Anto efula mbutaka dia wekɔ la mbetawɔ le Nzambi. Koko naka wɛ mbambola ɔnɛ ele Nzambi, vɔ wayokosha ekadimwelo wotshikitanyi. Le anto amɔtshi, Nzambi ekɔ shushi y’awui wolo, yayanga paka dia mbisha anto dilanya l’ɔtɛ wa munga yawɔ. Le anto akina, nde mbokanaka ngandji ndo dimanyiyanaka tena tshɛ, oyadi kɛnɛ tshɛ kasalawɔ. Ndo akina nto mbutaka dia Nzambi mangana etale la so ndo hayasha le so. L’ɔtɛ wa tokanyi totshikitanyi tɔsɔ, anto efula mbeyaka mfɔnya dia hatokoke pondjo mbeya ele Nzambi.

Onde ekɔ ohomba mbeya ele Nzambi? Eelo. Mbeya Nzambi dimɛna koka tokimanyiya dia monga la lɔsɛnɔ lele l’oyango. (Etsha 17:26-28) Etena katayaleke ndjasukanya la Nzambi, mbayondoleka kooka ngandji ndo kokimanyiya. (Jakɔba 4:8) Naka wɛ mbeya Nzambi dimɛna, kete dui sɔ koka kokimanyiya dia nkondja lɔsɛnɔ la pondjo.​—Joani 17:3.

Ngande wakokayɛ mbeya Nzambi? Tɔshi ɛnyɛlɔ k’onto ɔmɔtshi leyayɛ dimɛna, ɛnyɛlɔ ɔngɛnyi ayɛ wa ma ma. Ngande wakatatɛ lɔngɛnyi lɔsɔ? Ondo wɛ akeye lokombo lande l’oshika, lonto lande, kɛnɛ kalangande ndo kahandalange, mbidja ndo kɛnɛ kakandasale ndo kasangoyande nsala ndo awui akina. Awui asɔ mbakakokotola oya le onto ɔsɔ, mbuta ate wɛ akeke awui wendana la nde.

Woho akɔ waamɛ mbele, sho koka mbeya Nzambi lo nsɛdingola ambola wayela anɛ:

• NAA LOKOMBO LA NZAMBI?

• NAA WAONGA WA NZAMBI?

• KAKƆNA KAKASALE NZAMBI?

• KAKƆNA KAYOSALA NZAMBI?

• WAHƆ AKƆNA WAKOKAYƐ NKONDJA LO MBEYA NZAMBI?

Periodikɛ kɛnɛ mbishaka ekadimwelo w’oma lo Bible lo ambola asɔ. Asawo wa lɔkɔ wayokokimanyiya dia mbeya aha tsho ele Nzambi koko ndo woho wayoyokondja wahɔ naka wɛ monga la diɔtɔnganelo dia ma ma la nde.