1, 2. Lande na kele lɔngɛnyi laki lam’asa Jɔnatana la Davidɛ lekɔ ɛnyɛlɔ ka diambo ka kɔlamelo?

JƆNATANA akaambe lo menda dihonga diaki la ɔlɔngɔlɔngɔ Davidɛ. Davidɛ akadiake dihangamende diakawelɛka Ngɔliyatɛ ndo akatɔlɛɛ she aki Jɔnatana, mbuta ate Saolo laki nkumekanga k’Isariyɛlɛ, ‘ɔtɛ w’ose Filistiya’ ɔsɔ. (1 Samuele 17:57) Jɔnatana komonga la taamu dia Nzambi aki kaamɛ la Davidɛ, ndo oma l’etena kɛsɔ, Jɔnatana nde la Davidɛ wakakome angɛnyi w’eshika. Vɔ wakatshike dɔkɔlɔkɔ ɔnɛ wayotshikalaka la kɔlamelo nshi tshɛ lam’asawɔ. (1 Samuele 18:1-3) L’edja tshɛ ka lɔsɛnɔ lande, Jɔnatana aki la kɔlamelo le Davidɛ.

² Jɔnatana akatshikala la kɔlamelo le Davidɛ kaanga mbakasɔnɛ Jehowa Davidɛ dia monga nkumekanga k’oyoyo k’Isariyɛlɛ, koko aha Jɔnatana. Ndo etena kakayange Saolo dia ndjaka Davidɛ, Jɔnatana akayakiyanya lo dikambo di’ɔngɛnyi ande. Nde akeyaka dia Davidɛ akayashɛ l’oswe la Hɔrɛshɛ, ɔnkɔnɛ Jɔnatana akatshu lɛkɔ dia tookeketsha dia nde ntetemala ndjaɛkɛ le Jehowa. Jɔnatana akatɛ Davidɛ ate: ‘Tokake  wɔma, nɛ dia Saolo ka papa hatokɛna. Wɛ ayonga nkumekanga l’Isariyɛlɛ ndo dimi layonga onto la 2 oma laleyɛ.’​—1 Samuele 23:16, 17.

3. Kakɔna kakaleke monga ohomba efula le Jɔnatana oleki monga la kɔlamelo le Davidɛ, ndo ngande weyaso dui sɔ? (Enda osato wele lo mbɔtwɛlɔ.)

³ Mbala efula sho ngɛnangɛnaka anto wele la kɔlamelo. Ko onde sho ngɛnangɛnaka Jɔnatana paka l’ɔtɛ wakinde la kɔlamelo le Davidɛ? Ndooko. Monga la kɔlamelo le Nzambi mbaki dui diakaleke ohomba lo lɔsɛnɔ laki Jɔnatana. Lo mɛtɛ, ɔsɔ mbele ɔkɔkɔ wakinde la kɔlamelo le Davidɛ ndo wakinde komboka kandjema, kaanga mbakahombe Davidɛ nkoma nkumekanga lo dihole diande. Jɔnatana akakimanyiya Davidɛ nto dia nde ndjaɛkɛ le Jehowa. Apami ahende asɔ wakatshikala la kɔlamelo otsha le Jehowa ndo lam’asawɔ. Vɔ wakakotsha dɔkɔlɔkɔ diakawadje ɔnɛ: ‘Jehowa onge lam’asami dimi la yɛ ndo lam’asa tokanula tami la tokanula tayɛ pondjo pondjo.’—1 Samuele 20:42.

4. a) Kakɔna kayotosha ɔngɛnɔngɛnɔ wa mɛtɛ? b) Kakɔna kayotɔkɛtshanya lo sawo nɛ?

⁴ Sho lawɔ pombaka monga la kɔlamelo otsha le nkumbo kaso, angɛnyi aso, ndo anangɛso l’akadiyɛso wa l’etshumanelo. (1 Tɛsalɔnika 2:10, 11) Koko kɛnɛ koleki ohomba tshɛ ele, sho pombaka monga la kɔlamelo otsha le Jehowa. Nde mbele Ɔnɛ lakatosha lɔsɛnɔ. (Ɛnyɛlɔ 4:11) Etena keso la kɔlamelo le nde, sho mongaka l’ɔngɛnɔngɛnɔ wa mɛtɛ. Koko sho mbeyaka ɔnɛ sho pombaka monga la kɔlamelo le Nzambi kaanga lo ntena dia paa. Lo sawo nɛ, tayɔkɛtshanya woho wakoka ɛnyɛlɔ kaki Jɔnatana tokimanyiya dia sho ntshikala la kɔlamelo le Jehowa lo akambo anɛi anɛ: 1) etena kɛnaso dia onto ɔmɔtshi lele la lowandji hakoke nɛmiyama oma le so, 2) etena kahombaso nshikikɛ onto akɔna ahombaso monga la kɔlamelo le nde, 3) etena kele ɔnangɛso ɔmɔtshi lele l’ɛkɛndɛ hatoke kana tosalɛka akambo aha la losembwe, ndo 4) etena kɛnaso dia ekɔ wolo nkotsha dɔkɔlɔkɔ diaso.

5. Lande na kele aki wolo le anto wa l’Isariyɛlɛ dia monga la kɔlamelo le Nzambi etena kaki Saolo nkumekanga?

⁵ Jɔnatana ndo anto wa l’Isariyɛlɛ waki l’okakatanu ɔmɔtshi. Nkumekanga Saolo ka she Jɔnatana komonga la kɔlamelo nto, ndo Jehowa akɔsɛkɛ. (1 Samuele 15:17-23) Koko, Nzambi aketawɔ dia Saolo ntetemala mbolɛ l’edja k’ɛnɔnyi efula. Ɔnkɔnɛ, akonge dikambo dia wolo di’anto monga la kɔlamelo le Nzambi etena kele nkumekanga kakasɔnama dia mbidjasɛ ‘lo kiti ka lowandji ka Jehowa’ akasalaka akambo wa kɔlɔ efula.​—1 Ekondo 29:23.

6. Kakɔna kɛnya dia Jɔnatana akatshikala la kɔlamelo le Jehowa?

⁶ Jɔnatana akatshikala la kɔlamelo le Jehowa. Ohokanyiya kɛnɛ kakasale Jɔnatana l’ɔkɔngɔ wa Saolo ntatɛ mpindolɛ Nzambi. (1 Samuele 13:13, 14) L’etena kɛsɔ, olui a woke w’alembe w’ase Filistiya wakaye la pusupusu 30 000 dia ndjɔlɔsha ase Isariyɛlɛ. Saolo aki paka l’asɔlayi 600 ndo paka nde la Jɔnatana ato mbaki la dihomɔ dia ta. Koko Jɔnatana komonga la wɔma. Nde akohɔka ɛtɛkɛta waki omvutshi Samuɛlɛ lakate ɔnɛ: ‘L’ɔtɛ wa lokombo lande la woke, Jehowa hatɔsɛka anto ande, nɛ dia Jehowa akɛnyi ɔlɔlɔ nyetɛ anto ande.’ (1 Samuele 12:22) Jɔnatana akatɛ ɔsɔlayi okina ate: ‘Ndooko kakoka nshimba Jehowa dia nde nshimbɛ lo tshimbo y’anto  efula kana y’anto angana ato.’ Ɔnkɔnɛ, nde la ɔsɔlayi ɔsɔ wakalɔsha olui ɔmɔtshi w’ase Filistiya ndo wakadiake 20 l’atei awɔ. Jɔnatana aki la mbetawɔ le Jehowa, ndo Jehowa akɔɔtshɔkɔla. Jehowa akasale dia didimu dia nkɛtɛ monga ndo ase Filistiya wakoke wɔma. Oma laasɔ vɔ wakalɔshana ndo wakadiakana lam’asawɔ ndo ase Isariyɛlɛ wakadje otshumba lo ta sɔ.​—1 Samuele 13:5, 15, 22; 14:1, 2, 6, 14, 15, 20.

7. Dionga dia ngande diaki la Jɔnatana otsha le she?

⁷ Kaanga mbakatetemala Saolo mpindolɛ Jehowa, Jɔnatana akatetemala nkitanyiya she etena tshɛ kaki dui sɔ ohomba. Ɛnyɛlɔ, vɔ wakalɔsha kaamɛ dia nkokɛ ekambi wa Jehowa.—1 Samuele 31:1, 2.

8, 9. Lande na kele nɛmiya wanɛ wele la lowandji mɛnyaka dia tekɔ la kɔlamelo le Nzambi?

⁸ L’ɛnyɛlɔ ka Jɔnatana, sho kokaka monga la kɔlamelo le Jehowa lo nkitanyiya lowandji la lo wodja aso etena tshɛ kele dui sɔ ohomba. Jehowa aketawɔ dia “ewandji wa laadiko” ɛsɔ monga la lowandji laadiko diaso, ndo nde tɔlɔmbaka dia sho mbalɛmiya. (Adia Rɔmɔ 13:1, 2.) Diakɔ diahombaso nɛmiya owandji ɔmɔtshi wa lɛɛta oyadi nde bu la losembwe ndo oyadi sho mɛnaka dia nde hakoke nɛmiyama oma le so. Lo mɛtɛ, sho pombaka nɛmiya wanɛ wele Jehowa akawasha lowandji.​—1 Kɔrɛtɔ 11:3; Hɛbɛru 13:17.

⁹ Olga, kadiyɛso kɛmɔtshi kodjashi l’Amérique du Sud, akɛnya kɔlamelo yande otsha le Jehowa lo monga la dilɛmiɛlɔ  di’efula otsha le omɛnde, kaanga mbele omɛnde akosalɛka akambo wa kɔlɔ efula. ^[1] (Enda nɔtɛ ka la koma.) Tena dimɔtshi, omɛnde akatonaka mbɔtɛkɛtsha ndo akotondjɛka ɛtɛkɛta wa kɔlɔ efula l’ɔtɛ wakinde Ɔmɛnyi wa Jehowa. Nde akakome ndo lo mbotɛ dia nde ayowɔsɛka ndo ayowɔhɔtɔla ana. Koko Olga ‘kokaloya kɔlɔ lo kɔlɔ.’ Nde akasale tshɛ dia monga wadi l’ɔlɔlɔ. Nde akokatɛka, akosolɛka ahɔndɔ ndo akakotshaka ehomba w’anto akina wa lo nkumbo kande. (Rɔmɔ 12:17) Nde akatshindɛka omɛnde dia tembola ase nkumbo kande kana angɛnyi ande, etena kakandakokaka nsala dui sɔ. Ɛnyɛlɔ, etena kakandalange ntshɔ l’osomba okina l’otanda wa she, nde akalɔngɔsɔla oseka ɛngɔ tshɛ kakiwɔ l’ohomba dikambo dia lɔkɛndɔ lɔsɔ. Oma laasɔ, lam’akiwɔ l’odo lo luudu l’ɔtɛmwɛlɔ, nde akakongaka omɛnde l’andja. L’ɔkɔngɔ w’ɛnɔnyi efula, omi aki Olga akatatɛ salɛ Olga akambo w’amɛna l’ɔtɛ wakinde la solo dia lotutsha ndo wakandɔlɛmiyaka lushi tshɛ. Ɛlɔ kɛnɛ, nde okeketshaka Olga dia ntshɔ otsha lo nsanganya ndo nde owɛmbaka otsha lɛkɔ. Tena dimɔtshi, nde mbɔtɔka lo nsanganya kaamɛ la nde.​—1 Petero 3:1.

10. Ngande wakeyaka Jɔnatana onto lakandahombe monga la kɔlamelo le nde?

¹⁰ Etena kakate Saolo dia nde ayanga todiaka Davidɛ, Jɔnatana akahombe mbɔsa yɛdikɔ ya wolo. Nde akalange monga la kɔlamelo le she, koko nde akalange monga nto la kɔlamelo le Davidɛ. Jɔnatana akeyaka dia Nzambi aki kaamɛ la Davidɛ, koko aha la Saolo, ɔnkɔnɛ nde akasɔnɛ dia monga la kɔlamelo le Davidɛ. Nde akahɛmɔla Davidɛ dia nde ndjashɛ, ko oma laasɔ nde akatotɛka Saolo ɔkɔkɔ wahombande ntshika Davidɛ la lɔsɛnɔ.​—Adia 1 Samuele 19:1-6.

11, 12. Ngande wele ngandji kokaso Nzambi tokimanyiyaka dia sho mbɔsa yɛdikɔ ya monga la kɔlamelo le nde?

¹¹ Alice, kadiyɛso kɛmɔtshi ka l’Australie akahombe nshikikɛ onto lakandahombe monga la kɔlamelo le nde. Etena kakandekaka Bible, nde akatɛka nkumbo kande akambo wakandekaka. Nde akawatɛ nto dia nde hahombe nsala fɛtɛ ka Nɔɛlɛ kaamɛ la wɔ ndo nde akaalembetshiya lande na. Mbala ka ntondo ase nkumbo kande wakakɔmɔ, ndo l’ɔkɔngɔ vɔ wakayongaka la nkɛlɛ k’efula otsha le nde. Vɔ wakafɔnya dia Alice hatoyakiyanyaka nto lo dikambo diawɔ. Oma laasɔ, mama kande akate dia nde halange mɛna Alice nto. Alice mbutaka ate: “Ɛtɛkɛta ɛsɔ wakanyangiya ndo wakambisha paa efula l’asolo nɛ dia lakokaka mɛtɛ nkumbo kami ngandji. Koko, lakayashikikɛ dia Jehowa l’Ɔnande monga lo dihole dia ntondo l’otema ami, ndo lakabatizama lo losanganya la woke lakayele.”—Mateo 10:37.

¹² Hatohombe mbetawɔ dia kɔlamelo yele la so otsha le olui ɔmɔtshi wa tɔkɛnyɔ, otsha le kalasa kɛmɔtshi, wodja ɔmɔtshi nkoma ohomba efula le so oleki kɔlamelo yaso otsha le Jehowa. Ɛnyɛlɔ, Henry akangɛnangɛnaka nkɛnya damɛ kaamɛ l’ase olui wa kalasa kande ndo nde akalangaka mbidjɛ kalasa kawɔ otshumba. Koko l’ɔtɛ wakandakɛnyaka oseka wikɛndɛ tshɛ, nde komonga l’etena k’efula ka ntshɔ l’olimu w’esambishelo kana lo nsanganya. Henry mbutaka dia kɛnyɔ shɔ yakayongaka ohomba le nde woho ɔnɛ wele nde akayoleka monga la kɔlamelo otsha le kalasa kawɔ oleki otsha le Nzambi. Ɔnkɔnɛ nde akɔshi yɛdikɔ ya ntshika nkɛnya damɛ dikambo dia kalasa kawɔ.​—Mateo 6:33.

13. Ngande wakoka kɔlamelo yaso le Nzambo tokimanyiya dia ndɔshana l’ekakatanu wa lo nkumbo?

 ¹³ Ntena dimɔtshi, koka monga wolo dia monga la kɔlamelo le anto wa lo nkumbo kaso l’etena kakɔ kaamɛ. Ɛnyɛlɔ, Ken mbutaka ate: “Dimi lakalangaka ntshɔ tenda mama laki aya osombe mbala la mbala ndo dia nde tshikalaka kaamɛ la so lo ntena dimɔtshi. Koko mama la wadɛmi kombokanaka.” Nde tetemalaka mbuta ate: “Dimi kokoka ngɛnyangɛnya ɔmɔtshi ko nyangiya okina.” Ken akakane yimba la kɛnɛ kata Bible ndo nde akashihodia dia lo dikambo sɔ, nde akahombe ngɛnyangɛnya wadɛnde ndo monga la kɔlamelo le nde. Ɔnkɔnɛ nde akakandola dikambo sɔ lo yoho yakangɛnyangɛnya wadɛnde. Oma laasɔ, nde akalembetshiya wadɛnde lande na kahombande monga ɔlɔlɔ otsha le nyango. Nde akalembetshiya ndo nyango lande na kahombande nɛmiya wadɛnde.​—Adia Etatelu 2:24; 1 Kɔrɛtɔ 13:4, 5.

14. Saolo ngande wakandasalɛ Jɔnatana akambo lo yoho ya kɔlɔ?

¹⁴ Sho koka nto monga la kɔlamelo otsha le Jehowa naka ɔnangɛso ɔmɔtshi lele l’ɛkɛndɛ ambotosalɛ akambo aha la losembwe. Nkumekanga Saolo akasɔnama oma le Nzambi, koko nde akasalɛ ɔnande hita la pami akambo wa kɔlɔ. Nde koshihodia lande na kakokaka Jɔnatana Davidɛ ngandji. Ɔnkɔnɛ etena kakahembe Jɔnatana dia nkimanyiya Davidɛ, Saolo akoke nkɛlɛ k’efula, ndo nde akawosha sɔnyi la ntondo k’anto efula. Koko Jɔnatana akatetemala nɛmiya she. L’etena kakɔ kaamɛ, nde akatshikala la kɔlamelo le Jehowa ndo  le Davidɛ, ɔnɛ lakasɔnama oma le Nzambi dia monga nkumekanga k’oyoyo k’Isariyɛlɛ.​—1 Samuele 20:30-41.

15. Naka ɔnangɛso ɔmɔtshi ambotosalɛ akambo aha la losembwe, ahombaso nsala?

¹⁵ Ɛlɔ kɛnɛ lo tshumanelo diaso, anangɛso wele l’ɛkɛndɛ salaka la wolo dia salɛ onto tshɛ akambo la losembwe. Koko anangɛso asɔ wekɔ anto wele bu kokele. L’ɔtɛ wa dikambo sɔ, vɔ kokaka monga l’okakatanu dia nshihodia lande na kakatasadi dui kapanda. (1 Samuele 1:13-17) Ɔnkɔnɛ, naka wambotokanɛ kɔlɔ kana hawotoke, totshikale la kɔlamelo otsha le Jehowa.

16. L’akambo akɔna wahombaso monga la kɔlamelo le Nzambi ndo wahatahombe monga la lokaki?

¹⁶ Saolo akakombolaka dia Jɔnatana nkoma nkumekanga k’oyoyo lo dihole dia Davidɛ. (1 Samuele 20:31) Koko Jɔnatana akokaka Jehowa ngandji ndo aki la kɔlamelo le nde. Ɔnkɔnɛ, lo dihole dia nde monga la lokaki, Jɔnatana akakome ɔngɛnyi wa Davidɛ ndo akakotsha dɔkɔlɔkɔ diande le nde. Lo mɛtɛ, onto tshɛ loka Jehowa ngandji ndo lele la kɔlamelo le nde ‘hatokadimɔka lo daka diande, oyadi kaanga diɔ diekɔ kɔlɔ le nde.’ (Osambu 15:4) Lam’ele tekɔ la kɔlamelo otsha le Nzambi, sho tayokotsha alɔkɔlɔkɔ aso. Ɛnyɛlɔ, naka tambokana dui dimɔtshi diendana l’awui w’okanda, sho pombaka nsala kɛnɛ kakatetawɔ dia nsala, oyadi dui sɔ diaya wolo. Ndo naka tekɔ l’ekakatanu lo diwala diaso, tayɛnya Jehowa ngandji kawokaso lo ntshikala la kɔlamelo le omɛso kana wadɛso.​—Adia Malaki 2:13-16.

17. Ngande wambotokimanyiya sawo nɛ?

¹⁷ Sho nangaka monga la kɔlamelo le Nzambi kaanga l’atei w’ekakatanu l’ɛnyɛlɔ ka Jɔnatana. Laasɔ, nyɛsɔ totshikale la kɔlamelo le anangɛso l’akadiyɛso etena katonyangiyawɔ. Lo nsala ngasɔ, tayɔngɛnyangɛnya otema wa Jehowa ndo kɛsɔ ayosala dia sho monga l’ɔngɛnɔngɛnɔ woleki tshɛ. (Tukedi 27:11) Sho koka monga l’eshikikelo ɔnɛ nde ayotosalɛka nshi tshɛ kɛnɛ koleki ɔlɔlɔ le so ndo ayotokotshɛka ehomba aso. Lo sawo diayela, tayɛna wetshelo wakokaso nkondja oma le anto amɔtshi wa lo nshi ya Davidɛ waki la kɔlamelo ndo wanɛ waki komonga la kɔlamelo.