OHƆSA DUI NƐ: Wɛ ekɔ lo tembola luudu lɔmɔtshi lalamawɔ disɛlasɛla (musée) loludi tɔɔ la waa mɔnima w’edjedja. Efula kawɔ wekɔ la wesho, wambotshikitana kulɛrɛ ndo wambolana. Ɛmɔ bɛtshi dia weke diaya bu. Koko, mɔnima ɔmɔtshi wekɔ tshondo tsho, vɔ wekɔ lo mɛnama dimɛna tshɛ lo tshɛ. Wɛ ambombola onto latakɔlɔmbɔla ɔnɛ: “Onde mɔnima ɔnɛ weke oyoyo ndeka ekina?” Nde ambokokadimola ate: “Keema, vɔ waya edja ndeka mɔnima suke la tshɛ, ndo vɔ watawokaka nto.” Wɛ ambowombola ɔnɛ: “Onde vɔ wakakokamɛ diaha vɔ ndanyema oma le diangɔ dimɔtshi?” Ɔnɛ latakɔlɔmbɔla ambokotɛ ate: “Keema, mɔnima ɔnɛ wakahomana la mpɛpɛ ya wolo ndo mvula. Ndo anto w’epetenge efula wakayange dia mbolanya.” Ondo wɛ koka mamba ndo ndjambola ɔnɛ: ‘La diangɔ diakɔna diakawasale mɔnima ɔnɛ?’

Lo yoho mɔtshi, Bible kekɔ oko mɔnima wa diambo ɔsɔ. Tɔ kekɔ dibuku diaya edja efula ndeka abuku efula. Lo mɛtɛ, ekɔ abuku akina nto w’edjedja. Koko l’ɛnyɛlɔ ka mɔnima w’edjedja wakalana, efula k’efundelo w’edjedja wakalanyema lo yoho ya kɔlɔ efula l’edja katete nshi. Ɛnyɛlɔ lo nkamba la tolembetelo tetawoya, kɛnɛ kafundama lo awui wa siansɛ wa nshi nyɛ ndɔshanaka la kɛnɛ kakafundama lo awui wa siansɛ w’edjedja. Amboleka mɛnama dia alako w’aseka enganga wakafundama lo abuku w’edjedja wekɔ waale efula lo dihole dia mbisha ekimanyielo. Ndo efundelo efula w’edjedja waya bu lo dikoho diakawafundama ntondo, tenyi dimɔ diakashishɔ kana diakalana lo yɛdikɔ y’efula.

Koko, Bible tshikitana la efundelo ekina. Tɔ kakatatɛ fundama ambeta ntambe ndekana 35, koko Bible kekekɔ tshondo tsho. Ndo kaanga mbakatalɔshama  mbala ko mbala lo edja ka ntambe, mbuta ate kaanga mbakatatshumbama, shimbama, ndo kaanga mbakasalema diaha tɔ mbɔsama la nɛmɔ, kɛnɛ kata Bible kekɔ paka woho akɔ waamɛ. Lo dihole dia tɔ monga dibuku diambeta loowe lo menda awui w’eyoyo wa nshi nyɛ, Bible kekɔ la awui efula wɛnya shɛnɔdi ya diambo.​—Enda kiombo yele l’ɔtɛ a dui ɔnɛ: “Kambeta loowe kana tɔ tataki kɛnɛ kayosalema edja efula la ntondo?”

Wɛ mbeyaka ndjambola ɔnɛ: ‘Onde wetshelo wa lo Bible wekɔ mɛtɛ ohomba nshi yaso nyɛ?’ Dia nkadimola, yambola wate: ‘Akambo akɔna woleki kɔlɔ wahomana l’anto ɛlɔ kɛnɛ? Wakɔna waleka mbotsha anto wɔma?’ Ondo wɛ koka mfɔnya dia ekɔ ata, olanelo wa nkɛtɛ kana hiɛlɛlɛ, akambo wa ngala kana kɔta mishiko. Tɔsɛdingole kakianɛ atɔndɔ amɔ w’eshika wetsha Bible. Etena katayasɛdingola, yambola ɔnɛ: ‘Naka anto nsɛna lo ndjela atɔndɔ anɛ, onde andja wayonga dihole dia dimɛna efula?’

NGANDJI KA WƆLADI

“Ɔngɛnɔngɛnɔ le wanɛ wadja wɔladi, nɛ dia vɔ wayelamɛ ana wa Nzambi.” (Mateo 5:9) “Naka kokaka, lo edja tshɛ kaakadialemanɛ la nyu, nyodjasɛ l’anto tshɛ ki.”​—Rɔmɔ 12:18.

KƐTSHI, EDIMANYIELO

“Ɔngɛnɔngɛnɔ le wanɛ wokana kɛtshi, nɛ dia vɔ wayowaoka kɛtshi.” (Mateo 5:7) “Nyotetemale mbikikanɛ kɔlɔ ndo nyodimanyiyanake l’otema ɔtɔi lam’asanyu, oyadi kaanga onto ekɔ la dikambo dia nyangɛ osekande, oko wakanyodimanyiya Jehowa * l’otema ɔtɔi, nyu lawɔ pombaka nsala woho akɔ waamɛ.”​—Kɔlɔsayi 3:13.

DIƆTƆNGANELO LAM’ASA NKOHO Y’ALEMBA YOTSHIKITANYI

Nzambi “oma le onto ɔtɔi mbakandatonge anto wa lo wedja tshɛ dia vɔ mbidjasɛ lo nkɛtɛ k’otondo.” (Etsha 17:26) “Nzambi keema la shɔnɔdi, koko lo wedja tshɛ, onto lawoka wɔma ndo lasala akambo w’ɛlɔlɔ mbetawɔmaka le nde”​—Etsha 10:34, 35.

ƆLƐNYƐLƆ WA NKƐTƐ

“Jehowa Nzambi akakitsha pami lo ekambɔ k’Ɛdɛna dia nde kikambaka ndo kilamaka.” (Etatelo 2:15) Nzambi “[ayolanya] wanɛ walanya nkɛtɛ.”—Ɛnyɛlɔ 11:18.

MPETSHA LOKAKI NDO AWUI WA MINDO

“Nyewɔ weho tshɛ wa lokaki, nɛ dia kaanga etena kele onto la diangɔ efula, lɔsɛnɔ lande halolemanɛ la diangɔ diele la nde.” (Luka 12:15) “Awui wa mindo wa dieyanelo ndo weho tshɛ wa mindo kana lokaki watodimɔmake kaanga nimɔma l’atei anyu, oko wahombadiɔ monga le ekilami.”​—Ɛfɛsɔ 5:3.

LOSEMBWE, OLIMU WA WOLO

“Sho kombolaka monga la losembwe lo akambo tshɛ.” (Hɛbɛru 13:18) “Ɔnɛ latovaka atovake nto; koko nde akambe efula.”​—Ɛfɛsɔ 4:28.

OHOMBA WA NKIMANYIYA WANƐ WELE LO DIHOMBO

“Nyokambe la ɛtɛkɛta w’esambelo le wanɛ wambɔkɔmɔ, nyosuke wanɛ wele wɔdu ndo nyonge la solo dia lotutsha otsha le anto tshɛ.” (1 Tɛsalɔnika 5:14) “Nkimanyiya ana wa tshike la wadi waki edo lo asui awɔ.”​—Jakɔba 1:27.

Bible hatɛnya tsho kɛnɛ kahombaso nsala, koko tɔ tɛnyaka ndo kɛnɛ kakokaso nsala. Naka anto  nsɛna lo ndjela atɔndɔ asɔ, kete ekakatanu hawotoleka monga l’andja ɛlɔ kɛnɛ. Lo mɛtɛ, atɔndɔ w’oma lo Bible wamboleka monga ohomba nshi nyɛ oleki nshi ya ntondo! Ko, wahɔ akɔna wakokayɛ nkondja oma lo wetshelo wa lo Bible oma ko kakianɛ?

Onto loleki lomba akate mbala kɛmɔtshi ate: “Lomba lamboshikikɛma oma lo etombelo alɔ.” (Mateo 11:19, nɔtɛ) Shi wɛ mbetawɔka dui sɔ? Dia wɛ menda mɛtɛ kana wɛ ekɔ la lomba, dui sɔ diayɛnama oma lo woho wakambayɛ la lɔ. Ondo wɛ koka mbuta ɔnɛ: ‘Naka Bible kekɔ mɛtɛ ohomba, shi tɔ kotonga la etombelo lo lɔsɛnɔ lami? Ngande wetɔ ohomba lo ekakatanu wahomana la mi kakianɛ?’ Tɔsɛdingole ɛnyɛlɔ kɛmɔtshi.

Delphine * aki la awui efula lo lɔsɛnɔ ndo aki la ekondjelo k’efula. Kombeta edja, nde akayotataka hemɔ efula ya wolo. Ɔnande la womoto akavu. Diwala diande diakayovɔ. Aha la ntshimbatshimba, nde akayonga l’ekakatanu wendana l’ekondjelo. Nde mbohɔka ate: “Dimi kondjonga la kanyi lo woho wakamayonga, mbuta ate aha ɔna, aha omi, aha luudu. Lakayaoke ɛngɔ k’anyanya, mbuta ate dimi komonga l’onto lambidja yimba, komonga la wolo, komonga l’elongamelo lo lɔsɛnɔ.”

Delphine akayɛnaka hwe mɛtɛ k’ɛtɛkɛta ɛnɛ:  “Otale wa lɔsɛnɔ laso ekɔ ɛnɔnyi 70, kana 80 naka onto ekɔ la wolo wa laande. Koko vɔ wambololanɛ la paa ndo la lɔkɔnyɔ; vɔ mbetaka esadi esadi, ko sho mfumbɔ.”​—Osambo 90:10.

Delphine akakondja ekimanyielo lo Bible lo tena di’ekakatanu sɔ. Kɛnɛ kakoosalɛ Bible kaki dui dia diambo. Oko wayɛnya asawo asato wayela, Bible kambokimanyiya anto akina efula etena kakambawɔ la tɔ dia nkandola ekakatanu awɔ. Vɔ wakayoshihodia dia Bible kekɔ oko mɔnima wakatatɛkɛtshi lo mbɔtwɛlɔ. Tɔ tshikitana etale la abuku akina efula watatombe ndo wambeta loowe. Onde l’ɔtɛ wele Bible kakasalema la ɛngɔ kɛmɔ kotshikitanyi? Onde tɔ mɛtɛ tanemaka la tokanyi ta Nzambi koko aha t’anto?​—1 Tɛsalɔnika 2:13.

Ondo wɛ la wɔ akɛnyi dia lɔsɛnɔ lekɔ mondo ndo ndola tɔ la ekakatanu. Etena kamɛnamayɛ l’ekakatanu, lende akokayɛ ntana esambelo, osukɔ ndo alako w’eshika?

Ɛsɔ tɔsɛdingole awui asato w’eshika wakoka Bible monga ohomba lo lɔsɛnɔ layɛ. Tɔ koka ketsha dia

1. mbewɔ ekakatanu naka kokaka.

2. nkandola ekakatanu etena katombawɔ.

3. ndɔshana la awui wele wɛ hakoke tshikitanya.

Asawo wayela wayɔtɛkɛta dia awui asato ango.