1. Kakɔna kakoka nkimanyiya ekambi wa Jehowa dia ntetemala mbɔtɛmɔla kaanga mbahomanawɔ l’ekakatanu?

 BIBLE mbelɛka nshi yasɛnaso nyɛ ɔnɛ: “Tena dia paa dia wolo mbikikɛ.” (2 Tim. 3:1) Laadiko di’ekakatanu wahomana l’anto lo dikongɛ nɛ di’akambo, ekambi wa Jehowa wekɔ lo mpomana l’ɔlɔshamelo ndo l’ɛhɛnyɔhɛnyɔ. Kakɔna kakoka tokimanyiya dia ntetemala ntɛmɔla Jehowa kaanga la ntondo k’ekakatanu ɛsɔ? Dui dioleki ele woho wakateye dia Jehowa ekɔ “Nzambi kasɛna.”—Jɛr. 10:10; 2 Tim. 1:12.

2. Lo woho akɔna wele Jehowa, Nzambi kasɛna?

² Jehowa ekɔ onto la mɛtɛ latosukɛ l’ehemba ndo layanga waaso wa tokimanyiya. (2 Ɛk. 16:9; Os. 23:4) Mbɔɔsa oko Nzambi kasɛna koka tokimanyiya dia ntondoya oseka okakatanu tshɛ wakoka tokomɛ. Tɔsɛdingole woho waki dui sɔ mɛtɛ le nkumekanga Davidɛ.

3. Kakɔna kakalange Davidɛ mbuta etena kakandate dia “Jehowa ekɔ la lɔsɛnɔ”?

³ Davidɛ akeyaka Jehowa ndo akayaɛkɛka le Nde. Etena kakatawotshanyaka nkumekanga Saolo l’anto akina dia mbodiaka, Davidɛ akalɔmbɛ Jehowa dia mbokimanyiya. (Os. 18:6) L’ɔkɔngɔ wa Nzambi nkadimola dɔmbɛlɔ diande ndo mboshimbɛ, Davidɛ akate ate: “Jehowa ekɔ la lɔsɛnɔ!” (Os. 18:46) Lo mbuta ɛtɛkɛta ɛsɔ, Davidɛ kombeyaka tsho ɔnɛ Nzambi ekɔ. Dibuku dimɔtshi mbutaka dia Davidɛ akɛnya omamemelo ande le Jehowa “oko nzambi kasɛna katosalaka akambo lo wahɔ w’ekambi ande.” Mɛtɛ, Davidɛ akeye oma lo kɛnɛ kakookomɛ dia Nzambi kande aki la lɔsɛnɔ ndo eshikikelo  kɛsɔ akakeketsha yɛdikɔ yande ya kambɛ ndo ntombola Jehowa.—Os. 18:​28, 29, 49.

4. Wahɔ akɔna wayotokondja lo mbɔsa Jehowa oko Nzambi kasɛna?

⁴ Eshikikelo kaso k’ɔnɛ Jehowa ekɔ Nzambi kasɛna koka tokimanyiya dia mbokambɛ l’ohetoheto. Tayonga la wolo wa mbikikɛ ehemba ndo dui sɔ diayototshutshuya dia ntetemala nkamba wolo l’olimu ande. Ndo nto, tayoyashikikɛ dia ntetemala ntshikala suke la Jehowa.

NZAMBI KASƐNA AYOKOKEKETSHA

5. Eshikikelo kakɔna kele la so etena kahomanaso l’ehemba? (Filipɛ 4:13)

⁵ Tayonga l’akoka wa mbikikɛ oseka ohemba tshɛ, oyadi wa woke kana wa tshitshɛ, naka sho mbohɔka dia Jehowa ekɔ la lɔsɛnɔ ndo ɔnɛ nde ekɔ suke dia tokimanyiya. Kɛnɛ kele mɛtɛ ele, ndooko okakatanu wakoka mpomana la so wele wolo le Nzambi kaso. Nde ekɔ Kanga-Wolo-Tshɛ ndo nde koka tosha wolo wa mbikikɛ. (Adia Filipɛ 4:13.) Ɔnkɔnɛ, tekɔ l’ɛkɔkɔ tshɛ wa ntokomɛ ehemba l’eshikikelo. Woho wakatosukɛ Jehowa l’ehemba wa totshitshɛ toshikikɛka dia nde ayotosukɛ ndo l’ehemba wa weke.

6. Awui akɔna wakete etena kaki Davidɛ eke dikɛnda wakafudia wɛkamu ande le Jehowa?

⁶ Tɔsɛdingole awui ahende wakafudia wɛkamu wa Davidɛ otsha le Jehowa. Etena kakalamaka Davidɛ ɛkɔkɔ, laondo akande ɔkɔkɔ ndo ntambwɛ akande ɔkɔkɔ oma l’ɛkɔkɔ wa she. Lo waaso akɔ ehende, la dihonga tshɛ, Davidɛ akayele nyama shɔ ndo akatoshimbɛka ɛkɔkɔ. Koko, nde kondjafuna l’ɔtɛ wakandasale dui sɔ. Nde akeyaka dia Jehowa mbakawosha wolo wa nsala dui sɔ. (1 Sa. 17:​34-37) Davidɛ kombohɛ pondjo awui asɔ. Lo kanaka yimba la wɔ, nde aki l’eshikikelo dia Nzambi kasɛna ayowokeketsha lo nshi yayaye.

7. Ngande wele mɛna akambo la sso di’ɔlɔlɔ akakimanyiya Davidɛ dia tɔlɔsha Ngɔliyatɛ?

⁷ Oma laasɔ, etena kakinde eke mangase, Davidɛ akatshu lo mpango k’asɔlayi k’ase Isariyɛlɛ. Nde akatane di’asɔlayi waki la wɔma efula l’ɔtɛ wakatombe dikongote di’ose Filistiya diakawelɛka Ngɔliyatɛ ndo wakandatatɛ ‘mbidja andɔshi wa ta w’ase Isariyɛlɛ tɔfwɛfwɛ.’ (1 Sa. 17:​10, 11) Asɔlayi wakandama la wɔma lo menda woho waki Ngɔliyatɛ dikongote ndo l’ɔtɛ wa tɔfwɛfwɛ takandawadje. (1 Sa. 17:​24, 25) Koko, Davidɛ akɛnyi akambo lo yoho yotshikitanyi. Davidɛ akeye di’etena kakasɔkaka Ngɔliyatɛ asɔlayi w’ase Isariyɛlɛ, nde akatɛngaka “andɔshi wa ta wa Nzambi kasɛna.” (1 Sa. 17:26) Davidɛ akakanyiyaka Jehowa lo yimba yande. Davidɛ aki l’eshikikelo dia Nzambi lakokimanyiya l’etena kakinde olami w’ɛkɔkɔ ayowokimanyiya nto lo dikambo nɛ. L’eshikikelo k’awui wakosalɛ Nzambi lo nshi yakete asɔ, nde akatshu tɔlɔsha Ngɔliyatɛ ndo aha la taamu, Davidɛ akɔlɛndja!—1 Sa. 17:​45-51.

8. Ngande wakokaso mendɛka le Jehowa etena kahomanaso l’ehemba? (Enda ndo osato.)

⁸ Sho lawɔ koka ntondoya ehemba naka sho mbohɔ dia Nzambi kasɛna ekɔ suke dia tokimanyiya. (Os. 118:6) Sho koka nkeketsha wɛkamu aso lo dui sɔ lo sɛdingola kɛnɛ kakandasale lo nshi yakete. Adia ɛkɔndɔ wa lo Bible wakohola woho wakashimbɛ Jehowa atɛmɔdi ande. (Isa. 37:​17, 33-37) Sɛdingola nto alapɔlɔ wele lo sitɛ kaso k’Ɛtɛrnɛtɛ ka jw.org wɛnya woho wasukɛ Jehowa anangɛso l’akadiyɛso wa nshi nyɛ. Laadiko dia laasɔ, ohɔka tena diakasale Jehowa akambo lo wahɔ ayɛ. Ondo wɛ koka ndjaoka di’oko Jehowa  atakosalɛka dui dia diambo diele oko koshimbɛ oma le ntambwɛ kana laondo. Kɛnɛ kele mɛtɛ ele, Jehowa ambokosalɛka awui efula lo lɔsɛnɔ layɛ! Nde akakokotola dia wɛ monga ɔngɛnyi ande. (Jni. 6:44) Kaanga kakianɛ, ekɔ diɛsɛ l’ekimanyielo ka Jehowa mbatetemalayɛ ntshikala l’akambo wa mɛtɛ. Lande na kahayɔlɔmbɛ dia kokimanyiya dia wɛ mbohɔka tena diakandakadimola lo alɔmbɛlɔ ayɛ, diakandakosukɛ etena kaki dui sɔ ohomba kana woho wakandakokimanyiya etena kakayatenyanyaka tena dia wolo? Kanaka yimba l’awui asɔ ayotetemala nkeketsha dietawɔ diayɛ di’ɔnɛ Jehowa ayotetemala nsala akambo lo wahɔ ayɛ.

9. Ngande wakokaso mbɔsaka ehemba aso? (Tokedi 27:11)

⁹ Mbɔsa Jehowa oko Onto lasɛna, ayotokimanyiya dia mɛna ehemba aso la sso di’ɔlɔlɔ. Lo ngande? Tayotatɛ mɛna ehemba aso oko etenyi kɛmɔtshi ka woke k’okakatanu wa lam’asa Jehowa la Satana. Diabolo sɛmaka dia naka sho mpomana l’ekakatanu wa wolo, kete tayɔsɛka Jehowa. (Jɔbɔ 1:​10, 11; adia Tokedi 27:11.) Koko etena katondoyaso ehemba, sho mɛnyaka ngandji kokaso Jehowa ndo mɛnyaka dia Diabolo ekɔ kanga kashi. Onde wɛ ekɔ lo mpomana l’ɔlɔshamelo w’oma le ewandji wa lɛɛta, ekakatanu wendana l’ekondjelo, wendjudi l’olimu w’esambishelo kana ehemba ekina? Naka ngasɔ, kete ohɔ dia kɛnɛ kambokokomɛ koshaka diaaso dia ngɛnyangɛnya otema wa Jehowa. Ohɔ nto dia nde hatetawɔ pondjo dia wɛ pembama oleki kɛnɛ kakokayɛ mbikikɛ. (1 Kɔr. 10:13) Nde ayokosha wolo wa mbikikɛ.

NZAMBI KASƐNA AYOKOFUTA

10. Kakɔna kayosalɛ Nzambi kasɛna wanɛ wɔtɛmɔla?

¹⁰ Jehowa ekɔ Ofutshi wa wanɛ wɔtɛmɔla. (Hɛb. 11:6) Nde toshaka wɔladi ndo ɔngɛnɔngɛnɔ oma ko kakianɛ ndo lo nshi yayaye lɔsɛnɔ la pondjo. Sho koka nongamɛ le Jehowa, tele l’eshikikelo dia nde ekɔ la nsaki ndo la wolo wa tofuta. Ndo eshikikelo kɛsɔ totshutshuyaka dia monga l’awui efula wa nsala  l’ɔtɛmwɛlɔ aso, paka oko wakatshutshuyama ekambi wa Nzambi wa lo nshi yakete dia nsala. Kɛsɔ mbakasale Timɔte lo ntambe ka ntondo.—Hɛb. 6:​10-12.

11. Kakɔna kakatshutshuya Timɔte dia nkamba wolo l’etshumanelo? (1 Timɔte 4:10)

¹¹ Adia 1 Timɔte 4:10. Timɔte akendɛka le Nzambi kasɛna. Ɔnkɔnɛ, nde aki l’ɛkɔkɔ wa nkamba wolo lo dikambo dia Jehowa ndo di’anto akina. Lo toho takɔna? Ɔpɔstɔlɔ Pɔɔlɔ akookeketsha dia nde nsala ehamelo oko ombetsha ndo ɔtɛkɛtshi wa lo sɛkɛ. Timɔte akatshike nto ɛnyɛlɔ k’ɔlɔlɔ le asekande ambetawudi, oyadi akɛnda kana epalanga. Ndo wakawosha ɛkɛndɛ ekina wa wolo, mbidja ndo wa mbisha alako wa wolo, koko wa la ngandji, le wanɛ waki l’ohomba awɔ. (1 Tim. 4:​11-16; 2 Tim. 4:​1-5) Timɔte aki l’eshikikelo dia kaanga etena kaki olimu ande kɔmbɔsamaka la nɛmɔ kana anto komandolaka olimu akɔ, Jehowa akahombe mbofuta.—Rɔmɔ 2:​6, 7.

12. Kakɔna kakoka ntshutshuya dikumanyi dia monga l’akambo efula wa nsala l’olimu awɔ? (Enda ndo osato.)

¹² Ɛlɔ kɛnɛ, dikumanyi diɔ lawɔ koka monga l’eshikikelo dia Jehowa mɛnaka ndo mbɔsaka olimu wa dimɛna wakambawɔ la nɛmɔ. Laadiko di’olimu wa nama ɛkɔkɔ, wa wetshelo ndo w’esambishelo, dikumanyi efula diekɔ lo mbisha lonya lo prɔjɛ ya wokelo ndo ya mbisha ekimanyielo etena katomba mpokoso. Amɔtshi kambaka lo Kɔmite y’Elui wembola ɛkɔnyi kana lo Kɔmite ka diɔtɔnganelo la mpitadi. Dikumanyi diele suke dia nsala elimu ɛsɔ mbɔsaka etshumanelo oko kaki Jehowa koko aha k’onto ɔmɔtshi. Ndo etombelo wonga la dui sɔ ele, vɔ ndjashaka dia nkotsha ɛkɛndɛ awɔ l’anima awɔ tshɛ ndo wekɔ l’eshikikelo ɔnɛ Nzambi ayowafuta l’ɔtɛ wa kɛnɛ kasalawɔ.—Kɔl. 3:​23, 24.

13. Ngande wayaoka Jehowa lo dikambo dia welo wadjaso l’olimu ande?

¹³ Aha onto tshɛ mbakoka monga ekumanyi. Koko sho tshɛ koka mbisha Jehowa ɛngɔ  kɛmɔtshi. Nzambi kaso ngɛnangɛnaka etena kasalaso la wolo dia mbokambɛ. Nde mɛnaka woho washaso lonya l’olimu wasalema l’andja w’otondo, oyadi woho tshɛ wewɔ. Nde ngɛnangɛnaka etena kɛnande tasala la wolo dia minya nsɔnyi ndo memɛ lonya dia mbisha kɔmatɛrɛ lo nsanganya ndo nde ngɛnangɛnaka etena kohɛso dui dia kɔlɔ diakawatosalɛ ndo kadimanyiyaso. Oyadi wɛ mɛnaka dia wɛ hakoke nsala akambo efula wakombolayɛ nsala, onga l’eshikikelo dia Jehowa mbɔsaka kɛnɛ kakokayɛ nsala la nɛmɔ. Nde kokaka ngandji l’ɔtɛ ɔsɔ ndo nde ayokofuta.—Luka 21:​1-4.

TSHIKALA SUKE LA NZAMBI KASƐNA

14. Ngande wele monga la diɔtɔnganelo dia ma ma la Jehowa tokimanyiyaka dia ntshikala la kɔlamelo? (Enda ndo osato.)

¹⁴ Naka sho monga la diɔtɔnganelo dia dimɛna la Jehowa, kete tayɛna dia ekɔ wɔdu dia sho ntshikala la kɔlamelo le nde. Dui sɔ diaki mɛtɛ le Yɔsɛfu. Nde akatone la wolo tshɛ dia nsala awui wa mindo. Nde aki la diɔtɔnganelo dia dimɛna la Nzambi ndo nde konanga mboonyangiya. (Eta. 39:9) Dia sho monga la diɔtɔnganelo dia dimɛna la Jehowa, sho pombaka tshungolaka etena ka mbɔlɔmbaka ndo mbekaka Ɔtɛkɛta ande. Lɔngɛnyi la lam’asaso la nde layohama. Oko Yɔsɛfu, etena kongaso la diɔtɔnganelo dia dimɛna la Jehowa, sho hatotetawɔ dia nsala dui diakoka mbonyangiya.—Jak. 4:8.

15. Wetshelo akɔna wakokaso nkondja oma lo kɛnɛ kakakomɛ ase Isariyɛlɛ l’oswe wa shɛnga? (Hɛbɛru 3:12)

¹⁵ Wanɛ wohɛ dia Jehowa ekɔ Nzambi kasɛna, koka ndjanganya la nde aha l’okakatanu. Tɔsɛdingole kɛnɛ kakakomɛ ase Isariyɛlɛ etena kakiwɔ l’oswe wa shɛnga. Vɔ wakeyaka dia Jehowa ekɔ, koko wakatatɛ monga la taamu ɔnɛ nde hatowakotshɛ ehomba awɔ. Wakayokoma polo lo mimbola ɔnɛ: “Onde Jehowa ekɔ l’atei aso, kana bu?” (Eto. 17:​2, 7) Oma laasɔ, wakayɔtɔmbɔkwɛka Nzambi. Lo mɛtɛ, sho tonaka ndjela ɛnyɛlɔ kawɔ ka kɔlɔ.—Adia Hɛbɛru 3:12.

16. Kakɔna kakoka mbidja mbetawɔ kaso l’ohemba?

 ¹⁶ Andja ɔnɛ toshimbaka dia monga suke la Jehowa. Anto efula tonaka kanyi y’ɔnɛ Nzambi ekɔ. Mbala efula, mɛnamaka oko wanɛ watona kɛnɛ kalɔmba Nzambi wekɔ la lɔsɛnɔ la dimɛna. Etena kɛnaso awui asɔ, mbetawɔ kaso koka mbɔtɔ l’ohemba. Kaanga mbetawɔso dia Nzambi ekɔ, sho koka ndjotatɛ ndjambola dia kana nde koka nsala akambo lo wahɔ aso. Ofundji w’osambo wa 73 akayonga nde lawɔ la kanyi shɔ. Nde akɛnyi wanɛ wakodinge wɔnyɔla ɛlɛmbɛ wa Nzambi ndo waki la lɔsɛnɔ la dimɛna. Etombelo waki la dui sɔ ele, nde akayotatɛ ndjaoka ambola dia kana aki ohomba kambɛ Nzambi.—Os. 73:​11-13.

17. Kakɔna kayotokimanyiya dia ntshikala suke la Jehowa?

¹⁷ Kakɔna mɛtɛ kakakimanyiya omembi w’esambo dia ntshikitanya ekanelo kande? Nde akakane yimba lo kɛnɛ kakahombe nkomɛ wanɛ wakatone dia ndjaɛkɛ le Jehowa. (Os. 73:​18, 19, 27) Nde akɛnyi nto ɛtshɔkɔ waya lo kambɛ Jehowa. (Os. 73:24) Sho lawɔ koka nkanyiya ɛtshɔkɔ tshɛ wakatakondja oma le Jehowa. Ɛdika woho wotonga lɔsɛnɔ laso otondongaka sho hatokambɛ Jehowa. Nsala ngasɔ ayotokimanyiya dia ntshikala la kɔlamelo ndo mbuta oko wakate omembi w’esambo ate: “Le mi, nsukana la Nzambi kele ɔlɔlɔ le mi.”—Os. 73:28.

18. Lande na kakokaso ntokomɛ nshi yayaye l’eshikikelo?

¹⁸ Sho koka ntokomɛ woho w’okakatanu tshɛ lo nshi y’ekomelo nyɛ nɛ dia tekɔ lo “kambɛ Nzambi kasɛna ndo ka mɛtɛ.” (1 Tɛs. 1:9) Nzambi kaso ekɔ Onto la mɛtɛ lasala akambo lo wahɔ wa wanɛ tshɛ wɔtɛmɔla. Nde akɛnya dia nde aki kaamɛ l’ekambi ande wa lo nshi y’edjedja ndo nde ekɔ la so nshi nyɛ. Keema edja, tayanga monga lo mfɔnu ka woke. Koko hatotonga shoamɛ, Jehowa ayonga kaamɛ la so. (Isa. 41:10) Nyɛsɔ sho tshɛ “[tonge] la dihonga di’efula ndo mbuta ɔnɛ: “Jehowa kele okimanyedi ami, dimi hantoka wɔma.’”—Hɛb. 13:​5, 6.