1. Waa na wakasha lonya dia nkenga etshumanelo k’oyoyo ka la Filipɛ?

ETENA kakakome ɔpɔstɔlɔ Pɔɔlɔ, Silasɛ, Luka ndo Timɔte la Filipɛ, osomba wakalɔmbɔmaka oma le ase Rɔmɔ, vɔ wakatane anto efula wakayashaka lo losango la Diolelo. Anangɛso anɛi waki l’ohetoheto asɔ wakasha lonya dia etshumanelo kengama ndo ambeki tshɛ wakatatɛ nsangana kaamɛ, ondo lo luudu la Ludiya ombetawudi ɔmɔtshi wakalongɔnaka dimɛna.​—Ets. 16:40.

2. Okakatanu akɔna wakahomana la etshumanelo kɛsɔ esadi eto?

² Kombeta edja, etshumanelo k’oyoyo kɛsɔ kakahomana l’okakatanu ɔmɔtshi. Satana akatshutshuya atunyi w’akambo wa mɛtɛ dia ndɔshana l’olimu w’esambishelo wakasalaka Akristo wa kɔlamelo asɔ. Wakande Pɔɔlɔ la Silasɛ, wakaakɔmɔla eshingɔ ndo wakawadje lo lokanu. L’ɔkɔngɔ wa vɔ mbatondja oma lo lokanu, vɔ wakembola ambeki w’eyoyo asɔ ndo wakaakeketsha. Oma laasɔ, Pɔɔlɔ, Silasɛ ndo Timɔte wakakalola koko ondo Luka akatshikala lɛkɔ. Kakɔna kakahombe anangɛso l’akadiyɛso w’eyoyo asɔ nsala? L’ekimanyielo ka nyuma ka Jehowa, ambetawudi w’eyoyo asɔ wakatetemala kambɛ Jehowa l’ohetoheto. (Flpɛ. 2:12) Pɔɔlɔ aki l’ɔkɔkɔ w’oshika wa monga l’ofunu lo dikambo diawɔ!

3. Oko wotamidiɔ lo Filipɛ 1:9-11, kakɔna kakalɔmbɛ Pɔɔlɔ?

³ Ɛnɔnyi oko dikumi l’ɔkɔngɔ, Pɔɔlɔ akafundɛ etshumanelo ka la Filipɛ mukanda. Etena katayadia mukanda ɔsɔ, wɛ mbeyaka nshihodia esadi eto ngandji kakoke Pɔɔlɔ anango asɔ. Nde akafunde ate: “[Lekɔ la] mposa k’efula . . . ka nyɛna nyu tshɛ la ngandji k’efula kele oko kaki la Kristo Yeso.” (Flpɛ. 1:8) Nde akaafundɛ dia nde mbadjaka lo alɔmbɛlɔ. Nde akalɔmbɛ Jehowa dia mbakimanyiya dia ngandji kawɔ mfula, dia nshikikɛ akambo woleki ohomba, dia monga pudipudi, aha ntakanya anto akina ndo dia vɔ ntetemala ndodiama la olowa wa losembwe. Aha la taamu wɛ mbetawɔka ɛlɔ kɛnɛ dia sho koka nkondja wahɔ oma l’ɛtɛkɛta  wa l’otema ɔtɔi wakafunde Pɔɔlɔ. Diakɔ diele tayanga mbadia kɛnɛ kakafundɛ Pɔɔlɔ ase Filipɛ. (Adia Filipɛ 1:9-11.) Oma laasɔ, tayɔsɛdingola akambo wakandashile ndo tayɔkɛtshanya woho wakokaso nkamba la dikambo ɔtɔi ɔtɔi l’atei awɔ.

4. a) Lo ndjela 1 Joani 4:9, 10, ngande wakɛnya Jehowa ngandji katokande? b) Polo lo yɛdikɔ yakɔna yahombaso mboka Nzambi ngandji?

⁴ Jehowa akatɛnya ngandji kande ka woke lo ntoma Ɔnande lanɛ la nkɛtɛ dia ndjotovwɛ l’ɔtɛ wa pɛkato yaso. (Adia 1 Joani 4:9, 10.) Ngandji ka Nzambi ka ndjahondja totshutshuyaka dia mbolanga. (Rɔmɔ 5:8) Polo lo yɛdikɔ yakɔna yahombaso mboka Nzambi ngandji? Yeso akakadimola dimbola sɔ etena kakandatɛ Ofarisɛ ɔmɔtshi ate: “Langa Jehowa Nzambi kayɛ la otema ayɛ tshɛ ndo la anima ayɛ tshɛ ndo la yimba yayɛ tshɛ.” (Mat. 22:36, 37) Sho kombolaka mboka Nzambi ngandji l’otema aso tshɛ. Koko, sho kombolaka dia ngandji kawokaso talekaka mfula lushi tshɛ. Pɔɔlɔ akatɛ ase Filipɛ dia ngandji kawɔ kakahombe “[t]alekaka mfula tsho.” Kakɔna kakokaso nsala dia nkeketsha ngandji kokaso Nzambi?

5. Ngande wakoka ngandji kaso mfula?

⁵ Dia sho mboka Nzambi ngandji, sho pombaka mbeeya. Bible mbutaka ɔnɛ: “Onto tshɛ lahokana ngandji ateye Nzambi, nɛ dia Nzambi ekɔ ngandji.” (1 Jni. 4:8) Ɔpɔstɔlɔ Pɔɔlɔ akɛnya dia ngandji kokaso Nzambi kayotafulaka etena kayotokondja ‘ewo Kande k’oshika ndo shɛnɔdi tshɛ.’ (Flpɛ. 1:9) Etena kakatatatɛ mbeka Bible, takoke Nzambi ngandji kohikami lo ewo ka tshitshɛ ka waonga ande wa diambo. Oma laasɔ, lo yɛdikɔ yakatatalekaka mbeka awui wendana la Jehowa, mbakatalekaka mfula ngandji kawokaso. Aha la taamu sho mbɔsaka wekelo wa Bible wa mbala la mbala ndo okanelo wa yimba la Ɔtɛkɛta wa Nzambi oko awui amɔtshi l’atei w’awui woleki ohomba lo lɔsɛnɔ laso!​—Flpɛ. 2:16.

6. Lo ndjela 1 Joani 4:11, 20, 21, lo woho akɔna wakokaso mfudia ngandji kaso?

⁶ Ngandji k’efula katoka Nzambi katotshutshuya dia mboka anangɛso ngandji. (Adia 1 Joani 4:11, 20, 21.) Sho mbeyaka ndjɔfɔnya ɔnɛ tayoka anangɛso l’akadiyɛso ngandji aha la mbidja welo. Kɛnɛ kele mɛtɛ ele tekɔ lo ntɛmɔla Jehowa ndo tekɔ lo nsala la wolo dia mbokoya waonga ande w’amɛna. Tekɔ lo ndjela ɛnyɛlɔ ka Yeso lele ngandji kande kaki efula diakɔ diakandakimɔ lɔsɛnɔ lande dia wahɔ aso. Koko, sho mbeyaka ndjɛna lo tena dimɔtshi wolo nkitanyiya didjango dia mbokana ngandji lam’asaso. Tɔsɛdingole ɛnyɛlɔ kɛmɔtshi ka l’etshumanelo ka la Filipɛ.

7. Wetshelo akɔna wakondjaso oma lo dako di’ohomba diakasha Pɔɔlɔ Evodiya la Sutukɛ?

⁷ Evodiya la Sutukɛ waki akadiyɛso waki l’ohetoheto, wakakambe “dihɛka lo dihɛka” l’ɔpɔstɔlɔ Pɔɔlɔ. Koko ondo vɔ waketawɔ di’ekakatanu waki lawɔ mbakakitola. Lo mukanda wakandafundɛ etshummanelo kaki akadiyɛso asɔ, Pɔɔlɔ akashile lokombo la Evodiya la Sutukɛ ndo akawasha dako dia vɔ “monga la kanyi ɔtɔi.” (Flpɛ. 4:2, 3) Pɔɔlɔ akɛnyi nto dia ekɔ ohomba mbutɛ etshumanelo k’otondo ɔnɛ: “Nyosalake akambo tshɛ aha la engunungunu ndo aha la ewanu.” (Flpɛ. 2:14) Aha la taamu, dako dia Pɔɔlɔ di’ohomba diakakimanyiya aha tsho akadiyɛso wa kɔlamelo asɔ, koko ndo etshumanelo k’otondo dia vɔ nkeketsha dimama dia ngandji ka lam’asa onto l’ɔnango.

8. Okakatanu akɔna wa woke wonga dia mboka anangɛso ngandji, ndo ngande wakokaso nkandola dui sɔ?

 ⁸ L’ɛnyɛlɔ ka Evodiya la Sutukɛ, sho koka monga l’okakatanu wa woke dia mboka anto akina ngandji naka sho mbidjaka yimba lo wandja. Sho tshɛ salaka munga lushi tshɛ. Naka sho mbidja yimba lo wandja w’anto akina, kete ngandji kawaokaso kayokitakita. Ɛnyɛlɔ, naka ɔnangɛso ɔmɔtshi ambohɛ dia tokimanyiya dia nsola Mbalasa ka Diolelo, sho mbeyaka momala. Naka sho ntatɛ nshila wandja akina tshɛ weyaso wakasale ɔnangɛso, kete nkɛlɛ kaso kayofula ndo ngandji kawokaso kayokitakita. Naka wɛ ekɔ la okakatanu wa ngasɔ, kete ayonga ohomba nkana yimba la dui nɛ: Jehowa mɛnaka wandja aso ndo wandja w’ɔnangɛso. Koko, kaanga mbeyande wandja asɔ, Jehowa ekɔ lo ntetemala mboka ɔnangɛso ngandji ndo ekɔ lo ntetemala toka ngandji. Diakɔ diele, sho pombaka mbokoya ngandji ka Jehowa ndo monga la kanyi y’ɔlɔlɔ otsha le anangɛso. Etena kasalaso la wolo dia mboka anangɛso ngandji, sho keketshaka kaamɛ ka lam’asaso.​—Flpɛ. 2:1, 2.

9. Awui akɔna wele l’atei wa “akambo woleki ohomba” wakafundɛ Pɔɔlɔ ase Filipɛ lo mukanda ande?

⁹ Nyuma k’ekila kakatshutshuya Pɔɔlɔ dia mbitɛ ase Filipɛ ndo Akristo tshɛ dia “nshikikɛ akambo woleki ohomba.” (Flpɛ. 1:10) Akambo w’ohomba asɔ mendanaka la okidiamelo wa lokombo la Jehowa, okotshamelo w’asangwelo ande ndo wɔladi la kaamɛ ka l’etshumanelo. (Mat. 6:9, 10; Jni. 13:35) Etena kaleka akambo asɔ monga ohomba lo lɔsɛnɔ laso, sho mɛnyaka dia sho mbokaka Jehowa ngandji.

10. Kakɔna kahombaso nsala dia mbɔsama oko anto wele pudipudi?

¹⁰ Pɔɔlɔ akate nto dia sho pombaka “monga pudipudi.” Dui sɔ halembetshiya ɔnɛ sho pombaka monga pudipudi lo yoho ya kokele. Hatokoke monga pudipudi oko Jehowa Nzambi. Koko, Jehowa ayotɔsa oko anto wele pudipudi naka sho nsala kɛnɛ tshɛ kakokaso nsala dia mfudia ngandji kaso ndo nshikikɛ akambo woleki ohomba. Yoho mɔtshi yɛnyaso ngandji kaso ele lo nsala la wolo dia mbewɔ ntakanya anto akina.

11. Lande na kahombaso mbewɔ ntakanya anto akina?

¹¹ Dako dia mbewɔ ntakanya anto akina diekɔ mɛtɛ tshondo y’ɔhɛmwɛlɔ. Ngande wakokaso ntakanya onto ɔmɔtshi? Sho mbeyaka nsala dui sɔ oma l’ɔsɔnwɛlɔ wa tɔkɛnyɔ, ɔsɔnwɛlɔ wa ahɔndɔ, kaanga ɔsɔnwɛlɔ w’olimu aso. Kɛnɛ kasalaso mbeyaka monga ko bu kɔlɔ. Koko naka ɛsɔnwɛlɔ aso wekɔ lo nkiyanya nkum’otema k’onto okina, ko nde ambotakana, kete dui sɔ diekɔ kɔlɔ. Yeso akate dia naka tambokonya ɔnangɛso ɔmɔtshi dia ndanya diɔtɔnganelo diande la Jehowa, kete etombelo wayonga la dui sɔ wayoleka w’onto lokelekiwɔ dive dia wotsho lo kingo ko mbotambiya lo ndjale!​—Mat. 18:6.

12. Wetshelo akɔna wakondjaso oma l’ɛnyɛlɔ ka wadi l’omi w’ambatshi mboka?

¹² Tende woho wakayele wadi l’omi amɔtshi w’ambatshi mboka ɔhɛmwɛlɔ wa Yeso ɔsɔ. Vɔ waki l’etshumanelo ɔtɔi la wadi l’omi amɔtshi waki weke kabatizama wakodiama lo nkumbo yaki awui efula kombetawɔmaka. Wadi l’omi waki weke kabatizama asɔ wakafɔnyaka dia Akristo hawohombe ntshɔ dia tenda filmɛ, oyadi filmɛ y’amɛna. Vɔ wakanyange etena kakawoke ɔnɛ wadi l’omi w’ambatshi mboka wakatshu tenda filmɛ kɛmɔtshi. L’ɔkɔngɔ  wa laasɔ, wadi l’omi w’ambatshi mboka wakɔshi yɛdikɔ y’aha ntshɔ nto tenda filmɛ edja ndo lam’akahombe wadi l’omi weke kabatizama monga l’akoka wa mbekiya nkum’otema kawɔ dia vɔ ndeka monga la wɛdimo. (Hɛb. 5:14) Lo nsala ngasɔ, wadi l’omi w’ambatshi mboka wakɛnya dia vɔ mbokaka atshukanyi asɔ ngandji, aha tsho l’ɛtɛkɛta koko ndo l’etsha.​—Rɔmɔ 14:19-21; 1 Jni. 3:18.

13. Ngande wakokaso nkonya onto ɔmɔtshi dia nsala pɛkato?

¹³ Woho okina wakokaso ntakanya onto ɔmɔtshi ele lo mbokonya dia nsala pɛkato. Ngande wakoka dui sɔ salema? Tɔsɛdingole dui nɛ. L’ɔkɔngɔ wa nde ndɔsha l’etena k’otale, ombeki wa Bible ɔmɔtshi akayoyakimɛ diaha monga nto mfumbe ka wanu. Nde akayɛna dia nde akahombe ntshika nnɔ wanu tshɛ lo tshɛ. Nde akasale etshikitanu efula lo lɔsɛnɔ lande ndo akayobatizama. L’ɔkɔngɔ diko, ɔnangɛso ɔmɔtshi akawelɛ dia vɔ nsanga lonya ndo akawosha wanu lo mbotɛ ate: “Wɛ aya kakianɛ Okristo ndo wɛ ekɔ la nyuma ka Jehowa. Dionga dimɔtshi dia nyuma k’ekila ele ndjakimɛ. Naka wɛ monga la ndjakimɛ, kete wɛ koka nnɔ wanu la wɛdimo.” Tokanyiya etombelo wotoyala otondonga ɔnangɛso leke kabatizama ɔsɔ akakitanyiya dako dia kɔlɔ sɔ!

14. Ngande watokimanyiya nsanganya y’Akristo dia nkamba la dako dia lo Filipɛ 1:10?

¹⁴ Nsanganya y’Akristo tokimanyiyaka dia nkamba l’alako wa lo Filipɛ 1:10 lo toho efula. Ntondotondo, ekongelo ka mbo ya ndɛ ya lo nyuma y’amɛna toholaka kɛnɛ koleki ohomba le Jehowa.  Dui dia hende ele, sho mbekaka woho wa nkamba la kɛnɛ kekaso l’oyango wa sho nyomoleka monga pudipudi. Dui dia sato ele, sho tshutshuyanaka “lo ngandji ndo lo etsha w’ɛlɔlɔ.” (Hɛb. 10:24, 25) Lo yɛdikɔ yayotoleka keketshama oma le anangɛso, mbayoleka ngandji kokaso Nzambi kaso ndo anangɛso mpama. Naka sho mboka Nzambi ndo anangɛso ngandji, kete tayosala kɛnɛ tshɛ kakokaso nsala dia mbewɔ ntakanya anangɛso.

15. Kakɔna kalembetshiya “ndodiama la olowa wa losembwe”?

¹⁵ Pɔɔlɔ akalɔmbɛ l’otema ɔtɔi dia ase Filipɛ “ndodiama la olowa wa losembwe.” (Flpɛ. 1:11) Aha la taamu “olowa wa losembwe” ɔsɔ wakendanaka ndo la ngandji kakawokaka Jehowa ndo ekambi ande. Dui sɔ diakendanaka nto la woho wakawasawolaka l’anto akina awui wendana la mbetawɔ kawɔ le Yeso ndo elongamelo kawɔ ka diambo. Filipɛ 2:15 kambaka l’ɛnyɛlɔ kekina kendana la “mpɛta . . . oko esase lo andja ɔnɛ.” Ɛnyɛlɔ kɛsɔ kekɔ dimɛna nɛ dia Yeso akelɛ ambeki ande ɔnɛ “osase wa l’andja ɔnɛ.” (Mat. 5:14-16) Nde akadjangɛ ambeki ande nto dia ‘mbetɛ anto ambeki’ ndo akate dia vɔ wayonga “ɛmɛnyi . . . polo ndo l’ahole woleki etale wa lo nkɛtɛ.” (Mat. 28:18-20; Ets. 1:8) Sho tɔka “olowa wa losembwe” etena kayashaso l’ohetoheto l’olimu woleki ohomba ɔsɔ.

16. Ngande wɛnya Filipɛ 1:12-14 dia sho koka mpɛta oko esase kaanga l’atei w’ɛhɛnyɔhɛnyɔ? (Enda osato wele lo lohoso.)

¹⁶ Oyadi awui akɔna wele laso, sho koka mpɛta oko esase. Lo tena dimɔtshi, kɛnɛ kɛnama oko wekamu dia nsambisha lokumu l’ɔlɔlɔ mbeyaka ndjotosha diaaso dia nsambisha. Ɛnyɛlɔ, ɔpɔstɔlɔ Pɔɔlɔ aki lo  luudu la lokanu la Rɔmɔ etena kakandafundɛ ase Filipɛ mukanda ande. Koko mɔlɔla wakawokeleka komboshimba dia nsambisha wanɛ wakolamaka ndo wanɛ wakayaka ndjowenda. Pɔɔlɔ akasambisha l’ohetoheto kaanga l’atei w’akambo asɔ, ndo dui sɔ diakasha anangɛso eshikikelo ndo dihonga dia “mbewoya ɔtɛkɛta wa Nzambi aha la mboka wɔma.”​—Adia Filipɛ 1:12-14; 4:22.

17. Sha ɛnyɛlɔ kɛmɔtshi ka nshi nyɛ kɛnya woho wakokaso ntetemala nsambisha kaanga l’atei w’ekakatanu wa wolo.

¹⁷ Anangɛso l’akadiyɛso efula wekɔ la diaaso dia mɛnya dihonga lo ndjela ɛnyɛlɔ ka Pɔɔlɔ. Vɔ wekɔ lo nsɛna lo wedja wahawakoke nsambisha lo sɛkɛ kana lo soko la soko, koko vɔ tanaka toho tokina ta nsambisha lokumu l’ɔlɔlɔ. (Mat. 10:16-20) Lo wodja ɔmɔtshi wa ngasɔ, omendji w’otshimbedi ɔmɔtshi akasha kanyi y’opandjudi tshɛ nkindjakindja ‘ɛtshi kande ka nkɛtɛ’ kakakengama la ewotɔ ande, asukanyi ande, asekande wa la kalasa, wa l’olimu ndo anto akina weyande. L’ɔkɔngɔ w’ɛnɔnyi ehende, lofulo la tshumanelo dia l’otshimbedi ɔsɔ lakadɛ lo yɛdikɔ y’efula. Mbeyaka monga ko hatɔsɛnɛ lo wodja wahakoke anto nsambisha lo sɛkɛ. Koko, sho koka nkondja wetshelo ɔmɔtshi w’ohomba oma l’ɛnyɛlɔ k’anangɛso l’akadiyɛso asɔ. Yangaka mbala tshɛ toho ta nsambisha lokumu l’ɔlɔlɔ lo yɛdikɔ y’efula l’eshikikelo dia Jehowa ayokosha wolo weyɛ l’ohomba dia mbekola oseka wekamu tshɛ.​—Flpɛ. 2:13.

18. Kakɔna kahombaso ndjashikikɛ dia nsala?

¹⁸ L’etena k’ohomba kɛnɛ, nyɛsɔ toyashikikɛ dia nkamba la alako wakasambiyama watanaso lo mukanda wakafundɛ Pɔɔlɔ ase Filipɛ. Nyɛsɔ toshikikɛ akambo woleki ohomba, mbuta ate monga pudipudi, mbewɔ takanya anto akina, ndo ntɔ olowa wa losembwe. Lo nsala ngasɔ, tayofudia ngandji kaso ndo tayotombola Jehowa, Shɛso ka ngandji.