1-2. a) Kakɔna kɛna Jehowa etena kasangana miliyɔ y’anto lo Dambo dia dikɔlɔ dia Nkumadiɔndjɔ? (Enda osato wele lo lohoso.) b) Kakɔna kayotɔsɛdingola lo sawo nɛ?

TOKANYIYA kɛnɛ kɛna Jehowa etena kasangana miliyɔ y’anto wa l’andja w’otondo kaamɛ lo Dambo dia dikɔlɔ dia Nkumadiɔndjɔ. Nde hende tsho lofulo la woke l’anto, koko nde mɛnaka onto l’onto lakaye dia ndjosangana. Ɛnyɛlɔ, nde mɛnaka wanɛ wokongaka la kɔlamelo lo mbɔtɔka losanganya lakɔ ɔnɔnyi tshɛ. L’atei awɔ mbakoka monga ndo anto waya oyadi wekɔ la ɔlɔshamelo wa wolo. Anto akina hawoye mbala la mbala lo nsanganya kina, koko vɔ mbɔsaka dia mbɔtɔ lo Eohwelo ekɔ dui di’ohomba efula. Jehowa mɛnaka nto wanɛ waya lo Eohwelo ondo mbala ka ntondo tena dimɔtshi l’ɔtɛ walangawɔ mbeya akambo.

² Lo mɛtɛ, Jehowa ngɛnangɛnaka etena kɛnande anto efula wɔtɔ lo Eohwelo. (Luka 22:19) Koko, Jehowa hayakiyanya ntondotondo dikambo dia lofulo l’anto waya. Nde ndekaka ndjakiyanya dikambo dia ɔkɔkɔ wayawɔ; mbuta ate kɛnɛ kaatshutshuya mboleki ohomba le Jehowa. Lo sawo nɛ, tayɔsɛdingola dimbola di’ohomba efula nɛ: Lande na kahatɔtɔ tsho lo Eohwelo kasalema ɔnɔnyi tshɛ, koko sho mbɔtɔka ndo lo nsanganya yasalema lomingu la lomingu yalɔngɔsɔlɛ Jehowa wanɛ wawoka ngandji?

3-4. a) Lande na kɔtɔso nsanganya? b) Kakɔna kɛnya wɔtwɛlɔ aso lo nsanganya dikambo diaso? c) Lo ndjela kɛnɛ kata 1 Kɔrɛtɔ 11:23-26, lande na kahatahombe mbetsha Eohwelo?

³ Sho mbɔtɔka nsanganya ya l’etshumanelo ntondotondo nɛ dia yɔ yekɔ etenyi k’ɔtɛmwɛlɔ aso. Sho mbɔtɔka nsanganya nto nɛ dia Jehowa tetshaka lɛkɔ. Anto wele l’otako  tonaka kanyi y’ɔnɛ vɔ pombaka mbetshama dui dimɔtshi. (3 Jni. 9) Otshikitanyi la wɔ, sho nomɔlomɔka dia mbetshama oma le Jehowa la okongamelo wakamba la nde.—Isa. 30:20; Jni. 6:45.

⁴ Wɔtwɛlɔ aso lo nsanganya mɛnyaka dia tekɔ l’okitshakitsha, suke ndo mbetawɔka mbetshama. La dikɔlɔ dia Eohwelo ka nyɔi ka Yeso, sho mbɔtɔka losanganya l’ohomba lɔsɔ aha tsho nɛ dia sho pombaka liɔtɔ, koko ndo l’ɔtɛ wakitanyiyaso l’okitshakitsha tshɛ didjango dia Yeso diata ɔnɛ: “Kanyotshake ɔnkɔnɛ dia mbohɔkami.” (Adia 1 Kɔrɛtɔ 11:23-26.) Losanganya lɔsɔ keketshaka elongamelo kaso ka lo nshi yayaye ndo toholaka woke woke wa ngandji katoka Jehowa. Koko, Jehowa mbeyaka dia tekɔ l’ohomba wa nkondja wolo ndo ekeketshelo, aha mbala ɔtɔi keto l’ɔnɔnyi. Diakɔ diele, nde tɔlɔngɔsɔlɛka nsanganya lomingu tshɛ ndo tokeketshaka dia sho ndjiɔtɔka. Okitshakitsha totshutshuyaka dia nkitanyiya. Sho mbetshaka wenya efula lomingu tshɛ dia nɔngɔsɔla ndo mbɔtɔ nsanganya yakɔ.

5. Lande na kele ketawɔ anto wele l’okitshakitsha leeta la Jehowa?

⁵ Ɔnɔnyi tshɛ, anto efula wele l’okitshakitsha mbetawɔka leeta la Jehowa la mbetshama oma le nde. (Isa. 50:4) Vɔ mbetawɔka mbɔtɔ lo Eohwelo, ndo vɔ ndjotatɛka mbɔtɔ lo nsanganya kina. (Zɛk. 8:20-23) Sho tshɛ ngɛnangɛnaka mbetshama ndo nɔmbwama oma le Jehowa, “okimanyedi [aso] ndo ombitshi [aso].” (Os. 40:17) Ko kakɔna kakoka ndeka tɔngɛnyangɛnya, kana ndeka ohomba, laadiko dia mbetawɔ leeta la mbetshama oma le Jehowa la Yeso, Ɔnande lalangande efula?​—Mat. 17:5; 18:20; 28:20.

6. Ngande wele okitshakitsha wakakimanyiya pami kɛmɔtshi dia mbɔtɔ lo Eohwelo?

⁶ Ɔnɔnyi tshɛ, sho mbidjaka welo dia mbelɛ anto efula dia ndjɔtɔ lo Eohwelo ka nyɔi ka Yeso. Anto efula wele l’okitshakitsha kondjaka wahɔ lo mbetawɔ leeta laso. Tɔsɛdingole ɛnyɛlɔ kɛmɔtshi. Ambeta ɛnɔnyi efula, pami kɛmɔtshi akalongola dikatshi dia leeta l’oya lo Eohwelo, koko nde akatɛ ɔnangɛso lakawoshadiɔ ɔnɛ nde hatokoka ntshɔ. Koko, la dikɔlɔ dia Eohwelo ɔnangɛso akakashimɔ dia mɛna pami kakɔ ayakɛndakɛnda lo Mbalasa ka Diolelo. Pami kakɔ akambe dia mɛna woho wakawolongola ko nde akayotatɛ mbɔtɔ nsanganya yaso ya lomingu la lomingu. Lo mɛtɛ, nde aketsha paka nsanganya shato tsho lo ɔnɔnyi w’otondo wakayelana. Kakɔna kakookimanyiya dia nsala akambo lo yoho ya dimɛna ngasɔ? Nde aki mɛtɛ la memakana dia ntshikitanya ekanelo kande. Ɔnangɛso lakawelɛ akayota ate: “Nde ekɔ pami kele l’okitshakitsha w’efula.” Aha la taamu, Jehowa akakotola pami kɛsɔ dia mbɔtɛmɔla ndo kakianɛ nde aya ɔnangɛso lambobatizama.​—2 Sa. 22:28; Jni. 6:44.

7. Ngande wakoka kɛnɛ kekaso lo nsanganya ndo kadiaso lo Bible tokimanyiya dia monga l’okitshakitsha?

⁷ Kɛnɛ kekaso lo nsanganya ndo kɛnɛ kadiaso lo Bible koka tokimanyiya dia monga l’okitshakitsha. Lo mingu ya la ntondo ka Eohwelo, mbala efula nsanganya yaso ndekaka ntɛkɛta dikambo dia ɛnyɛlɔ ka Yeso ndo okitshakitsha wakandakɛnɛmɔla lo nkimɔ lɔsɛnɔ lande oko oshinga w’etshungwelo. Ndo lo nshi ya la ntondo ka Eohwelo, sho keketshamaka dia mbadia ɛkɔndɔ wa lo Bible wendana l’akambo wakete lo nshi ya nyɔi ndo eolwelo ka Yeso. Kɛnɛ kekaso lo nsanganya shɔ, ndo kɛnɛ kadiaso lo ɛkɔndɔ wa lo Bible ɛsɔ, fudiaka lowando laso lo olambo wakakimɔ Yeso dikambo diaso. Sho tshutshuyamaka dia mbokoya dionga diande di’okitshakitsha ndo dia nsala lolango la Jehowa oyadi etena keso l’okakatanu.—Luka 22:41, 42.

8. Ngande wakɛnya Yeso dihonga?

⁸ Sho salaka la wolo nto dia mbokoya Yeso lo monga la dihonga. Tokanyiya yema lo dikambo dia dihonga diakɛnya Yeso nshi ya la ntondo ka nyɔi kande. Nde akeyaka dimɛna ɔnɛ keema edja atunyi ande wayowosha sɔnyi, wayowɔkɔmɔla ndo wayowodiaka. (Mat. 20:17-19) Koko, nde aketawɔ ndjakema. Lam’akakoke etena kɛsɔ, nde akatɛ apɔstɔlɔ ande wa kɔlamelo waki kaamɛ la nde lo Ngɛtɛsɛmanɛ ate: “Nyonee, nyoyete totshu. Nyolonge, ofungi ami aya suke la nkoma.” (Mat. 26:36, 46) Ndo etena kakaye olui w’anto waki la dihomɔ dia ta dia ndjowonda, nde akatombe la ntondo kawɔ, akayaeyanya ndo akadjangɛ asɔlayi dia ntshika apɔstɔlɔ ande dia vɔ ntshɔ. (Jni. 18:3-8) Ande dihonga dia diambo diakɛnya Yeso lee! Ɛlɔ kɛnɛ, Akristo w’akitami ndo ɛkɔkɔ ekina salaka la wolo dia mbokoya Yeso lo monga la dihonga. Lo ngande?

9. a) Lande na kakokaso monga l’ohomba wa dihonga dia mbɔtɔka nsanganya mbala la mbala? b) Ngande wakoka ɛnyɛlɔ kaso monga la shɛngiya le anangɛso wele lo lokanu l’ɔtɛ wa mbetawɔ kawɔ?

⁹ Dia mbɔtɔka nsanganya mbala la mbala, sho koka monga l’ohomba wa mɛnya dia tekɔ la dihonga la ntondo k’ekakatanu. Anangɛso l’akadiyɛso amɔtshi mbɔtɔka nsanganya oyadi wekɔ lo diɛnɛ la lɔkɔnyɔ, ɔkɔmwɛlɔ kana ekakatanu wendana la yoonge. La dihonga tshɛ, akina mbɔtɔka nsanganya oyadi wekɔ lo ndɔshama wolo oma le ase nkumbo kana ewandji wa lɛɛta. Tokanyiya yema woho wonga ɛnyɛlɔ kaso la shɛngiya le anangɛso wele lo lokanu l’ɔtɛ wa mbetawɔ kawɔ. (Hɛb. 13:3) Etena kokawɔ dia tekɔ lo ntetemala kambɛ Jehowa oyadi ehemba akɔna wele la so, vɔ keketalaka dia nama mbetawɔ, dihonga ndo olowanyi awɔ. Ɔpɔstɔlɔ Pɔɔlɔ akayaoke woho akɔ waamɛ. Etena kakinde lo lokanu la Rɔmɔ, nde akangɛnangɛnaka etena tshɛ kakandokaka dia anango wakakambɛka Nzambi la kɔlamelo tshɛ. (Flpɛ. 1:3-5, 12-14) Yema tshitshɛ la ntondo kana yema tshitshɛ l’ɔkɔngɔ wa nde tondjama oma lo lokanu, Pɔɔlɔ akafundɛ ase Hɛbɛru mukanda. Lo mukanda ɔsɔ nde akakeketsha Akristo asɔ wa kɔlamelo ɔnɛ “ngandji . . . k’onto l’ɔnango katetemale” ndo aha ntshika nsangana kaamɛ.​—Hɛb. 10:24, 25; 13:1.

10-11. a) Waa na wahombaso mbelɛka oya lo Eohwelo? b) Ɔkɔkɔ akɔna watanaso lo Ɛfɛsɔ 1:7 watokimanyiya dia nsala dui sɔ?

¹⁰ Sho mɛnyaka dia tekɔ la dihonga etena kelɛso ewotɔ aso, asekaso wa l’olimu ndo asukanyi aso oya lo Eohwelo. Lande na kelɛso anto asɔ? Tekɔ la lowando l’efula l’ɔtɛ wa kɛnɛ kakatosalɛ Jehowa la Yeso diakɔ diele sho nangaka mɛtɛ mbelɛ anto akina dia vɔ ndjɔtɔ lo Eohwelo. Sho nangaka dia vɔ mbeka woho wa vɔ lawɔ nkondja wahɔ oma lo “ɔlɔlɔ . . . waheyama mbɛdika” wa Jehowa lo tshimbo ya oshinga w’etshungwelo.—Adia Ɛfɛsɔ 1:7; Ɛny. 22:17.

¹¹ Etena kɛnyaso dia tekɔ la dihonga lo sanganaka kaamɛ, sho mɛnyaka nto dionga dikina di’ohomba efula diɛnya Nzambi nde la Ɔnande lo toho ta diambo.

12. a) Ngande wakeketsha nsanganya yaso ngandji kokaso Jehowa la Yeso? b) Kakɔna katokeketsha 2 Kɔrɛtɔ 5:14, 15 dia nsala dia mbokoya Yeso?

¹² Ngandji kokaso Jehowa ndo Yeso totshutshuyaka dia mbɔtɔka nsanganya. Oma laasɔ, kɛnɛ kekaso lo nsanganya fudiaka ngandji kokaso Jehowa nde la Ɔnande. Lo nsanganya vɔ toholaka mbala la mbala kɛnɛ kakatosalɛ Jehowa nde la Ɔnande. (Rɔmɔ 5:8) Eohwelo toholaka lo yoho ya laande woke woke wa ngandji kawɔ, oyadi le wanɛ wahatashihodia ohomba wele l’oshinga w’etshugwelo. Diɛsɛ la lowando l’efula lele la so, sho salaka la wolo dia mbokoya Yeso oma lo yoho yaso ya lɔsɛnɔ la lushi la lushi. (Adia 2 Kɔrɛtɔ 5:14, 15.) Laadiko dia laasɔ, etema aso totshutshuyaka dia ntombola Jehowa l’ɔtɛ wakandakimɔ oshinga w’etshungwelo. Yoho mɔtshi yakokaso mbotombola ele lo mbishaka kɔmatɛrɛ y’oma k’ɛse otema lo nsanganya yaso.

13. Ngande wakokaso mɛnya dia sho mbokaka Jehowa l’Ɔnande ngandji k’efula? Lembetshiya.

¹³ Sho koka mɛnya ngandji k’efula kokaso Jehowa la Ɔnande, lo monga suke dia ndjahondja lo dikambo diawɔ. Mbala efula, sho pombaka ndjahondja lo toho totshikitanyi dia mbɔtɔka nsanganya yaso. Tshumanelo efula salaka losanganya lɔmɔtshi l’ekomelo ka lushi l’olimu etena kele ondo efula l’atei aso wambɔlɛmba. Ndo losanganya lokina salemaka lo wikɛndɛ etena kele anto akina lo diomuyelo. Onde Jehowa mɛnaka dia tekɔ lo mbɔtɔ nsanganya yaso oyadi tambɔlɛmba? Lo mɛtɛ nde mɛnaka! Kɛnɛ kele mɛtɛ ele, lo yɛdikɔ yatataleke mbidja welo, mbataleke Jehowa mbɔsa ngandji kawokaso la nɛmɔ.​—Makɔ 12:41-44.

14. Ngande wakatotshikɛ Yeso ɛnyɛlɔ ka dimɛna efula lo mɛnya ngandji ka ndjahondja?

¹⁴ Yeso akatotshikɛ ɛnyɛlɔ ka dimɛna efula lo mɛnya ngandji ka ndjahondja. Nde kombetawɔ tsho dia mvɔ lo dikambo di’ambeki ande, koko nde aketawɔ nto dia sɛnaka lushi la lushi lo mbetshaka wahɔ awɔ la ntondo ka wande hita. Ɛnyɛlɔ, nde aki kaamɛ l’ambeki ande kaanga etena kakandalɛmbɛ kana kakinde la lonyangu. (Luka 22:39-46) Ndo nde akaleke mbidja yimba lo kɛnɛ kakandakoke mbisha anto akina, koko aha lo kɛnɛ kakandakoke nkondja oma le wɔ. (Mat. 20:28) Naka sho mbokaka Jehowa ndo anangɛso ngandji k’efula, kete tayosala kɛnɛ tshɛ kakokaso nsala dia mbɔtɔ lo Dambo dia dikɔlɔ dia Nkumadiɔndjɔ ndo nsanganya kina tshɛ ya l’etshumanelo.

15. Le waa na wayashaso lo yoho ya laande dia mbakimanyiya?

 ¹⁵ Sho tekɔ ase nkumbo ɔtɔi k’Akristo wa mɛtɛ k’onto l’ɔnango ka l’andja w’otondo, ndo sho ngɛnangɛnaka mbetsha wenya efula dia mbelɛ anto akina dia ndjonga lo nkumbo kaso. Koko, sho ndjashaka lo yoho ya laande dia nkimanyiya wanɛ “wotɔ la so lo mbetawɔ” koko wambɔla. (Ngal. 6:10) Sho mɛnyaka ngandji kawaokaso lo mbakeketsha dia mbɔtɔka nsanganya yaso djekoleko Eohwelo. L’ɛnyɛlɔ ka Jehowa la Yeso, sho ngɛnangɛnaka efula etena kakalola onto ɔmɔtshi lakɔlɛ le Jehowa Shɛso ndo Olami aso woludi la ngandji.​—Mat. 18:14.

16. a) Ngande wakokaso keketshana onto la wonyande, ndo kakɔna kayotosalɛ nsanganya yaso? b) Lande na kele ɔnɛ ekɔ etena ka dimɛna ka l’ɔnɔnyi ka mbohɔ ɛtɛkɛta wa Yeso wele lo Joani 3:16?

¹⁶ Lo mingu yayaye, elɛ anto efula dia ndjɔtɔ lo Eohwelo Lushi la tanu la dikɔlɔ, Ngɔndɔ ka nɛi 19, 2019. (Enda kiombo yele l’ɔtɛ a dui ɔnɛ: “ Onde wɛ ayowaelɛ?”) Nyɛsɔ tokeketshanake tena tshɛ onto la wonyande lo mbɔtɔka mbala la mbala lo nsanganya tshɛ yatɔlɔngɔsɔlɛ Jehowa. Oko wamboleka ekomelo ka dikongɛ nɛ nsukana, sho nangaka dia nsanganya yaso tokimanyiya dia nama okitshakitsha, dihonga ndo ngandji. (1 Tɛs. 5:8-11) Ɔnkɔnɛ, nyɛsɔ tɛnya l’etema aso tshɛ woho wayaokaso dikambo dia Jehowa nde l’Ɔnande l’ɔtɛ wakawatoke ngandji k’efula!​—Adia Joani 3:16.