo bɛnyɛlɔ diawɔ. Diakɔ diele, Jehowa akakambe l’ɔpɔstɔlɔ Pɔɔlɔ dia mfunda. (Adia Rɔmɔ 15:4.) Mbadia ɛkɔndɔ ɛsɔ koka tosha yema y’ekeketshelo ndo elongamelo. Koko, dia sho nkondja wahɔ, sho pombaka nsala akambo efula aha tsho mbadia Bible. Sho pombaka mbetawɔ dia Afundelo ntshikitanya ekanelo kaso ndo minanda etema aso. Kakɔna kakokaso nsala naka tekɔ lo nyanga ɛlɔmbwɛlɔ ka woho wa nkandola okakatanu ɔmɔtshi shikaa? Sho koka nsala awui anɛi anɛ: 1) Nɔmba, 2) Nkanyiya, 3) Nkana yimba, ndo 4) Nkamba l’awui akɔ. Nyɛsɔ tɔsɛdingole kɛnɛ kalembetshiya awui asɔ. * Oma laasɔ, tayokamba la yoho ya wekelo  shɔ dia mbeka awui wakakomɛ nkumekanga Davidɛ ndo ɔpɔstɔlɔ Pɔɔlɔ lo lɔsɛnɔ.

3. La ntondo ka wɛ ntatɛ mbadia Bible, ahombayɛ nsala, ndo lande na?

³ 1) Lɔmba. La ntondo ka wɛ ntatɛ mbadia Bible, lɔmba Jehowa dia kokimanyiya dia wɛ mɛna woho wakokayɛ nkondja wahɔ oma lo kɛnɛ kadiayɛ. Ɛnyɛlɔ, naka wɛ ekɔ lo nyanga dako dia mbeya woho wakokayɛ nkandola okakatanu ɔmɔtshi, kete lɔmba Jehowa dia kokimanyiya dia ntana atɔndɔ l’Ɔtɛkɛta ande wakoka kɔlɔmbɔla.​—Flpɛ. 4:6, 7; Jak. 1:5.

4. Kakɔna kayokokimanyiya dia ndeka mɛna mɛtɛ k’ɔkɔndɔ ɔmɔtshi wa lo Bible?

⁴ 2) Kanyiya. Jehowa akatotonge la dikoka di’ekanelo dia diambo efula. Dia kokimanyiya dia mɛna mɛtɛ k’ɔkɔndɔ ɔmɔtshi wa lo Bible, sala la wolo dia nkanyiya ɔkɔndɔ akɔ ndo yaɛna dia wɛ ekɔ lo dihole di’onto lalekawɔ ntɛkɛta l’ɔkɔndɔ akɔ. Sala la wolo dia mɛna diangɔ diɛnande ndo ndjaoka woho wakoka onto akɔ ndjaoka.

5. Nkana yimba kɛdikɛdi na, ndo ngande wakokayɛ nkana yimba?

⁵ 3) Kana yimba. Nkana yimba kɛdikɛdi nkanyiya la yambalo tshɛ awui wadiayɛ ndo lo woho wendana awui akɔ la yɛ. Dui sɔ diayokokimanyiya dia mbɔtɔnganyiya tokanyi ndo nkondja eokelo ka dimɛna ka dui dimɔtshi. Mbadia Bible aha la nkana yimba ekɔ oko mbolo ya dikalo yambowongola ko mbidja lo kartɔ. Nkana yimba ekɔ oko mbɔsa mbolo yakawongodi ko mɔtɛ dikalo. Dia kokimanyia dia nkana yimba, wɛ koka ndjaoka ndo nkadimola ambola wayela anɛ: ‘Kakɔna kakasale onto lalekawɔ ntɛkɛta l’ɔkɔndɔ ɔnɛ dia ndjakimanyiya? Ngande wakookimanyiya Jehowa? Ngande wakokami nkamba la wetshelo wakamakondja dia kimanyiyami dia mbikikɛ ehemba?’

6. Lande na kahombaso kambaka la kɛnɛ kekaso?

⁶ 4) Kambaka la kɛnɛ kekayɛ. Yeso akate dia naka hatokambe la kɛnɛ kekaso, kete tekɔ oko onto laka luudu lo lɔsɛnga. Nde kambaka olimu wa wolo, koko dui sɔ hokimanyiya. Lande na? Nɛ dia etena kayɔkɔmama lɔpɛpɛ la wolo ndo kayonga elola, luudu lɔsɔ layohandjɔ. (Mat. 7:24-27) Woho akɔ waamɛ mbele, naka sho nɔmba, nkanyiya, ndo nkana yimba ko hatokambe la kɛnɛ kekaso, kete welo aso wayonga anyanya. Etena kɔtɔ mbetawɔ kaso l’ohemba kana kahɛnyahɛnyamaso, mbetawɔ kaso hatoyala wolo nto. Lo wedi okina, etena kekaso ndo kakambaso la kɛnɛ kekaso, sho mbɔsaka tɛdikɔ t’eshika ndo sho nyomolekaka monga la wɔladi ndo mongaka la mbetawɔ ka wolo. (Isa. 48:17, 18) Lo nkamba l’awui anɛi w’omaso la nsɛdingola, nyɛsɔ tɔsɛdingole dui dimɔtshi diakakomɛ nkumekanga Davidɛ lo lɔsɛnɔ.

7. Ɔkɔndɔ akɔna wa lo Bible wayangaso nsɛdingola kakianɛ?

⁷ Onde ɔngɛnyi kana ose nkumbo ɔmɔtshi akakonyangiya? Naka ngasɔ, kete wɛ ayokondja wahɔ lo nsɛdingola ɔkɔndɔ wa Abisalɔma w’ɔnaki nkumekanga Davidɛ, lakakesola she ndo lakasale la wolo dia monga nkumekanga lo dihole dia she.​—2 Sa. 15:5-14, 31; 18:6-14.

8. Akokayɛ nsala dia nkondja ekimanyielo ka Jehowa?

⁸ 1) Lɔmba. La ɔkɔndɔ akɔ lo yimba, tɛ Jehowa woho wayaokayɛ lo kɛnɛ kendana la woho wa kɔlɔ wakosalɛwɔ akambo. (Os. 6:6-9) Ta akambo shikaa. Oma laasɔ, lɔmba Jehowa dia kokimanyiya dia mɛna atɔndɔ wayokokimanyiya dia wɛ mbeya kɛnɛ kahombayɛ nsala.

9. Kakɔna kakatombe lam’asa Davidɛ la Abisalɔma?

⁹ 2) Kanyiya. Kanyiya awui wendana l’ɔkɔndɔ ɔnɛ ndo kanyiya woho wakayaoke nkumekanga Davidɛ. Abisalɔma w’ɔna Davidɛ akasalaka la wolo l’edja k’ɛnɔnyi di’anto  mbolanga. (2 Sa. 15:7) Lam’akɛnyi Abisalɔma di’etena ka dimɛna kambokoka, nde akatome atɔpi l’Isariyɛlɛ w’otondo dia totɛ anto dia mbeetawɔ oko nkumekanga kawɔ. Nde aketawoya Ahitɔfɛlɛ, laki ɔngɛnyi w’oshika ndo ondaki wa Davidɛ dia tɔmbɔkwɛ Davidɛ. Abisalɔma akayate dia nde aya nkumekanga ndo akasale la wolo dia minda ndo ndjaka Davidɛ laki ondo l’etena kɛsɔ la hemɔ ka wolo. (Os. 41:1-9) Davidɛ akeye sheke shɔ ndo akalawɔ oma la Jɛrusalɛma. L’ekomelo, asɔlayi w’Abisalɔma wakalɔsha asɔlayi wa Davidɛ. Atunyi asɔ wakalɛndjama ndo Abisalɔma w’ɔna Davidɛ akadiakema.

10. Kakɔna kakakoke nkumekanga Davidɛ nsala?

¹⁰ Oma laasɔ, kanyiya woho wakahombe Davidɛ ndjaoka l’ɔtɛ w’awui wakookomɛ asɔ. Nde akalangaka Abisalɔma ndo akayaɛkɛka le Ahitɔfɛlɛ. Koko, angɛnyi ande wakɔ ahende wa ma ma asɔ wakookesola. Vɔ wakoonyangiya efula ndo wakayange dia mbodiaka. Davidɛ akakoke mfɔnya dia angɛnyi ande akina wakete vɔ lawɔ lo wedi w’Abisalɔma ndo akakoke ntshika ndjaɛkɛ le wɔ. Nde akakoke nkanyiya paka dikambo diande ndamɛ ndo nyanga dia ndawɔ oma lo wodja. Kana nde akakoke tsho ndjakɔmɔla efula. Davidɛ kosala awui asɔ tshɛ. Koko nde akakandola okakatanu wa wolo ɔsɔ. Lande na kakinde l’akoka wa nsala dui sɔ?

11. Kakɔna kakasale Davidɛ la okakatanu wa wolo ɔsɔ?

¹¹ 3) Kana yimba. Atɔndɔ akɔna wakokayɛ nkondja oma l’ɔkɔndɔ ɔnɛ? Kadimola dimbola nɛ: “Kakɔna kakasale Davidɛ dia mbokimanyiya?” Davidɛ komboka wɔma ko mbɔsa tɛdikɔ taha la lomba l’esasesase. Nde komonga la wɔma amboleka ko mbokonya diaha mbɔsa yɛdikɔ lo kɛnɛ kakandahombaka nsala. Koko nde akalɔmbɛ Jehowa ekimanyielo. Nde akalɔmbɛ nto angɛnyi ande dia mbokimanyiya. Ndo nde akasale akambo esadi esadi dia nkotsha tɛdikɔ takandɔshi. Kaanga mbakinde la lonyangu l’efula, Davidɛ kotshika ndjaɛkɛ le anto akina ndo nde kombaombɛ tokumbɛkumbɛ. Nde akatetemala ndjaɛkɛ le Jehowa ndo ndjaɛkɛ le angɛnyi ande.

12. Kakɔna kakasale Jehowa dia nkimanyiya Davidɛ?

¹² Ngande wakakimanyiya Jehowa Davidɛ? Lo nsala eyangelo ɛmɔtshi, wɛ ayeka dia Jehowa akasha Davidɛ wolo wakinde l’ohomba dia mbikikɛ ohemba ɔsɔ. (Os. 3:1-8; efunde wa la diko) Jehowa akatshɔkɔla tɛdikɔ takɔshi Davidɛ. Ndo nde akasukɛ angɛnyi wa kɔlamelo wa Davidɛ etena kakawalɔshaka dia nkokɛ nkumekanga kawɔ.

13. Ngande wakokayɛ mbokoya Davidɛ naka onto ɔmɔtshi ambokonyangiya efula lo yoho mɔtshi? (Mateo 18:15-17)

¹³ 4) Kamba la kɛnɛ kekayɛ. Yambola wate: ‘Ngande wakokami mbokoya Davidɛ?’ Wɛ pombaka nsala akambo esadi dia nkandola okakatanu. Nemanɛka l’awui wele la yɛ, wɛ koka nkamba la dako dia Yeso diele lo Mateo 18 mbala kakɔ ɔtɔi kana nkamba la tɔndɔ diele lɔkɔ. (Adia Mateo 18:15-17.) Koko wɛ hahombe mbɔsa tɛdikɔ l’esasesase etena keyɛ la nkɛlɛ. Wɛ pombaka nɔmba Jehowa dia kosha wɔladi wa l’etei k’otema ndo lomba leyɛ l’ohomba dia mbeya kɛnɛ kahombayɛ nsala. Totshikake ndjaɛkɛ le angɛnyi ayɛ. Koko la lolango tshɛ etawɔ ekimanyielo kakoshawɔ. (Tok. 17:17) Kɛnɛ koleki ohomba ele, yela alako wakosha Jehowa l’Ɔtɛkɛta ande.​—Tok. 3:5, 6.

14. Etena kakɔna kakoka kokeketsha 2 Timɔte 1:12-16; 4:6-11, 17-22?

¹⁴ Onde wɛ ekɔ lo diɛnɛ l’ɔlɔshamelo oma le ase nkumbo kayɛ? Kana onde wɛ ekɔ lo nsɛna lo wodja ɔmɔtshi wele olimu w’Ɛmɛnyi  wa Jehowa wekɔ l’elelo kana wamboshimbama? Naka ngasɔ, kete wɛ mbeyaka nkondja ekeketshelo lo mbadia 2 Timɔte 1:12-16 ndo 4:6-11, 17-22. * Pɔɔlɔ akafunde avɛsa anɛ etena kakinde lo lokanu.

15. Kakɔna kakokayɛ nɔmba Jehowa?

¹⁵ 1) Lɔmba. La ntondo ka wɛ mbadia avɛsa asɔ, tɛ Jehowa awui wendana l’okakatanu ayɛ ndo woho wayaokayɛ. Ta awui shikaa. Oma laasɔ, lɔmba Jehowa dia nde kokimanyiya dia wɛ nshihodia atɔndɔ wele l’ɛkɔndɔ wendana l’ehemba wakahomana la Pɔɔlɔ wayokokimanyiya dia wɛ mbeya kɛnɛ kahombayɛ nsala dia ntokomɛ okakatanu ayɛ.

16. Kakɔna kakakomɛ Pɔɔlɔ?

¹⁶ 2) Kanyiya. Ohɔsa dia wɛ ambohomana la kɛnɛ kakakomɛ Pɔɔlɔ. Nde ekɔ la Rɔmɔ lo lokanu ndo wambookeleka mɔlɔla. Ɔsɔ bu mbala ka ntondo ka nde monga lo lokanu, koko etena kɛnɛ nde ekɔ l’eshikikelo dia nde ayodiakema. Asekande amɔtshi wambowoka ɔkɔngɔ ndo nde ambɔkɔmɔ efula lo demba.​—2 Tim. 1:15.

17. Kakɔna kakakoke Pɔɔlɔ nsala?

¹⁷ Pɔɔlɔ akakoke mbika washo lo nshi yakete, afɔnya dia otondonga nde kokoma Okristo wele l’ohetoheto, tshike vɔ kombonda. Nde akakoke momalɛ apami wa lo distrikɛ di’Asiya, wanɛ wakawoke ɔkɔngɔ ndo nde akakoke ntshika ndjaɛkɛ le angɛnyi ande akina. Koko Pɔɔlɔ kosala awui asɔ tshɛ. Lande na kakinde l’eshikikelo di’angɛnyi ande wayotshikala la kɔlamelo le nde ndo ɔnɛ Jehowa ayowofuta?

18. Kakɔna kakasale Pɔɔlɔ la ntondo k’okakatanu wa wolo ɔsɔ?

¹⁸ 3) Kana yimba. Ohokadimola dimbola nɛ: “Ngande wakayaakimanyiya Pɔɔlɔ?” Kaanga mbakinde suke la nyɔi, Pɔɔlɔ kombohɛ dia dui diakaleke ohomba ele ntombola Jehowa. Ndo nde akatetemala nkana yimba lo kɛnɛ kendana la woho wakandakoke nkeketsha anto akina. Nde akayaɛkɛ le Jehowa lo mbɔlɔmbaka mbala la mbala. (2 Tim. 1:3) Lo dihole dia ndjakiyanya amboleka lo dikambo dia wanɛ wakawoke ɔkɔngɔ, nde akakɛnɛmɔla lowando l’efula lo osukɔ wa la ngandji wakawosha angɛnyi ande wanɛ wakookimanyiya la kɔlamelo tshɛ lo toho ta shikaa. Laadiko dia laasɔ, Pɔɔlɔ akatetemala mbeka Ɔtɛkɛta wa Nzambi. (2 Tim. 3:16, 17; 4:13) Dui diakaleke ohomba ele, nde aki l’eshikikelo koleki tshɛ ɔnɛ Jehowa la Yeso mbookaka ngandji. Vɔ koomboka ɔkɔngɔ ndo wakawosha difuto l’ɔtɛ w’olimu ande wa la kɔlamelo.

19. Ngande wakakimanyiya Jehowa Pɔɔlɔ?

¹⁹ Jehowa akatɛ Pɔɔlɔ dia nde ayohomba mbikikɛ ɛhɛnyɔhɛnyɔ l’ɔtɛ wende Okristo. (Ets. 21:11-13) Ngande wakakimanyiya Jehowa Pɔɔlɔ? Nde akakadimola alɔmbɛlɔ ande, ndo l’edjedja ka wonya akawosha wolo. (2 Tim. 4:17) Wakashikikɛ Pɔɔlɔ dia nde ayolongola difuto l’ɔtɛ wakandakambe olimu wa wolo dia nkondja difuto diakɔ. Ndo Jehowa akakambe la angɛnyi wa kɔlamelo wa Pɔɔlɔ dia mbosha ekimanyielo k’oshika.

20. La Rɔmɔ 8:38, 39 lo yimba, ngande wakokayɛ mbokoya mbetawɔ ka Pɔɔlɔ?

²⁰ 4) Kamba la kɛnɛ kamboyeka. Yambola wate: ‘Ngande wakokami mbokoya mbetawɔ ka Pɔɔlɔ?’ L’ɛnyɛlɔ ka Pɔɔlɔ, sho pombaka nongamɛ dia tayɔhɛnyahɛnyama l’ɔtɛ wa mbetawɔ kaso. (Makɔ 10:29, 30) Dia nama olowanyi aso la ntondo k’ehemba, sho pombaka ndjaɛkɛ le Jehowa lo dɔmbɛlɔ ndo sho pombaka mbekaka Ɔtɛkɛta ande mbala la mbala. Ndo sho pombaka mbohɔka dia dui dioleki ohomba diakokaso nsala ele mbisha  Jehowa lotombo. Sho koka monga l’eshikikelo dia Jehowa hatokalɛki pondjo ndo ndooko ɛngɔ kana onto lakoka mboshimba dia nde tooka ngandji.​—Adia Rɔmɔ 8:38, 39; Hɛb. 13:5, 6.

21. Kakɔna kakakimanyiya Aya la Hector dia ntondoya ekakatanu waki la wɔ?

²¹ Oyadi ekakatanu akɔna wele la so, sho koka nkondja ekeketshelo oma lo bɛnyɛlɔ dia lo Bible. Ɛnyɛlɔ, Aya, ombatshi mboka ɔmɔtshi wa lo Japon mbutaka dia ɔkɔndɔ wa Jɔna wakookimanyiya dia nde minya wɔma wa nsambisha lo sɛkɛ. Hector, ɔlɔngɔlɔngɔ ɔmɔtshi wadjasɛ lo Indonésie wele ambutshi ande hawokambɛ Jehowa, mbutaka dia ɔkɔndɔ wa Ruta wakootshutshuya dia nde mbeka awui wendana la Jehowa ndo dia mbokambɛ.

22. Ngande wakokayɛ nkondja wahɔ w’efula lo adramɛ w’oma lo Bible kana lo ɔnɔngɔ w’asawo wele l’ɔtɛ a dui ɔnɛ “Tokoya mbetawɔ kawɔ”?

²² Lende akokayɛ ntana bɛnyɛlɔ dia lo Bible diayokokeketsha? Tovidɛo taso ndo adramɛ wa lohokamɛ tsho, mbidja ndo ɔnɔngɔ w’asawo wele l’ɔtɛ a dui ɔnɛ “Tokoya mbetawɔ kawɔ” wayokokimanyiya dia wɛ monga oko onto lɛna awui wɔtɛkɛtshiwɔ lo Bible. * La ntondo ka wɛ menda, mpokamɛ kana mbadia ɛkɔndɔ w’amɛna ɛsɔ, lɔmba Jehowa dia kokimanyiya dia wɛ ntana awui w’ohomba wakokayɛ nkamba la wɔ. Yadja lo dihole di’onto lolekiwɔ ntɛkɛta dikambo diande. Kana yimba lo awui wakasale ekambi wa Jehowa wa kɔlamelo ɛsɔ ndo woho wakandaakimanyiya dia ntondoya ekakatanu. Oma laasɔ, nkamba la wetshelo wamboyokondja dia wɛ nkandola okakatanu ayɛ hita. Kaloya Jehowa losaka l’ekimanyielo kakoshande. Ndo ɛnya dia wɛ ekɔ la lowando l’ekimanyielo kɛsɔ lo nyangaka waaso wa nkeketsha ndo nsukɛ anto akina.

23. Lo ndjela Isaya 41:10, 13, kakɔna kalaka Jehowa dia tosalɛ?

²³ Lɔsɛnɔ la l’andja ɔnɛ walɔmbɔma oma le Satana koka monga wolo efula ndo lo tena dimɔtshi sho komaka ewo. (2 Tim. 3:1) Koko hatohombe ndjakiyanya kana mboka wɔma. Jehowa mbeyaka ekakatanu wele la so. Etena keso l’ohomba w’ekimanyielo, nde ndakaka dia tosukɛ la lonya lande l’omi la wolo. (Adia Isaya 41:10, 13.) La eshikikelo tshɛ l’osukɔ ande, sho koka nkondja ekeketshelo oma l’Afundelo ndo ntondoya oseka okakatanu tshɛ.