LUSHI la sato la pindju, Ngɔndɔ ka ntondo 24, 2018, ase nkumbo ka Bɛtɛlɛ ka l’États-Unis ndo ka la Canada wakonge l’ɔngɛnɔngɛnɔ dia mpokamɛ diewoyelo dia laande nɛ: Olui-walɔmbɔla w’Ɛmɛnyi wa Jehowa wambokotsha ɔnangɛso Kenneth Cook, Jr.

Ɔnangɛso Cook akotɔ ndo akole lo centre-sud ka Pennsylvanie, États-Unis. Nde akeke akambo wa mɛtɛ oma le osekande la la kalasa yema tshitshɛ ntondo ka nde nongola dipɔlɔmɛ dia lo sekɔndɛrɛ ndo nde akabatizama lo Ngɔndɔ ka samalo 7, 1980. Nde akatatɛ olimu wa lo tena tshɛ oko ombatshi mboka wa pondjo lo Ngɔndɔ ka divwa 1, 1982. L’ɔkɔngɔ wa nkamba oko ombatshi mboka ɛnɔnyi ehende, wakawelɛ lo Bɛtɛlɛ, nde akatatɛ olimu wa lo Bɛtɛlɛ la Wallkill, New York, lo Ngɔndɔ ka dikumi  2, 1984.

Lo ɛnɔnyi 25 wakayele, ɔnangɛso Cook akakambe elimu wotshikitanyi lɛnɛ atondjawɔ ekanda ndo lo biro ka Bɛtɛlɛ. Nde akatshuke wadɛnde, Jamie, lo 1996 ndo nde akaye dia ndjokamba kaamɛ la nde olimu wa lo Bɛtɛlɛ la Wallkill. Lo Ngɔndɔ ka dikumi l’ahende 2009, wakatome ɔnangɛso la kadiyɛso Cook lo dihole diasalema Kalasa ka Ngiliyadɛ la Patterson, New York lɛnɛ akatokamba ɔnangɛso Cook lo Departɛma di’ofundelo wa mikanda. Lo Ngɔndɔ ka nɛi 2016, l’ɔkɔngɔ wa vɔ nkalola nshi mɔtshi la Wallkill, ɔnangɛso la kadiyɛso Cook wakatomama la Brooklyn, New York. Ngɔndɔ tshanu l’ɔkɔngɔ, vɔ wakonɔ lo mbalasa kalɔmbɔla olimu aso wa l’andja w’otondo la Warwick, New York. Lo Ngɔndɔ ka ntondo 2017, ɔnangɛso Cook akasɔnama dia nkamba oko okimanyedi wa lo Kɔmite k’ofundelo k’Olui-walɔmbɔla.