MBETAWƆ toshaka wolo w’efula. Ɛnyɛlɔ, kaanga mbalanga Satana dia todiaka lo nyuma, mbetawɔ toshaka akoka wa “nyima mpito tshɛ yalombalomba ya kanga kɔlɔ.” (Ɛf. 6:16) Mbetawɔ koka tokimanyiya dia ntokomɛ ekakatanu wele oko akona. Yeso akatɛ ambeki ande ate: “Naka nyu monga la mbetawɔ ka woke oko lɔtɔngɔ la mutardɛ, kete nyayotɛ dikona nɛ nyate: ‘Mɔ oma lanɛ, tshɔka lɛnɛ,’ ko diɔ diayomɔ.” (Mat. 17:20) Lam’ele mbetawɔ koka tokeketsha lo nyuma, sho pombaka ndjaoka ambola anɛ: Mbetawɔ kɛdikɛdi na? Shɛngiya yakɔna yele la eongelo kaso k’otema lo mbetawɔ kaso? Ngande wakokaso nkeketsha mbetawɔ kaso? Ndo le na ahombaso monga la mbetawɔ?​—Rɔmɔ 4:3.

Mbetawɔ nɔmbaka akambo efula koko aha tsho mbeya akambo wa mɛtɛ, nɛ dia kaanga “ɛdiɛngɛ mbetawɔka [ɔnɛ Nzambi ekɔ] ndo vɔ sakaka lokomba la wɔma.” (Jak. 2:19) Ko, mbetawɔ kɛdikɛdi na?

Bible mɛnyaka dia mbetawɔ nembetshiyaka awui ahende. Ntondotondo, “mbetawɔ ele okongelo wa la eshikikelo tshɛ wa kɛnɛ kalongamɛ onto.” (Hɛb. 11:1a) Naka wɛ ekɔ la mbetawɔ, kete wɛ mbetawɔka l’eshikikelo dia dui tshɛ diata Jehowa diekɔ mɛtɛ ndo diɔ diayokotshama. Ɛnyɛlɔ, Jehowa akatɛ ase Isariyɛlɛ ate: “Otondongaka nyu nyakakoke ndanya sheke yami yendana la yanyi ndo sheke yami yendana la otsho diaha yanyi la otsho ndjaaka lo tena diahombama, mbotokoka sheke yami yakamadje la okambi ami Davidɛ ndana.” (Jɛr. 33:20, 21) Onde wɛ mbokaka wɔma ɔnɛ yanyi koka monga ko hayowale ndo dui sɔ nsala dia yanyi la otsho memala? Naka wɛ bu la taamu lo ɛlɛmbɛ wakɛndjakɛndja diangɔ diakatongama diasala dia nkɛtɛ ndjantshimba ndo ntshimba wonya, onde wɛ koka mbidja taamu ɔnɛ Otungi wa ɛlɛmbɛ ɛsɔ hakoke nkotsha alaka ande? Ndooko!​—Isa. 55:10, 11; Mat. 5:18.

Dui dia hende, mbetawɔ ekɔ “wɛnyɛlɔ wa lo sɛkɛ w’akambo wa mɛtɛ wahɛnama.” Mbetawɔ ekɔ “wɛnyɛlɔ wa lo sɛkɛ,” kana “djembetelo yetawoya,” ya diangɔ diahɛnama la washo, koko diekɔ mɛtɛ. (Hɛb. 11:1b; nɔtɛ) Lo woho akɔna? Tɔshi dia ɔna ɔmɔtshi ambokombola ate: ‘Ngande weyayɛ ɔnɛ hiɛlɛlɛ yekɔ?’ Kaanga mbahayatɛnaka hiɛlɛlɛ, ondo wɛ koka nkimanyiya ɔn’ɔsɔ lo nkana la nde yimba lo tolembetelo tɛnama, ɛnyɛlɔ ɔhɛngɛlɔ, awui wasala lɔpɛpɛ, ndo awui akina. Etena kayetawɔ ɔn’ɔsɔ dia diangɔ sɔ diekɔ, nde ayoshihodia di’onto koka monga la mbetawɔ lo ɛngɔ kɛmɔtshi kahɛnama. Woho akɔ waamɛ mbele, mbetawɔ mpikama lo tolembetelo t’eshika.​—Rɔmɔ 1:20.

Lam’ele mbetawɔ mpikama lo tolembetelo, dia monga la mbetawɔ kakɔ onto pombaka ntondo monga la “ewo k’oshika k’akambo wa mɛtɛ.” (1 Tim. 2:4) Koko, aha laasɔ ato. Ɔpɔstɔlɔ Pɔɔlɔ akafunde ate: “La otema mbonga onto la mbetawɔ.” (Rɔmɔ 10:10) Onto hahombe tsho mbetawɔ akambo wa mɛtɛ, koko pombaka nto mbaɔsa la nɛmɔ. Paka lo nsala ngasɔ mbayondotshutshuyama dia nkɛnɛmɔla  mbetawɔ, mbuta ate nsala awui wɔtɔnɛ la akambo wa mɛtɛ. (Jak. 2:20) Onto lele bu la lowando la l’otema ɔtɔi lo akambo wa mɛtɛ, koka ntona kaanga tolembetelo tetawoya nɛ dia nde tonaka ntshikitanya dietawɔ diande kana nangaka nsala akambo lo ndjela ɛsɔnwɛlɔ ande. (2 Pe. 3:3, 4; Judɛ 18) Diakɔ diele lo nshi yakafundamaka Bible, aha onto tshɛ lakɛnyi ahindo wakasalema mbaki la mbetawɔ. (Wal. 14:11; Jni. 12:37) Nyuma k’ekila ka Nzambi kimanyiyaka anto walanga akambo wa mɛtɛ dia monga la mbetawɔ.​—Ngal. 5:22; 2 Tɛs. 2:10, 11.

L’atei w’anto waki la mbetawɔ k’efula mbaki ndo nkum’ekanga Davidɛ. (Hɛb. 11:32, 33) Koko, aha onto tshɛ laki lo nkumbo ka Davidɛ mbaki la mbetawɔ ka ngasɔ. Ɛnyɛlɔ, lo diaaso dimɔtshi Eliyabɛ, enondo wa Davidɛ, akɛnya dia nde komonga la mbetawɔ etena kakandahangwɛ Davidɛ l’ɔtɛ wakandayakiyanyaka lo dikambo dia tɔfwɛfwɛ takadjaka Ngɔliyatɛ ekambi wa Nzambi. (1 Sa. 17:26-28) Ndooko onto lotɔ la mbetawɔ kana mpowɔ mbetawɔ oma le ambutshi ande, ɔnkɔnɛ mbetawɔ ka Davidɛ kakaye oma lo diɔtɔnganelo diande la Nzambi.

Lo Osambo 27, Davidɛ mɛnyaka woho wakandayonga la mbetawɔ ka wolo ka ngasɔ. (Div. 1) Davidɛ akakanaka yimba lo awui wakokomɛ lo nshi yakete ndo woho wakasalɛ Jehowa atunyi ande akambo. (Div. 2, 3) Nde akɔsaka la nɛmɔ di’efula yɛdikɔ ya Jehowa yendana l’ɔtɛmwɛlɔ. (Div. 4) Davidɛ akatɛmɔlaka Nzambi kaamɛ l’asekande ambetawudi lo tabɛrnaklɛ. (Div. 6) Nde akayangaka Jehowa l’etete lo dɔmbɛlɔ. (Div. 7, 8) Davidɛ akalangaka nto dia mbetshama lo mboka ka Nzambi. (Div. 11) Dionga sɔ diaki ohomba efula le Davidɛ, diakɔ diakandoke dimbola ɔnɛ: “Lende otomonga otondonga dimi bu la mbetawɔ?”​—Div. 13.

Wɛ koka monga la mbetawɔ kele oko ka Davidɛ naka wɛ monga l’ekanelo ka yimba ndo la mbekelo yoshilami lo Osambo 27. Lam’ele mbetawɔ mpikama lo ewo k’oshika, etena kayoyotalekaka mbeka Ɔtɛkɛta wa Nzambi ndo ekanda walembetshiya Bible, mbayondoleka monga dui dia wɔdu dia nkɛnɛmɔla dionga sɔ dia olowa wa nyuma ka Nzambi. (Os. 1:2, 3) Ɔsaka etena ka kanaka yimba etena kekayɛ. Naka wɛ kanaka yimba la kɛnɛ kekayɛ, lowando layɛ otsha le Jehowa layofula. Etena katafule lowando layɛ otsha le Jehowa, mbayoleka mfula ndo nsaki kayɛ ka nkɛnɛmɔla mbetawɔ lo mbɔtɛmɔlaka lo nsanganya ya l’etshumanelo ndo lo mbewoyaka anto akina elongamelo kayɛ. (Hɛb. 10:23-25) Ndo nto, sho mɛnyaka dia tekɔ la mbetawɔ etena katetemalaso “nɔmbaka . . . aha la mpekɔ.” (Luka 18:1-8) Ɔnkɔnɛ, ‘totetemale nɔmba’ Jehowa, tele l’eshikikelo dia “nde ndjakiyanyaka dikambo dia[so].” (1 Tɛs. 5:17; 1 Pe. 5:7) Mbetawɔ totshutshuyaka l’etsha, ndo etsha aso keketshaka mbetawɔ kaso.​—Jak. 2:22.

La dikɔlɔ dia la ntondo ka nyɔi kande, Yeso akatɛ ambeki ande ate: “Nyonge la mbetawɔ le Nzambi ndo nyonge la mbetawɔ le mi.” (Jni. 14:1) Ɔnkɔnɛ, sho pombaka monga la mbetawɔ aha tsho le Jehowa, koko ndo le Yeso. Ngande wakokayɛ monga la mbetawɔ le Yeso? Nyɛsɔ tɔsɛdingole toho tosato.

Ntondotondo, ɔsa oshinga w’etshungwelo oko woshasha wokosha Nzambi ndamɛ. Ɔpɔstɔlɔ Pɔɔlɔ akate ate: “Lekɔ lo nsɛna diɛsɛ la mbetawɔ kele la mi le Ɔna Nzambi lakamboke ngandji ndo lakayakimɔ dikambo diami.” (Ngal. 2:20) Naka wɛ monga la mbetawɔ le Yeso, kete wɛ ayetawɔ l’eshikikelo tshɛ dia oshinga w’etshungwelo mendanaka la yɛ, kokimanyiyaka dia kɔlɔ yayɛ dimanyiyama, koshaka elongamelo ka lɔsɛnɔ la pondjo, ndo wekɔ djembetelo yoleki woke ya ngandji kakoka Nzambi. (Rɔmɔ 8:32, 38, 39; Ɛf. 1:7) Naka wɛ mbetawɔka dia oshinga w’etshungwelo koka kokimanyiya, kete wɛ hoyaɛndja onongo kana ndjaɔsa oko onto la kɔlɔ.​—2 Tɛs. 2:16, 17.

Dui dia hende, yasukanya la Jehowa lo dɔmbɛlɔ l’ekimanyielo ka olambo wa Yeso. L’ɔtɛ wa oshinga w’etshungwelo, sho koka nɔmba Jehowa “la dihonga tshɛ dia sho mbokama kɛtshi ndo dia ɔlɔlɔ waheyama mbɛdika tokimanyiya lo etena kahombama.” (Hɛb. 4:15, 16; 10:19-22) Dɔmbɛlɔ keketshaka yɛdikɔ yaso ya nshika tanga la ntondo k’ohemba wa nsala pɛkato.​—Luka 22:40.

Dui dia sato, kitanyiya Yeso. Ɔpɔstɔlɔ Joani akafunde ate: “Onto tshɛ lele la mbetawɔ le Ɔna ayokondja lɔsɛnɔ la pondjo. Onto tshɛ lahakitanyiya Ɔna hatɛna lɔsɛnɔ, koko odudu wa Nzambi wekɔ le nde.” (Jni. 3:36) Tolembete dia Joani akɛnya otshikitanu wele lam’asa monga la mbetawɔ la monga l’ohindodi. Ɔnkɔnɛ, wɛ mongaka la mbetawɔ le Yeso etena kawokitanyiyayɛ. Wɛ kitanyiyaka Yeso lo ndjela “ɔlɛmbɛ wa Kristo,” mbuta ate kɛnɛ tshɛ kakandetsha ndo kakandadjanga. (Ngal. 6:2) Wɛ kitanyiyaka Yeso nto lo ndjela ɛlɔmbwɛlɔ kashande lo tshimbo ya “ɔhɔmbɔ wa kɔlamelo ndo kɛsɔ.” (Mat. 24:45) Naka wɛ nkitanyiya Yeso, kete wɛ ayokondja wolo wa mbikikɛ ehemba wele oko mpɛpɛ ya wolo.​—Luka 6:47, 48.

Mbala kɛmɔtshi pami kɛmɔtshi akalelɛ Yeso ate: “Dimi lekɔ la mbetawɔ! Okimanyiya lɛnɛ eemi l’ohomba wa mbetawɔ!” (Makɔ 9:24) Nde aki la yema ya mbetawɔ, koko pami kɛsɔ aketawɔ l’okitshakitsha tshɛ dia nde aki l’ohomba wa mbetawɔ k’efula. L’ɛnyɛlɔ ka pami kɛsɔ, sho tshɛ tayonga l’ohomba wa mbetawɔ k’efula lo etena kɛmɔtshi. Ndo sho tshɛ koka nkeketsha mbetawɔ kaso oma ko kakianɛ. Oko wakatadiɛnyi, sho keketshaka mbetawɔ kaso etena kekaso Ɔtɛkɛta wa Nzambi ndo kakanaso la wɔ yimba. Dui sɔ diayotokimanyiya dia sho ndeka monga la lowando le Jehowa. Mbetawɔ kaso kayoleka nkeketala nto, naka sho l’asekaso ambetawudi tayɔtɛmɔlaka Jehowa, tayotɛka anto akina lo sɛkɛ elongamelo kaso ndo tayotetemalaka nɔmba. Ndo nto, naka sho nkeketsha mbetawɔ kaso, kete tayokondja difuto dioleki tshɛ. Ɔtɛkɛta wa Nzambi totɛka ɔnɛ: “Nyu analengo wa ngandji, nyoyahike nyuamɛ lo mbetawɔ kanyu koleki ekila . . . lo ngandji ka Nzambi.”​—Judɛ 20, 21.