TƆNDƆ DIA LO BIBLE: “Nyotshike ndjakiyanya dikambo dia nsɛnɔ yanyu.”​—Mateo 6:25.

Kakɔna kalembetshiya tɔndɔ sɔ? Yeso akate ɛtɛkɛta ɛsɔ lo Dako diande dia lo dikona. Lo ndjela diksiɔnɛrɛ dimɔtshi di’awui wa lo Bible, vɛrbɛ ya lo Grɛkɛ yokadimɔmi ɔnɛ “ndjakiyanya” koka mendana la “kɛnɛ katosalaka onto la ntondo ka wola, ndjala ndo awui akina wotshindja wɔɔngɔ wahomana la nde lo lɔsɛnɔ la lushi la lushi.” Mbala efula okiyanu mendanaka la tshimba wɔɔngɔ dikambo dia awui wa lo nshi yayaye. Ekɔ dimɛna ndo sunganaka dia ndjakiyanya dikambo dia ehomba aso wa lo demba ndo dikambo dia yonge ya wakiso wokaso ngandji. (Filipɛ 2:20) Koko etena kakate Yeso ɔnɛ: “Tanyoyakiyanyake pondjo,” nde akashaka ampokami ande dako dia mbewɔ ndjakiyanya amboleka, mbuta ate monga la wɔma wamboleka dikambo dia loyi ko nshisha ɔngɛnɔngɛnɔ dia nsɛna ɛlɔ.​—Mateo 6:31, 34.

Onde tɔndɔ nɛ diekekɔ ohomba nshi nyɛ? Tayonga akanga wa tomba naka sho nkitanyiya dako dia Yeso. Lande na? Abuku amɔtshi mbutaka dia etena kayakiyanya anto lo yoho y’efula, wɔɔngɔ awɔ tetemalaka nkamba olimu ndo dui sɔ “mbelaka hemɔ yele oko mpota, hemɔ ka lo dui ndo asthme.”

Yeso akasha ɔkɔkɔ w’oshika dia mbewɔ dia ndjakiyanya amboleka: Dui sɔ bu ohomba. Yeso akambola ate, “Onto akɔna l’atei anyu ayokoka ntaloya otale wa lɔsɛnɔ lande kaanga yema tshi tshɛ oma lo woho wayakiyanyande?” (Mateo 6:27) Naka sho ndekaka nkanyiya dikambo dia ekiyanu aso, kete dui sɔ hotaloya lɔsɛnɔ laso kaanga losekɔndɛ ɔtɔi. Laadiko dia laasɔ, mbala efula akambo hawotongaka oko wokaso wɔma. Nomb’ewo kɛmɔtshi akasha kanyi yande lo dui sɔ lo mbuta ɔnɛ: “Ndjakiyanya dikambo dia nshi yayaye ekɔ wetshelo wa wenya, ndo nshi yayaye mbala efula mongaka dimɛna oleki woho wafɔnyaso wakoka monga.”

Ngande wakokaso mbewɔ ekiyanu? Ntondotondo, toyaɛkɛ le Nzambi. Naka Nzambi mbishaka mfudu diangɔ dia ndɛ ndo ndɔtshaka alɛmbɔlɛmbɔ dimɛna, onde nde hatokotsha ehomba wa lo lɔsɛnɔ wa anto wanɛ wetsha ɔtɛmwɛlɔ ande lo dihole dia ntondo lo nsɛnɔ yawɔ? (Mateo 6:25, 26, 28-30) Dui diahende ele, tɔsɛnake lo ndjela lushi la lushi. Yeso akate ate: “Tanyoyakiyanyake pondjo dikambo dia loyi, nɛ dia loyi ayonga la ekiyanu alɔ.” Onde wɛ hashikikɛ dia “lushi la lushi lekɔ l’ekakatanu alɔ.”?​—Mateo 6:34.

Lo nkitanyiya dako dia Yeso dia lomba, sho koka ndjakokɛ shoamɛ diaha ndjahomuya. Laadiko dia laasɔ, tayonga la wɔladi wa l’etei k’otema mbuta ate kɛnɛ kelɛ Bible ɔnɛ “wɔladi wa Nzambi.”​—Filipɛ 4:6, 7.