1. Kakɔna kahomba Akristo nsala dia ndawɔ polo l’ekomelo dia nkondja lɔsɛnɔ?

AKRISTO wekɔ lo talawɔ lowango l’otsha lo lɔsɛnɔ. Oyadi teke ka ntatɛ ndawɔ kana tambolawɔ ɛnɔnyi efula, sho pombaka ntetemala ndawɔ polo lam’ayotokoma l’oshidi w’ekomelo. Dako diakasha ɔpɔstɔlɔ Pɔɔlɔ Akristo wa la Filipɛ koka tokeketsha dia sho ndawɔ polo l’ekomelo. Anto amɔtshi wa l’etshumanelo ka lo ntambe ka ntondo kɛsɔ wamboshilaka kambɛ Jehowa l’edja k’ɛnɔnyi etena kakawalongola mukanda wa Pɔɔlɔ. Vɔ wakatalawɔka dimɛna, koko Pɔɔlɔ akawaohola ohomba wa ntetemala ndawɔ la ekikelo. Nde akalangaka dia vɔ ntetemala ndjela ɛnyɛlɔ kande lo ‘ntetemala la lɔkɛndɔ lawɔ . . . la oyango.’​—Flpɛ. 3:14.

2. Lande na kele alako wakasha Pɔɔlɔ ase Filipɛ waki la wonya?

² Alako wakasha Pɔɔlɔ ase Filipɛ wakashama la wonya. Ase etshumanelo kɛsɔ wakahomana l’ɛhɛnyɔhɛnyɔ oma l’etatelo katɔ. Tɔ kakatatɛ etena kaketawɔ Pɔɔlɔ la Silasɛ leeta l’oma le Nzambi l’ɔnɛ “yaka lendo la Makɛdɔniya,” ndo kakawakome la Filipɛ oya lo 50 T.D. (Ets. 16:9) Lɛkɔ vɔ wakatane womoto lelɛwɔ Ludiya, nde “akahokamɛka, ko Jehowa akadihola otema ande” dia mboka lokumu l’ɔlɔlɔ. (Ets. 16:14) Aha la ntshimbatshimba, nde akabatizama kaamɛ l’ase luudu lande. Koko, Diabolo kondala djɔ. Apami wa l’osomba wakatɔlɛ Pɔɔlɔ la Silasɛ la ntondo k’ewandji wa l’osomba ndo wakaamamatanyɛ awui wa kashi ɔnɛ wekɔ lo mbidja ofukutanu. Diakɔ diele, wakakɔmɔla Pɔɔlɔ la Silasɛ, wakawadje lo lokanu ndo l’ɔkɔngɔ, wakaalɔmbɛ dia ntomba oma l’osomba. (Ets. 16:16-40) Onde vɔ wakahekɔ? Ndooko! Kayotota dikambo di’anangɛso l’akadiyɛso waki l’etshumanelo k’oyoyo kaki keke ka kengama? Dui dia lowando ko vɔ lawɔ wakakikɛ! Aha la taamu, vɔ wakakeketshama oma l’ɛnyɛlɔ ka Pɔɔlɔ nde la Silasɛ.

3. Kakɔna kakeyaka Pɔɔlɔ, ndo ambola akɔna wayotɔsɛdingola?

³ Pɔɔlɔ akayashikikɛ diaha mpekɔ pondjo. (2 Kɔr. 4:16) Koko, nde akeyaka ɔnɛ dia ntetemala ndawɔ polo l’ekomelo, nde akahombe mbidja yimba lo oyango. Wetshelo akɔna  wakokaso nkondja oma l’ɛnyɛlɔ ka Pɔɔlɔ? Bɛnyɛlɔ diakɔna di’anto wa nshi nyɛ wele la mbetawɔ diɛnya dia sho koka mbikikɛ ekakatanu? Ndo ngande wakoka elongamelo kaso ka nshi yayaye nkeketsha yɛdikɔ yaso yaha mpekɔ pondjo?

4. Ngande wakatetemala Pɔɔlɔ monga l’ohetoheto oyadi awui akɔna wakokomɛ?

⁴ Tɔsɛdingola kɛnɛ kakasalaka Pɔɔlɔ etena kakandafundɛ ase Filipɛ. Nde aki lo lokanu lo luudu lɔmɔtshi la Rɔmɔ. Nde kokokaka ntomba l’andja dia tosambisha. Koko, nde akatetemala monga l’akambo efula wa nsala lo nsambisha wanɛ wakayaka dia ndjowenda ndo lo fundɛka tshumanelo diaki etale mikanda. Woho akɔ waamɛ mbele, ɛlɔ kɛnɛ Akristo efula wahayokoka ntomba oma lo luudu kambaka la diaaso tshɛ diakondjawɔ dia nsambisha anto waya lawakawɔ lokumu l’ɔlɔlɔ. Vɔ fundɛka nto anto wahaleke mɛnama mikanda w’ekeketshelo.

5. Lo ndjela ɛtɛkɛta ande wele lo Filipɛ 3:12-14, kakɔna kakakimanyiya Pɔɔlɔ dia mbika washo l’oyango ande?

⁵ Pɔɔlɔ kombetawɔ mbekola yimba yande, oyadi l’awui w’amɛna kana wa kɔlɔ wakandasale. Nde akate ate “mbohɛ akambo wakamatshike l’ɔkɔngɔ” ekɔ ohomba efula dia “nsembɔ otsha lo akambo wele la ntondo,” mbuta ate ndawɔ lowango polo l’ekomelo. (Adia Filipɛ 3:12-14.) Naa awui amɔtshi wakakoke mbekola yimba ya Pɔɔlɔ? Dui dia ntondo ele, nde akasale awui wa diambo ntondo ka nde monga Okristo. Koko, nde akɔshi awui asɔ oko “tota dia mindo.” (Flpɛ. 3:3-8) Dui dia hende ele, kaanga mbakandakoke ndjaɛndja onongo l’ɔtɛ wakandahɛnyahɛnyaka Akristo ntondo, nde kombetawɔ awui asɔ mboshimba dia kambɛ Jehowa. Ndo dui dia sato ele, nde kotshika mbidja welo lo nkanyiya ɔnɛ awui w’amɛna wakandasalɛ Jehowa akakoke. Pɔɔlɔ akasale awui efula l’esambishelo kaanga mbele nde akadjama lo lokanu, akakɔmama, akokama ave, masuwa wakambɔ, akahombe mbo ya ndɛ ndo ahɔndɔ. (2 Kɔr. 11:23-27) Koko, kaanga mbakandasale awui efula ntondo ndo mbakandadiɛnɛ l’asui, Pɔɔlɔ akeyaka dia nde akahombe ntetemala kambɛ Jehowa. Sho lawɔ pombaka nsala woho akɔ waamɛ.

6. Naa “akambo waka[t]atshike l’ɔkɔngɔ” amɔtshi wahombaso mbohɛ?

⁶ Ngande wakokaso mbokoya ɛnyɛlɔ ka Pɔɔlɔ lo “mbohɛ akambo waka[t]atshike l’ɔkɔngɔ”? Ondo anto amɔtshi l’atei aso wekɔ lo ndjaɛndja onongo l’ɔtɛ wa pɛkato yakawasale lo nshi yakete. Naka ngasɔ, shi ayonga dimɛna ntatɛ wekelo w’onto ndamɛ waka epole ɔsɛkɛ l’oshinga w’etshungwelo wa Kristo? Naka sho mbeka, nkana yimba ndo nɔmba dia dikambo diakeketsha sɔ, kete hatotoyaɛndja onongo tshanana l’ɔtɛ w’awui akɔ. Sho kokaka ntshika ndjasha dilanya l’ɔtɛ wa pɛkato yakatodimanyiya Jehowa. Tɔsɛdingole wetshelo okina wakokaso nkondja oma le Pɔɔlɔ. Ondo anto amɔtshi wakatshike elimu wakawaafutaka falanga efula dia mbesa wahɔ wa Diolelo. Naka ngasɔ, onde hatokoke mbohɛ diangɔ diakatatshike l’ɔkɔngɔ lo ntona dia kombolaka diangɔ diototokondja sɔ? (Wal. 11:4-6; Ond. 7:10) “Akambo waka[t]atshike l’ɔkɔngɔ” mbeyaka mendana l’awui wakatasale kana ehemba wakatakikɛ lo nshi yakete. Lo mɛtɛ, mbohɔ woho wakatɔtshɔkɔla ndo wakatosukɛ Jehowa l’edja k’ɛnɔnyi, koka ndeka tosukanya la Shɛso. Koko, tatɔfɔnyake pondjo ɔnɛ kɛnɛ kakatasalɛ Jehowa ambokoka.​—1 Kɔr. 15:58.

7. Lo ndjela 1 Kɔrɛtɔ 9:24-27, ahombaso nsala dia nkondja difuto lo lowango l’otsha lo lɔsɛnɔ? Sha ɛnyɛlɔ.

 ⁷ Pɔɔlɔ akashihodia dimɛna ɛtɛkɛta wa Yeso w’ɔnɛ: “Nyodje welo w’efula.” (Luka 13:23, 24) Pɔɔlɔ akeyaka ɔnɛ l’ɛnyɛlɔ ka Kristo, nde akahombe mbidja welo efula polo l’ekomelo. Diakɔ diele, nde akɛdika lɔsɛnɔ laso l’Okristo la lowango l’andawi wa lo tɔkɛnyɔ. (Adia 1 Kɔrɛtɔ 9:24-27.) Ondawi wa lo tɔkɛnyɔ ta lowango mbidjaka yimba dia nkoma l’oshidi w’ekomelo ndo mbewɔka awui wekola yimba. Ɛnyɛlɔ, nshi nyɛ andawi watalawɔ l’osomba mbeyaka ndawɔ lo mboka kele la makashinyi l’emamu ndo diangɔ dikina diakoka mbekola timba tawɔ. Afɔnyayɛ, onde ondawi ɔmɔtshi koka memala dia menda oma l’adidishi diangɔ diohanewɔ lo makashinyi? Nde hosala ngasɔ naka nde nangaka nkotsha oyango! Lo lowango laso l’otsha lo lɔsɛnɔ, sho lawɔ pombaka mbewɔ awui wekola yimba. Naka sho ntetemala mbidja yimba l’oyango aso, mbidja welo efula oko wakasale Pɔɔlɔ, kete tayokondja difuto!

8. Naa ekakatanu esato wayangaso nsɛdingola?

⁸ Nyɛsɔ tɔsɛdingole kakianɛ ekakatanu esato wakoka tɔkɔmɔla. Ekakatanu akɔ vɔ ɛnɛ: 1) Naka awui walongamɛso wambotshimbatshimba, 2) naka wolo wa lo demba wambokitakita, ndo 3) naka tekɔ lo diɛnɛ l’ekakatanu wahakomɛ. Sho koka nkondja wahɔ lo mbeka woho wakatondoya anto akina ekakatanu ɛsɔ.​—Flpɛ. 3:17.

9. Shɛngiya yakɔna yakoka monga naka awui walongamɛso wambotshimbatshimba?

⁹ Naka awui walongamɛso wambotshimbatshimba. Tekɔ lo nongamɛ awui w’amɛna watolaka Jehowa. Etena kakate Habakuka omvutshi wa Jehowa dia nde nangaka dia Jehowa minya awui wa kɔlɔ lo Juda, Jehowa akawotɛ dia “tetemala [k]ongɛɛ.” (Hab. 2:3) Koko, etena kɛnama oko awui walongamɛso wambotshimbatshimba, ondo ohetoheto aso koka nkitakita. Sho koka kaanga nkɔmɔ. (Tok. 13:12) Kɛsɔ mbakasalema l’etatelo ka ntambe ka 20. L’etena kɛsɔ, Akristo efula w’akitami wakalongamɛka  dia nongola difuto diawɔ dia l’olongo lo 1914. Etena kaki dui sɔ kokotshama, kakɔna kakasale Akristo waki la kɔlamelo lam’ele awui wakawalongamɛka wakatshimbatshimba?

10. Ngande wakasale wadi l’omi amɔtshi akambo etena kakatshimbatshimba awui wakawalongamɛka?

¹⁰ Tɔsɛdingole ɛnyɛlɔ k’Akristo ahende wa kɔlamelo wakahomana l’okakatanu wa ngasɔ. Ɔnangɛso Royal Spatz akabatizama lo 1908 etena kakinde l’ɛnɔnyi 20. Nde aki l’eshikikelo dia ndooko edja nde ayolongola difuto diande. Diakɔ diele, lo 1911 etena kakandasawola la kadiyɛso Pearl dia mbotshuka, nde akawotɛ ate: “Wɛ mbeyaka kɛnɛ kayosalema lo 1914. Naka tayotshukana, kete tosale dui sɔ esadi!” Onde wadi l’omi w’Akristo asɔ wakatshike ndawɔ lowango lawɔ la nkondja lɔsɛnɔ etena kakiwɔ konongola difuto diawɔ dia l’olongo lo 1914? Ndooko, nɛ dia vɔ wakayashaka ntondo dia nsala lolango la Nzambi la kɔlamelo tshɛ, aha l’ɔtɛ wa nkondja difuto. Vɔ wakayashikikɛ dia ndawɔ lowango l’ekikelo. Lo mɛtɛ, Royal la Pearl wakatetemala monga l’ohetoheto ndo la kɔlamelo polo lam’akawashidiya lowango lawɔ la la nkɛtɛ ɛnɔnyi akumi efula l’ɔkɔngɔ. Aha la taamu, wɛ ekɔ lo nongamɛ etena kayokidia Jehowa lokombo ndo lowandji lande ndo nkotsha alaka ande tshɛ. Onga l’eshikikelo di’awui asɔ wayokotshama l’etena kakakongɛ Jehowa. Polo l’etena kɛsɔ, nyɛsɔ totetemale monga l’akambo efula wa nsala lo kambɛka Nzambi kaso, ndo tatetawɔke pondjo nkɔmɔ kana ntɛwɔ naka awui walongamɛso watakotshama.

11-12. Lande na kahombaso ntetemala oyadi wolo aso wa demba wambokitakita? Sha ɛnyɛlɔ.

¹¹ Naka wolo wa lo demba wambokitakita. Otshikitanyi la ondawi wa mɛtɛ mɛtɛ, wɛ bu l’ohomba wa monga la wolo efula wa lo demba dia ntetemala mpama lo nyuma. Anto efula waya bu la wolo efula wa lo demba wekɔ lo ntetemala ndjashikikɛ dia tahamaka lo nyuma. (2 Kɔr. 4:16) Ɛnyɛlɔ, ɔnangɛso Arthur Secord * aki l’ɛnɔnyi 88 ndo wolo wa demba wakakitakita l’ɔkɔngɔ wa nde nkamba ɛnɔnyi 55 lo Bɛtɛlɛ. Onganga ɔmɔtshi akasukana la mbeto kande dia mbosakɛ. Nde akawende ndo la ngandji tshɛ nde akate ate: “Ɔnangɛso Secord, wɛ akakambɛ Jehowa olimu efula.” Koko Arthur, kombidjaka yimba l’awui wakandasale lo nshi yakete. Nde akawende, akamɔnamɔna ndo akookadimola ate: “Eelo, ɔsɔ ekɔ dui dia mɛtɛ. Koko aha kɛnɛ kakatasale mbele ohomba. Kɛnɛ kasalaso ntatɛ oma lanɛ mbele ohomba.”

¹² Ondo wɛ ambokambɛ Jehowa l’edja k’ɛnɔnyi efula ndo l’etena kɛnɛ wɛ ɛna dia l’ɔtɛ wa demba diayɛ diaya bu la wolo  wɛ hayokoka nsala awui efula oko wakayasalaka. Naka ngasɔ, kete toshishake elongamelo. Onga l’eshikikelo dia Jehowa mbohɔka olimu wa la kɔlamelo wakayokambɛ lo nshi yakete. (Hɛb. 6:10) Ndo l’etena kɛnɛ, ohɔ di’omamemelo wa la tshondo le Nzambi hɛdikama la akambo efula wasalaso l’olimu wa Jehowa. Koko, sho mɛnyaka omamemelo aso w’efula lo mɛna akambo la sso di’ɔlɔlɔ ndo lo nsala kɛnɛ tshɛ kakokaso nsala lo ndjela yoonge yaso. (Kɔl. 3:23) Jehowa shihodiaka elelo aso ndo nde hatɔlɔmbɛ kɛnɛ kahatakoke nsala.​—Makɔ 12:43, 44.

13. Ngande watokeketsha kɛnɛ kakakomɛ Anatoly la Lidiya dia ntetemala kambɛ Jehowa oyadi tekɔ l’ehemba efula?

¹³ Naka tekɔ lo diɛnɛ l’ekakatanu wahakomɛ. Ekambi wa Jehowa ɛmɔtshi wambokikɛ ekakatanu ndo ɛhɛnyɔhɛnyɔ l’edja k’ɛnɔnyi akumi. Ɛnyɛlɔ, Anatoly Melnik * aki l’ɛnɔnyi 12 etena kakawande she, kakawawodje lo lokanu ndo kakawootome lo lɔhɔmbɔ la Sibérie mangana la nkumbo kande ka la Moldavie kilɔmɛtrɛ ndekana 7 000. Ɔnɔnyi ɔtɔi l’ɔkɔngɔ, Anatoly, nyango ndo watshɛnde wakatɔlama vɔ lawɔ lo lɔhɔmbɔ la Sibérie. L’etena kɛsɔ, vɔ waki l’akoka wa mbɔtɔ nsanganya lo ngielongelo kina, koko wakahombaka nkɛndakɛnda kilɔmɛtrɛ 30 lo loonge ndo lo tshitshi k’efula. L’ɔkɔngɔ diko, ɔnangɛso Melnik akasale ɛnɔnyi esato lo lokanu mangana la wadɛnde Lidiya ndo ɔnawɔ la womoto laki l’ɔnɔnyi ɔtɔi. Kaanga mbakawahɛnyahɛnyama ɛnɔnyi efula, Anatoly la nkumbo kande wakatetemala kambɛ Jehowa la kɔlamelo. L’etena kɛnɛ, Anatoly ekɔ l’ɛnɔnyi 82 ndo ekɔ lo nkamba lo kɔmite ka filialɛ ka l’Asie centrale. L’ɛnyɛlɔ ka Anatoly nde la Lidiya, nyɛsɔ tosale tshɛ kakokaso nsala l’olimu wa Jehowa, totetemale mbikikɛ oko wakatasalaka lo nshi yakete.​—Ngal. 6:9.

14. Kakɔna kakashihodia Pɔɔlɔ kakandahombe nsala dia nkotsha oyango ande?

¹⁴ Pɔɔlɔ aki l’eshikikelo ɔnɛ nde ayotetemala ndawɔ polo l’ekomelo ndo ayokotsha oyango ande. Oko wakinde Okristo w’okitami, nde aki l’elongamelo ka nkondja “difuto dia leeta la Nzambi.” Koko, dia nkotsha oyango ɔsɔ, nde akashihodia dia aki ohomba nde ‘ntetemala la lɔkɛndɔ lande.’ (Flpɛ. 3:14) Pɔɔlɔ akakambe la wɛdikelo wa dimɛna efula dia nkimanyiya ase Filipɛ dia vɔ ntetemala mbidja yimba l’oyango awɔ.

15. Ngande wakakambe Pɔɔlɔ la tshɛkɛta ose dia nkeketsha Akristo wa la Filipɛ dia ‘ntetemala la lɔkɛndɔ lawɔ’?

 ¹⁵ Pɔɔlɔ akohola ase Filipɛ dia vɔ waki anto wayotɔsɛna l’olongo. (Flpɛ. 3:20) Lande na kakawahombe mbohɔka dui sɔ? Lo nshi shɔ, monga ose Rɔmɔ aki la wahɔ efula. * Koko, Akristo w’akitami wakahombe tɔsɛna lo lowandji lakaleke tshɛ dimɛna ndo dui sɔ diakahombe mbakondjɛ wahɔ wakaleke tshɛ. Monga ose Rɔmɔ komonga la nɛmɔ di’efula oko diaki la wanɛ wayotɔsɛna l’olongo! Diakɔ diele, Pɔɔlɔ akakeketsha ase Filipɛ ate: “Nyonge la dionga diɔtɔnɛ la lokumu l’ɔlɔlɔ lendana la Kristo.” (Flpɛ. 1:27) Ɛlɔ kɛnɛ, Akristo w’akitami mbishaka ɛnyɛlɔ ka dimɛna lo kɛnɛ kendana la mbesa oyango awɔ wa lɔsɛnɔ la pondjo l’olongo.

16. Oyadi tekɔ l’elongamelo ka tɔsɛna l’olongo kana la nkɛtɛ, kakɔna kahombaso ntetemala nsala lo ndjela Filipɛ 4:6, 7?

¹⁶ Oyadi tekɔ l’elongamelo ka lɔsɛnɔ la pondjo l’olongo kana lo paradiso ka la nkɛtɛ, sho pombaka ntetemala la lɔkɛndɔ dia nkotsha oyango ɔsɔ. Oyadi awui akɔna wele la so, hatohombe mbohɔ awui wakatatshike l’ɔkɔngɔ ndo hatohombe mbetawɔ kaanga dui ɔtɔi toshimba dia kambɛ Jehowa. (Flpɛ. 3:16) Awui walongamɛso koka mɛnama oko wambotshimbatshimba, kana wolo aso wa demba koka nkitakita. Ondo tekɔ lo mbikikɛ ekakatanu ndo ɛhɛnyɔhɛnyɔ l’edja k’ɛnɔnyi efula. Oyadi okakatanu akɔna wele la yɛ “[t]oyakiyanyake.” Koko, tɛ Nzambi ehomba ayɛ lo dɔmbɛlɔ la ɛsɛngɔsɛngɔ ko nde ayokosha wɔladi woleki kɛnɛ kakokayɛ nkanyiya.​—Adia Filipɛ 4:6, 7.

17. Kakɔna kayotɔsɛdingola lo sawo diayela?

¹⁷ L’ɛnyɛlɔ ka ondawi wa lowango wadja welo etena katandalawɔ dia nkoma l’oshidi w’ekomelo, nyɛsɔ totetemale mbidja yimba l’oyango aso wa ndawɔ polo l’ekomelo dia nkondja lɔsɛnɔ la pondjo. Lo yɛdikɔ yɛdimi la wolo aso ndo lo ndjela akoka aso, nyɛsɔ toyasha tshɛ ndo totetemale nomɔlomɔ dia mɛna awui wa diambo watokongɛ la ntondo. Ahombaso nsala dia ntetemala ndawɔ lo yoho ya dimɛna ndo aha nkitshakitsha ohetoheto aso? Sawo diayela diayotokimanyiya dia mbeya awui wahombaso mbetsha lo dihole dia ntondo ndo “nshikikɛ akambo woleki ohomba.”​—Flpɛ. 1:9, 10.