Delphine, lakatatɛkɛtshi diande lo sawo dietshi akayaokaka dia ekiyanu waki la nde wakotomaka dia nde nnɔ wanu lo tshambandeko. Bible hashimbe nnɔ wanu la wɛdimo, koko tɔ mbutaka ɔnɛ: “Tongake l’atei wa wanɛ wanɔ wanu efula.” (Tokedi 23:20) Ɔnwɛlɔ wa wanu lo tshambandeko konyaka lo hemɔ ya wolo, ndanyaka diɔtɔnganelo l’anto ndo konyaka lo nyɔi k’osondjo ka miliyɔ y’anto ɔnɔnyi tshɛ. Efula k’ekakatanu ɛsɔ kokaka mbewɔma naka anto ndjela alako wa lomba watanema lo Bible.

Kɛsɔ mbakasale Delphine. Nde ota kakianɛ ate: “Lakayoshihodiaka dia wanu kokimanyiyakami dia nshidiya ekiyanu ami. Lakakambe la dako dia lomba diatanema lo Filipɛ 4:6, 7, diata ɔnɛ: ‘Lo oseka dikambo tshɛ, tanyoyakiyanyake, koko nyote Nzambi ehomba anyu.’ L’otsho tshɛ etena kakandjɛka tokanyi ndo ekiyanu, lakalɔmbaka Jehowa. Lakawotɛka woho tshɛ wakamayaokaka, oyadi nkɛlɛ, lonyangu, oshishelo w’elongamelo ndo lakɔɔsɛngasɛngaka dia nde kimanyiyami dia dimi ndeka ndjaoka dimɛna. La pindju, laki l’eshikikelo dia lakawɔkɛnɛmɔlɛ mɛtɛ nsaki yami. Mbekelo ka nɔmbaka Jehowa kakankimanyiya dia dimi ndeka ndjaoka dimɛna. Lakɔshi yɛdikɔ diaha nyomɔnɔ wanu nto pondjo. Lam’ele wɔladi wakamatane waki w’oshika, lakasale la wolo diaha mboshisha.”

Awui wa mindo ekɔ l’atei w’akambo wakonya l’ɔkɔmwɛlɔ w’otema ndo asui. Koko atɔndɔ wa lo Bible  koka tokimanyiya dia mbewɔ ekakatanu ɛsɔ lo tɛnya awui amɔtshi wele lo kiɔkɔ, ɛnyɛlɔ nkɛnya la nsaki y’onto lele bu olonganyi aso ndo wendelo wa esato wɛnyawɔ anto etakataka. Samuel lele ɔlɔngɔlɔngɔ mbutaka ate: “Aki dui dia wɔdu nkɛnya la nsaki y’onto lele bu olonganyi ami. Mbala efula dimi kokotwamaka otsha le ɔna womoto koko dimi lakakoka mbuta dia nde akanangaka, kɛsɔ kaka tshutshuyaka dia dimi nsala totshelo tɛnya dia lekɔ lo mbolanga.” Samuel akɛnyi dia nde akakotwamaka mbala efula dia nkɛnya la nsaki y’onto lele bu olonganyi ande kaanga etena kakinde konangaka ndo l’edjedja ka wonya nde akayotatɛ nsala dui sɔ. Koko mbekelo kɛsɔ kakokiyanyaka. Kakianɛ nde ekɔ lo mbuta ate: “Tɔ kaki waale nɛ dia tɔ kakahamiaka nsaki ya lokaki.”

Samuel akadia sawo dimɔtshi diendana l’ɛlɔngɔlɔngɔ dia lo sitɛ k’Ɛtɛrnɛtɛ ka jw.org. Nde akakane yimba la Tokedi 20:11, divɛsa diata ɔnɛ: “Kaanga ɔna [kana, “ɔna pami,” nɔtɛ] mbeyamaka oma lo etsha ande, dia kana dionga diande diekɔ pudipudi ndo dimɛna.” Ngande wakookimanyiya dui sɔ? Samuel akayɛnaka dia kɛnɛ kakandasalaka komonga pudipudi ndo dimɛna. Kakianɛ nde mbutaka ate: “Lakakondja wetshelo nto dia ɔlɔngɔlɔngɔ wele la nsaki ka kɛnyaka la nsaki y’onto lele bu olonganyi ande, ayoyokonya dia nde monga olonganyi wa kɔlɔ etena kayondonga lo diwala. Lakatatɛ nkanyiya woho wayoyaoka womoto layomoyotshuka naka nde mɛnami lakɛnya la nsaki ya womoto okina. Lakɛnyi dia dui sɔ diaki la waale efula. Woho wele nsala dui sɔ bu wolo, hasale dia diɔ monga dui dia dimɛna.” Samuel akatshikitana. Mbewɔ nkɛnya la nsaki y’onto lele bu olonganyi ande akokimanyiya nto dia nde mbewɔ awui wa mindo.

Antonio aki lo waale w’efula waya oma lo awui wa mindo: Nde akayashaka efula lo menda esato wɛnyawɔ anto etakataka. Kaanga mbakinde la wadi lakandalangaka efula, nde akayashaka lo mbekelo kɛsɔ mbala la mbala. Nde mbutaka dia nkana lomba la 1 Petero 5:8 akookimanyiya mɛtɛ. Divɛsa diakɔ mbutaka ɔnɛ: “Nyambalɛke, nyosungukalake. Diabolo otunyi anyu ekɔ lo mbeteta oko ntambwɛ kadikita kayanga onto la nde ndɛ.” Antonio mbutaka ate: “Esato wɛnyawɔ anto etakataka wekɔ wonya tshɛ l’andja weso ɔnɛ ndo esato ɛsɔ koka mfukutanya wɔɔngɔ. Divɛsa sɔ diakakimanyiya mɛtɛ efula dia nkana yimba lo mbeya onto mɛtɛ lele lo kiɔkɔ y’ehemba ɛsɔ. Lakeye esadi eto dia dimi pombaka mbohɔka dia esato wɛnyawɔ anto etakataka ndjaaka oma le Diabolo. Kakianɛ lambeya dia paka Jehowa mbakoka kimanyiyami dia ‘dimi mambalɛka ndo sungukalaka’ dia ndɔshana la tokanyi tandjɛ lo yimba, l’otema ndo lo diwala diami.” Antonio akalongola ekimanyielo kaki la nde ohomba ndo l’ekomelo nde akayotshika mbekelo kaki la nde ka kɔlɔ kɛsɔ. Woho wakandatshike mbekelo kɛsɔ akokimanyiya dia mbewɔ ekakatanu wa wolo.

Mbokɛmaka hwe dia, Bible toshaka alako w’eshika wakoka tokimanyiya dia mbewɔ ekakatanu wa wolo. Ko kayotota dikambo dia ekakatanu wele wamboshilaka mbika edio ndo mɛnamaka dia hawokoke kandɔma? Ɛsɔ tende woho wakoka Ɔtɛkɛta wa Nzambi tokimanyiya dia nkandola ekakatanu wa ngasɔ.