OHƆSA dia wɛ ekɔ lo takɛndakɛnda lo mboka kɛmɔtshi ka wodjima la dikɔlɔ di’otsho. Kaanga mbele wonya akashidi mbidja, wɛ hayaoke dia wɛ ambonganɛ nɛ dia wɛ ekɔ la tɔrshɛ ka wolo lo lonya layɛ. Etena kamboyokiendjiya otsha lo nkɛtɛ, wɛ ambɛna dimɛna kɛnɛ kele la ntondo kayɛ mbala kakɔ ɔtɔi. Etena kamboyokiendjiya otsha la ntondo, tɔ kambongamula mboka k’otondo polo l’etale.

Lo toho tɔmɔtshi, Bible kekɔ oko tɔrshɛ kɛsɔ. Oko wakatɛnyi lo asawo wetshi, Ɔtɛkɛta wa Nzambi koka tokimanyiya dia sho ndɔshana mbala kakɔ ɔtɔi la kɛnɛ kele la ntondo kaso, mbuta ate ekakatanu wa lushi la lushi wahomana la so sho tshɛ lo andja wa wodjima ɔnɛ. Koko Bible salaka awui efula laadiko dia laasɔ. Tɔ tongamulɛka nto osase wendana la nshi yayaye, tokimanyiyaka dia mɛna ndo ndjela mboka katɔla otsha l’ɔngɛnɔngɛnɔ wa pondjo ndo ngɛnangɛna la kɛnɛ kele la so. (Osambo 119:105) Lo ngande?

Ɛsɔ tende toho tohende tatosha Bible elongamelo k’oshika kendana la nshi yayaye: 1 Tɔ tokimanyiyaka dia monga la oyango lo lɔsɛnɔ, ndo 2 tɔ tetshaka woho wa mbɔtɔ lɔngɛnyi la pondjo l’Otungi aso.

Bible mbishaka alako w’amɛna dia ndɔshana l’ekakatanu aso, koko tɔ bu tsho dibuku diashana ekimanyielo. Tɔ hakomɛ tsho lo tokeketsha diaha mbika washo paka lo ekiyanu aso hita, koko Bible tetshaka dia monga l’awui efula wa nsala lo lɔsɛnɔ laadiko di’awui aso hita. Paka lo nsala ngasɔ mbakoka nsɛnɔ yaso monga l’oyango w’oshika.

Tɔshi ɛnyɛlɔ, tɔndɔ dia lo Bible nɛ mbutaka ɔnɛ: “Ɔngɛnɔngɛnɔ waya lo mbisha ndeka wa nongola.” (Etsha 20:35) Onde wɛ koka nkanyiya etena kɛmɔ kakayakimanyiya onto ɔmɔ laki lo dihombo la ɛngɔ kɛmɔ ka l’emunyi? Kana onde wɛ koka nkanyiya etena kakayahokamɛ ɔngɛnyi ayɛ ɔmɔ akotɛ ekiyanu ande? Onde wɛ komonga l’ɔngɛnɔngɛnɔ lo nkimanyiya onto ɔmɔ dia nde ndjaoka dimɛna?

Sho mongaka l’ɔngɛnɔngɛnɔ efula etena kakimanyiyaso onto aha la nongamɛ nkondja ɛngɔ oma le nde. Pami kɛmɔtshi kele ofundji akate ate: “Ekɔ yema wolo dia nkaha ɛngɔ aha la nongola efula oleki  kɛnɛ kokahiyɛ, koko dia dui sɔ salema, paka wɛ monga la kanyi yaha nongamɛ kaanga difuto ɔtɔi etena kakahayɛ.” Ɔnkɔnɛ, etena kakahaso, djekoleko etena kakahɛso wanɛ wele bu l’akoka wa tokawoyɛ, tekɔ lo nongola difuto. Hatotenda paka wahɔ aso eto. Lo mɛtɛ, tekɔ lo nkamba dihɛka lo dihɛka kaamɛ la Otungi aso ndamɛ, ɔnɛ lɛɛna etsha wa kɛtshi wa ngasɔ oko onto lawɔsɔndja. (Tokedi 19:17) Nde mbɔsaka la nɛmɔ efula kɛnɛ kasalɛso tombolambola, ndo nde tolakaka dia tofuta ɛngɔ koleki tshɛ, mbuta ate lɔsɛnɔ la pondjo lo paradiso ka la nkɛtɛ, ɔsɔ mɛtɛ ekɔ elongamelo k’ɔngɛnɔngɛnɔ lo nshi yayaye!​—Osambo 37:29; Luka 14:12-14. *

Laadiko dia laasɔ, Bible tetshaka dia sho koka monga la oyango w’oshika lo lɔsɛnɔ lo ntɛmɔla Jehowa, Nzambi ka mɛtɛ. Ɔtɛkɛta ande tokeketshaka dia sho mbotombola, mbosha nɛmɔ ndo monga l’okitanyiya wakoka otsha le nde. (Ondaki 12:13; Ɛnyɛlɔ 4:11) Etena kasalaso ngasɔ, sho salaka dui dimɔ dia diambo diahombaso nkana la diɔ yimba: Sho mongaka la shɛngiya otsha le Otungi aso lo yoho ya dimɛna. Lo mɛtɛ, nde tɔlɔmbaka ɔnɛ: “Oyale kanga lomba ndo ɔngɛnyangɛnya otema ami.” (Tokedi 27:11) Ohokanyiya yema, etena kɔsaso tɛdikɔ ta lomba tɔtɔnɛ l’atɔndɔ wa lo Bible, sho ngɛnyangɛnyaka otema wa Shɛso ka ngandji lele l’olongo. Lande na? Nɛ dia nde ndjakiyanyaka dikambo diaso ndo nangaka sho nkondja wahɔ lo ndjelaka ɛlɔmbwɛlɔ kande. (Isaya 48:17, 18) Lo mɛtɛ, ndooko oyango wa woke wakokaso ndjadjɛ ko ndeka wɔnɛ wa ntɛmɔla Omboledi wa l’andja w’otondo ndo nsɛna dia ngɛnyangɛnya otema ande.

Bible tetshaka nto dia sho mbɔtɔ lɔngɛnyi la Otungi aso. Afundelo totɛka ɔnɛ: “Nyoyasukanya la Nzambi, ko nde ayoyasukanya la nyu.” (Jakɔba 4:8) Lo tena dimɔ, sho koka ndjonga la taamu dia nkana mɛtɛ sho koka monga angɛnyi w’Otungi aso lele Kanga-Wolo-Tshɛ. Koko, Bible toshikikɛka ɔnɛ naka sho “nyanga Nzambi,” kete ‘lo mɛtɛ, tayowotana,’ nɛ dia “nde bu etale oma le ɔmɔmɔ la l’atei aso.” (Etsha 17:27) Dako dia lo Bible dikambo dia monga ɔngɛnyi wa Nzambi diekɔ ohomba efula lo nshi yaso yayaye. Lo ngande?

Tɔsɛdingole dui nɛ: Oyadi welo akɔna wakokaso mbidja, ndooko onto la l’atei aso lakoka mpandɔ oma le otunyi w’ekomelo, mbuta ate nyɔi. (1 Kɔrɛtɔ 15:26) Koko Nzambi tshikalaka pondjo. Nde havɔki pondjo, ndo nde nangaka di’angɛnyi ande sɛnaka pondjo pondjo ndo vɔ la wɔ. Lo nkamba la ɛtɛkɛta w’amɛna wayela ɛnɛ, Bible mɛnyaka kɛnɛ kalanga Jehowa le wanɛ wooyanga ɔnɛ: “Nyongake la lɔsɛnɔ pondjo pondjo.”​—Osambo 22:26.

Ngande wakokayɛ mbɔtɔ lɔngɛnyi la pondjo la ngasɔ la Nzambi? Tetemala mbeka awui ande lo tshimbo y’Ɔtɛkɛta ande, Bible. (Joani 17:3; 2 Timɔte 3:16) Yanga ekimanyielo kande dia nshihodia Afundelo. Bible toshikikɛka dia naka sho ‘ntetemala nɔmba Nzambi’ lomba, kete nde ayotoshalɔ. * (Jakɔba 1:5) L’ekomelo, sala la wolo dia nkamba la kɛnɛ kekayɛ, lo mbetawɔ di’Ɔtɛkɛta wa Nzambi monga oko “tala lo ekolo [ayɛ]” ndo “osase lo mboka [kayɛ]” oma ko kakianɛ ndo pondjo pondjo.​—Osambo 119:105.