1-2. Lo ndjela Osambo 34:8, akokaso nsala dia sho mbeya dia Jehowa ekɔ ɔlɔlɔ?

OHƆSA dia wambokosha ɛngɔ kɛmɔtshi ka ndɛ kahayatalɛka ndooko lushi. Wɛ koka mbeya woho wele ɛngɔ kakɔ lo kienda, nonga nsolo, nyanga dia mbeya woho wakikatɛwɔ kana mimbola anto akina dia kana vɔ kilangaka. Koko, yoho yaamɛ yakokayɛ mbeya l’eshikikelo tshɛ dia kana wɛ kilangaka ele lo kilɛta wɛmɛ.

² Sho koka mbeya awui wendana l’ɔlɔlɔ wa Jehowa lo mbadia Bible ndo ekanda aso ndo lo mpokamɛ kɛnɛ kata anto akina lo dikambo di’ɛtshɔkɔ wakawakondja oma le Jehowa. Koko tayoshihodia dimɛna ɔnɛ Jehowa ekɔ ɔlɔlɔ naka sho ‘ndɛta’ ɔlɔlɔ ande shoamɛ. (Adia Osambo 34:8.) Nyɛsɔ tende ɛnyɛlɔ kɛmɔtshi kɛnya woho wakokaso nsala dui sɔ. Tɔshi dia tekɔ lo nanga nkamba woho ɔmɔtshi w’olimu wa lo tena tshɛ, koko dia sho nkotsha oyango ɔsɔ, ayonga ohomba dia sho mbetɛ nsɛnɔ yaso ɔsɛlɛngɛ. Ondo tambadiaka mbala la mbala daka dia Yeso di’ɔnɛ naka sho mbetsha wahɔ wa Diolelo lo dihole dia ntondo, kete Jehowa ayotokotshɛ ehomba mɛtɛ wele la so, koko shoamɛ tatɛnaka okotshamelo wa daka sɔ. (Mat. 6:33) Lam’ele tekɔ la mbetawɔ lo daka dia Yeso, tambokitshakitsha adepansɛ aso, tambomɔ oma l’olimu wakatakambaka l’oyango wa sho ndeka ndjasha l’olimu w’esambishelo. Etena kambotosala ngasɔ, tamboshihodia shoamɛ dia Jehowa ekɔ lo nkotsha ehomba aso mɛtɛ. ‘Tambɔlɛta’ ɔlɔlɔ wa Jehowa shoamɛ.

3. Lo yoho yɔtɔnɛ la Osambo 16:1, 2, Jehowa ekɔ ɔlɔlɔ le waa na?

³ Jehowa ekɔ “ɔlɔlɔ le anto tshɛ,” kaanga le wanɛ wahaweye. (Os. 145:9; Mat. 5:45) Koko djekoleko wanɛ woka Jehowa ngandji ndo wookambɛ l’anima awɔ tshɛ kondjaka ɛtshɔkɔ efula oma le nde. (Adia Osambo 16:1, 2.) Nyɛsɔ tende toho  tɔmɔtshi takondjaso wahɔ oma l’ɔlɔlɔ wa Jehowa.

4. Ngande wɛnya Jehowa wanɛ watatɛ ndjasukanya la nde ɔlɔlɔ ande?

⁴ Etena tshɛ kakambaso la kɛnɛ kekaso oma le Jehowa, sho mɛnaka shɛngiya ya dimɛna yele la dui sɔ lo lɔsɛnɔ laso. Etena kakateke awui wendana la nde ndo kakatawoke ngandji, nde mbakatokimanyiya dia minya ekanelo ndo mbekelo yakatanganyaka la nde. (Kɔl. 1:21) Ndo etena kakatayakimɔ le Jehowa ndo kakatabatizama, nde akatosha diangɔ efula di’amɛna, ɛnyɛlɔ nkum’otema ka dimɛna ndo diɔtɔnganelo dia ma ma la nde.​—1 Pe. 3:21.

5. Ngande wɛnayɛ ɔlɔlɔ wa Jehowa l’esambishelo?

⁵ Sho tetemalaka mɛna ɔlɔlɔ wa Jehowa etena kasambishaso. Onde wɛ ekɔ ɔsɔnyi? Ekambi wa Jehowa efula wekɔ ngasɔ. Ondo ntondo ka wɛ monga okambi wa Jehowa wɛ kokanyiyaka kaanga yema dia wɛ koka nkɔkɔla lo soko di’onto ɔmɔtshi lahayeye ko ntatɛ mbosambisha losango lahandeye. Koko, ɛlɔ kɛnɛ wɛ osala dui sɔ mbala la mbala. Kɛnɛ koleki ele, l’ekimanyielo ka Jehowa, wɛ ambeka dia ngɛnangɛna olimu w’esambishelo! Wɛ akɛnyi osukɔ wa Jehowa lo toho efula. Nde akakokimanyiya dia monga ki etena kakayahomana l’ɔlɔshamelo. Nde akakokimanyiya nto dia wɛ mbohɔ divɛsa diahombama dia nsambisha ompokami ɔmɔtshi wakɛnya nsaki. Ndo nde akakosha wolo wa ntetemala etena kakayahomana la wendjudi l’ɛtshi kayɛ ka nkɛtɛ.​—Jɛr. 20:7-9.

6. Ngande wele olowanyelo watosha Jehowa wekɔ djembetelo ya ɔlɔlɔ ande?

⁶ Jehowa tɛnyaka nto ɔlɔlɔ ande lo tolowanya dikambo di’esambishelo. (Jni. 6:45) Lo losanganya la l’atei wa lomingu, sho pokamɛka bɛnyɛlɔ di’asawo diakalɔngɔswama dimɛna ndo sho keketshamaka dia nkamba la diɔ l’esambishelo. Oma l’etatelo, sho mbeyaka monga la yema y’okakatanu dia nkamba la dui dimɔtshi di’oyoyo, koko etena kasalaso dui sɔ sho koka mɛna dia dui diakɔ ngɛnyangɛnyaka anto wa l’ɛtshi kaso ka nkɛtɛ. Sho keketshamaka nto lo nsanganya ya l’etshumanelo ndo lo nsanganya ya weke dia nkamba la toho t’esambishelo tele tatakambaka la tɔ. Ndo laasɔ nto, sho koka monga la yema y’okakatanu, koko naka sho pemba nkamba l’awui asɔ, kete Jehowa ayotɔtshɔkɔla. Nyɛsɔ tɔsɛdingole ɛtshɔkɔ ɛmɔtshi wakokaso nkondja naka sho nkamba la toho t’eyoyo dia mbisha Jehowa kɛnɛ koleki ɔlɔlɔ le so, oyadi akambo akɔna wele la so. Oma laasɔ tayɔsɛdingola toho takokaso mpamia olimu aso.

7. Ɛtshɔkɔ akɔna wakokaso nkondja naka sho nsala la wolo dia mpamia olimu aso?

⁷ Sho ndekaka ndjasukanya la Jehowa. Tɔsɛdingole ɛnyɛlɔ k’ekumanyi kɛmɔtshi kelɛwɔ Samuel * kakamba kaamɛ la wadɛnde lo Colombie. Wadi l’omi asɔ wakakambaka oko ambatshi mboka l’etshumanelo ka lo ngelo kawɔ, koko vɔ wakalange mpamia olimu awɔ lo tosha lonya l’etshumanelo kɛmɔtshi kakiwɔ l’ohomba efula w’ekimanyielo. Dia nkotsha oyango ɔsɔ, vɔ wakahombe ndjahondja awui amɔtshi. Samuel mbutaka ate: “Takakambe la Mateo 6:33 ndo takatshike nsomba diangɔ diele bu ohomba. Koko nna diakaleke wolo ntakola ele ntshika luudu laso la woke. Lɔ lakakama woho mɛtɛ wakatalange ndo laasɔ ko tatakondja ndooko dikuta oma lɔkɔ.” Etena kakawonɔ lo etshumanelo k’oyoyo, vɔ waki l’ohomba wa yema ya dikuta tshitshɛ dia sɛnaka otshikitanyi la lɛnɛ akiwɔ ntondo. Samuel mbutaka ate: “Takɛnyi woho wakatɔlɔmbɔla Jehowa ndo woho wakandakadimola alɔmbɛlɔ aso. Takashihodia dia nde tetawɔka ndo tookaka ngandji lo toho takiso tatɛnaka.” Onde wɛ ekɔ l’akoka wa mpamia  olimu ayɛ lo yoho mɔtshi? Naka ngasɔ, kete wɛ koka monga l’eshikikelo dia wɛ ayoleka ndjasukanya la Jehowa ndo nde ayokokotshɛ ehomba ayɛ.​—Os. 18:25.

8. Wetshelo akɔna wakondjayɛ oma lo kɛnɛ kakate Ivan nde la Viktoria?

⁸ Sho kondjaka ɔngɛnɔngɛnɔ l’olimu aso. Tende kɛnɛ kakate Ivan nde la Viktoria, wadi l’omi wakamba oko ambatshi mboka la Kirghizstan. Vɔ waketɛ nsɛnɔ yawɔ ɛsɛlɛngɛ l’oyango wa vɔ ndjakimɔ la lolango l’olimu akɔna tshɛ, mbidja ndo elimu wa wokelo. Ivan mbutaka ate: “Takayashaka tshɛ l’olimu tshɛ wakawatoshaka. Kaanga mbakatalɛmbaka l’ekomelo ka lushi, taki la ki ka lo yimba ndo l’ɔngɛnɔngɛnɔ, teeya dia takakambi la wolo aso l’olimu wa Diolelo. Takakondja nto ɔngɛnɔngɛnɔ efula nɛ dia takakondja angɛnyi efula w’eyoyo ndo takeye akambo efula wahatohɛki.”​—Makɔ 10:29, 30.

9. Kakɔna kasala kadiyɛso kɛmɔtshi kele l’ekakatanu dia mpamia olimu ande, ndo etombelo akɔna wonga la dui sɔ?

⁹ Sho mongaka l’ɔngɛnɔngɛnɔ l’olimu wa Jehowa kaanga etena keso l’ekakatanu. Ɛnyɛlɔ, Mirreh, lele wadi aki odo laya osombe ladjasɛ l’Afrikɛ wa lo owɛstɛ ekɔ dɔkɔtɛlɛ, nde akɔshi pasiɔ ndo akatatɛ nkamba oko ombatshi mboka. Mirreh ekɔ la hemɔ ka wolo efula kawokonya dia monga l’okakatanu dia nkɛndakɛnda ndo nde koka mbetsha paka wonya ɔtɔi wa tango l’esambishelo ka luudu la luudu. Koko nde ekɔ l’akoka wa mbetsha wenya efula l’esambishelo ka lo sɛkɛ. Nde ekɔ la wendelo w’eyoyo ndo ambeki wa Bible efula, amɔtshi l’atei awɔ nde sawolaka la wɔ lo telefɔnɛ. Kakɔna kakatshutshuya Mirreh dia nsambisha efula? Nde mbutaka ate: “Dimi mbokaka Jehowa nde la Kristo Yeso ngandji k’efula. Ndo dimi nɔmbaka Jehowa mbala la mbala dia nde kimanyiyami dia dimi nsala akambo efula wakokami nsala l’olimu ande.”​—Mat. 22:36, 37.

10. Oko wɛnya 1 Petero 5:10, wanɛ wakotsha eyango awɔ kakɔna kakondjawɔ oma le Jehowa?

¹⁰ Sho kondjaka olowanyelo okina oma le Jehowa. Kenny, lele ombatshi mboka wakamba lo disɛnga dia Maurice, akɛnyi mɛtɛ ka dui sɔ. Etena kakandeke akambo wa mɛtɛ, nde akamɔ oma l’inivɛrsite, akabatizama ndo akatatɛ nkamba olimu wa lo tena tshɛ. Nde mbutaka ate: “Dimi salaka la wolo dia nsɛna lo yoho yɔtɔnɛ l’ɛtɛkɛta w’omvutshi Isaya lakate ate: ‘Dimi ɔnɛ, ontome!’” (Isa. 6:8) Kenny akakambe elimu efula wa wokelo ndo nto nde akasha lonya l’okadimwelo w’ekanda walembetshiya Bible l’ɔtɛkɛta ande wa lootɔ. Kenny mbutaka ate: “Lakalongola olowanyelo wakambetsha dia monga l’akoka wakimi l’ohomba dia nkotsha ɛkɛndɛ ami.” Koko nde akeke awui efula aha tsho woho wa nkamba olimu. Nde kotshaka ate: “Lakeke nto awui wakimi komonga l’akoka wa nsala ndo waonga wakimi l’ohomba dia monga okambi wa Jehowa w’oshika.” (Adia 1 Petero 5:10.) Lande na kahayasɛdingola akambo wele la yɛ dia menda kana wɛ koka nongola olowanyelo okina oma le Jehowa?

11. Welo akɔna wakadje akadiyɛso amɔtshi wa la Corée du Sud l’oyango wa ndjasha l’esambishelo, ndo dui sɔ diakonge l’etombelo akɔna? (Enda osato wele lo lohoso.)

¹¹ Kaanga Ɛmɛnyi wa Jehowa wele la diewo kondjaka wahɔ oma l’olowanyelo etena katatɛwɔ nkamba woho ɔmɔtshi w’olimu w’oyoyo. Lo nshi ya hemɔ kambokokanɛ ka COVID-19, dikumanyi dia l’etshumanelo kɛmɔtshi ka la Corée du Sud wakafunde ɔnɛ: “Anto amɔtshi wakafɔnyaka ɔnɛ hawokoke ndjasha l’olimu w’esambishelo l’ɔtɛ wekakatanu wendana la yoonge wosala dui sɔ l’ekimanyielo ka vidɛo kɔferansɛ. Akadiyɛso asato wele l’ɛnɔnyi 80 l’ɛmɔtshi wakeke woho wa nkamba la tshulatshula di’eyoyo ndo wosambisha l’ekimanyielo kadiɔ suke la lushi tshɛ.” (Os. 92:14, 15) Onde wɛ hakoke mpamia olimu ayɛ ndo ndɛta ɔlɔlɔ wa Jehowa lo yɛdikɔ yoleki? Tɔsɛdingole  wanya amɔtshi wakokayɛ ntakola wayokokimanyiya dia nkotsha oyango ɔsɔ.

12. Kakɔna kalaka Jehowa wanɛ wayaɛkɛ le nde?

¹² Eka dia ndjaɛkɛ le Jehowa. Nde tolakaka dia tosha ɛtshɔkɔ naka sho ndjaɛkɛ le nde ndo mbosha kɛnɛ koleki ɔlɔlɔ le so. (Mal. 3:10) Kadiyɛso kɛmɔtshi ka la Colombie kelɛwɔ Fabiola akɛnyi okotshamelo wa daka dia Jehowa sɔ le nde. Nde akalangaka nkamba oko ombatshi mboka wa pondjo yema tshitshɛ l’ɔkɔngɔ wa nde batizama. Koko omɛnde la anande asato wakasɛnaka la difuto diakawofutaka. Diakɔ diele, etena kakandayonga l’akoka wa nɔmba pasiɔ, nde akalɔmbɛ Jehowa l’etete dia mbokimanyiya. Nde mbutaka ate: “Mbala efula mbɔsaka etena k’otale dia vɔ ndjosha onto pasiɔ, koko dimi waketawɔ mbishami pasiɔ ngɔndɔ ɔtɔi keto l’ɔkɔngɔ wa dimi kilɔmba. Aki oko dihindo!” L’ɔkɔngɔ wa ngɔndɔ hiende, nde akalodia dɛmandɛ dia monga ombatshi mboka. Kakianɛ, nde aya l’ɛnɔnyi 70 l’ɛmɔtshi ndo nde ambokamba oko ombatshi mboka l’edja kolekanyi ɛnɔnyi 20. L’edja kɛsɔ, nde ambokimanyiya anto enanɛi dia vɔ batizama. Nde mbutaka ate: “Kaanga mbayaokami lo tena dimɔtshi dia lekɔ wɔdu, Jehowa kimanyiyakami lushi tshɛ dia dimi ntetemala nkamba oko ombatshi mboka.”

13-14. Bɛnyɛlɔ diakɔna diakoka tokimanyiya dia sho ndjaɛkɛ le Jehowa ndo nkotsha eyango aso?

¹³ Kondja wahɔ oma lo bɛnyɛlɔ dia wanɛ wakayaɛkɛ le Jehowa. Bible ndolanɛ la bɛnyɛlɔ di’anto wakayasha tshɛ l’olimu wa Jehowa. Bɛnyɛlɔ efula l’atei adiɔ mɛnyaka di’ekambi  wa Jehowa ɛsɔ wakahombe ntakola nna dia ntondo la ntondo ka vɔ ndjokondja ɛtshɔkɔ wa laande oma le Jehowa. Ɛnyɛlɔ, aki paka l’ɔkɔngɔ wa Abrahama monɛɛ oma lakande, “kaanga mbakinde kombeyaka lɛnɛ akandatatshɔka,” mbakayowɔtshɔkɔla Jehowa. (Hɛb. 11:8) Aki paka l’ɔkɔngɔ wa Jakɔbɔ ndɔshana l’ondjelo mbakandayokondja ɔtshɔkɔ wa laande. (Eta. 32:24-30) Etena kaki wodja w’Isariyɛlɛ suke la mbɔtɔ lo Nkɛtɛ ya Daka, aki paka l’ɔkɔngɔ w’ɛlɔmbɛdi mbidja ekolo lo ɔkɛdi wa Jɔrdana mbakayokoka anto ntehɔ ɔkɛdi akɔ.​—Jash. 3:14-16.

¹⁴ Wɛ koka nkondja wahɔ nto oma lo bɛnyɛlɔ dia nshi nyɛ di’Ɛmɛnyi wa Jehowa wakayaɛkɛ le Jehowa ndo wakakotsha eyango awɔ. Ɛnyɛlɔ, ɔnangɛso lelɛwɔ Payton nde la wadɛnde, Diana ngɛnangɛnaka mbadia awui wendana l’anangɛso l’akadiyɛso wakahamia olimu wakambɛwɔ Jehowa, ɛnyɛlɔ wanɛ wɔkɔndwami lo ɔnɔngɔ w’asawo wata ɔnɛ: “Wakayakimɔ la lolango dia tokimanyiya.” * Payton mbutaka ate: “Etena kadiaso bɛnyɛlɔ diawɔ, sho mbokaka oko tekɔ lo menda onto ɔmɔtshi angɛnangɛna ɛngɔ kɛmɔtshi ka ndɛ ka dimɛna efula. L’edja tshɛ kawendaso, mbalekaso nanga ‘ndɛta ndo mɛna dia Jehowa ekɔ ɔlɔlɔ.’” L’ekomelo, Payton nde la Diana wakonɔ dia tokamba lɛnɛ akiwɔ l’ohomba efula w’ekimanyielo. Onde wɛ akadia asawo asɔ? Ndo onde wɛ akende tovidɛo tele l’ɔtɛ a dui ɔnɛ Esambishelo ka l’ahole wa ntale wa l’Australie; Esambishelo ka l’ahole wa ntale wa la Irlande takatondjama lo jw.org? Awui asɔ koka kokimanyiya dia wɛ nyanga toho takokayɛ mpamia olimu ayɛ.

15. Ngande wakoka angɛnyi w’eshika tokimanyiya?

¹⁵ Sɔna angɛnyi w’eshika. Sho ndekaka monga suke dia ndɛ mbo ya ndɛ yahatatalɛka naka tekɔ kaamɛ la wanɛ wayilanga. Woho akɔ waamɛ mbele, naka sho mbetshaka wenya kaamɛ la wanɛ wetsha Jehowa lo dihole dia ntondo lo nsɛnɔ yawɔ, kete ondo tayoleka nyanga toho takokaso mpamia olimu wakambɛso Nzambi. Wadi l’omi welɛwɔ Kent nde la Veronica wakɛnyi mɛtɛ ka dui sɔ. Kent mbutaka ate: “Angɛnyi ndo nkumbo kaso wakatokeketsha dia sho mpemba nkamba yoho y’olimu y’oyoyo. Takashihodia ɔnɛ mbɔtɔ lɔngɛnyi la wanɛ wayanga ntondo Diolelo, tokimanyiyaka dia monga l’eshikikelo dia mpemba nsala dui dimɔtshi di’oyoyo.” Kakianɛ Kent nde la Veronica wokamba oko ambatshi mboka wa laande la Serbie.

16. Oko wɛnya wɛɛla wa Yeso wele lo Luka 12:16-21, lande na kahombaso monga suke dia ndjahondja awui amɔtshi?

¹⁶ Yahondja awui amɔtshi lo dikambo dia Jehowa. Aha ɔnɛ awui tshɛ wangɛnangɛnaso mbahombaso ntshika l’oyango wa sho ngɛnyangɛnya Jehowa. (Ond. 5:19, 20) Koko, naka sho mengenga dia nsala awui efula l’olimu wa Nzambi paka nɛ dia hatolange ndjahondja awui amɔtshi, kete sho koka nsala munga kakɔ kaamɛ kakasale pami ka lo wɛɛla wa Yeso kakasale la wolo dia monga la lɔsɛnɔ la dimɛna, koko akanya Nzambi yimba. (Adia Luka 12:16-21.) Ɔnangɛso lelɛwɔ Christian, ladjasɛ la France, mbutaka ate: “Dimi kombishaka Jehowa ndo nkumbo kami kɛnɛ koleki ɔlɔlɔ le mi, etena ndo wolo ami.” Nde la wadɛnde wakɔshi yɛdikɔ ya monga ambatshi mboka. Koko dia nkotsha oyango ɔsɔ, vɔ wakahombe ntshika elimu awɔ. Dia ndjasɛnya, vɔ wakatatɛ nkamba djemulemu mɔtshi y’osolelo ndo wakeke dia ngɛnangɛna la falanga yema tshitshɛ. Onde aki ohomba dia vɔ ndjahondja ngasɔ? Christian mbutaka ate: “Kakianɛ, tambonyomoleka ngɛnangɛna olimu aso ndo tɔngɛnangɛna dia mɛna ambeki aso wa Bible ndo anto wembolaso weka akambo wendana la Jehowa.”

17. Lande na kakokaso monga l’okakatanu dia nkamba la yoho y’oyoyo y’esambishelo?

 ¹⁷ Etawɔ nkamba toho t’eyoyo t’esambishelo. (Ets. 17:16, 17; 20:20, 21) Shirley, lele ombatshi mboka l’États-Unis, akahombe ntshikitanya esambishelo kande lo nshi ya hemɔ kambokokanɛ ka COVID-19. L’etatelo, kadiyɛso kɛsɔ akengenga dia nkamba l’esambishelo ka lo telefɔnɛ. Koko l’ɔkɔngɔ wa nde nongola olowanyelo lo nshi ya wembwelo w’omendji w’otshimbedi, nde akatatɛ nkamba yoho y’esambishelo shɔ mbala la mbala. Nde mbutaka ate: “L’etatelo, lakokaka wɔma, koko kakianɛ lokingɛnangɛna mɛtɛ. L’ekimanyielo katɔ toosambisha anto efula oleki l’esambishelo ka luudu la luudu!”

18. Kakɔna kakoka tokimanyiya dia sho ntokomɛ ekakatanu etena kalangaso mpamia olimu aso?

¹⁸ Sala ekongelo ndo yela tɔ. Etena kahomanaso l’ekakatanu, tosale dɔmbɛlɔ dia nkondja ekimanyielo ndo tokanyiya efula dia mbeya kɛnɛ kakokaso nsala la wɔ. (Tok. 3:21) Sonia, lakamba oko ombatshi mboka wa pondjo kaamɛ la olui ɔmɔtshi wa l’ɔtɛkɛta ɔmɔtshi w’ase Roumanie, l’Erɔpɛ, mbutaka ate: “Dimi ngɛnangɛnaka mfunda eyango ami lo dikatshi ko nkitsha dikatshi diakɔ lo dihole diɛnama. Lo mɛsa ami, lakakitsha sango di’etadimbo ehende watshɔ otsha l’ahole wotshikitanyi. Etena kalangami mbɔsa yɛdikɔ, dimi mendaka lo etadimbo akɔ ehende wele lo sango diakɔ ko nkanyiya dia kana yɛdikɔ sho yayokimanyiya dia nkotsha oyango ami kana bu.” Sonia salaka la wolo dia mɛna ekakatanu wambokomɛ la sso di’ɔlɔlɔ. Nde mbutaka ate: “Okakatanu tshɛ w’oyoyo wekɔ oko ehele kambidjɛ wekamu kana oko kilalo kakimanyiya dia nkotsha oyango ami, dui sɔ nemanɛka la dionga diami.”

19. Kakɔna kahombaso ndjashikikɛ dia nsala?

¹⁹ Jehowa tɔtshɔkɔlaka lo toho efula. Sho koka mɛnya dia tekɔ la lowando l’efula l’ɛtshɔkɔ ɛsɔ lo nsala kɛnɛ tshɛ kakokaso nsala dia mbotombola. (Hɛb. 13:15) Dui sɔ koka mendana nto la nkamba la toho t’eyoyo dia mpamia olimu aso, lo nsala ngasɔ Jehowa ayotɔtshɔkɔ nto efula. Lushi tshɛ, nyɛsɔ toyangake toho takokaso ‘ndɛta ko tayɛna dia Jehowa ekɔ ɔlɔlɔ.’ Oma laasɔ tayoyala oko Yeso lakate ate: “Mbo ya ndɛ yami ele nsala lolango la Ɔnɛ lakantome ndo nshidiya olimu ande.”​—Jni. 4:34.