1-2. a) Lo ndjela didjango dia Yeso diele lo Mateo 28:18-20, ɔkɛndɛ akɔna wa ntondo wele l’Akristo? b) Ambola akɔna wayangaso nsɛdingola lo sawo nɛ?

APƆSTƆLƆ wakahombe monga l’ɔngɛnɔngɛnɔ w’efula etena kakawatshumana l’omamu wa dikona dimɔtshi. L’ɔkɔngɔ wa Yeso mbolɔ nde akaalɔmbɛ dia tohomana la nde lo dihole sɔ. (Mat. 28:16) Ondo lo diaaso sɔ “nde akɛnama mbala kakɔ ɔtɔi le anangɛso ndekana 500.” (1 Kɔr. 15:6) Lande na kakelɛ Yeso ambeki ande lo losanganya lɔsɔ? Dia mbasha ɔkɛndɛ w’ohomba efula ɔnɛ: “Nyotshu ndo nyetɛ anto wa lo wedja tshɛ ambeki.”​—Adia Mateo 28:18-20.

² Ambeki wakahokamɛ ɛtɛkɛta wa Yeso wakayonga anto wa l’etshumanelo k’Akristo ka lo ntambe ka ntondo. Ɔkɛndɛ wa ntondo waki l’etshumanelo kɛsɔ aki dia mbetɛ anto efula ambeki wa Kristo. * Ɛlɔ kɛnɛ, aya tshumanelo efula di’Akristo wa mɛtɛ lo nkɛtɛ k’otondo, ndo ɔkɛndɛ wa ntondo wele la tshumanelo sɔ ele mbetɛ anto ambeki. Lo sawo nɛ, tayokadimola ambola anɛi anɛ: Lande na kele mbetɛ anto ambeki ohomba efula? Kakɔna kalɔmba dui sɔ? Onde Akristo tshɛ mbakoka mbisha lonya dia mbetɛ anto ambeki? Ndo lande na kele mbetɛ anto ambeki nɔmbaka monga la solo dia lotutsha?

3. Lo ndjela Joani 14:6 ndo 17:3, lande na kele olimu wa mbetɛ anto ambeki ohomba efula?

³ Lande na kele olimu wa mbetɛ anto ambeki ohomba efula? Nɛ di’ambeki wa Kristo ato mbakoka monga angɛnyi  wa Nzambi. Ndo nto, wanɛ wayela Kristo salaka etshikitanu lo nsɛnɔ yawɔ nshi nyɛ ndo wekɔ l’elongamelo ka ndjokondja lɔsɛnɔ la pondjo. (Adia Joani 14:6; 17:3.) Lo mɛtɛ, Yeso akatosha ɔkɛndɛ w’ohomba efula, koko hatosale olimu ɔsɔ shoamɛ. Ɔpɔstɔlɔ Pɔɔlɔ akafunde lo dikambo diande ndo di’angɛnyi ande amɔtshi wa ma ma ate: “Tekɔ ekambi kaamɛ la Nzambi.” (1 Kɔr. 3:9) Ande diɛsɛ dia dimɛna efula diakasha Jehowa ndo Kristo anto wele bu kokele lee!

4. Wetshelo akɔna wakokaso nkondja oma l’ɔkɔndɔ wa Ivan la Matilde?

⁴ Olimu wa mbetɛ anto ambeki toshaka ɔngɛnɔngɛnɔ efula. Tɔsɛdingole ɛnyɛlɔ ka Ivan la wadɛnde Matilde wele la Colombie. Vɔ wakasambisha Davier ɔlɔngɔlɔngɔ wakawatɛ ate: “Lekɔ lo nanga nsala etshikitanu lo lɔsɛnɔ lami, koko hatondoya.” Davier aki omboki w’akɔfi wakanɔka didjoyadjoya, wanu lo tshambandeko ndo Erika aki oseka ande. Ivan mbutaka ate: “Takatatɛ ntshɔ dia towembola lo ngielongelo yawɔ yanganyi, dui sɔ diakalɔmbɛ dia sho nyɔnga akalo wenya a tango efula lo mboka ya lɔtɛkɛ. L’ɔkɔngɔ wa nde mɛna dia Davier ambosala etshikitanu lo dionga ndo lo lɔkɛwɔ, Erika nde la wɔ akatatɛ mbeka Bible.” Kombet’edja, Davier akatshike nnɔ didjoyadjoya, wanu ndo mboka akɔfi. Ndo nto nde akayotshuka Erika. Matilde mbutaka ate: “Etena kakabatizama Davier la Erika lo 2016, takohɔ kɛnɛ kakataka Davier ate: ‘Lekɔ lo nanga nsala etshikitanu, koko hatondoya.’ Takakɛdia asɔyi.” Aha la taamu, sho mongaka l’ɔngɛnɔngɛnɔ efula etena kakimanyiyaso anto dia monga ambeki wa Kristo.

5. Nna diakɔna dia ntondo diahombaso ntakola dia mbetɛ anto ambeki?

⁵ Sho takolaka nna dia ntondo dia mbetɛ anto ambeki etena ‘kayangaso’ anto w’etema ɛlɔlɔ. (Mat. 10:11) Sho mɛnyaka dia tekɔ mɛtɛ Ɛmɛnyi wa Jehowa lo nsambisha onto tshɛ lahomana la so. Sho mɛnyaka dia tekɔ Akristo wa mɛtɛ lo nkitanyiya didjango dia Kristo dia nsambisha.

6. Kakɔna kayotokimanyiya dia nkondja etombelo w’ɛlɔlɔ l’esambishelo?

⁶ Anto amɔtshi nomɔlomɔka mbeka akambo wa mɛtɛ wa lo Bible, koko anto efula wahomana la so hawetawɔ mbala kakɔ ɔtɔi. Mbeyaka monga ohomba dia sho nomialomia nsaki kawɔ. Dia nkondja etombelo w’ɛlɔlɔ l’esambishelo, sho pombaka ndjalɔngɔsɔla dimɛna. Sɔna asawo amɔtshi wele ondo wayɔngɛnyangɛnya anto wayohomana la yɛ. Oma laasɔ nkongɛ woho wayoyɔtshiya asawo asɔ.

7. Ngande wakokayɛ ntatɛ sawo l’onto ɔmɔtshi, ndo lande na kele ekɔ ohomba mpokamɛ ndo monga la dilɛmiɛlɔ?

⁷ Ɛnyɛlɔ, wɛ koka mimbola ompokami ayɛ ɔnɛ: “Onde wɛ ayolanga dimi kombola kanyi yayɛ lo dui dimɔtshi? Ekakatanu efula watokomɛ ɛlɔ kɛnɛ komɛka anto wa l’andja w’otondo. Onde wɛ fɔnyaka dia lowandji lɔmɔtshi la l’andja ɔnɛ koka nkandola ekakatanu ɛsɔ?” Oma laasɔ nyɔkɛtshanya Danyɛlɛ 2:44. Kana wɛ koka mbutɛ onto ɔmɔtshi ɔnɛ: “Naa yoho yoleki dimɛna ya mbetsha ana dia monga la lɔkɛwɔ la dimɛna? Dimi kombolaka mbeya kanyi yayɛ.” Oma laasɔ nyɔkɛtshanya Eohwelo k’Ɛlɛmbɛ 6:6, 7. Sawo tshɛ diasɔnayɛ dia tɔkɛtshanya l’anto, kanyiya dikambo di’anto wayodihokamɛ. Kanyiya wahɔ wayowokondja lo mbeya kɛnɛ  mɛtɛ ketsha Bible. Etena kayoyosawola la wɔ, ayonga ohomba wɛ mbahokamɛ ndo nɛmiya tokanyi tawɔ. Lo nsala ngasɔ mbayoyoshihodia tokanyi tawɔ ndo ondo vɔ wayoleka monga suke dia kohokamɛ.

8. Lande na kahombaso ntetemala nsala wendelo w’eyoyo?

⁸ La ntondo k’onto ɔmɔtshi mbɔsa yɛdikɔ ya mbeka Bible, ondo ayonga ohomba mbetsha wenya ndo mbidja welo dia salaka wendelo w’eyoyo. Lande na? Nɛ dia ondo anto hawototanema la ngelo etena kayotoya dia ndjowaembola nto. Ndo nto, ondo ayonga ohomba wɛ nkalola mbala efula di’onto ndjetawɔ mbeka Bible. Tohɔ dia eononɛ mbolaka esadi naka ashi wekɔ lo mbitamɛ mbala la mbala. Woho akɔ waamɛ mbele, onto loka Jehowa ndo Kristo ngandji ayohama esadi esadi naka sho kɛtshanyaka l’onto ɔsɔ mbala la mbala Ɔtɛkɛta wa Nzambi.

9-10. Lande na kakokaso mbuta ɔnɛ Okristo tshɛ kokaka mbisha lonya dia ntana anto w’etema ɛlɔlɔ?

⁹ Okristo tshɛ kokaka mbisha lonya dia nyanga anto w’etema ɛlɔlɔ. Sho koka mbɛdika olimu ɔsɔ la nyanga ɔna dikɛnda lamboshishɔ. Lo ngande? Tɔshi ɛnyɛlɔ k’ɔna dikɛnda la pami l’ɛnɔnyi esato lakashishɔ oma la ngelo. Anto oko 500 mbakasha lonya dia mboyanga. L’ekomelo, wenya 20 l’ɔkɔngɔ w’ɔna nshishɔ, onto ɔmɔtshi akatoshola ɔn’ɔsɔ l’okonda. Onto ɔsɔ akatone vɔ mbotombola l’ɔtɛ wakandashola ɔn’ɔsɔ. Nde mbutaka ate: “Ɔn’ɔsɔ akɛnama nɛ di’anto asɔ tshɛ wakakambe kaamɛ.”

¹⁰ Anto efula wekɔ oko ɔna lakashishɔ ɔsɔ. Vɔ bu l’elongamelo. Vɔ wekɔ l’ohomba w’ekimanyielo. (Ɛf. 2:12) Anto ndekana  miliyɔ enanɛi l’atei aso wekɔ lo mbisha lonya dia nyanga anto wa ngasɔ. Ondo wɛ atatane onto la mbeka la nde Bible. Koko, apandjudi akina wasambisha l’ɛtshi ka nkɛtɛ kakɔ kaamɛ koka ntana onto ɔmɔtshi lalanga mbeka akambo wa mɛtɛ wa l’Ɔtɛkɛta wa Nzambi. Etena katana ɔnangɛso kana kadiyɛso onto ɔmɔtshi laya ombeki wa Kristo, onto tshɛ lasha lonya l’oyangelo ɔsɔ mongaka l’ɔngɛnɔngɛnɔ.

11. Oyadi wɛ bu l’onto leka la yɛ Bible l’etena kɛnɛ, lo toho takɔna tokina takokayɛ mbisha lonya dia mbetɛ anto ambeki?

¹¹ Oyadi l’etena kɛnɛ wɛ bu l’onto leka la yɛ Bible, wɛ koka nkimanyiya dia mbetɛ anto ambeki lo toho tokina. Ɛnyɛlɔ, wɛ koka nongola anto waya mbala ka ntondo lo Mbalasa ka Diolelo ndo mbasalɛ akambo la ngandji. Lo nsala ngasɔ, wɛ koka mbakimanyiya dia vɔ nshikikɛ ɔnɛ sho mbeyamaka oko Akristo wa mɛtɛ oma lo ngandji. (Jni. 13:34, 35) Kɔmatɛrɛ yashayɛ lo nsanganya, kaanga ya tomondo, koka mbetsha anto w’eyoyo asɔ dia nkɛnɛmɔla mbetawɔ kawɔ lo yoho ya dimɛna ndo la dilɛmiɛlɔ. Wɛ koka nto ntomba l’opandjudi ɔmɔtshi w’oyoyo l’esambishelo ndo mbokimanyiya dia nkamba l’Afundelo dia nkana l’anto yimba. Lo nsala ngasɔ, wɛ ayowetsha woho wa mbokoya Kristo.​—Luka 10:25-28.

12. Onde sho pombaka monga l’akoka wa laande dia mbetɛ anto ambeki? Lembetshiya.

¹² Tatɔfɔnyake ɔnɛ sho pombaka monga l’akoka wa laande dia mbetsha anto akina dia monga ambeki wa Kristo. Lande na? Tɔsɛdingole ɛnyɛlɔ ka Faustina, ladjasɛ la Bolivie. Nde kokokaka mbadia etena kakandatatɛ nsawola l’Ɛmɛnyi wa Jehowa. Oma laasɔ, nde akatatɛ mbeka woho wa mbadia yema. Nshi nyɛ nde ambobatizama ndo nde ngɛnangɛnaka mbetsha anto akina. Mbala efula nde mbekaka l’anto atanu Bible lomingu tshɛ. Kaanga mbele Faustina hakoke mbadia dimɛna oko ambeki ande, nde ambokimanyiya anto asamalo dia nongola batisimu.​—Luka 10:21.

13. Kaanga tekɔ l’akambo efula wa nsala, naa ɛtshɔkɔ ɛmɔtshi wakokaso nkondja l’olimu wa mbetɛ anto ambeki?

¹³ Akristo efula wekɔ l’awui efula wa nsala nɛ dia vɔ wekɔ l’ɛkɛndɛ efula w’ohomba. Koko, lam’ele vɔ tshungolaka etena ka mbeka l’anto Bible, vɔ mongaka l’ɔngɛnɔngɛnɔ efula lo nsala dui sɔ. Tɔsɛdingole ɛnyɛlɔ ka Melanie. Nde aki ombutshi wakodiaka ɔnande la womoto l’ɛnɔnyi enanɛi ndamɛ la Alaska. Nde aki nto l’olimu wakawɔsɛka wenya efula ndo akakimanyiyaka ombutshi ɔmɔtshi  waki la kansɛrɛ. Melanie oto mbaki Ɔmɛnyi wa Jehowa l’osomba awɔ wanganyi. Nde akalɔmbaka dia nkondja wolo wa mbikikɛ tshitshi ndo ntshɔ l’esambishelo nɛ dia nde akalangaka mɛtɛ ntana onto ɔmɔtshi la mbeka la nde Bible. L’ekomelo, nde akayɛnana la Sara, laki l’ɔngɛnɔngɛnɔ dia mbeya ɔnɛ Nzambi ekɔ la lokombo l’oshika. L’ɔkɔngɔ w’etena kɛmɔtshi, Sara aketawɔ mbeka Bible. Melanie mbutaka ate: “Lo akɔlɔ amɔtshi Lushi la tanu lakalɛmbaka, koko dimi l’ɔnami la womoto taki l’ɔngɛnɔngɛnɔ dia mbeka la Sara Bible. Takasalaka eyangelo lo ambola waki Sara ndo takangɛnangɛna efula etena kakandonge ɔngɛnyi wa Jehowa.” Sara akakikɛ ɔlɔshamelo la dihonga tshɛ, akamɔ oma l’ɔtɛmwɛlɔ wakinde ndo akabatizama.

14. a) Ngande wɛdikama olimu wa mbetɛ anto ambeki la munda nse? b) Shɛngiya yakɔna yele la ɛtɛkɛta wa Pɔɔlɔ wele lo 2 Timɔte 4:1, 2 le yɛ?

¹⁴ Oyadi mɛnamaka di’olimu ayɛ w’esambishelo bu l’etombelo w’ɛlɔlɔ, tohekɔke, onga l’elongamelo dia wɛ ayotana ambeki. Ohɔ dia Yeso akɛdika olimu wa mbetɛ anto ambeki la munda nse. Amundji wa nse koka mbetsha wenya efula dia vɔ ndjonda kaanga lose ɔtɔi. Mbala efula vɔ kambaka polo l’otsho wa kati kana la pindju k’efula, ndo tena dimɔtshi vɔ pombaka munda lɔkɛndɔ l’otale. (Luka 5:5) Woho akɔ waamɛ mbele, apandjudi amɔtshi mbetshaka wenya efula la solo dia lotutsha tshɛ dia ‘munda nse’ lo tena ndo  l’ahole wotshikitanyi. Lande na? Dia vɔ ntana anto efula. Mbala efula wanɛ wadja welo wa laande kondjaka wahɔ lo ntana anto wetawɔ losango. Onde wɛ hakoke nsala la wolo dia nsambisha etena kana dihole diakokayɛ ntana anto efula?​—Adia 2 Timɔte 4:1, 2.

15. Lande na kele mbeka l’anto Bible nɔmbaka monga la solo dia lotutsha?

¹⁵ Lande na kele mbeka l’anto Bible nɔmbaka monga la solo dia lotutsha? Ɔkɔkɔ ɔmɔtshi ele sho pombaka nsala akambo efula aha tsho nkimanyiya ombeki dia mbeya ndo nanga kɛnɛ ketsha Bible. Sho pombaka nkimanyiya ombeki dia mbeya ndo nanga Jehowa ɔnɛ lele Kiɔkɔ ya Bible. Ndo nto dia mbetsha ombeki kɛnɛ kalɔmba Yeso ambeki ande, sho pombaka nkimanyiya ombeki dia mbeya woho wa nsɛna lo ndjela kɛnɛ ketsha Bible. Sho pombaka mbokimanyiya la solo dia lotutsha tshɛ etena kasalande la wolo dia nkamba l’atɔndɔ wa lo Bible. Anto amɔtshi mongaka l’akoka wa ntshikitanya ekanelo ndo lɔkɛwɔ lawɔ lo ngɔndɔ ngana tsho; anto akina mbɔsaka etena k’otale.

16. Wetshelo akɔna wamboyokondja oma l’ɔkɔndɔ wa Raúl?

¹⁶ Misiɔnɛrɛ ɔmɔtshi wa la Peru akahomana la dui dimɔtshi diɛnya ohomba wa monga la solo dia lotutsha. Nde mbutaka ate: “Lakeke la Raúl Bible l’ekimanyielo ka abuku ahende. Koko nde akatetemala monga l’ekakatanu w’efula lo lɔsɛnɔ lande. Diwala diande diaki l’ekakatanu, nde akatondjanɛka ɛtɛkɛta wa kɔlɔ ndo anande kombɔlɛmiyaka l’ɔtɛ wa lɔkɛwɔ lande la kɔlɔ. Nde akayaka lo nsanganya mbala la mbala, diakɔ diele lakatetemalaka membola nde la nkumbo kande dia mbakimanyiya. L’ɔkɔngɔ w’ɛnɔnyi ndekana esato wakamɛnana la nde, nde akayokotsha kɛnɛ kalɔmbama dia batizama.”

17. Kakɔna kayotɔsɛdingola lo sawo diayela?

¹⁷ Yeso akatotɛ ɔnɛ “nyotshu ndo nyetɛ anto wa lo wedja tshɛ ambeki.” Dia nkotsha ɔkɛndɛ ɔsɔ, mbala efula sho sawolaka l’anto wele la tokanyi totshikitanyi etale la taso, ndo anto wahatshu kaanga l’ɔtɛmwɛlɔ ɔtɔi kana wahetawɔ ɔnɛ Nzambi ekɔ. Lo sawo diayela tayɔsɛdingola woho wakokaso nsambisha anto asɔ lokumu l’ɔlɔlɔ.