1-2. a) Lande na kakokaso mbuta ɔnɛ Yeso akatɛnya yoho ya wɔdu ya mbohɔka nyɔi kande? b) Waonga akɔna wa Yeso wayangaso nsɛdingola?

ONDE wɛ koka nembetshiya kɛnɛ kasalema lo Eohwelo ka nyɔi ka Kristo kasalema ɔnɔnyi tshɛ? Aha la taamu, efula ka l’atei aso koka mbohɔ awui wasalema lo Dambo dia dikɔlɔ dia Nkumadiɔndjɔ. Lande na? Nɛ dia dambo sɔ bu dia kawotake. Koko, diɔ diekɔ dikambo di’ohomba efula. Diakɔ diele, sho koka ndjambola ɔnɛ: ‘Lande na kele dambo sɔ bu dia kawotake?’

² Etena kakandakambaka olimu ande la nkɛtɛ, Yeso akeyamaka oma lo woho wakandetshaka akambo wa mɛtɛ w’ohomba lo yoho ya wɔdu, yokɛma hwe ndo yele bu wolo nshihodia. (Mat. 7:28, 29) Woho akɔ waamɛ mbele nde akatɛnya yoho ya wɔdu, koko y’ohomba efula ya mbohɔka * nyɔi kande. Nyɛsɔ tɔsɛdingole la yambalo tshɛ dambo dia Eohwelo ndo awui amɔtshi wakate ndo wakasale Yeso. Tayoleka nshihodia woho wele Yeso mɛtɛ la okitshakitsha, la dihonga ndo la ngandji ndo tayeya woho wakokaso ndeka mbookoya.

3. Oko wɔtɛkɛtamidiɔ lo Mateo 26:26-28, ngande waki dambo dia Eohwelo diakahɔhɔla Yeso komonga dia kawotake, ndo mapa la vinyɔ yaki didjidji dia na?

³ Yeso akahɔhɔla Eohwelo ka nyɔi kande kaamɛ l’apɔstɔlɔ ande wa kɔlamelo 11. Nde akɔshi diangɔ dimɔtshi diakatshikala lo dambo di’Elekanelo ndo akasale la diɔ Eohwelo kaha  kawotake. (Adia Mateo 26:26-28.) Nde akakambe paka la mapa waha la wodoya ndo la vinyɔ yaki la wɔ. Yeso akatɛ apɔstɔlɔ ande ɔnɛ mapa la vinyɔ shɔ yaki didjidji dia demba ndo dikila diande dia kokele, diaki suke la kimɔma lo dikambo diawɔ. Ondo apɔstɔlɔ komamba l’ɔtɛ waki dambo di’ohomba di’oyoyo sɔ aha kawotake. Lande na?

4. Ngande watokimanyiya dako diakasha Yeso Maata dia nshihodia lande na kakasale Yeso dambo dia Eohwelo diaha kawotake?

⁴ Tɔsɛdingole kɛnɛ kakatombe ngɔndɔ mɔtshi la ntondo, lo ɔnɔnyi wa sato w’olimu wa Yeso, etena kakandatshu dia tembola angɛnyi ande wa ma ma lakawɔ, mbuta ate Lazaro, Maata ndo Mariya. Etena kakawasawolaka, Yeso akatatɛ mbetsha. Maata aki laawɔ, koko yimba yande yakekɔ lo katɛ ɔngɛndangɛnda ande wa lokumu dambo dia woke. Etena kakandɛnyi dui sɔ, Yeso akangola Maata la ngandji tshɛ, lo mbokimanyiya dia mbeya ɔnɛ aha tena tshɛ mbele dambo dia lokumu ohomba. (Luka 10:40-42) L’ɔkɔngɔ diko, laasɔ ko ambotshikala wenya ɛmɔtshi eto ntondo ka nyɔi kande k’olambo, Yeso akakambe la dako diande ndamɛ. Nde akasale dia dambo dia Eohwelo monga diaha kawotake. Dui sɔ atotɛdiɔ lo dikambo dia Yeso?

5. Woho waki dambo sɔ komonga dia kawotake ɛnyadiɔ lo dikambo dia Yeso, ndo ngande wɔtɔnɛ dui sɔ la Filipɛ 2:5-8?

⁵ L’awui tshɛ wakate ndo wakasale Yeso, nde aki l’okitshakitsha. Diakɔ diele, hatokoke mamba dia nde mɛnya okitshakitsha w’efula l’otsho w’ekomelo ka lɔsɛnɔ lande lanɛ la nkɛtɛ. (Mat. 11:29) Nde akeyaka dia nde aki suke la nambola olambo woleki woke l’ɔkɔndɔ w’anto ndo ɔnɛ Jehowa akahombe mboolola dia tonga lo dihole dia lotombo l’olongo. Kaanga mbakandeyaka dui sɔ, nde kokotola yambalo oya le nde lo nɔmba dia salaka Eohwelo ka nyɔi kande lo yoho ya kawotake. Koko, nde akatɛ ambeki ande dia vɔ pombaka salaka Eohwelo kande mbala ɔtɔi l’ɔnɔnyi l’ekimanyielo ka dambo dia tshitshɛ sɔ. (Jni. 13:15; 1 Kɔr. 11:23-25) Dambo diaha kawotake, koko di’ohomba efula mɛnyaka dia Yeso komonga la ndjadiya. Sho koka monga l’ɔngɛnɔngɛnɔ l’ɔtɛ wele okitshakitsha ekɔ l’atei wa waonga wa diambo wa Nkumekanga kaso ka l’olongo.​—Adia Filipɛ 2:5-8.

6. Ngande wakokaso mbokoya okitshakitsha wa Yeso etena kahomanaso l’ehemba?

⁶ Ngande wakokaso mbokoya okitshakitsha wa Yeso? Lo mbetsha wahɔ w’anto akina lo dihole dia ntondo. (Flpɛ. 2:3, 4) Tokanyiya nto dikambo di’otsho w’ekomelo wa  lɔsɛnɔ la Yeso la nkɛtɛ. Yeso akeye dia nde aki suke la mvɔ nyɔi ka paa efula, koko nde akayakiyanya efula lo dikambo di’apɔstɔlɔ ande wa kɔlamelo waki suke la monga la lɔkɔnyɔ lo dikambo diande. Diakɔ diele, nde aketsha otsho w’ekomelo lo mbaetsha, mbakeketsha ndo mbasamba. (Jni. 14:25-31) L’okitshakitsha tshɛ Yeso akaleke ndjakiyanya lo wahɔ w’anto akina oleki wande hita. Ɔsɔ ekɔ mɛtɛ ɛnyɛlɔ ka dimɛna efula le so!

7. Ngande wakɛnya Yeso dihonga di’efula yema tshitshɛ l’ɔkɔngɔ wa nde mpɔhɔla Dambo dia dikɔlɔ dia Nkumadiɔndjɔ?

⁷ Yema tshitshɛ l’ɔkɔngɔ wa Yeso mpɔhɔla Dambo dia dikɔlɔ dia Nkumadiɔndjɔ, nde akɛnya dihonga di’efula. Lo ngande? Yeso aketawɔ dia lolango la She kotshama lo dikambo diande, kaanga mbakandeyaka ɔnɛ nsala dui sɔ diakahombe mbokonya dia mvɔ l’ɔtɛ wa dui dia sɔnyi di’ɔnɛ ambɔtɛnga Nzambi. (Mat. 26:65, 66; Luka 22:41, 42) Yeso akalame olowanyi wa kokele dia nɛmiya lokombo la Jehowa, nsukɛ lowandji la Nzambi ndo ndjiholɛ anto wayatshumoya mboka ka lɔsɛnɔ la pondjo. L’etena kakɔ kaamɛ, Yeso akalɔngɔsɔla ambeki ande lo dikambo dia kɛnɛ kaki suke la mbakomɛ.

8. a) Kakɔna kakatɛ Yeso apɔstɔlɔ ande wa kɔlamelo? b) L’ɛnɔnyi wakayelana la nyɔi kande, ngande wakayele ambeki wa Yeso ɛnyɛlɔ kande ka dihonga?

⁸ Yeso akɛnya nto dihonga lo woho wakinde kondjakiyanya lo kɛnɛ kakahombe mbokomɛ ndo lo woho wakandayasha l’ehomba w’apɔstɔlɔ ande wa kɔlamelo. Dambo diaha kawotake diakandahɔhɔla l’ɔkɔngɔ wa ntondja Judasɛ, diakahombe mbohola wanɛ wakahombe ndjonga ambeki ande w’akitami ndo lo sheke y’oyoyo wahɔ waya oma lo dikila dia Yeso diakatshulwama.  (1 Kɔr. 10:16, 17) Dia mbakimanyiya dia ntshikala la kɔlamelo ko tonga la Yeso l’olongo, Yeso akatɛ ambeki ande kɛnɛ kakandalongamɛka nde la She oma le wɔ. (Jni. 15:12-15) Yeso akatɛ apɔstɔlɔ nto dikambo dia ehemba wakaakongɛka la ntondo. Oma laasɔ, nde akaakeketsha dia ndjela ɛnyɛlɔ kande ate: “Nyonge la dihonga!” (Jni. 16:1-4a, 33) Ɛnɔnyi efula l’ɔkɔngɔ, ambeki wa Yeso wakatetemala ndjela ɛnyɛlɔ kande ka ndjahondja ndo wakɛnya dihonga. Kaanga mbakaweyaka ɔnɛ wayosoyama, vɔ wakasukanɛ lo ehemba efula wakahomana la wɔ.​—Hɛb. 10:33, 34.

9. Ngande wakokaso mbokoya Yeso lo monga la dihonga?

⁹ Woho akɔ waamɛ mbele, ɛlɔ kɛnɛ sho ndjelaka ɛnyɛlɔ ka Yeso lo monga la dihonga. Ɛnyɛlɔ, nɔmbamaka dihonga dia nkimanyiya anangɛso wahɛnyahɛnyama l’ɔtɛ wa mbetawɔ kawɔ. Lo tena dimɔtshi, anangɛso koka mbidjama lo lokanu aha la losembwe. Etena katomba dui dia ngasɔ, sho pombaka nsala tshɛ kakokaso nsala lo dikambo diawɔ ndo mbawamɛ. (Flpɛ. 1:14; Hɛb. 13:19) Yoho kina yɛnyaso dia tekɔ la dihonga ele ntetemala nsambisha “la dihonga.” (Ets. 14:3) L’ɛnyɛlɔ ka Yeso, sho ndjashikikɛka dia nsambisha losango la Diolelo oyadi anto wayotona kana wayotɔhɛnyahɛnya. Koko lo tena dimɔtshi, sho mbeyaka nshisha dihonga. Akokaso nsala?

10. Lo mingu ya la ntondo ka Eohwelo, kakɔna kahombaso nsala, ndo lande na?

¹⁰ Sho koka nkeketsha dihonga diaso lo kanyiyaka dikambo di’elongamelo katosha olambo w’oshinga w’etshungwelo wa Kristo. (Jni. 3:16; Ɛf. 1:7) Lo mingu ya la ntondo ka Eohwelo, tekɔ la diaaso dia laande dia nkɛnɛmɔla lowando laso l’ɔtɛ w’oshinga w’etshungwelo. L’etena kɛsɔ, tetemala mbadia wadielo wa Bible wendana la Eohwelo, lɔmbaka ndo kanaka yimba lo akambo wakete lo nshi ya nyɔi ka Yeso. Oma  laasɔ, etena kayotosala Dambo dia dikɔlɔ dia Nkumadiɔndjɔ, tayoleka nshihodia kɛnɛ kalembetshiya mapa la vinyɔ ya lo Eohwelo yele didjidji dia olambo wa diambo ɔsɔ. Etena kashihodiaso kɛnɛ kakatosalɛ Jehowa nde la Yeso ndo kashihodiaso wahɔ wakondjaso sho la anto wokaso ngandji, elongamelo kaso ka lo nshi yayaye ndekaka nkeketala ndo sho tshutshuyamaka dia mbikikɛ la dihonga tshɛ polo l’ekomelo.—Hɛb. 12:3.

11-12. Polo lanɛ kakɔna kamboteka?

¹¹ Polo lanɛ tambeka dia Dambo dia dikɔlɔ dia Nkumadiɔndjɔ toholaka aha tsho oshinga w’etshungwelo wa nɛmɔ, koko ndo waonga wa diambo wa Yeso wa okitshakitsha ndo dihonga. Shi sho koka monga la lowando lo woho watetemala Yeso nkɛnɛmɔla waonga asɔ oko wende Ɔlɔmbɛdi aso wa laadiko wa l’olongo, walɔmba dikambo diaso! (Hɛb. 7:24, 25) Dia mɛnya lowando laso l’oma k’ɛse otema, sho pombaka mbohɔka nyɔi ka Yeso la kɔlamelo tshɛ oko wakandadjanga. (Luka 22:19, 20) Sho salaka dui sɔ lo lushi lɔtɔnɛ la ngɔndɔ ka Nisana 14, datɛ dioleki ohomba dia l’ɔnɔnyi.

¹² Sho koka nshihodia oma lo woho wele Dambo dia dikɔlɔ dia Nkumadiɔndjɔ bu dia kawotake dionga dikina diakatshutshuya Yeso dia mvɔ lo dikambo diaso. Etena kakandasɛnaka la nkɛtɛ, nde akeyamaka oma lo dionga sɔ. Naa dionga diakɔ?

13. Ngande walembetshiya Joani 15:9 ndo 1 Joani 4:8-10 ngandji kakɛnya Jehowa la Yeso, ndo waa na wakondja wahɔ oma lo ngandji kawɔ?

¹³ Yeso akakɛnɛmɔla lo yoho ya kokele ngandji ka Jehowa k’efula oya le so lo dui tshɛ diakandasalaka. (Adia Joani 15:9; 1 Joani 4:8-10.) Laadiko di’awui asɔ tshɛ, Yeso akatshutshuyama l’otema ande dia nkimɔ lɔsɛnɔ lande dikambo diaso. Oyadi tekɔ akitami kana “ɛkɔkɔ ekina,” sho kondjaka wahɔ oma lo ngandji kakatɛnya Jehowa la Ɔnande lo tshimbo y’olambo ɔsɔ. (Jni. 10:16; 1 Jni. 2:2) Tokanyiya nto lo kɛnɛ kendana la diangɔ diakambema lo dambo dia Eohwelo, diɔ mɛnyaka ngandji ndo nɛmɔ diasha Yeso ambeki ande. Lo ngande?

14. Lo woho akɔna wakɛnya Yeso ambeki ande ngandji?

¹⁴ Yeso akɛnya ngandji kakandoke ambeki ande w’akitami lo nsala, aha sɛlɛmɔnyi ka wolo, koko dambo diaha kawotake dia vɔ salaka. Oko wakatetaka nshi, ambeki w’akitami asɔ wakahombe salaka Eohwelo ɔnɔnyi tshɛ, oyadi l’atei w’akambo wotshikitanyi, mbidja ndo lokanu. (Ɛny. 2:10) Onde vɔ wakakoke nkitanyiya Yeso? Eelo!

15-16. Ngande wakonge anto amɔtshi l’akoka wa nsala Dambo dia dikɔlɔ dia Nkumadiɔndjɔ oyadi l’atei w’ekakatanu?

¹⁵ Oma ko ntambe ka ntondo polo nshi nyɛ, Akristo wa mɛtɛ salaka la wolo dia mbohɔ nyɔi ka Yeso. Vɔ ndjelaka yoho yahomba Dambo dia dikɔlɔ dia Nkumadiɔndjɔ salema lo yoho yoleki dimɛna yakokawɔ nsala, tena dimɔtshi oyadi l’atei w’ekakatanu. Tɔsɛdingole bɛnyɛlɔ diayela nɛ. Etena kakinde ndamɛ lo lokanu la tshitshɛ la Chine, ɔnangɛso Harold King akayange yoho mɔtshi yakandakoke nsala Eohwelo. Nde akalɔngɔsɔla Eohwelo lo woshɛshɛ lo nkamba la diangɔ diaki la nde. Ndo nto, nde akakambe akumi la yambalo tshɛ dia mbeya datɛ dia Eohwelo. Etena kakakoke lushi la Eohwelo, ndamɛ lo lokanu akembe osambo, akasale dɔmbɛlɔ ndo akasha sawo di’oma l’Afundelo.

¹⁶ Tɔsɛdingole ɛnyɛlɔ kekina. Olui ɔmɔtshi w’akadiyɛso wakadjama lo mpango kɛmɔtshi ka lokanu etena kakalɔmaka Ta dia hende di’andja w’otondo, wakadje nsɛnɔ yawɔ lo waale l’oyango wa nsala Dambo dia dikɔlɔ dia Nkumadiɔndjɔ. Koko, lam’ele diangɔ diakambema lo diaaso sɔ bu dia  kawotake, vɔ wakonge l’akoka wa nsala Eohwelo lo woshɛshɛ. Vɔ mbutaka ɔnɛ: “Takemala kaamɛ oko anto wele l’otshimbedi, takakitsha kihona l’atei mbala dihɔndɔ dia wɛma ko nkitsha mapa la vinyɔ laadiko. Takahɛtsha buji lo shambrɛ, nɛ dia dja ya kura yakakoke nkonya anto dia mbeya kɛnɛ kakatasalaka. . . . Takanyomohola dɔkɔlɔkɔ diaso le Shɛso dia nkamba la wolo aso tshɛ dia mamɛ lokombo Lande l’ekila.” Ɔsɔ mɛtɛ aki mbetawɔ ka mamba kakawɛnya! Ande ngandji kakɛnya Yeso etena kakandasale dia sho monga l’akoka wa salaka Eohwelo oyadi l’atei w’ekakatanu lee!

17. Ambola akɔna wakokaso ndjaoka?

¹⁷ Oko wambosukana Eohwelo, ayonga ohomba sho ndjaoka ambola wayela anɛ: ‘Ngande wakokami ndeka mbokoya Yeso dimɛna lo nkɛnɛmɔla ngandji? Onde dimi ndekaka nkanyiya dikambo di’ehomba w’asekami atɛmɔdi oleki woho wakanyiyami dikambo di’ehomba ami? Onde dimi nongamɛka awui efula oma le anangɛmi l’akadiyɛmi oleki kɛnɛ kakokawɔ nsala, ko kana dimi mbeyaka elelo awɔ?’ Nyɛsɔ tokoyake Yeso nshi tshɛ ndo tokanake “kandji.”​—1 Pe. 3:8.

18-19. a) Lo na akokaso monga l’eshikikelo? b) Kakɔna kamboyoyashikɛ dia nsala?

¹⁸ Didjango dia salaka Eohwelo ka nyɔi ka Kristo hotshikalaka pondjo. ‘Lam’ayoya’ Yeso lo mfɔnu ka woke, nde ayotshumanya atshikadi wa “asɔnami” ande otsha l’olongo ndo Eohwelo kayokomɛ salema.​—1 Kɔr. 11:26; Mat. 24:31.

¹⁹ Kaanga hatoyosala dambo dia Eohwelo, sho koka monga l’eshikikelo ɔnɛ ekambi wa Jehowa wayohɔka dambo diaha kawotake sɔ oko didjidji dia okitshakitsha, dihonga ndo ngandji koleki tshɛ kahatɛnyaka onto. Aha la taamu l’etena kɛsɔ, wanɛ wakasalaka dambo dia dimɛna efula sɔ wayɔkɔndɔlɛka anto wayonga la lɔsɛnɔ dia vɔ la wɔ nkondja wahɔ. Koko dia nkondja wahɔ oma ko kakianɛ oma lo dambo sɔ, sho pombaka ndjashikikɛ dia mbokoya ɛnyɛlɔ ka Yeso ka okitshakitsha, dihonga ndo ngandji. Naka sho nsala ngasɔ, kete tayonga l’eshikikelo ɔnɛ tayolongola difuto oma le Jehowa.​—2 Pe. 1:10, 11.