1. Kakɔna kakasale Jehowa yema tshitshɛ l’ɔkɔngɔ w’Adama l’Eva nsala pɛkato? (Etatelo 3:15)

 YEMA tshitshɛ l’ɔkɔngɔ w’Adama l’Eva nsala pɛkato, Jehowa akasha tokanula tawɔ elongamelo lo tshimbo ya prɔfɛsiya kɛmɔtshi k’ohomba efula. Kɛnɛ kakandate fundama lo Etatelo 3:15.​—Adia.

2. Lande na kele prɔfɛsiya kɛnɛ kekɔ ohomba efula?

² Prɔfɛsiya kakɔ tanemaka lo dibuku dia ntondo dia lo Bible. Koko abuku tshɛ wa lo Bible wekɔ la diɔtɔnganelo la tɔ lo yoho mɔtshi kana lo yoho kina. Oko watokakatanyemaka akatshi dia ntondja dibuku dimɔtshi, mbele ɛtɛkɛta wakafundama lo Etatelo 3:15 kakatanyaka awui wa lo dibuku tshɛ dia lo Bible dia ntondja losango ɔtɔi, mbuta ate Nzambi akahombe ntoma Otshungodi dia ndjolanya Diabolo nde l’anto ande tshɛ wa kɔlɔ. * Ande ɔtshɔkɔ wayokondja wanɛ woka Jehowa ngandji lee!

3. Kakɔna kayotɔsɛdingola lo sawo nɛ?

³ Lo sawo nɛ, tayokadimola ambola wayela anɛ wendana la prɔfɛsiya kele lo Etatelo 3:15: Anto akɔna watɛkɛtama lo prɔfɛsiya kɛsɔ? Ngande wakotshama prɔfɛsiya kɛsɔ? Ndo ngande wakondjaso wahɔ oma lo prɔfɛsiya kɛsɔ?

4. Ele “oloyi,” ndo ngande weyaso dikambo sɔ?

⁴ Anto watɛkɛtama l’ɔkɔndɔ wele lo Etatelo 3:14, 15 wekɔ “oloyi,” “kanula” y’oloyi, “womoto,” ndo “kanula” ya womoto.  Bible tokimanyiyaka dia mbeya onto tshɛ l’atei awɔ. * Nyɛsɔ totate la oloyi. Oloyi wa mɛtɛ mɛtɛ kokoka nshihodia kɛnɛ kakate Jehowa l’ekambɔ k’Ɛdɛna. Ɔnkɔnɛ, kilombo ka Jehowa kakahombe mendana l’etongami kɛmɔtshi kele la yimba. Naa etongami kakɔ? Ɛnyɛlɔ 12:9 nembetshiyaka hwe ele oloyi. Lɔkɔ vɔ mɛnyaka hwe dia “oloyi w’edjedja” ekɔ Satana Diabolo. Ko waa na wakenga kanula y’oloyi?

5. Waa na wakenga kanula y’oloyi?

⁵ Etena katɛkɛta Bible dikambo dia kanula lo yoho ya didjidji, dui sɔ mendanaka la wanɛ wakanyiya ndo wasala akambo oko shɛwɔ ka didjidji. Laasɔ, kanula y’oloyi kengama la ditongami dia lo nyuma ndo l’anto wele l’ɛnyɛlɔ ka Satana, vɔ wekɔ lo ndɔshana la Jehowa Nzambi ndo l’ekambi Ande. L’atei awɔ mbele andjelo wakatshike ahole awɔ l’olongo lo nshi ya Nɔa, kaamɛ ndo anto wa kɔlɔ wasala akambo oko shɛwɔ Diabolo.​—Eta. 6:1, 2; Jni. 8:44; 1 Jni. 5:19; Judɛ 6.

6. Lande na kele “womoto” lakatama lo prɔfɛsiya kɛnɛ kokoka monga Eva?

⁶ Oma laasɔ, tayanga mbeya ele “womoto.” Nde kokoka monga Eva. Lande na? Tɔsɛdingole ɔkɔkɔ ɔtɔi oto. Prɔfɛsiya kɛsɔ shikikɛka dia kanula ya womoto yakahombe ‘minola’ oloyi l’ɔtɛ. Oko womaso la ditɛkɛta, oloyi ekɔ etongami ka lo nyuma, Satana ndo ndooko onto lele keema kokele lele kanula y’Eva lakakoke monga la dikoka dia mbominola. Laasɔ ngande wakahombe Satana ndanyema?

7. Oko wɛnyamidiɔ lo Ɛnyɛlɔ 12:1, 2, 5, 10, ele womoto lɔtɛkɛtami lo Etatelo 3:15?

⁷ Dibuku di’ekomelo dia lo Bible totɛka ele womoto lɔtɛkɛtami lo Etatelo 3:15.  (Adia Ɛnyɛlɔ 12:1, 2, 5, 10.) Ɔsɔ bu womoto ko womoto! Nde ekɔ la ngɔndɔ l’ekolo ande ndo la dɛmbɔ dia nkoso diele la tɔɔtɔ 12 l’ɔtɛ ande. Nde akote aha ɔna ko ɔna, koko Diolelo dia Nzambi. Diolelo sɔ diekɔ l’olongo, laasɔ womoto ɔsɔ pombaka monga ndo nde l’olongo. Nde ekɔ didjidji di’etenyi k’okongamelo wa Jehowa kele l’olongo kokengami la ditongami diande dia lo nyuma diele la kɔlamelo.​—Ngal. 4:26.

8. Ele etenyi ka ntondo ka kanula ya womoto, ndo etena kakɔna kakandakome kanula ya womoto? (Etatelo 22:15-18)

⁸ Ɔtɛkɛta wa Nzambi tokimanyiyaka nto dia mbeya etenyi ka ntondo ka kanula ya womoto. Kanula shɔ yakahombe monga l’ɔlɔndji w’Abrahama. (Adia Etatelo 22:15-18.) Oko wakate prɔfɛsiya, Yeso aki kanula ya pami ka kɔlamelo kɛsɔ. (Luka 3:23, 34) Koko kanula shɔ kokoka monga onto k’onto, nɛ dia nde akahombe ndanya Satana Diabolo diaha nde monga la lɔsɛnɔ nto. Ɔnkɔnɛ, etena kaki Yeso l’ɛnɔnyi oko 30, nde akakitama nyuma dia monga Ɔna ɛtɔi laki Nzambi. Etena kakandakitama nyuma, Yeso akakome etenyi ka ntondo ka kanula ya womoto. (Ngal. 3:16) L’ɔkɔngɔ wa nyɔi ndo wa eolwelo ka Yeso, Nzambi “akɔɔlɔtsha lotombo ndo kɛnɛmɔ” ndo akawosha “lowandji tshɛ l’olongo ndo la nkɛtɛ,” mbidja ndo lowandji la “ndanya etsha wa Diabolo.”​—Hɛb. 2:7; Mat. 28:18; 1 Jni. 3:8.

9-10. a) Anto akɔna nto wakenga kanula ya womoto, ndo etena kakɔna kongawɔ ngasɔ? b) Kakɔna kayangaso nsɛdingola nto?

⁹ Koko akahombe monga etenyi ka hende ka kanula shɔ. Ɔpɔstɔlɔ Pɔɔlɔ akɛnya wanɛ wakenga etenyi ka kanula shɔ etena kakandatɛ Akristo w’ase Juda ndo w’ase Wedja w’akitami w’esɔ ate: “Naka nyekɔ anto waki Kristo, kete nyu mɛtɛ nyekɔ kanula ya Abrahama, ekitɔ lo kɛnɛ kendana la daka.” (Ngal. 3:28, 29) Etena kasɔna Jehowa Okristo ɔmɔtshi la nyuma kande k’ekila, onto ɔsɔ mongaka l’atei wa wanɛ wakenga kanula ya womoto. Ɔnkɔnɛ, kanula shɔ kengama la Yeso Kristo ndo l’anto 144 000 wayolɛ kaamɛ la nde. (Ɛny. 14:1) Vɔ tshɛ kɛnɛmɔlaka yimba ya Shɛwɔ, Jehowa Nzambi.

¹⁰ Oko wamboteya anto watɛkɛtama lo Etatelo 3:15, nyɛsɔke tɔsɛdingole lo tshena pe woho wakayakotshamaka prɔfɛsiya kɛsɔ yema yema ndo woho wakondjaso wahɔ oma lɔkɔ.

11. Lo yoho yakɔna yele kanula ya womoto yakalumatema “lo etshindji”?

¹¹ Lo ndjela prɔfɛsiya kele lo Etatelo 3:15, oloyi akahombe numata kanula ya womoto “lo etshindji.” Dui sɔ diakasalema etena kakatshutshuya Satana ase Juda ndo ase Rɔmɔ dia ndjaka Ɔna Nzambi. (Luka 23:13, 20-24) Oko wele onto lambohomɔ mpota ka mɛtɛ mɛtɛ l’etshindji bu l’akoka wa nkɛndakɛnda lo tshanda mɔtshi, mbele nyɔi ka Yeso kakookonya lo tshanda mɔtshi diaha nsala ndooko dikambo nɛ dia nde aki lo diombo l’edja ka nshi shato.​—Mat. 16:21.

12. Ngande ndo etena kakɔna kayominɔma ɔtɛ w’oloyi?

¹² Naka prɔfɛsiya kele lo Etatelo 3:15 kakahombe kotshama, Yeso kokoka ntshikala lo diombo. Lande na? Nɛ dia lo ndjela prɔfɛsiya kɛsɔ, kanula akahombe minola oloyi l’ɔtɛ. Dui sɔ nembetshiyaka dia mpota kakahomɔ Yeso l’etshindji kakahombe nkɔnɔ, mbuta ate nde akahombe mbolɔ. Ndo kɛsɔ mbakasalema! Lushi la sato l’ɔkɔngɔ wa nyɔi kande, Yeso akolwama oko etongami ka lo nyuma kahavu. L’etena kakashikikɛ Nzambi, Yeso ayolanya Satana. (Hɛb. 2:14) Wanɛ wayolɛ  kaamɛ la Kristo wayosha lonya dia minya atunyi wa Nzambi tshɛ la nkɛtɛ, mbuta ate kanula y’oloyi.​—Ɛny. 17:14; 20:4, 10. *

13. Wahɔ akɔna wakondjaso oma l’okotshamelo wa prɔfɛsiya kɛnɛ?

¹³ Naka wɛ ekɔ okambi wa Nzambi, kete wɛ ekɔ lo nkondja wahɔ oma l’okotshamelo wa prɔfɛsiya kɛsɔ. Yeso akaye la nkɛtɛ oko onto. Nde akakɛnɛmɔla lonto la She lo yoho ya kokele. (Jni. 14:9) Lo tshimbo yande mbambotokoma dia mbeya ndo nanga Jehowa Nzambi. Sho kondjaka wahɔ nto oma lo wetshelo wa Yeso ndo oma l’ɛlɔmbwɛlɔ kashande etshumanelo k’Akristo ɛlɔ kɛnɛ. Nde tetshaka dia nsɛna lo yoho yayotokimanyiya dia mbetawɔma le Jehowa. Ndo sho tshɛ koka nkondja wahɔ oma lo nyɔi ka Yeso, mbuta ate oma lo woho wakandalumatema l’etshindji. Lo ngande? Etena kakolɔma Yeso, nde akakimɔ nɛmɔ dia dikila diande oko olambo wa kokele “[wa]tɛdia oma lo pɛkato tshɛ.”​—1 Jni. 1:7.

14. Onde anto wakahombe nongamɛ dia prɔfɛsiya kakatama l’Ɛdɛna kotshama aha la ntshimbatshimba? Lembetshiya.

¹⁴ Ɛtɛkɛta wakate Jehowa l’Ɛdɛna wakɛnya dia etena kɛmɔtshi kakahombe mbeta la ntondo ka prɔfɛsiya kɛsɔ ndjokotshama tshɛ lo tshɛ. Akahombe mbɔsa etena dia womoto ndjotondja kanula yakalakema, dia Diabolo ndjotshumanya anto ande ndo dia lohetsho (kana lotunu) ndjonga lam’asa elui akɔ ehende. Sho kondjaka wahɔ lo mbeya awui wendana la prɔfɛsiya kɛsɔ nɛ dia tɔ tɔhɛmɔlaka ɔnɛ andja ɔnɛ walɔmbwama oma le Satana wayohetsha atɛmɔdi wa Jehowa. L’ɔkɔngɔ diko, Yeso akayosha ambeki ande ɔhɛmwɛlɔ akɔ waamɛ. (Makɔ 13:13; Jni. 17:14) Lo mɛtɛ, tambɛna okotshamelo w’etenyi kɛsɔ ka prɔfɛsiya djekoleko lo ɛnɔnyi 100 wetshi ɛnɛ. Lo ngande?

15. Lande na kele lohetsho l’andja ɔnɛ lekɔ lo tafule tsho, ko lande na kahatahombe mboka Satana wɔma?

¹⁵ Yema tshitshɛ l’ɔkɔngɔ wa Yeso monga Nkumekanga Mɛsiya lo 1914, Satana akakashema oma l’olongo. Kakianɛ nde ekɔ l’emamu wa nkɛtɛ akonga elanyelo kande. (Ɛny. 12:9, 12) Koko nde hakonge ɔkɔmi anya. Satana ekɔ la nkɛlɛ k’efula ndo ekɔ lo ndɔsha ekambi wa Nzambi. (Ɛny. 12:13, 17) Diakɔ diele, lohetsho l’andja ɔnɛ otsha le ekambi wa Nzambi lekɔ lo tafule tsho. Koko sho keema l’ɔkɔkɔ wa mboka Satana nde l’anto ande wɔma. Lo dihole dia nsala ngasɔ, sho kokaka monga la dietawɔ diamɛ diaki l’ɔpɔstɔlɔ Pɔɔlɔ lakafunde ate: “Naka Nzambi ekɔ lo wedi aso, akɔna ayokoka tɔlɔsha?” (Rɔmɔ 8:31) Sho koka monga la wɛkamu tshɛ le Jehowa, nɛ dia oko wambotodiɛna, etenyi ka woke ka prɔfɛsiya kele lo Etatelo 3:15 kamboshilaka kotshama.

16-18. Naa wahɔ wakakondja Curtis, Ursula, ndo Jessica lo woho wakawashihodia Etatelo 3:15?

¹⁶ Daka dia Jehowa diatanema lo Etatelo 3:15 koka tokimanyiya dia ntondoya oseka ohemba tshɛ wakoka tokomɛ. Curtis, lakamba oko misiɔnɛrɛ la Guam, mbutaka ate: “Lo tena dimɔtshi, lakadiɛnɛ l’ehemba ndo l’ɔkɔmwɛlɔ wakadje wɛkamu ami le Jehowa l’ohemba. Koko nkana yimba la prɔfɛsiya kele lo Etatelo 3:15 akakimanyiya dia ntetemala ndjaɛkɛ le Shɛso lele l’olongo.” Curtis ekɔ lo nkonga lushi layokomiya Jehowa ehemba aso tshɛ.

¹⁷ Kadiyɛso kɛmɔtshi kele la Bavière kelɛwɔ  Ursula mbutaka dia woho wakandashihodia Etatelo 3:15 akokimanyiya dia monga l’eshikikelo ɔnɛ Bible kakasambiyama oma le Nzambi. Nde akɛnyi woho wele prɔfɛsiya kina tshɛ mbɔtɔnɛka la prɔfɛsiya kɛsɔ ndo dui sɔ diakawambiya efula. Nde mbutaka nto ate: “Lakanandema efula etena kakameke dia Jehowa akasale akambo aha la ntshimbatshimba diaha anto ntshikala aha l’elongamelo.”

¹⁸ Jessica, ladjasɛ la Micronésie, mbutaka ate: “Laakohɔ woho wakamayaoke etena kakamashihodia mbala ka ntondo ɔnɛ lambotana akambo wa mɛtɛ! Prɔfɛsiya kofundami lo Etatelo 3:15 kakatakotshamaka. Tɔ kakakimanyiya dia mbohɔ ɔnɛ aha Jehowa mbele lo kiɔkɔ y’asui wele la so ɛlɔ kɛnɛ. Prɔfɛsiya kɛsɔ kakakeketsha dietawɔ diami di’ɔnɛ kambɛ Jehowa kimanyiyaka dia monga la lɔsɛnɔ la dimɛna nshi nyɛ ndo ndjonga la lɔsɛnɔ loleki dimɛna lo nshi yayaye.”

19. Lande na kakokaso monga l’eshikikelo ɔnɛ etenyi k’ekomelo ka prɔfɛsiya kɛsɔ kayokotshama?

¹⁹ Oko wambotodiɛna, Etatelo 3:15 ekɔ lo takotshama nshi nyɛ. Kanula ya womoto ndo kanula y’oloyi wambeyama hwe. Yeso lele etenyi ka ntondo ka kanula ya womoto amboshilaka nkɔnɔ lo mpota kakandahomɔ l’etshindji ndo kakianɛ nde ekɔ Nkumekanga kahavɔki. Ɔsɔnɛlɔ wa wanɛ wakenga etenyi ka hende ka kanula shɔ wekɔ suke la nkomɛ. Lam’ele etenyi ka ntondo ka prɔfɛsiya kɛnɛ kakashile la kotshama, tekɔ l’ɔkɔkɔ w’oshika wa monga l’eshikikelo ɔnɛ etenyi k’ekomelo, mbuta ate ominwelo w’oloyi l’ɔtɛ, kayokotshama ndo tɔ lawɔ. Ande ɔlɔ wayonga l’anto wa kɔlamelo etena kayolanyema Satana lee! Polo l’etena kɛsɔ, tatohekɔke. Le Nzambi kaso mbahombaso ndjaɛkɛ tshɛ lo tshɛ. Lo tshimbo ya kanula ya womoto, nde ayela “wedja tshɛ wa la nkɛtɛ” ɛtshɔkɔ waheyama mbuta.​—Eta. 22:18.