1. Kakɔna kakokaso nongamɛ ndo eshikikelo kakɔna kakoka monga laso?

 SHO koka nongamɛ dia tayohomana la ɔlɔshamelo l’olimu aso w’esambishelo. Ɔlɔshamelo ɔsɔ koka ndeka monga wolo lo nshi yayaye. (Dan. 11:44; 2 Tim. 3:12; Ɛny. 16:21) Koko, sho koka monga l’eshikikelo ɔnɛ Jehowa ayotosha ekimanyielo kele laso ohomba. Lande na? Nɛ dia Jehowa kimanyiyaka nshi tshɛ ekambi ande dia vɔ nkotsha ɛkɛndɛ wakandawasha oyadi ɛkɛndɛ akɔ wekɔ wolo efula. Ɛnyɛlɔ, nyɛsɔ tɔsɛdingole awui amɔtshi wakahomana l’omvutshi Ɛzɛkiyɛlɛ ɔnɛ lakasambisha ase Juda waki lo lɔhɔmbɔ la Babilɔna.

2. Kakɔna kakate Jehowa lo kɛnɛ kendana l’anto waki l’ɛtshi ka nkɛtɛ kakasambishaka Ɛzɛkiyɛlɛ ndo kakɔna kayotɔsɛdingola lo sawo nɛ? (Ɛzɛkiyɛlɛ 2:3-6)

² Weho w’anto akɔna waki l’ɛtshi ka nkɛtɛ kakasambishaka Ɛzɛkiyɛlɛ? Jehowa akate dia vɔ waki akanga “w’ohindodi,” “w’etema wolo,” ndo “atɔmbɔki.” Vɔ waki oko atɛndɛ ndo nkoto ya waale. Diakɔ diakatɛka Jehowa Ɛzɛkiyɛlɛ mbala la mbala ɔnɛ: ‘Tokake wɔma’! (Adia Ɛzɛkiyɛlɛ 2:3-6.) Ɛzɛkiyɛlɛ aki l’akoka wa nkotsha ɔkɛndɛ ande wa nsambisha nɛ dia 1) Jehowa akotome, 2) nyuma ka Nzambi kakawoshaka wolo waki lande ohomba ndo 3) ɛtɛkɛta waki Nzambi wakakeketsha mbetawɔ kande. Ngande wakakimanyiya awui asato asɔ Ɛzɛkiyɛlɛ? Ndo ngande wakokawɔ tokimanyiya ɛlɔ kɛnɛ?

3. Ɛtɛkɛta akɔna wakakeketsha Ɛzɛkiyɛlɛ ndo ngande wakoshikikɛ Jehowa dia nde ayowosukɛ?

³ Jehowa akatɛ Ɛzɛkiyɛlɛ ate: “Dimi lambokotoma.” (Ɛzk. 2:3, 4) Lo weho akɔ tshɛ ɛtɛkɛta ɛsɔ wakakeketsha Ɛzɛkiyɛlɛ. Lande na? Nɛ dia aha la taamu nde akohɔ dia Jehowa akakambe  l’ɛtɛkɛta akɔ waamɛ etena kakandatome Mɔsɛ la Isaya oko amvutshi ande. (Eto. 3:10; Isa. 6:8) Ɛzɛkiyɛlɛ akeyaka nto dia Jehowa akakimanyiya amvutshi ahende asɔ dia ntondoya ekakatanu wa wolo. Ɔnkɔnɛ, etena kakatɛ Jehowa Ɛzɛkiyɛlɛ mbala hiende y’etondo ate: “Dimi lambokotoma,” omvutshi ɔsɔ aki l’ɔkɔkɔ w’oshika wa ndjaɛkɛ l’osukɔ wa Jehowa. Ndo nto, lo dibuku di’Ɛzɛkiyɛlɛ sho tanaka mbala efula etelo k’ɔnɛ: “Ɔtɛkɛta wa Jehowa wakaye le mi.” (Ɛzk. 3:16) Ndo mbala efula nde akafunde ate: “Ɔtɛkɛta wa Jehowa wakaye le mi nto.” (Ɛzk. 6:1) Lo mɛtɛ, Ɛzɛkiyɛlɛ aki l’eshikikelo ɔnɛ Jehowa mbakotome. Ndo nto, oko wakinde ɔna aki omvutshi, Ɛzɛkiyɛlɛ aketshamaka oma le she lo tshimbo y’ɛkɔndɔ wɛnya woho wakasukɛka Jehowa amvutshi ande. Ɛnyɛlɔ, Jehowa akatɛ Isaka, Jakɔbɔ ndo Jɛrɛmiya ate: “Dimi lekɔ kaamɛ la yɛ.”​—Eta. 26:24; 28:15; Jɛr. 1:8.

4. Naa tokanyi t’ekeketshelo takakeketsha Ɛzɛkiyɛlɛ?

⁴ Kakɔna kakasale ase Isariyɛlɛ efula la esambishelo kaki Ɛzɛkiyɛlɛ? Jehowa akate ate: “Luudu la Isariyɛlɛ layotona kohokamɛ, nɛ dia vɔ hawolange pokamɛmi.” (Ɛzk. 3:7) Lo ntona Ɛzɛkiyɛlɛ, vɔ waki lo ntona Jehowa. Ɛtɛkɛta ɛsɔ wakashikikɛ Ɛzɛkiyɛlɛ dia woho wakootone anto konembetshiya dia nde kotondoya ɔkɛndɛ ande oko omvutshi. Jehowa akashikikɛ Ɛzɛkiyɛlɛ nto dia etena kayoya dombwelo diakandalake, anto “wayeya mɛtɛ di’omvutshi ɔmɔtshi aki l’atei awɔ.” (Ɛzk. 2:5; 33:33) Aha la taamu, tokanyi t’ekeketshelo tɔsɔ takasha Ɛzɛkiyɛlɛ wolo waki la nde ohomba dia nkotsha ɔkɛndɛ ande wa nsambisha.

5. Lo ndjela Isaya 44:8, oma le na aya wolo aso?

⁵ Sho lawɔ tekɔ la dihonga nɛ dia sho mbeyaka dia Jehowa mbatotoma dia nsambisha. Nde toshaka nɛmɔ lo woho watetande  “ɛmɛnyi” ande. (Isa. 43:10) Ɔsɔ ekɔ mɛtɛ nɛmɔ di’efula! Paka oko wakatɛ Jehowa Ɛzɛkiyɛlɛ ɔnɛ: “Tokake wɔma,” Jehowa tokeketshaka ate: “Tanyondamake la sase.” Lande na kahatahombe mboka andɔshi aso wɔma? L’ɛnyɛlɔ k’Ɛzɛkiyɛlɛ, Jehowa mbatotoma ndo nde tosukɛka.​—Adia Isaya 44:8.

6. a) Ngande watoshikikɛ Jehowa dia nde ayotosukɛ? b) Oma le na akondjaso esambelo ndo wolo?

⁶ Jehowa toshikikɛka dia nde ayotosukɛ. Ɛnyɛlɔ, la ntondo ka Jehowa mbuta ɔnɛ: “Nyu nyekɔ Ɛmɛnyi ami,” nde akate ate: “Etena katehɔyɛ ashi, dimi layonga kaamɛ la yɛ, ndo ɛkɛdi, vɔ hawotokombɔmbwɛ. Etena kakɛndakɛndayɛ lo dja, wɛ hatolongola, ndo loombe la dja halotokotshumba.” (Isa. 43:2) Mbala mɔtshi, etena ka nsambishaso, sho pomanaka la wekamu wele oko ashi ndo l’ehemba wele oko dja. Koko, l’ekimanyiyelo ka Jehowa, sho tetemalaka nsambisha. (Isa. 41:13) Oko wakidiɔ lo nshi y’Ɛzɛkiyɛlɛ, efula k’anto ɛlɔ kɛnɛ tonaka losango laso. Koko sho mbeyaka dia otonelo awɔ halembetshiya dia sho hatotondoya oko Ɛmɛnyi wa Nzambi. Sho sambemaka ndo keketshamaka lo mbeya ɔnɛ Jehowa ngɛnangɛnaka etena katetemalaso nsambisha losango lande la kɔlamelo tshɛ. Ɔpɔstɔlɔ Pɔɔlɔ akate ate: “Onto l’onto ayolongola difuto diande lo ndjela olimu ande hita.” (1 Kɔr. 3:8; 4:1, 2) Kadiyɛso kɛmɔtshi kaya edja l’olimu w’ombatshi mboka wa pondjo mbutaka ɔnɛ: “Dimi mongaka l’ɔngɛnɔngɛnɔ etena keyami dia Jehowa tofutaka l’ɔtɛ wa welo aso.”

7. Ngande wakayaokaka Ɛzɛkiyɛlɛ etena kakandakanaka yimba lo dikambo di’ɛnɛlɔ kakandɛnyi? (Enda osato wele lo lohoso.)

⁷ Ɛzɛkiyɛlɛ akɛnyi wolo w’efula wele la nyuma ka Nzambi. L’ɛnɛlɔ kande, nde akɛnyi olimu wakakambaka nyuma k’ekila le ditongami dia lo nyuma diele la nkudu ndo l’etshimbi wa weke wa pusupusu ka l’olongo. (Ɛzk. 1:20, 21) Kakɔna kakasale Ɛzɛkiyɛlɛ? Nde akafunde kɛnɛ kakokomɛ ɔnɛ: “Lam’akamɛnyi ngasɔ, dimi lakakɔ ekukumadi.” L’ɔtɛ wa diangɔ dia diambo diakandɛnyi, Ɛzɛkiyɛlɛ akakɔ la nkɛtɛ. (Ɛzk. 1:28) L’ɔkɔngɔ wa laasɔ, etena tshɛ kakakanyiyaka Ɛzɛkiyɛlɛ lo dikambo di’ɛnɛlɔ ka diambo kɛsɔ, dui sɔ diakakeketshaka wɛkamu ande ɔnɛ l’ekimanyielo ka nyuma ka Nzambi, nde akahombe nkotsha ɔkɛndɛ ande wa nsambisha.

8-9. a) Kakɔna kakakomɛ Ɛzɛkiyɛlɛ etena kakawodjangɛ Jehowa ate emala? b) Ngande wakakeketsha Jehowa Ɛzɛkiyɛlɛ nto lo okakatanu waki lande lo dikambo di’ɛtshi kande ka nkɛtɛ kakandasambishaka?

⁸ Jehowa akadjangɛ Ɛzɛkiyɛlɛ ate: “Ɔna onto, emala lo ekolo ayɛ kele sawole la yɛ.” Etena kakadjangɛ Jehowa Ɛzɛkiyɛlɛ dia nde memala, didjango sɔ kaamɛ ndo nyuma ka Nzambi akasha Ɛzɛkiyɛlɛ wolo waki lande ohomba dia memala oma lo nkɛtɛ. Ɛzɛkiyɛlɛ akafunde ate: “Nyuma kakaye le mi ndo kakamemadja lo ekolo ami.” (Ɛzk. 2:1, 2) Oma laasɔ ndo l’edja tshɛ k’olimu ande w’esambishelo, Ɛzɛkiyɛlɛ akalɔmbwamaka la “lonya” la Nzambi, mbuta ate la nyuma k’ekila kaki Nzambi. (Ɛzk. 3:22; 8:1; 33:22; 37:1; 40:1) Nyuma ka Nzambi kakakeketsha Ɛzɛkiyɛlɛ dia nkotsha ɔkɔndɛ wakandalongola, mbuta ate nsambisha “akanga w’ɛtɛ wolo ndo w’etema wolo” wakadjasɛka l’ɛtshi kande ka nkɛtɛ. (Ɛzk. 3:7) Jehowa akatɛ Ɛzɛkiyɛlɛ ate: “Dimi lambetɛ elungi kayɛ wolo oko dungi diawɔ ndo okoko ayɛ wolo oko ekoko awɔ. Dimi lambetɛ okoko ayɛ oko diyama, wolo ndeka dive dia silɛksɛ. Towaokake wɔma ndo tatɛke asolo l’ɔtɛ wa dungi diawɔ.” (Ɛzk. 3:8, 9) Lo mɛtɛ, aki oko Jehowa akatɛka Ɛzɛkiyɛlɛ ate: ‘Tetawɔke di’akanga w’ɛtɛ wolo asɔ kɔkɔmɔla. Dimi layokokeketsha.’

⁹ Oma laasɔ, nyuma ka Nzambi kakakimanyiya  Ɛzɛkiyɛlɛ l’edja tshɛ k’olimu ande w’esambishelo l’ɛtshi kande ka nkɛtɛ. Ɛzɛkiyɛlɛ akafunde ate: “Lonya la Jehowa lakambahema wolo.” Omvutshi ɔsɔ akɔshi lomingu l’otondo dia nshihodia dimɛna dimɛna losango lakandahombe nsambisha l’eshikikelo tshɛ. (Ɛzk. 3:14, 15) Oma laasɔ, Jehowa akɔlɔmbɔla otsha l’okidi lɛnɛ ‘akatɔtɔ nyuma le nde.’ (Ɛzk. 3:23, 24) Ɛzɛkiyɛlɛ aki suke dia ntatɛ olimu w’esambishelo.

10. Ekimanyielo kakɔna kele laso ohomba dia nkotsha ɔkɛndɛ aso wa nsambisha ndo lande na?

¹⁰ Ekimanyielo kakɔna kele laso ohomba dia nkotsha ɔkɛndɛ aso wa nsambisha? Dia nkadimola lo dimbola sɔ, tokane yimba lo kɛnɛ kakakomɛ Ɛzɛkiyɛlɛ. La ntondo ka nde ntatɛ nsambisha, nyuma ka Nzambi kakawosha wolo waki lande ohomba. Ɛlɔ kɛnɛ, oko Ɛzɛkiyɛlɛ, paka l’ekimanyielo ka nyuma k’ekila ka Nzambi mbakokaso nkotsha ɔkɛndɛ aso wa nsambisha. Lande na? Nɛ dia Satana ekɔ lo tɔlɔsha dia memadia olimu aso w’esambishelo. (Ɛny. 12:17) Anto efula fɔnyaka dia Satana ekɔ la wolo efula ndo sho hatokoke mbɔlɔsha. Koko lo tshimbo y’olimu aso w’esambishelo, sho tekɔ lo mbɔlɛndja! (Ɛny. 12:9-11) Lo woho akɔna? Etena kasambishaso, sho mɛnyaka dia hatoke wanelo wa Satana wɔma. Etena tshɛ kasambishaso, Satana ekɔ lo mɛmba ɛkɔndjɔ. Ko kakɔna kakokaso mbuta lo woho weso l’akoka wa nkotsha ɔkɛndɛ aso wa nsambisha kaanga l’atei w’ɔlɔshamelo? Sho koka mbuta ɔnɛ tekɔ la nyuma k’ekila ndo sho mbetawɔmaka oma le Jehowa.​—Mat. 5:10-12; 1 Pe. 4:14.

11. Kakɔna kayosala nyuma k’ekila le so ndo ngande wakokaso ntetemala kikondja?

¹¹ Kakɔna kakokaso mbeka nto etena kakanyiyaso woho wakasha Jehowa Ɛzɛkiyɛlɛ wolo waki lande ohomba dia nsambisha? Nyuma ka Nzambi koka tosha wolo wele laso ohomba dia ntondoya oseka okakatanu tshɛ wakoka mpomana laso l’olimu aso w’esambishelo.  (2 Kɔr. 4:7-9) Ko laasɔ, kakɔna kakokaso nsala dia sho monga l’eshikikelo dia tekɔ lo ntetemala nongola nyuma kaki Nzambi? Sho pombaka ntetemala kilɔmba tele l’eshikikelo ɔnɛ Jehowa ayoka alɔmbɛlɔ aso. Yeso aketsha ambeki ande ate: “Nyotetemale nɔmba, . . . nyotetemale nyanga, . . . nyotetemale nkɔkɔla.” Lo wedi ande, Jehowa ‘ayosha nyuma kande k’ekila le wanɛ wɔɔlɔmbatɔ.’​—Luka 11:9, 13; Ets. 1:14; 2:4.

12. Lo ndjela Ɛzɛkiyɛlɛ 2:9–3:3, oma lende akaye wɔɔmbɔ ndo kakɔna kaki lɔkɔ?

¹² Ɛzɛkiyɛlɛ kokeketshama tsho la nyuma ka Nzambi koko nde akaleshama nto l’ɛtɛkɛta wa Nzambi. L’ɛnɛlɔ, Ɛzɛkiyɛlɛ akɛnyi lonya lokime wɔɔmbɔ. (Adia Ɛzɛkiyɛlɛ 2:9–3:3.) Oma lende akaye wɔɔmbɔ ɔsɔ? Kakɔna kaki lo wɔɔmbɔ ɔsɔ? Ndo ngande wakale Ɛzɛkiyɛlɛ wɔɔmbɔ akɔ? Nyɛsɔ tɔsɛdingole. Wɔɔmbɔ wakaye oma lo kiti ka Nzambi. Ondo Jehowa akakambe l’ɔmɔtshi l’atei wa andjelo anɛi wakɛnyi Ɛzɛkiyɛlɛ ntondo dia mbosha wɔɔmbɔ ɔsɔ. (Ɛzk. 1:8; 10:7, 20) Wɔɔmbɔ waki l’ɛtɛkɛta wa Nzambi, mbuta ate losango la kilombo lakahombe Ɛzɛkiyɛlɛ mbewoya ase Juda w’atɔmbɔki. (Ɛzk. 2:7) Losango lɔsɔ lakafundama lo wedi akɔ ehende wa wɔɔmbɔ.

13. Kakɔna kakatɛ Jehowa Ɛzɛkiyɛlɛ dia nde nsala la wɔɔmbɔ ndo lande na kaki wɔɔmbɔ akɔ mpɛ?

¹³ Jehowa akatɛ omvutshi ande dia ndɛ wɔɔmbɔ ndo ‘mbolodia lo dikundju diande.’ L’okitanyiya tshɛ, Ɛzɛkiyɛlɛ akale wɔɔmbɔ ɔsɔ tshɛ. Kakɔna kalembetshiya etenyi k’ɛnɛlɔ kɛsɔ? Ɛzɛkiyɛlɛ akahombe nshihodia dimɛna dimɛna losango lakandahombe mbewoya. Nde akahombe mbetawɔ losango lɔsɔ dia nde mbeya nsambisha. Oma laasɔ, dui dimɔtshi dia diambo diakasalema. Ɛzɛkiyɛlɛ nembetshiyaka ate: ‘Wɔɔmbɔ ɔsɔ waki mpɛ oko osanga.’ (Ɛzk. 3:3) Lande na? Nɛ dia le Ɛzɛkiyɛlɛ, nɛmɔ dia monga onyimpala wa Jehowa aki oko mpɛ kana dui dimɔtshi di’ɔngɛnɔngɛnɔ le nde. (Os. 19:8-11) Nde aki la lowando l’efula le Jehowa lo woho wakandetawɔ mbokambɛ oko omvutshi ande.

14. Kakɔna kakakimanyiya Ɛzɛkiyɛlɛ dia monga suke dia mbetawɔ ɔkɔndɛ ande?

¹⁴ L’ɔkɔngɔ wa laasɔ, Jehowa akatɛ Ɛzɛkiyɛlɛ ate: “Hokamɛ ɛtɛkɛta ami tshɛ wakotɛmi ndo djawɔ lo otema.” (Ɛzk. 3:10) Dia nde mbohɔka kɛnɛ kakafundama lo wɔɔmbɔ ɔsɔ, nde akahombe kanaka yimba dimɛna dimɛna la wɔ. Etena kakasale Ɛzɛkiyɛlɛ dui sɔ, mbetawɔ kande kakakeketshama. Ndo nto, dui sɔ diakokimanyiya dia nde nsambisha anto losango la wolo lɔsɔ. (Ɛzk. 3:11) Etena kakashihodia Ɛzɛkiyɛlɛ dimɛna dimɛna ndo kakandetawɔ losango la Nzambi, nde aki suke dia ntetemala nsambisha ndo nkotsha ɔkɛndɛ ande.​—Ɛdika la Osambo 19:14.

15. Dia sho mbikikɛ, kakɔna kakokaso mbidja “l’otema”?

¹⁵ Dia sho monga l’ekikelo l’olimu aso w’esambishelo, sho la wɔ pombaka ntetemala ndeshama l’ɛtɛkɛta wa Nzambi. Sho pombaka ntetemala mbidja kɛnɛ tshɛ katotɛ Jehowa “lo otema.” Ɛlɔ kɛnɛ, Jehowa ekɔ lo ntɛkɛta la so lo tshimbo y’Ɔtɛkɛta ande wakafundama, Bible. Ngande wakokaso ndjashikikɛ di’Ɔtɛkɛta wa Nzambi wekɔ lo ntetemala monga la shɛngiya lo tokanyi, lo nsaki ndo lo eyango aso?

16. Kakɔna kahombaso nsala la Ɔtɛkɛta wa Nzambi ndo ngande wakoka otema aso mbooshihodia?

¹⁶ Sho kondjaka wolo lo demba etena kalɛso mbo ya ndɛ ndo kakambayɔ dimɛna, woho akɔ waamɛ mbele etena kekaso Ɔtɛkɛta wa Nzambi ndo kakanaso lawɔ yimba, mbetawɔ  kaso keketshamaka. Ɔsɔ mbele wetshelo walanga Jehowa teetsha. Lo kɛnɛ kendana l’Ɔtɛkɛta ande, Jehowa nangaka dia sho ‘ndodia otema aso la wɔ,’ mbuta ate, nshihodia Ɔtɛkɛta akɔ dimɛna. Sho koka nsala dui sɔ lo tshimbo ya dɔmbɛlɔ, ya wadielo ndo y’okanelo wa yimba. Ntondotondo, sho nɔmbamaka dia nɔngɔsɔla otema aso dia mbidja tokanyi ta Nzambi lɔkɔ. Oma laasɔ, ko sho mbadia etenyi kɛmɔtshi ka Bible. L’ekomelo, sho memalaka yema dia nkana yimba ndo nkanyiya efula lo kɛnɛ kendana l’awui wadishaso. Ko etombelo akɔna wayonga la dui sɔ? Lam’ayototalekaka nshihodia Ɔtɛkɛta wa Nzambi, mbayotalekaka mbetawɔ kaso keketshama.

17. Lande na kele ekɔ ohomba kanaka yimba la kɛnɛ kadiaso lo Bible?

¹⁷ Lande na kele ekɔ ohomba mbadiaka Ɔtɛkɛta wa Nzambi ndo kanaka la wɔ yimba? Nɛ dia dui sɔ diayotosha wolo wele laso ohomba dia nsambisha losango la Diolelo kakianɛ ndo mbewoya losango la wolo la kilombo lakokaso mbewoya keema edja. Ndo nto, etena kakanaso yimba la waonga wa Jehowa w’amɛna, diɔtɔnganelo diasaso la nde diayotalekaka monga nge. Etombelo wayonga la dui sɔ ele, tayonga l’ɛngɔ kɛmɔtshi kele mɛtɛ mpɛ kana ka dimɛna, mbuta ate wɔladi wa l’etei k’otema ndo ɔngɛnɔngɛnɔ.​—Os. 119:103.

18. Kakɔna kayohomba anto wa l’ɛtshi kaso ka nkɛtɛ mbeya ndo lande na?

¹⁸ Ɛzɛkiyɛlɛ aki omvutshi, koko sho keema amvutshi. Koko sho tamboyashikikɛ dia ntetemala mbewoya losango lakasambiyama ndo lolamemi l’Ɔtɛkɛta ande wakafundama polo lam’ayokotsha olimu w’esambishelo lolango lande. Lam’ayokoka etena ka kilombo, anto wa l’ɛtshi kaso ka nkɛtɛ hawotoyala la shadiya ya mbuta ɔnɛ vɔ konongola ɔhɛmwɛlɔ kana ɔnɛ Nzambi kombadja yimba. (Ɛzk. 3:19; 18:23) Koko, vɔ wayeya dia losango lakatasambishaka lakaye oma le Nzambi.

19. Kakɔna kayotosha wolo dia nkotsha olimu aso?

¹⁹ Kakɔna kayotosha wolo dia nkotsha ɔkɛndɛ aso wa nsambisha? Awui asato wakɔ waamɛ wakakeketsha Ɛzɛkiyɛlɛ. Sho tetemalaka nsambisha nɛ dia sho mbeyaka dia takatomama oma le Jehowa, tekɔ lo nkondja wolo oma le nyuma k’ekila kaki Nzambi ndo tekɔ lo ndeshama la Ɔtɛkɛta wa Nzambi. L’ekimanyielo ka Jehowa, tekɔ lo keketshama dia nkotsha olimu aso ndo mbikikɛ “polo l’ekomelo.”​—Mat. 24:13.