Anto amɔtshi wadia ɔkɔndɔ ɔnɛ esadi esadi wakayaoke dimbola sɔ. Koko, apami ahende wotshikitanyi mbakelamɛka Mefibɔshɛtɛ ndo sho koka mbeka dui dimɔtshi lo nsɛdingola kɛnɛ kakete.

Saolo, nkumekanga k’Isariyɛlɛ aki l’ana esambele w’apami ndo ana ahende wa wamato. Jɔnatana mbaki ɔna l’enondo laki Saolo. L’ɔkɔngɔ diko, nkumekanga akote nde l’oseka ande Rizipa ɔna pami lakandɔlɛ Mefibɔshɛtɛ. Dui dia diambo ko, Jɔnatana nde lawɔ akote ɔna pami lakandɔlɛ Mefibɔshɛtɛ. Ɔnkɔnɛ, nkumekanga Saolo aki l’ɔna pami lakandɔlɛ Mefibɔshɛtɛ ndo l’okana wa pami wakawɔlɛ Mefibɔshɛtɛ.

L’etena kɛmɔtshi, nkumekanga Saolo akakadimwɛ ase Ngibiyɔna wakadjasɛka l’Isariyɛlɛ ndo akalange mbashila oshiki. Mɛnamaka dia efula l’atei awɔ wakadiakema. Mbokɛmaka hwe dia dui sɔ diaki kɔlɔ. Lande na? Nɛ dia lo nshi ya Jashua, ɛnɔmbɔdi w’ase Isariyɛlɛ wakadje sheke ya wɔladi kaamɛ l’ase Ngibiyɔna.​—Jas. 9:3-27.

Lo nshi ya nkumekanga Saolo, sheke shɔ yaki yeke la nɛmɔ. Otshikitanyi la kɛnɛ kakatama lo sheke shɔ, nkumekanga kɛsɔ akɔshi yɛdikɔ ya nshila ase Ngibiyɔna oshiki. Etombelo wakonge la dui sɔ ele “Saolo nde l’ase luudu lande [wakonge] la onongo wa dikila.” (2 Sa. 21:1) L’ekomelo, Davidɛ akayonga nkumekanga. Ase Ngibiyɔna wakahandɔ wakasawola la nde lo kɛnɛ kendana la munga ka woke kakasalema. Davidɛ akawambola kɛnɛ kakahombe salema l’ɔtɛ w’etsha wa kɔlɔ wa Saolo ndo kɛnɛ kakakoke nkimanyiya Jehowa dia ntshɔkɔla wodja. Lo dihole dia nɔmba falanga, ase Ngibiyɔna wakalɔmbɛ dia mbasha ana w’apami esambele wa pami ‘kakakongɛ dia mbashila oshiki’ dia vɔ ndjakema. (Wal. 35:30, 31) Davidɛ akaasalɛ kɛnɛ kakawalɔmbɛ.​—2 Sa. 21:2-6.

Laasɔ ko Saolo nde la Jɔnatana wakavu lo ta, koko Mefibɔshɛtɛ w’ɔnaki Jɔnatana aki eke la lɔsɛnɔ. Nde akɔkɔ ekolo lo aksida ɔmɔtshi wakasalema lam’akinde dikɛnda ndo nde kosukɛ tshɛnde lo ta diakandalɔsha ase Ngibiyɔna. Davidɛ akadje sheke nde la Jɔnatana y’ɔngɛnyi ande di’ekana ande ndjokondjaka wahɔ, mbidja ndo Mefibɔshɛtɛ y’ɔnaki Jɔnatana. (1 Sa. 18:1; 20:42) Ɔkɔndɔ ɔsɔ mbutaka ɔnɛ: “Nkumekanga [Davidɛ] akoke Mefibɔshɛtɛ ɔna Jɔnatana ɔna Saolo kɛtshi l’ɔtɛ w’etshibelo kakatshibe Davidɛ nde la Jɔnatana ɔna Saolo la ntondo ka Jehowa.”​—2 Sa. 21:7.

Koko Davidɛ akakotsha kɛnɛ kakalɔmbɛ ase Ngibiyɔna. Nde akakimɔ ana ahende wa Saolo w’apami, ɔmɔtshi lokombo lande Mefibɔshɛtɛ ndo ekana w’apami atanu waki Saolo. (2 Sa. 21:8, 9) Kɛnɛ kakasale Davidɛ kɛsɔ kakakomiya onongo wa dikila waki la wodja.

Ɔkɔndɔ ɔsɔ totɛka akambo efula, koko vɔ bu tsho ɔkɔndɔ. Ɔlɛmbɛ wa Nzambi wakokɛmaka hwe. Vɔ wakataka ɔnɛ: “Ana hawohombe ndjakema l’ɔtɛ wa kɛnɛ kasala ambutshi awɔ.” (Eoh. 24:16) Jehowa kokoka mbetawɔ kɛnɛ kakawasalɛ ana wa Saolo ahende w’apami ndo ekana ande etanu w’apami otondonga vɔ komonga l’onongo. Ɔlɛmbɛ ɔsɔ wakakotshaka ɔnɛ: “Onto pombaka ndjakema paka l’ɔtɛ wa pɛkato kande hita.” Mɛnamaka dia ana ahende waki Saolo ndo ekana ande etanu wakadiakema wakasukɛ Saolo lo yoho mɔtshi etena kakandashile ase Ngibiyɔna oshiki. Etombelo waki la dui sɔ ele vɔ wakadiakema l’ɔtɛ wa kɔlɔ kawɔ.

Ɔkɔndɔ ɔnɛ mɛnyaka dia onto hakoke dimanyiyama l’ɔtɛ wakandasale kɔlɔ lo mfɔnya kana lo mbuta dia nde akasale tsho kɛnɛ kakawawotɛ dia nsala. Yokedi mɔtshi ya lomba mbutaka ɔnɛ: “Lɔngɔsɔla mboka k’ekolo ayɛ, ko mboka yayɛ tshɛ yayonga shikaa.”​—Tok. 4:24-27; Ɛf. 5:15.