Etena kalangayɛ mbeya onto ɔmɔtshi, ondo dui dia ntondo diayoyosala ele mombola ɔnɛ: “Lokombo layɛ?” Naka wɛ mboka Nzambi dimbola sɔ, ngande wayondokadimola?

“Dimi kele Jehowa. Ɔsɔ kele lokombo lami.”​—Isaya 42:8.

Ohomba wa lokombo la Nzambi le nde ndamɛ. Ndooko onto lakasha Nzambi lokombo lande, ndamɛ mbakayasɔnɛlɔ. Jehowa akate ate: “Ɔsɔ kele lokombo lami la pondjo ndo lo lokombo lɔsɔ mbayomoohɔmaka lo lɔlɔnga la lɔlɔnga.” (Etombelo 3:15) Lo Bible, Jehowa, lokombo l’oshika laki Nzambi tanemaka mbala efula oleki titrɛ nyɛ: Kanga-Wolo-Tshɛ, Shɛso, Nkumadiɔndjɔ kana Nzambi ndo lɔ tanemaka mbala efula ndeka nkombo y’anto ɛnyɛlɔ, Abrahama, Mɔsɛ, Davidɛ kana Yeso. Kɛnɛ koleki tshɛ ele, Jehowa nangaka dia lokombo lande mbeyama. Bible mbutaka ɔnɛ: “Anto weye dia wɛ, lele lokombo layɛ Jehowa, wɛmɛ kele Ɔnɛ-Laheme-Tshɛ lo nkɛtɛ k’otondo.”​—Osambo 83:18.

Ohomba wa lokombo la Nzambi le Yeso. Lo dɔmbɛlɔ dielamɛ ɔnɛ Dɔmbɛlɔ dia Shɛso, Yeso aketsha ambeki ande dia nɔmbaka ɔnɛ: “Lokombo layɛ lakidiame.” (Mateo 6:9) Yeso ndamɛ akalɔmbɛ Nzambi ɔnɛ: “Papa, otombole lokombo layɛ.” (Joani 12:28) Ntombola lokombo la Nzambi mbaki dui diaketsha Yeso lo dihole dia ntondo lo lɔsɛnɔ lande, diakɔ diakandate lo dɔmbɛlɔ ɔnɛ: “Dimi lakawaewoya lokombo layɛ ndo layoliewoya.”​—Joani 17:26.

Ohomba wa lokombo la Nzambi le wanɛ waweya. Ekambi wa Nzambi wa lo nshi y’edjedja wakashihodia ɔnɛ, ekokelo ndo panda kawɔ kakalemanɛka la lokombo la laande laki Nzambi. “Lokombo la Jehowa lekɔ tshoto ya wolo. Onto ɔlɔlɔ ndawɔka otsha lɛkɔ  ko kondjaka ekokelo.” (Tokedi 18:10) “Onto tshɛ lelɛ lokombo la Jehowa ayoshimbamɛ.” (Jɔɛlɛ 2:32) Bible mbutaka dia lokombo laki Nzambi mɛnyaka otshikitanu wele lam’asa wanɛ wakambɛ Nzambi ndo anto akina. “Dikambo wedja tshɛ wayɔkɛndakɛndaka, wodja la wodja lo lokombo la nzambi kawɔ, Koko sho tayɔkɛndakɛndaka lo lokombo la Jehowa Nzambi kaso pondjo pondjo.”​—Mika 4:5; Etsha 15:14.

Tshɔi ya lokombo yeyanya Nzambi. Nomb’ewo efula mbutaka dia lokombo Jehowa nembetshiyaka ɔnɛ: “Nde salaka dia ndjaala.” Jehowa Nzambi akasale di’anto mbeya kitshimudi ya lokombo lande etena kakandate lo dikambo diande ndamɛ lo ɛtɛkɛta wakandatɛ Mɔsɛ ɔnɛ: “Dimi layoyala kɛnɛ kayomɔsɔna dia ndjaala.” (Etombelo 3:14) Koko, lokombo laki Nzambi halembetshiya ntsho woho wende Otungi wa diangɔ tshɛ. Lokombo lande lɔsɔ mɛnyaka dikoka diele la nde dia nsala dia ndamɛ kana dia ditongami diande ndjaala kɛnɛ tshɛ kahombama dia nkotsha sangwelo diande. Titrɛ mɛnyaka ntsho dihole, lowandji kana wolo wa Nzambi, koko paka lokombo lande Jehowa mbɛnya kɛnɛ tshɛ kende ndo kakokande monga.

Lokombo lɛnya dia Nzambi ndjashaka le so. Kitshimudi ya lokombo laki Nzambi mɛnyaka dia Nzambi tetemalaka ndjasha le etongelo kande, mbidja ndo sho. Ndo nto, woho wakasale Nzambi dia lokombo lande mbeyama, mɛnyaka dia nde nangaka sho mbeeya. Laadiko dia laasɔ, nde akatatɛ totɛ lokombo lande la ntondo ka sho mombola. Mbokɛmaka hwe dia, Nzambi nangaka dia sho mbɔɔsa aha oko Nzambi kaheyama ɔtɛ l’ekolo ndo kanganyi etale l’anto, koko oko onto la mɛtɛ mɛtɛ lakokaso ndjasukanya la nde.​—Osambo 73:28.

Nkamba la lokombo la Nzambi mɛnyaka dia sho ndjashaka le nde. Tɔshi ɛnyɛlɔ, wɛ mbeyaka nɔmba onto ɔmɔtshi lakombolayɛ dia nde monga ɔngɛnyi ayɛ dia kelɛ lo lokombo layɛ l’oshika. Ngande wayoyoyaoka naka onto akɔ ambotetemala ntona dia kelɛ lo lokombo layɛ? Ondo lo tena dimɔtshi, wɛ koka ndjoyambola dia kana onto akɔ mɛtɛ kombolaka monga ɔngɛnyi ayɛ w’oshika. Ngasɔ mbediɔ ndo lo dikambo dia Nzambi. Jehowa akatɛ anto lokombo lande ndo nde tokeketshaka dia sho nkamba la lɔ. Etena kasalaso dui sɔ, sho mɛnyaka Jehowa dia sho nangaka ndjasukanya la nde. Diakɔ diele, nde nembetɛka ndo anto “wakana yimba [kana, “wɔsa la nɛmɔ,” nɔtɛ] lokombo lande”!​—Malaki 3:16.

Mbeka dia mbeya lokombo laki Nzambi, mbele nna dia ntondo di’ohomba dia mbeeya. Koko hatohombe komɛ laasɔ. Sho pombaka mbeya ndo Lonto lande lo dihole dia lokombo loto. Sho pombaka mbeya waonga ande.