1. Kakɔna ka lembetshiya nama yimba yaso y’ɔlɔlɔ? (2 Timɔte 4:5)

 ETENA kahomanaso l’ekakatanu, kɔlamelo yakiso otsha le Jehowa ndo l’okongamelo ande koka mbidjama l’ohemba. Ngande wakokaso ntondoya weho w’ekakatanu ɛsɔ? Sho pombaka ntetemala monga la yimba y’ɔlɔlɔ, monga la yambalo ndo ntshikala nge lo mbetawɔ. (Adia 2 Timɔte 4:5.) Sho tetemalaka monga la yimba y’ɔlɔlɔ lo mbɔlami ki, lo nkana yimba dimɛna ndo lo mbidja welo dia mɛna akambo woho wawaɛna Jehowa. Naka sho nsala ngasɔ, kete tokanyi taso tayahemɛ nsaki yaso.

2. Kakɔna kayotɔsɛdingola lo sawo nɛ?

² Lo sawɔ dietshi takasɛdingola ekakatanu esato wakoka mpomana la so l’andja k’etshumanelo. Lo sawo nɛ, tayɔsɛdingola ekakatanu esato wahomana la so l’etshumanelo wakoka mbidja kɔlamelo yaso otsha le Jehowa l’ohemba. Okakatanu 1) etena katosalɛ osekaso Okrito kɔlɔ, 2) etena kalongolaso ohokwelo ndo 3) etena keso l’okakatanu wa ndjaɔtɔnganyiya l’etshikitanu wa l’okongamelo. Ko ngande wakokaso ntetemala monga la yimba y’ɔlɔlɔ ndo la kɔlamelo otsha le Jehowa ndo l’okongamelo ande etena kahomaso l’ekakatanu wa ngasɔ?

3. Kakɔna kahombaso nsala naka osekaso Okristo ɔmɔtshi ambotosalɛ kɔlɔ?

³ Onde wɛ ambokaka kandji kayala etena kakosalɛ osekayɛ Okristo ɔmɔtshi kɔlɔ, ondo onto ɔmɔtshi lele l’ɛkɛndɛ? Mbeyaka monga ko ɔnangɛso hongi la kanyi ya konyangiya. (Rɔmɔ 3:23; Jak. 3:2) Koko etsha ande mbeyaka konyangiya. Wɛ mbeyaka nshisha djɔ l’ɔtɛ wakanyiyayɛ dikambo diakɔ. Ndo wɛ mbeyaka ndjokoma lo ndjambola ɔnɛ: “Naka ɔnangɛso kokaka nsala akambo lo yoho nyɛ, onde ɔnɛ mɛtɛ ekɔ okongamelo  wa Nzambi?” Ngasɔ mɛtɛ mbalanga Satana dia sho mfɔnya. (2 Kɔr. 2:11) Kanyi ya kɔlɔ ya ngasɔ koka tokonya dia sho mangana la Jehowa ndo l’okongamelo ande. Ko naka tamboshihodia dia ɔnangɛso kana kadiyɛso ambotosalɛ kɔlɔ, ngande wakokaso ntetemala monga la yimba y’ɔlɔlɔ ndo mbewɔ ndjasha lo tokanyi ta kɔlɔ?

4. Ngande wakalame Yɔsɛfu yimba y’ɔlɔlɔ etena kakawosalɛ kɔlɔ ndo wetshelo akɔna wakokaso nkondja oma l’ɛnyɛlɔ kande? (Etatelo 50:19-21)

⁴ Tolamake kumbɛkumbɛ. Etena kaki Yɔsɛfu l’ɛnɔnyi dikumi l’ɛmɔtshi, anango wakosalɛ kɔlɔ. Vɔ wakohetsha ndo amɔtshi l’atei awɔ wakalange mboodiaka. (Eta. 37:4, 18-22) L’ekomelo a shimu, vɔ wakosondja lo mfumbe. Etombelo wakonge la dui sɔ ele, Yɔsɛfu akadiɛnɛ l’ehemba wa wolo l’edja k’ɛnɔnyi oko 13. Yɔsɛfu akakoke ndjambola dia kana Jehowa mɛtɛ akolangaka. Ndo nde akakoke ndjambola dia kana Jehowa akɔɔsɛkɛ etena kakinde l’ohomba w’ekimanyielo. Koko Yɔsɛfu kombaombɛ tokumbɛkumbɛ. Lo dihole dia nsala ngasɔ, Yɔsɛfu akatetemala nama yimba yande y’ɔlɔlɔ lo ntshikala ki. Etena kakandakondja diaaso dia nsɔmbɔya anango, nde kosala dui sɔ, koko nde akawaoke ngandji ndo akadimanyiya. (Eta. 45:4, 5) Yɔsɛfu akasale akambo lo yoho shɔ nɛ dia nde akɛnaka akambo la sso di’ɔlɔlɔ. Lo dihole dia nde mbika washo l’ekakatanu ande, nde akake washo lo sangwelo dia Jehowa. (Adia Etatelo 50:19-21.) Wetshelo akɔna wakondjaso? Naka wambokosalɛ dui dia kɔlɔ, tomalɛke Jehowa ndo tɔfɔnyake dia nde ambokokalɛ. Koko, nkana yimba lo woho wakokimanyiyande dia wɛ mbikikɛ ohemba akɔ. Ndo nto , etena kakosalɛ anto akina akambo wa kɔlɔ, nsala la wolo dia ngandji kayɛ nkomba wandja awɔ.​—1 Pe. 4:8.

5. Ngande wakatetemala Miqueas monga la yimba y’ɔlɔlɔ etena kakandayaoke dia wambosalɛ kɔlɔ?

⁵ Tɔsɛdingole ɛnyɛlɔ kɛmɔtshi ka nshi nyɛ k’ɔnangɛso ɔmɔtshi lele ekumanyi l’Amérique du Sud lelɛwɔ Miqueas. b Nde mbohɔka dia l’etena kɛmɔtshi anangɛso waki l’ɛkɛndɛ wakosalɛ kɔlɔ. Nde mbutaka ate: “Latahomanaka l’okiyanu wa ngasɔ ndooko lushi. Dimi laki la wɔma. Dimi kokoka nkondja djɔ ndo lakakɛdiaka asɔyi oko onto laki komonga l’elongamelo.” Koko, Miqueas akasale wolo dia mbahemɛ nsaki yande. Nde akalɔmbaka mbala la mbala, akalɔmbaka Jehowa dia nde mbosha nyuma kande k’ekila ndo wolo wa mbikikɛ. Nde akayange nto awui amɔtshi oma l’ekanda aso wakakoke mbookimanyiya. Wetshelo akɔna wakondjaso? Naka wɛ amboshihodia dia ɔnangɛyɛ kana kadiyɛyɛ kɛmɔtshi ambokosalɛ kɔlɔ, kete ntshikala ki ndo nsala la wolo dia mbahemɛ tokanyi tshɛ ta kɔlɔ takoka monga la yɛ. Mbeyaka monga ko wɛ heye ekakatanu akɔna wakokonya dia ntɛkɛta kana nsala akambo lo yoho shɔ. Laasɔ, nsawola la Jehowa lo dɔmbɛlɔ, lɔmbande dia nde kokimanyiya dia wɛ mɛna akambo woho wawaɛna onto okina. Nsala akambo lo yoho shɔ koka kokimanyiya dia dimanyiya ɔnanyɔ kana kadiyɛyɛ ndo mɛna dia nde hongi la kanyi ya konyangiya. (Tok. 19:11) Eya dia Jehowa mbeyaka okakatanu wahomana la yɛ ndo nde ayokosha wolo wele la yɛ ohomba dia mbikikɛ.​—2 Ɛk. 16:9; Ond. 5:8.

6. Lande na kele ekɔ ohomba mɛna ohokwelo oko djembetelo ya ngandji katoka Jehowa? (Hɛbɛru 12:5, 6, 11)

⁶ Ohokwelo koka monga dui dia paa efula. Koko naka sho mbika washo paka lo paa kɛsɔ, kete sho mbeyaka ndjotatɛ mɔnyɔla ohokwelo, mɛna dia vɔ hawosungana ndo ɔnɛ wamboleka wolo. Etombelo wakoka monga la dui sɔ ele, sho mbeyaka mpandja ɛngɔ kɛmɔtshi ka laande, mbuta ate mɛna dia ohokwelo ekɔ djembetelo ya ngandji katoka Jehowa. (Adia Hɛbɛru 12:5, 6, 11.) Ndo naka sho ntetemala mbika washo l’etombelo wa  kɔlɔ waya oma l’ohokwelo, kete Satana ayonga la diaaso dia nde tɔlɔsha. Nde nangaka dia sho ntona ohokwelo ndo kɛnɛ koleki tshɛ kɔlɔ ele, nde nangaka tokakitola la Jehowa ndo l’okongamelo ande. Naka wɛ ambohokwama, ngande wakokayɛ ntetemala monga la yimba y’ɔlɔlɔ?

7. a) Oko wɛnyamidiɔ l’osato, ngande wakayokamba Jehowa la Petero l’ɔkɔngɔ wa nde mbetawɔ ohokwelo? b) Wetshelo akɔna wamboyokondja oma l’ɛnyɛlɔ ka Petero?

⁷ Etawɔ ohokwelo ndo nsala etshikitanu wahombama. Mbala ndekana ɔtɔi, Yeso akangola Petero la ntondo k’apɔstɔlɔ akina. (Makɔ 8:33; Luka 22:31-34) Ondo dui sɔ diakasha Petero nsɔnyi efula! Koko, Petero akatshikala la kɔlamelo otsha le Yeso. Nde aketawɔ ohokwelo ndo akakondja wetshelo oma lo wandja ande. Etombelo wakonge la dui sɔ ele, Jehowa akafute Petero l’ɔtɛ wa kɔlamelo yande ndo akayowoshaka ɛkɛndɛ w’ohomba l’etshumanelo. (Jni. 21:15-17; Ets. 10:24-33; 1 Pe. 1:1) Wetshelo akɔna wakokaso nkondja oma l’ɛnyɛlɔ ka Petero? Sho ndjakondjɛka ndo kondjɛka anto akina wahɔ, etena kahatake washo paka lo nsɔnyi kaya oma l’ohokwelo, etena ketawɔso ohokwelo ndo kasalaso etshikitanu wahombama. Etena kasalaso dui sɔ, sho ndekaka monga ohomba le Jehowa ndo le anangɛso.

8-9. L’ɔkɔngɔ wa nde nongola ohokwelo, ngande wakayaoke Bernardo oma l’etatelo, ko kakɔna kakokimanyiya dia ntshikitanya ekanelo kande ka yimba?

⁸ Tɔsɛdingole kɛnɛ kakakomɛ Bernardo ɔnangɛso ɔmɔtshi ladjasɛ la Mozambique. Nde akashisha ɔkɛndɛ ande w’ekumanyi. Ngande wakayaoke Bernardo l’etatelo? Nde mbutaka ate: “Dimi laki la lonyangu nɛ dia dimi kombetawɔ ohokwelo wakamalongola.” Nde akake washo lo woho wakakokaka anto akina wa l’etshumanelo mbɔɔsa. Nde mbetawɔka ate: “Akambɔsɛ ngɔndɔ ngana la ntondo ka dimi ndjetawɔ ohokwelo wakamalongola ndo ndjoyaɛkɛ le Jehowa ndo l’okongamelo ande nto.” Kakɔna kakakimanyiya Bernardo dia mɛna akambo la sso di’ɔlɔlɔ?

⁹ Bernardo akatshikitanya ekanelo kande ka yimba. Nde nembetshiyaka ate: “Etena kakamakambaka oko ekumanyi, lakakambe la Hɛbɛru 12:7 dia nkimanyiya anto akina dia mɛna ohokwelo w’oma le Jehowa la sso di’ɔlɔlɔ. Kakianɛ loyambola nte: ‘Onto akɔna ahomba nkamba la divɛsa nɛ?’ Ekambi tshɛ wa Jehowa, mbidja ndo dimi.” Oma laasɔ, Bernardo akatakola wanya akina dia nyomoyaɛkɛ  le Jehowa ndo l’okongamelo ande. Nde akanyomoleka mbadia Bible ndo nkana yimba dimɛna dimɛna la kɛnɛ kakandadiaka. Kaanga mbakandatetemala ndjakiyanya lo woho wakawɔsaka anango l’akadiyɛnde, nde akasambishaka kaamɛ la wɔ ndo akashaka kɔmatɛrɛ lo nsanganya ya l’etshumanelo. L’edjedja ka wonya, Bernardo akayɔsɔnama nto oko ekumanyi. Naka oko Bernardo, wɛ akalongola ohokwelo, kete tolekake nkanyiya lo nsɔnyi ka dikambo sɔ, etawɔ alako ndo nsala etshikitanu wahombama. c (Tok. 8:33; 22:4) Naka wɛ nsala dui sɔ, kete wɛ koka monga l’eshikikelo ɔnɛ Jehowa ayokofuta lo woho watetemalayɛ monga la olowanyi otsha le nde ndo le okongamelo ande.

10. Etshikitanu akɔna wakasalema l’okongamelo wakakoke mbidja kɔlamelo y’apami amɔtshi w’ase Isariyɛlɛ l’ohemba?

¹⁰ Etshikitanu wasalema l’okongamelo koka mbidja kɔlamelo yaso l’ohemba. Koko naka hatendji ɔlɔlɔ, kete sho koka ndjetawɔ di’etshikitanu akɔ tokakitola la Jehowa. Ɛnyɛlɔ, tɔsɛdingole woho wakatshikitana akambo l’ɛse k’Ɛlɛmbɛ wa Mɔsɛ ndo shɛngiya yakonge la dui sɔ le ase Isariyɛlɛ amɔtshi. La ntondo ka Jehowa mbasha Ɛlɛmbɛ, ewandji wa nkumbo wakasalaka akambo wakahombaka ɛlɔmbɛdi nsala. Vɔ wakakaka dilambwelo ndo wakalambolaka Jehowa elambo lo wahɔ wa nkumbo yawɔ. (Eta. 8:20, 21; 12:7; 26:25; 35:1, 6, 7; Jɔbɔ 1:5) Koko lam’akadjama Ɛlɛmbɛ, ewandji wa nkumbo komonga nto la lotshungɔ la nsala awui asɔ. Jehowa akasɔnɛ nkumbo ka Arɔna oko ɛlɔmbɛdi dia nambolaka elambo. L’ɔkɔngɔ wa vɔ ntatɛ nkamba l’Ɛlɛmbɛ ɛsɔ, naka owandji wa nkumbo waki komonga lo dioho di’Arɔna nsala akambo oko ɔlɔmbɛdi, nde akahombe ndjakema. d (Lɛw. 17:3-6, 8, 9) Onde etshikitanu ɛsɔ wakasha Kɔra, Datana, Abirama ndo ewandji 250 ɛkɔkɔ wa vɔ tɔmbɔkwɛ Mɔsɛ nde l’Arɔna? (Wal. 16:1-3) Sho bu l’eshikikelo ka dui sɔ. Oyadi ɔkɔkɔ akɔna waki lawɔ, Kɔra ndo apami akina tshɛ waki la nde kotshikala la kɔlamelo le Jehowa. Naka etshikitanu wasalema l’okongamelo wambodja kɔlamelo yayɛ l’ohomba, kakɔna kakokayɛ nsala?

11. Wetshelo akɔna wakondjaso oma l’ɛnyɛlɔ k’ase Lɛwi w’aseka Kɔhata amɔtshi?

¹¹ Tosuke etshikitanu wa l’okongamelo tshɛ lo tshɛ. Lam’akawatatshɔka l’oswe wa shɛnga, ase Kɔhata waki l’ɔkɛndɛ ɔmɔtshi wa laande. Etena tshɛ kakatonɔka ase Isariyɛlɛ mpango yawɔ, ase Kɔhata amɔtshi wakatɛmbaka ɔshɛtɛ wa sheke la ntondo k’anto tshɛ. (Wal. 3:29, 31; 10:33; Jas. 3:2-4) Ande diɛsɛ diaki lawɔ lee! Koko, akambo wakatshikitana le wɔ etena kakadjasɛ ase Isariyɛlɛ lo Nkɛtɛ ya Daka. Ɔshɛtɛ wa sheke kokoka mɛmbɛmbama nto. Ɔnkɔnɛ, lo nshi ya nkumekanga Sɔlɔmɔna, ase Kɔhata amɔtshi wakasɔnama dia kambaka oko amembi, amɔtshi waki anami w’asoko ndo akina wakendaka mvudu ya waombelo. (1 Ɛk. 6:31-33; 26:1, 24) Ndooko dihole diɛnya di’ase Kɔhata wakasɛkɛ kana wakalɔmbɛ dihole dia laadiko l’ɔtɛ w’ɔkɛndɛ wa laande waki lawɔ. Wetshelo akɔna wakokaso nkondja? Nsukɛ etshikitanu wasalema l’okongamelo wa Jehowa l’otema ayɛ tshɛ mbidja ndo etshikitanu wele la shɛngiya l’olimu ayɛ. Onga l’ɔngɛnɔngɛnɔ oyadi ɔkɛndɛ akɔna wambowokosha. Eya dia nɛmɔ diele layɛ lo washo wa Jehowa halemanɛ l’ɔkɛndɛ wele layɛ. Jehowa mbɔsaka la nɛmɔ okitanyiya ayɛ oleki ɔkɛndɛ tshɛ wele layɛ.​—1 Sa. 15:22.

12. Ngande wakayaoke Zaina etena kakandatombe oma lo Bɛtɛlɛ?

 ¹² Tɔsɛdingole ɛnyɛlɔ ka Zaina, kadiyɛso kɛmɔtshi kadjasɛ lo Moyen-Orient, lakawatshikitanya ɔkɛndɛ ande ndo lakashisha diɛsɛ diakandalangaka efula. Nde akatomama nto dia tokamba lo teritwara l’ɔkɔngɔ wa nde nkamba ɛnɔnyi ndekana 23 lo Bɛtɛlɛ. Nde mbutaka ɔnɛ: “Otshikitanu w’ɔkɛndɛ ami akambisha paa efula l’asolo. Ndo lakayaɔshi oko ɛngɔ k’anyanya ndo lakatetemala ndjambola ɔnɛ: ‘Kɔlɔ kakɔna kosadimi?’” Lonyangu ko, anangɛso l’akadiyɛso amɔtshi wa l’etshumanelo wakayowahiyɛ wotsho laadiko dia tshuka lo mbootɛ ɔnɛ: “Otoyonga ohomba efula tshike okongamelo otokotshika lo Bɛtɛlɛ.” Lo ntena dimɔtshi Zaina aki la lɔkɔnyɔ l’efula l’otema, nde akalelaka otsho tshɛ. Koko nde mbutaka ate: “Dimi kombetawɔ pondjo dia monga la taamu lo ngandji ka Jehowa kana k’okongamelo ande.” Ngande waki Zaina l’akoka wa ntetemala monga la yimba y’ɔlɔlɔ?

13. Kakɔna kakakimanyiya Zaina dia nde mbahemɛ tokanyi tande ta kɔlɔ?

¹³ Zaina aki l’akoka wa mbahemɛ tokanyi tande ta kɔlɔ. Lo woho akɔna? Nde akadia sawo dimɔtshi dia l’ekanda aso diakatɛkɛtaka dikambo di’okakatanu ande ndo diakokimanyiya dia mbokikɛ. Sawo dia lo Tshoto y’Etangelo ya Ngɔndɔ ka hende 1, 2001 diele l’ɔtɛ a dui ɔnɛ: “Vous pouvez vaincre le découragement!” diakokimanyiya efula. Sawo sɔ diakalembetshiya okakatanu wakahomana la Mark ombeki ɔmɔtshi wa Bible lakakoke ndɔshana la nsaki yakɔ yaamɛ yaki lande etena kakatshikitanyema ɔkɛndɛ ande. Zaina mbohɔka ate: “Ɛnyɛlɔ ka Mark aki kɛnɛ kaki lami ohomba dia ndɔshana l’ɔkɔmwɛlɔ.” Zaina akatshikala nto ma ma l’angɛnyi ande. Nde kombewɔ anango l’akadiyɛnde; nde kotshika nsambisha ndo kotetemala ndjasha l’akambo ande hita. L’ekomelo a shimu nde mbutaka dia nyuma ka Jehowa kakakambe l’okongamelo ande ndo la wanɛ walɔmbɔla dia vɔ mbokimanyiya lo yɛdikɔ y’efula. Koko nde akashikikɛ nto dia okongamelo wa Nzambi salaka kɛnɛ tshɛ kakokawɔ nsala di’olimu wa Jehowa kambema.

14. Otshikitanu akɔna wakasalema l’okongamelo wakalɔshanaka la Vlado dia ndjaɔtɔnganyiya lawɔ, ndo kakɔna kakokimanyiya?

¹⁴ Vlado ekumanyi kɛmɔtshi kele la ɛnɔnyi 73 kadjasɛ la Slovénie aki l’okakatanu etena kakawasanganya etshumanelo kekina la kakiwɔ ndo kakawadihe mbalasa ka Diolelo kakandɔtɔka nsanganya. Nde mbutaka ɔnɛ: “Dimi koshihodia lande na kakawadihe mbalasa ka Diolelo k’olangala kɛsɔ. Lakoke kandji efula  nɛ dia takikɔ oma la nɔngɔsɔla mbalasa kakɔ. Dimi lekɔ otshudi w’abaya ndo lakatshule diangɔ dimɔtshi di’eyoyo lo mbalasa ka Diolelo kakɔ. Ndo nto, osanganelo ɔsɔ wakalɔmbaka dia nsala etshikitanu efula wakikɔ wolo le so apandjudi waya esombe.” Kakɔna kakakimanyiya Vlado dia nsukɛ yɛdikɔ shɔ? Nde nembetshiyaka ɔnɛ: “Ndjaɔtɔnganyiya l’etshikitanu wasala okongamelo wa Jehowa mbelaka nshi tshɛ ɛtshɔkɔ efula. Etshikitanu wasalema nshi nyɛ wekɔ lo tɔlɔngɔsɔla l’etshikitanu wa weke wayosalema lo nshi yayaye.” Onde wɛ ekɔ lo ndɔshana l’okakatanu wendana l’etshikitanu w’osanganyelo wa tshumanelo kana wendana l’etshikitanu w’ɛkɛndɛ? Naka ngasɔ mbediɔ, kete eya dia Jehowa mbeyaka woho wayaokayɛ. Etena kasukɛyɛ etshikitanu wa ngasɔ ndo katetemalayɛ monga la kɔlamelo otsha le Jehowa ndo l’okongamelo wakambande lawɔ, wɛ ayɔtshɔkwama ndooko onyake.​—Os. 18:25.

15. Ngande wakokaso ntetemala nama yimba yaso y’ɔlɔlɔ etena kahomanaso l’ekakatanu l’atei w’etshumanelo?

¹⁵ Oko watataleke nsukana l’ekomelo ka dikongɛ nɛ di’akambo, sho koka nongamɛ dia tayohomana l’ekakatanu l’atei w’etshumanelo, ekakatanu ɛsɔ koka mbidja kɔlamelo yaso otsha le Jehowa l’ohemba. Diakɔ diele, sho pombaka ntetemala nama yimba yaso y’ɔlɔlɔ. Naka wɛ amboshihodia dia osekayɛ Okristo ambokosalɛ kɔlɔ, kete tetawɔke dia dikambo sɔ koshishɛ ɔngɛnɔngɛnɔ. Naka wambokohokola, kete tokake washo lo nsɔnyi kayokosha dikambo sɔ, etawɔ dako ndo nsala etshikitanu wahombama. Ndo etena kasala okongamelo wa Jehowa etshikitanu wele la shɛngiya le yɛ, etawɔwɔ l’otema ayɛ tshɛ ndo nkitanyiya ɛlɔmbwɛlɔ.

16. Ngande wakokayɛ ntetemala nama wɛkamu ayɛ otsha le Jehowa ndo le okongamelo ande?

¹⁶ Wɛ koka nama kɔlamelo yayɛ otsha le Jehowa ndo le okongamelo ande etena kadjama kɔlamelo yayɛ l’ohemba. Koko dia nsala ngasɔ, wɛ pombaka ntetemala nama yimba y’ɔlɔlɔ, nkana lomba dimɛna ndo mɛna akambo oko wawaɛna Jehowa. Yashikikɛ dia mbeka bɛnyɛlɔ dia lo Bible di’anto wakatondoya ekakatanu akɔ waamɛ ndo nkana yimba la bɛnyɛlɔ diawɔ. Lɔmba Jehowa dia nde kokimanyiya. Toyanganyake pondjo l’etshumanelo. Oyadi kɛnɛ tshɛ kakoka kokomɛ, Satana hokoka kokakitola la Jehowa ndo l’okongamelo ande.​—Jak. 4:7.