Yeso akasambishaka losango la wɔladi. Koko lo diaaso dimɔtshi, nde akatɛ apɔstɔlɔ ande ate: “Tanyɔfɔnyake dia dimi lakaye dia ndjodja wɔladi la nkɛtɛ, dimi lakaye aha dia ndjodja wɔladi, koko lakela lokuwa la ta. Nɛ dia dimi lakaye ndjodja diatɔnelo lam’asa ɔna pami la she, ɔna womoto la nyango ndo lam’asa womoto lotshukami la nyango omɛnde.” (Mat. 10:34, 35) Kakɔna kakalange Yeso mbuta?

Yeso konanga dia nkakitola ase nkumbo lam’asawɔ, koko nde akeyaka dia wetshelo ande wakahombe mbidja diatɔnelo lo nkumbo mɔtshi. Diakɔ diele, wanɛ walanga monga ambeki wa Kristo ndo batizama, pombaka nongamɛ etombelo w’oma lo yɛdikɔ yawɔ. Naka wambohomana l’ɔlɔshamelo w’oma le olonganyi wele bu ombetawudi kana ase nkumbo akina, kete kokaka monga tshondo y’okakatanu dia ntshikala la kɔlamelo lo wetshelo wa Kristo.

Bible keketshaka Akristo tshɛ dia ‘mbidjasɛ l’anto tshɛ ki.’ (Rɔmɔ 12:18) Koko wetshelo wa Yeso koka monga oko ‘lokuwa la ta’ lo nkumbo mɔtshi. Dui sɔ mongaka etena ketawɔ ose nkumbo ɔmɔtshi wetshelo wa Yeso ko ase nkumbo akina wambootona kana wambɔɔlɔsha. L’etena kɛsɔ, ewotɔ, mbuta ate wanɛ wele lo luudu lakɔ mongaka “atunyi” wa ɔnɛ leka akambo wa mɛtɛ.​—Mat. 10:36.

Ambeki wa Kristo wadjasɛ lo nkumbo yatɔnyi l’awui w’ɔtɔmwɛlɔ pomanaka lo ntena dimɔtshi l’awui wa ngasɔ wadja ngandji kokakawɔ Jehowa ndo Yeso l’ohemba. Ɛnyɛlɔ, ewotɔ wele bu ambetawudi koka mbaatshutshuya dia vɔ nsala fɛtɛ ya l’ɛtɛmwɛlɔ. Etena kahembamawɔ, onto akɔna layowɔngɛnyangɛnya? Yeso akate ate: “Onto tshɛ loka she kana nyango ngandji koleki kɛnɛ kambokande hasungana le mi.” (Mat. 10:37) Lo mɛtɛ, Yeso konanga mbuta ɔnɛ dia monga ambeki ande, wanɛ weka akambo wa mɛtɛ hawohombe nanga ambutshi awɔ lo yɛdikɔ y’efula. Koko, nde akawaetshaka dia mbɔsa yɛdikɔ yendana l’awui woleki ohomba lo nsɛnɔ yawɔ. Naka ase nkumbo kaso wele bu ambetawui wotɔtɛwɔla di’aha ntɛmɔla Jehowa, sho tetemalaka mbaoka ngandji, koko sho mbeyaka dia ngandji kokaso Nzambi mbeeta lo dihole dia ntondo.

Aha la taamu, ɔlɔshamelo w’oma le ase nkumbo koka monga paa efula. Koko, ambeki wa Yeso pombaka mbohɔka ɛtɛkɛta ɛnɛ: “Onto tshɛ lahetawɔ mɛmba otamba ande w’asui ndo lahandjele hasungana le mi.” (Mat. 10:38) L’ɛtɛkɛta ekina, Akristo mbɔsaka ɔlɔshamelo w’oma le ase nkumbo oko etenyi k’asui wahomba ambeki wa Kristo mbetawɔ la lolango tshɛ. L’etena kakɔ kaamɛ, vɔ nongamɛka dia lɔkɛwɔ lawɔ la dimɛna layotshutshuya ase nkumbo yawɔ wele bu ambetawudi dia ntshikitanya kanyi yawɔ ndo mbetawɔ losango la lo Bible.​—1 Pe. 3:1, 2.