OHOKANYIYA lushi lɔmɔtshi lakayaleke monga l’ɔngɛnɔngɛnɔ lo lɔsɛnɔ layɛ. Onde aki etena kakayasale diwala, ko kana etena kakotɔ ɔnayɛ l’enondo? Ko kana lushi lakayabatizama? Ɔsɔ aki mɛtɛ lushi lakaleke ohomba le yɛ ndo l’ɔngɛnɔngɛnɔ lo lɔsɛnɔ layɛ. Ndo lushi lɔsɔ, ananyɔ l’akadiyɛyɛ waki l’ɔngɛnɔngɛnɔ lo woho wakayɛnya dia wɛ nangaka Nzambi l’otema ayɛ, l’anima ayɛ tshɛ, la yimba yayɛ tshɛ ndo la wolo ayɛ tshɛ.​—Makɔ 12:30.

Ondo wɛ ekɔ l’ɔngɛnɔngɛnɔ efula lo kambɛ Jehowa oma ko batisimu kayɛ. Koko, apandjudi efula wamboshisha ɔngɛnɔngɛnɔ waki lawɔ. Lande na kambowoyoshisha ɔngɛnɔngɛnɔ ɔsɔ? Ɛkɔkɔ akɔna wele laso watotshutshuya dia sho ntetemala kambɛ Jehowa l’ɔngɛnɔngɛnɔ?

Lokumu l’ɔlɔlɔ la Diolelo telaka ɔngɛnɔngɛnɔ w’efula. Lande na? Nɛ dia Jehowa ndakaka dia Diolelo diande diaya ‘suke la nkomiya andja ɔnɛ wa kɔlɔ, ko mbela andja w’oyoyo waki Nzambi. Zefaniya 1:14 totɛka ɔnɛ: ‘Lushi la woke la Jehowa laya suke! Lɔ laya suke ndo lekɔ lo ndjasukana esadi esadi!’ Koko naka toyaoka dia tambokonga ekomelo edja kakiso konongamɛka, sho kokaka ndjoshisha ɔngɛnɔngɛnɔ waki la so. Ndo dui sɔ koka tokonya dia sho nkitshakitsha ohetoheto aso l’olimu wakambɛso Nzambi.​—Tukedi 13:12.

Etena ketshaso wenya kaamɛ l’anangɛso l’akadiyɛso, sho keketshamaka dia ntetemala kambɛ Jehowa l’ɔngɛnɔngɛnɔ. Mbeyaka monga ko lɔkɛwɔ la dimɛna l’ekambi wa Jehowa mbakatokotola oya l’ɔtɛmwɛlɔ wa mɛtɛ ndo mbakatokimanyiya dia ntatɛ kambɛ Nzambi l’ɔngɛnɔngɛnɔ. (1 Petero 2:12) Ko kakɔna kakoka ntomba naka ɔnangɛso kana kadiyɛso kɛmɔtshi akalongola dilanya l’ɔtɛ wakinde kokitanyiya wadjango waki Nzambi? Dui sɔ mbeyaka kɔmɔla anto amɔtshi wa l’etshumanelo ndo mbaakonya dia vɔ nshisha ɔngɛnɔngɛnɔ awɔ.

Diangɔ dia l’emunyi koka nto tokonya dia sho nshisha ɔngɛnɔngɛnɔ aso. Lo woho akɔna? Andja waki Satana pembaka tetawoya dia sho pombaka nsomba diangɔ dieso bu ladiɔ mɛtɛ ohomba. Koko sho koka mbohɔ ɛtɛkɛta waki Yeso wata ɔnɛ: “Ndooko onto lakoka kambɛ ewandji ehende olimu, nɛ dia nde ayohetsha ɔmɔtshi ko ayolanga okina, kana nde ayɛkama ɔmɔtshi ko ayɛkɔ okina. Nyu hanyokoke kambɛ Nzambi la falanga olimu oko ɛhɔmbɔ.” (Mateo 6:24) Hatokoke kambɛ Jehowa l’ɔngɛnɔngɛnɔ ko l’etena kakɔ kaamɛ tayanga dia nkondja ɛngɔ tshɛ kakokaso nkondja oma l’andja ɔnɛ.

Kambɛ Jehowa bu oshikɔ wa wotsho le wanɛ wawoka ngandji. (1 Joani 5:3) Tohɔ dia Yeso akate ate: “Nyoye le mi, nyu wanɛ tshɛ wele la paa ndo wele la wetsho, ko dimi layonyokeketsha. Nyɛmbɛ osembe ami ndo nyeke akambo oma le mi, nɛ dia dimi lekɔ la memakana ndo la otema w’okitshakitsha ko anima anyu wayokondja ekeketshelo. Nɛ dia osembe ami wekɔ dimɛna ndo oshikɔ ami wekɔ osadi.” (Mateo 11:28-30) Monga Okristo wa mɛtɛ ekɔ ekeketshelo  ndo teelaka ɔngɛnɔngɛnɔ. Tekɔ mɛtɛ l’ɛkɔkɔ w’amɛna wa monga l’ɔngɛnɔngɛnɔ w’efula l’olimu wa Jehowa. Nyɛsɔ kakianɛ tɔsɛdingole ɛkɔkɔ akɔ esato.​—Habakuka 3:18.

Sho tekɔ lo kambɛ Ombishi aso wa lɔsɛnɔ lele Nzambi k’ɔngɛnɔngɛnɔ. (Etsha 17:28; 1 Timɔtɛ 1:11) Sho mbeyaka dia nsɛnɔ yaso yekɔ l’anya w’Otungi aso. Ɔnkɔnɛ, nyɛsɔ totetemale mbookambɛ l’ɔngɛnɔngɛnɔ, oyadi ɛnɔnyi engana wambeta ntatɛ lam’akatabatizama.

Tɔsɛdingole ɛnyɛlɔ kaki ɔnangɛso Héctor, lakakambɛ Jehowa oko omendji w’otshimbedi l’edja k’ɛnɔnyi 40. ‘Kaanga l’osombe ande,’ nde akatetemala kambɛ Jehowa l’ɔngɛnɔngɛnɔ. (Osambu 92:12-14) Hemɔ ka wadɛnde kombosha diaaso nto dia nde ndjasha l’olimu wa Nzambi oko wakandayashaka ntondo, koko Héctor koshisha ɔngɛnɔngɛnɔ ande. Nde mbutaka ate: “Kaanga mbele ekɔ dui dia kandji efula dia mɛna woho watalana yoonge ya wadɛmi yema yema ndo mbele okokelo ande wekɔ wolo efula, dimi haletawɔ dia dikambo sɔ shishiyɛmi ɔngɛnɔngɛnɔ wa kambɛ Nzambi ka mɛtɛ. Lo mbeya dia Jehowa mbele kiɔkɔ ya lɔsɛnɔ lami ndo ɔnɛ nde akatonge onto l’oyango ɔmɔtshi, dui sɔ ambotakokaka le mi dia mboka ngandji k’efula ndo mbokambɛ l’otema ɔtɔi. Lekɔ lo nsala la wolo diaha nshisha ohetoheto l’olimu w’esambishelo, ndo dimi salaka la wolo dia nkitsha elongamelo ka Diolelo lo dihole dia ntondo lo yimba yami diaha dimi nshisha ɔngɛnɛngɔnɔ ami.”

Jehowa akakimɔ oshinga w’etshungwelo, dia sho monga la lɔsɛnɔ l’ɔngɛnɔngɛnɔ. Lo mɛtɛ, “nɛ dia Nzambi akalange andja lo yɛdikɔ y’efula, diakɔ diakandakimɔ Ɔnande ɛtɔi lakandote, dia onto tshɛ longa la mbetawɔ le nde atovɔke, koko akondja lɔsɛnɔ la pondjo.” (Joani 3:16) Eelo, pɛkato yaso koka dimanyiyama ndo sho koka monga la lɔsɛnɔ la pondjo naka sho nkɛnɛmɔla mbetawɔ lo woshasha woludi la ngandji waki Nzambi w’oshinga w’etshungwelo. Ɔsɔ ekɔ ɔkɔkɔ woleki watotshutshuya dia monga la lowando! Ndo lowando laso l’oshinga w’etshungwelo ayototshutshuya dia sho kambɛ Jehowa l’ɔngɛnɔngɛnɔ w’efula.

Ɔnangɛso ɔmɔtshi lelɛwɔ Jesús, lakadjasɛka la Mexique, akate ate: “Dimi laki mfumbe k’olimu ami. Ntena efula lakakambaka elimu etanu wotshikitanyi aha la vɔ fundɛmi dia nsala dui sɔ. Lakasalaka ngasɔ paka dia nkondja falanga efula. Oma laasɔ lakayekaka akambo wendana la Jehowa ndo woho wakandakimɔ Ɔnande la ngandji lo dikambo di’anto. Lakonge la nsaki k’efula ka mbookambɛ. Ɔnkɔnɛ, lakalambola Jehowa lɔsɛnɔ lami, ndo l’ɔkɔngɔ wa nkamba lo kɔpanyi l’edja k’ɛnɔnyi 28, lakɔshi yɛdikɔ ya ntshika nkamba lo kɔpanyi kakɔ ndo lakɔsɛ olimu wa lo ntena tshɛ.” Woho ɔsɔ mbakatatɛ Jesús kambɛ Jehowa l’ɔngɛnɔngɛnɔ.

Tekɔ lo nsɛna lɔsɛnɔ la pudipudi lateela ɔngɛnɔngɛnɔ. Onde wɛ akohɔ woho waki lɔsɛnɔ layɛ la ntondo ka wɛ mbeya Jehowa? Ɔpɔstɔlɔ Pɔɔlɔ akohola Akristo wa la Rɔmɔ dia vɔ ‘waki ɛhɔmbɔ wa  pɛkato,’ koko wakayokoma ‘ɛhɔmbɔ wa kɛnɛ kele ɔlɔlɔ.’ Nɛ dia vɔ wakasɛnaka lɔsɛnɔ la pudipudi, vɔ wakakoke nongamɛ ndjokondja difuto dia lɔsɛnɔ la pondjo. (Rɔmɔ 6:17-22) Sho lawɔ tekɔ lo ndjela atɔndɔ waki Jehowa, ɔnkɔnɛ sho tambotshungɔ oma l’ekiyanu waya oma l’awui wa mindo ndo wa ngala. Ande ɔngɛnɔngɛnɔ wateela dui sɔ lee!

Tɔsɛdimgole ɛnyɛlɔ kaki Jaime, ɔnɛ laki kombetawɔka ɔnɛ Nzambi ekɔ, lasukɛ wetshelo w’ohilwelo ndo laki bɔksɛrɛ. Jaime akatatɛ ntshɔ lo nsanganya y’Akristo ndo nde akambiyama lo menda woho wakokanaka anto ngandji lɛkɔ. Dia ntshika lɔsɛnɔ lande la ntondo Jaime akalɔmbɛ Jehowa dia mbokimanyiya dia nde monga la mbetawɔ le Nde. Jaime mbutaka ate: “Yema yema, lakayasholaka dia Nzambi kɛmɔtshi ka ngandji ndo ka kɛtshi kekɔ ndo nde ekɔ Ombutshi. Nkitanyiya atɔndɔ wosembwe waki Jehowa akonge tshondo y’ekokelo le mi. Otondongaka dimi kotshikitanya lɔkɛwɔ lami, tshike lambodiakemaka, oko wakadiakema angɛnyi ami amɔtshi wanɛ waki waa bɔksɛrɛ. Ɛnɔnyi wambomoleka monga l’ɔngɛnɔngɛnɔ lo lɔsɛnɔ lami, ko ɛnɔnyi wambometsha l’olimu wa Jehowa.”

Ngande wahombaso ndjaoka etena kakongaso ekomelo ka andja ɔnɛ wa kɔlɔ ɔnɛ? Toohɔ dia tekɔ lo nsala lolango la Nzambi ndo tekɔ lo nkonga l’asolo walomɔlomɔ lɔsɛnɔ la pondjo. “Ɔnkɔnɛ, tatotshikake nsala kɛnɛ kele ɔlɔlɔ, nɛ dia l’etena kahombama, tayona naka hatohekwe.” (Ngalatiya 6:8, 9) L’ekimanyielo ka Jehowa, nyɛsɔ tokikɛ, tosale la wolo dia nkɛnɛmɔla waonga wahombama dia sho ndjohandɔ oma lo “mfɔnu ka woke,” ndo totetemale kambɛ Jehowa l’ɔngɛnɔngɛnɔ.​—Ɛnyɛlɔ 7:9, 13, 14; Jakɔba 1:2-4.

Sho kokaka monga l’eshikikelo ɔnɛ Jehowa ayotofuta l’ɔtɛ wa ekikelo kaso nɛ dia nde mbeyaka olimu wokambɛso ndo ngandji kawokaso ndo kokaso lokombo lande. Naka sho ntetemala mbokambɛ l’ɔngɛnɔngɛnɔ, kete tayonga oko omembi w’esambo Davidɛ, lakate ate: ‘Dimi kitshaka Jehowa la ntondo kami ntena tshɛ. Lam’ele nde ekɔ lo lonya lami l’omi, dimi hansutshasutshamaki pondjo. Ɔnkɔnɛ, otema ami ngɛnangɛnaka, tshondo yami lekɔ la ɔlɔ. Ndo dimi mbidjasɛ lo lotui tshitshi.’​—​Osambu 16:8, 9.