1. Kakɔna kakombolaso sho tshɛ lo dikambo di’ewotɔ aso?

KADIYƐSO Pauline * mbutaka ate: “Oma ko etena kakameke akambo wa mɛtɛ, lakakombola di’ose nkumbo kami tshɛ ndjonga la mi lo Paradiso. Lakakombola lo yoho ya laande dia omɛmi Wayne la anaso kambɛ Jehowa kaamɛ la mi.” Onde wɛ ekɔ l’ewotɔ wahateye ndo wahatalange Jehowa? Ondo wɛ ekɔ lo ndjaoka woho wakayaoke Pauline lo dikambo di’ase nkumbo kande.

2. Ambola akɔna wayotɔsɛdingola lo sawo nɛ?

² Hatokoke ntshutshuya ewotɔ aso dia mbetawɔ lokumu l’ɔlɔlɔ, koko sho koka mbakeketsha dia nkana yimba ndo mbetawɔ losango la lo Bible. (2 Tim. 3:14, 15) Lande na kahombaso nsambisha ewotɔ aso? Lande na kahombaso mbaoka kɛtshi? Kakɔna kakokaso nsala dia nkimanyiya ewotɔ aso dia vɔ nanga Jehowa oko sho? Ndo ngande wakoka ase etshumanelo kaso tshɛ tokimanyiya?

3. Lo ndjela 2 Petero 3:9, lande na kahombaso nsambisha ewotɔ aso?

³ Kem’edja nto, Jehowa ayanga nkomiya dikongɛ nɛ. Paka wanɛ wele “suke dia mbetawɔ akambo wa mɛtɛ wakonya lo lɔsɛnɔ la pondjo” mbayoshimbamɛ. (Ets. 13:48) Tekɔ lo mbetsha wenya ndo wolo efula dia nsambisha anto akina, diakɔ diele ekɔ dimɛna dia sho nanga di’ewotɔ aso kambɛ Jehowa kaamɛ la so. Jehowa Shɛso ka ngandji, “halange kaanga onto 1 ndanyema, koko nde nangaka dia anto tshɛ nkondja diaaso dia ndjatshumoya.”​—Adia 2 Petero 3:9.

4. Munga kakɔna kakokaso nsala etena kasambishaso ewotɔ aso?

⁴ Sho pombaka mbohɔka ɔnɛ ekɔ yoho ya dimɛna ndo ya kɔlɔ ya mbewoya losango la panda. Kaanga mbakokaso monga  l’ɔkɔmi etena kasambishaso anto akina, koka monga ko le ewotɔ aso sho ndekaka mbuta akambo hwe hwe etena kaasambishaso.

5. Ahombaso mbohɔka ntondo ka nsambisha ewotɔ aso?

⁵ Efula ka l’atei aso koka mbohɔ la lonyangu tshɛ etena kakawasambisha ewotɔ awɔ mbala ka ntondo ndo vɔ koka nkombola dia ntshikitanya yoho yakakambe la wɔ. Ɔpɔstɔlɔ Pɔɔlɔ akalake Akristo ate: “Nyotondjake nshi tshɛ ɛtɛkɛta w’amɛna, wɔsɔhanyemi la lɛɛhɔ dia nyu mbeya woho wahombanyu nkadimola onto tshɛ.” (Kɔl. 4:5, 6) Ekɔ ohomba mbohɔka dako sɔ etena kasambishaso ewotɔ aso. Naka hatosadi ngasɔ, kete sho koka ndjaanyangiya lo dihole dia mbakimanyiya dia vɔ tohokamɛ.

6-7. Sha ɛnyɛlɔ kɛnya ohomba wa ndjadja lo dihole di’olonganyi wele bu ombetawudi.

⁶ Toyadje lo dihole di’anto akina. Pauline, lakatatɛkɛtshi oma l’etatelo mbutaka ate: “Oma l’etatelo, lakalangaka nsawola l’omɛmi paka akambo wa lo nyuma ato. Sho kosawolaka akambo wendana la ‘lɔsɛnɔ laso la lushi la lushi.’” Koko Wayne, omi aki Pauline kombeyaka akambo efula wendana la Bible ndo nde koshihodiaka kɛnɛ kakawotɛka Pauline. Nde akɔsaka oko kɛnɛ tshɛ kakawotɛka Pauline akendanaka la ɔtɛmwɛlɔ ande. Nde akayakiyanya ɔnɛ Pauline ambɔtɔ lo yaato mɔtshi y’ɔtɛmwɛlɔ ya waale ndo ambokesama.

⁷ Pauline mbutaka dia l’etena kɛmɔtshi nde aketshaka etena k’efula l’akɔlɔ ndo lo wikɛndɛ kaamɛ l’anango l’akadiyɛnde wa lo nyuma lo nsanganya, l’esambishelo ndo l’ɔkɔkwɛlɔ wa demba. Pauline mbutaka ate: “Lo tena dimɔtshi, Wayne akakomaka la ngelo aha la ntana ndooko onto  ndo nde akayaokaka opoko.” Mbokɛmaka dia Wayne akalangaka dia wadɛnde l’ɔnande monga kaamɛ la nde. Nde kombeyaka anto waki kaamɛ la wɔ, ndo akɛnamaka dia angɛnyi w’eyoyo waki wadɛnde wakayooleka ohomba. L’ɔtɛ wa dikambo sɔ, Wayne akayoyanga dia ndjaka diwala la Pauline. Onde wɛ koka mɛna toho tɔmɔtshi takakoke Pauline ndeka ndjadja lo dihole di’omɛnde?

8. Lo ndjela 1 Petero 3:1, 2, kakɔna ondo kakoka monga la shɛngiya y’efula le ewotɔ aso?

⁸ Dionga diayɛ diakɔtɛkɛtɛ. Mbala efula, kɛnɛ kasalaso mongaka la shɛngiya y’efula le ewotɔ aso oleki kɛnɛ kataso. (Adia 1 Petero 3:1, 2.) Pauline akayoshihodia dui sɔ l’ɔkɔngɔ. Nde mbutaka ate: “Lakeyaka ɔnɛ Wayne akatolangaka ndo nde konangaka mɛtɛ ndjaka diwala. Koko, woho wakandate dia ndjaka diwala akakonya dia ntatɛ nsala akambo lo yoho yalanga Jehowa. Lo dihole dia tɛkɛtaka efula, lakahombe mbisha ɛnyɛlɔ ka dimɛna oma lo lɔkɛwɔ lami.” Pauline akayotshika ntshutshuya Wayne dia nsawola awui wendana la Bible, ndo nde akatatɛ nsawola la nde awui wendana la lɔsɛnɔ la lushi la lushi. Wayne akayɛna dia nde aya onto ladja wɔladi, ndo nde akayɛna di’ɔnawɔ akayoleka monga la lɔkɛwɔ la dimɛna. (Tok. 31:18, 27, 28) Etena kakɛnyi Wayne shɛngiya ya dimɛna yakonge la losango la Bible le nkumbo kande, nde akatatɛ nkana yimba ndo aketawɔ losango la l’Ɔtɛkɛta wa Nzambi.​—1 Kɔr. 7:12-14, 16.

9. Lande na kahombaso monga l’etete?

⁹ Tetemala nsala la wolo dia nkimanyiya ewotɔ ayɛ. Jehowa toshaka ɛnyɛlɔ lo dikambo sɔ. “Mbala la mbala,” nde mbishaka anto diaaso dia mbetawɔ lokumu l’ɔlɔlɔ  dia ndjokondja lɔsɛnɔ. (Jɛr. 44:4) Ndo ɔpɔstɔlɔ Pɔɔlɔ akatɛ Timɔte dia ntetemala nkimanyiya anto akina. Lande na? Nɛ dia lo nsala ngasɔ, nde akahombe ndjashimbɛ ndo nshimbɛ anto wakoohokamɛka. (1 Tim. 4:16) Sho nangaka ewotɔ aso, diakɔ diele sho nangaka dia vɔ mbeya akambo wa mɛtɛ wele l’Ɔtɛkɛta wa Nzambi. Ɛtɛkɛta wa Pauline ndo etsha ande wakayonga la shɛngiya ya dimɛna le nkumbo kande. Nshi nyɛ nde ekɔ l’ɔngɛnɔngɛnɔ dia kambɛ Jehowa kaamɛ la omɛnde. Vɔ akɔ ahende wekɔ ambatshi mboka ndo Wayne ekɔ ekumanyi.

10. Lande na kahombaso monga la solo dia lotutsha?

¹⁰ Onga la solo dia lotutsha. Etena katatɛso nsɛna lo yoho yɔtɔnɛ l’atɔndɔ wa Nzambi, ewotɔ aso koka monga l’okakatanu dia ndjaekesanyiya la dietawɔ diaso di’oyoyo ndo la yoho yaso ya lɔsɛnɔ. Mbala efula, dui dia ntondo diatatɛwɔ mɛna ele hatoyosala la wɔ fɛtɛ yawɔ ya l’ɛtɛmwɛlɔ ndo hatoyoyatambiya l’awui wa pɔlitikɛ. Oma l’etatelo, ewotɔ aso ɛmɔtshi koka tooka nkɛlɛ. (Mat. 10:35, 36) Koko tatohekɔke. Naka sho ntshika mbakimanyiya dia vɔ nshihodia awui wendana la dietawɔ diaso, kete ekɔ oko tekɔ lo mbalombosha lo mɛnya ɔnɛ vɔ hawosungana ndjokondja lɔsɛnɔ la pondjo. Jehowa kotosha ɔkɛndɛ wa nombosha, koko Yeso mbakandasha ɔkɛndɛ ɔsɔ. (Jni. 5:22) Naka sho monga la solo dia lotutsha, kete ewotɔ aso koka ndjetawɔ mpokamɛ losango laso.​—Enda kiombo yele l’ɔtɛ a dui ɔnɛ: “ Kamba la sitɛ kaso k’Ɛtɛrnɛtɛ dia mbetsha.”

11-13. Wetshelo akɔna wakondjayɛ oma lo woho wakasalɛ Alice ambutshi ande akambo?

¹¹ Onga l’ɔkɔmi, koko tetawɔke di’ewotɔ ayɛ ntshikitanya tɛdikɔ tayɛ. (Tok. 15:2) Tɔsɛdingole ɛnyɛlɔ ka Alice. Nde akeke awui wendana la Jehowa etena kakandangana etale l’ambutshi ande wakayashaka l’awui wa pɔlitikɛ ndo waki kombetawɔka ɔnɛ Nzambi ekɔ. Nde akashihodia ɔnɛ, nde pombaka mbatɛ esadi eto awui w’amɛna wakandekaka. Alice mbutaka ate: “Naka wɛ ntshimbatshimba dia mbatɛ etshikitanu wamboyosala wendana la dietawɔ ndo l’etsha ayɛ, kete dui sɔ diayosha ase nkumbo kayɛ lonyangu l’efula.” Nde akafundɛ ambutshi ande mikanda, lo mambola kanyi yawɔ lo kɛnɛ kendana la wetshelo wa lo Bible wendana l’akambo amɔtshi wakandafɔnyaka dia wayowangɛnyangɛnya, ɛnyɛlɔ ngandji. (1 Kɔr. 13:1-13) Nde akasha ambutshi ande losaka l’ɔtɛ wakawawodia, wakawokokɛ, ndo nde akaatomɛ weshasha. Tena diakandatshɔka dia tembola ambutshi ande, nde akasalaka kɛnɛ tshɛ kakandakoke nsala dia nkimanyiya nyango la elimu wa la ngelo. Oma l’etatelo, ambutshi ande kɔngɛnangɛna etena kakawatɛ Alice awui wendana la dietawɔ diande di’oyoyo.

¹² Etena kaki Alice la ambutshi ande la ngelo, nde akatetemala nɛmiya ekongelo kande ka wadielo wa Bible. Alice mbutaka ate: “Dui sɔ diakakimanyiya mama dia nshihodia woho wakamɔsaka Bible la nɛmɔ.” L’etena kɛsɔ, she Alice akɔshi yɛdikɔ ya mbeya dui dimɔtshi diendana la Bible dia nde nshihodia lande na kakatshikitanya ɔnande dietawɔ diande ndo nde akalangaka ntana ɔkɔkɔ ɔmɔtshi wa mɔnyɔla Bible. Alice mbutaka ate: “Lakawosha Bible, ndo lakofundɛ awui amɔtshi lɔkɔ.” Etombelo akɔna waki la dui sɔ? Lo dihole dia nde ntana ɔkɔkɔ ɔmɔtshi wa kiɔnyɔla, she Alice akanandema efula la kɛnɛ kakandadia oma l’Ɔtɛkɛta wa Nzambi.

¹³ Sho pombaka monga l’ɔkɔmi, koko tatetawɔke di’ewotɔ aso ntshikitanya tɛdikɔ taso, oyadi sho pombaka diɛnɛ l’ehemba. (1 Kɔr. 4:12b) Ɛnyɛlɔ, Alice akahombe diɛnɛ l’ɔlɔshamelo w’oma le nyango. “Etena  kakamabatizama, mama akambelɛ ɔnɛ ‘ɔna la kɔlɔ.’” Kakɔna kakasale Alice? “Lo dihole dia mbewewɔ nsawola la wɔ awui wendana l’ɔtɛmwɛlɔ, la dilɛmiɛlɔ tshɛ, lakaalembetshiya ɔnɛ lakɔshi yɛdikɔ ya monga Ɔmɛnyi wa Jehowa ndo hatoyitshikitanya. Lakasale la wolo dia nshikikɛ mama ɔnɛ dimi mbolangaka mɛtɛ. Dimi la nde takalele, ndo lakokatɛ yangɔ ya dimɛna. Oma ko etena kɛsɔ, mama akatatɛ mbetawɔ dia Bible kakatambetɛka onto ɔlɔlɔ.”

14. Lande na kahatahombe mbetawɔ pondjo dia ewotɔ aso ntshikitanya yɛdikɔ yaso ya kambɛ Jehowa?

¹⁴ Koka mbɔsa etena k’otale dia ewotɔ aso ndjoshihodia tshɛ lo tshɛ ohomba wele l’olimu wa Jehowa le so. Ɛnyɛlɔ, etena kakɔshi Alice yɛdikɔ ya monga ombatshi mboka lo dihole dia nkamba olimu wakɔsɔnɛ ambutshi ande, nyango akalele nto. Koko Alice kotshikitanya yɛdikɔ yande. Nde mbutaka ate: “Naka wɛ mbetawɔ sɛngiyama lo dikambo dimɔtshi, kete ondo ase nkumbo kayɛ wayokɔsɛngiya lo akambo akina. Koko, naka wɛ monga la ɔkɔmi ndo aha mbetawɔ di’ase nkumbo kayɛ ntshikitanya yɛdikɔ yayɛ, kete ondo amɔtshi l’atei awɔ wayokohokamɛ.” Kɛsɔ mbakasalema lo dikambo dia Alice. Ambutshi ande akɔ ahende waya ambatshi mboka ndo she ekɔ ekumanyi.

15. Lo ndjela Mateo 5:14-16 ndo 1 Petero 2:12, ngande wakoka “etsha . . . w’ɛlɔlɔ” w’anto akina nkimanyiya ewotɔ aso?

¹⁵ Jehowa kotolaka anto oya le nde diɛsɛ la “etsha . . . w’ɛlɔlɔ” w’Akristo wa l’etshumanelo. (Adia Mateo 5:14-16; 1 Petero 2:12.) Naka olonganyi ayɛ bu Ɔmɛnyi  wa Jehowa, onde nde nangaka nsawola l’ase etshumanelo kayɛ? Pauline, lakatatɛkɛtshi oma l’etatelo, akelɛ anangɛso l’akadiyɛso lakande dia omɛnde Wayne, mbaeya. Wayne mbohɔka woho wakokimanyiya ɔnangɛso ɔmɔtshi dia mbeya ele Ɛmɛnyi wa Jehowa mɛtɛ lo mbuta ate: “Nde akɔshi vakashi lushi lɔmɔtshi oma l’olimu paka dia nde ndjenda ponde kaamɛ la mi. Ndo laketawɔ ɔnɛ, ‘aha paka l’awui wa l’ɔtɛmwɛlɔ ande ato mbayashande!’”

16. Lande na kahombaso mbelɛka ewotɔ aso oya lo nsanganya?

¹⁶ Yoho mɔtshi yoleki dimɛna yakokaso nkimanyiya ewotɔ aso ele, mbaelɛ dia ndjɔtɔ lo nsanganya ya l’etshumanelo kaamɛ la so. (1 Kɔr. 14:24, 25) Losanganya la ntondo lakɔtɔ Wayne aki Eohwelo, nɛ dia lɔ salemaka l’ɔkɔngɔ w’anto minyɔ oma l’elimu ndo lɔ haloviya. Nde mbutaka ate: “Dimi koshihodia kɛnɛ kakatama lo sawo, koko kɛnɛ kakamambiya aki anto wa lɛkɔ. Vɔ wakaye le mi, wakanongola ndo wakambisha mɔyɔ wa keka. Dimi koka mbuta dia vɔ waki anto w’ɛlɔlɔ.” Wadi l’omi amɔtshi waki anto w’ɛlɔlɔ lo yoho ya laande le Pauline. Vɔ wakookimanyiya nde l’ɔnande lo nsanganya ndo l’esambishelo. Diakɔ diele, etena kakayɔsa Wayne yɛdikɔ ya mbeya awui efula wendana la dietawɔ di’oyoyo dia Pauline, nde akalɔmbɛ omi aki kadiyɛso kɛsɔ dia mbeetsha Bible.

17. Lo dui diakɔna diahatahombe ndjaɛndja onongo, ko lande na kahatahombe pondjo mpekɔ ewotɔ aso?

¹⁷ Tekɔ l’elongamelo di’ewotɔ aso tshɛ wayokambɛ Jehowa kaamɛ la so. Koko, oyadi welo akɔna wayotodja dia nkimanyiya ewotɔ aso dia monga ekambi wa Nzambi, mbeyaka monga ko vɔ hawoteka akambo wa mɛtɛ. L’etena kɛsɔ, tatoyaɛndjake onongo l’ɔtɛ wa dui sɔ. Kɛnɛ kele mɛtɛ ele, hatokoke ntshutshuya ndooko onto dia mbetawɔ dietawɔ diaso. Kaanga mbediɔ ngasɔ, tɔnyɔlake shɛngiya yakokayɛ monga la yɔ le ewotɔ ayɛ etena kakɛnawɔ akambɛ Jehowa l’ɔngɛnɔngɛnɔ. Lɔmba lo dikambo diawɔ. Sawolaka la wɔ l’ɔkɔmi tshɛ. Tohekɔke nsala la wolo dia mbakimanyiya! (Ets. 20:20) Onga l’eshikikelo ɔnɛ Jehowa ayɔtshɔkɔla welo ayɛ. Ndo naka ewotɔ ayɛ wambetawɔ kohokamɛ, kete vɔ wayoyoshimbamɛ!