Kɛnɛ kata anto lo dikambo dia dɔmbɛlɔ
“Etena kalɔmbami, dimi ndjaokaka oko Nzambi ekɔ suke lami, ekɔ lo takimɛ lo lonya ndo ekɔ lo tanɔmbɔla etena kayaokami dia lamboshishɔ.”—MARÍA.
“Wadɛmi akavu la kansɛrɛ l’ɔkɔngɔ wa nde diɛnɛ la hemɔ kakɔ l’edja k’ɛnɔnyi 13. Laakohɔ dia lakalɔmbaka Nzambi lushi tshɛ ndo lakayaokaka mɛtɛ dia nde akapokamɛka lo kandji yami. Lakayaoke lo wɔladi.”—RAÚL.
“Dɔmbɛlɔ ekɔ woshasha wa dimɛna efula w’oma le Nzambi wakandasha anto.”—ARNE.
María, Raúl, Arne ndo anto akina efula, mbutaka dia dɔmbɛlɔ ekɔ woshasha ɔmɔtshi wa laande. Vɔ ndjaokaka dia lotshimbo ya dɔmbɛlɔ, vɔ koka nsawola la Nzambi, mbosha losaka ndo nyanga ekimanyielo kande. Vɔ waketawɔ l’otema ɔtɔi kɛnɛ kashikikɛ Bible lo dikambo dia dɔmbɛlɔ di’otsha le Nzambi ɔnɛ: “Eshikikelo kɛnɛ mbele la so le nde, shoate kɛnɛ tshɛ kɔlɔmbaso kɔtɔnɛ la lolango lande, nde tokɛka.”—1 Joani 5:14.
Lo wedi okina, anto efula mongaka l’okakatanu dia mbetawɔ kɛnɛ kata Bible lo dikambo dia dɔmbɛlɔ. Steve kɔndɔlaka woho wakandayaokaka lo dikambo dia dɔmbɛlɔ. Nde mbutaka ɔnɛ: “Etena kakimi l’ɛnɔnyi 17, angɛnyi ami asato wakavu lo aksida ehende wotshikitanyi. Ɔmɔtshi akavu l’aksida wa mutuka ndo akina ahende wakavu l’ashi wa woke.” Kakɔna kakasale Steve? Nde kotshaka ate: “Lakalɔmbɛ Nzambi dia nkondja ekadimwelo wa lande na kakatombe akambo asɔ tshɛ, koko dimi kokondja ekadimwelo. Ko lakayambola nte, ‘lande na kahombami nɔmba Nzambi?’” Mɛnamaka di’anto efula ndjaokaka di’alɔmbɛlɔ awɔ hawokadimɔma diakɔ diele vɔ ndjambolaka lande na kahombawɔ ntetemala nɔmba.
Ndo nto anto ndjambolaka ohomba wa dɔmbɛlɔ lo ɛkɔkɔ ekina. Amɔtshi mbutaka dia lam’ele Nzambi mbeyaka kɛnɛ tshɛ keso la tɔ ohomba ndo okeyaka ehomba ndo ekakatanu wele la so, laasɔ keema ohomba sho mbotɛ awui asɔ tshɛ.
Amɔtshi fɔnyaka dia Nzambi hahokamɛ alɔmbɛlɔ awɔ l’ɔtɛ wa munga yakawasalaka lo nshi yakete. Jenny mbutaka ate: “Okakatanu wa wolo waki la mi ele, lakayaokaka dia lekɔ onto l’anyanya. Lakasale akambo wakamayonyangaka l’ɔkɔngɔ, ko lakate nte, dimi hasungana dia Nzambi pokamɛmi.”
Ngande wayaokayɛ lo dikambo dia dɔmbɛlɔ? Naka wɛ ambohomanaka la ekakatanu akɔ waamɛ kana ekɔ lo mbidja taamu lo dikambo dia dɔmbɛlɔ, * kete wɛ koka nkondja esambelo oma lo ekadimwelo w’eshika washa Bible. Sho koka ndjaɛkɛ lo kɛnɛ kata Bible lo dikambo dia dɔmbɛlɔ; nɛ dia tɔ koka kokimanyiya dia ntana ekadimwelo lo ambola wele oko wanɛ:
-
Onde Nzambi mɛtɛ pokamɛka alɔmbɛlɔ aso?
-
Lande na kele alɔmbɛlɔ amɔtshi hawokadimɔma?
-
Ngande wakokayɛ nɔmba ko Nzambi pokamɛ alɔmbɛlɔ ayɛ?
-
Wahɔ akɔna wakokayɛ nkondja oma lo dɔmbɛlɔ?
^ od. 9 Bible kekɔ l’alɔmbɛlɔ w’ekambi wa Nzambi efula, mbidja ndo alɔmbɛlɔ wakalɔmbaka Yeso Kristo. Afundelo wa lo Hɛbɛru, welamɛ mbala efula ɔnɛ Daka di’edjedja, wekɔ la alɔmbɛlɔ w’amɛna ndekana 150.
Enda ndo lo...
ƐLƆNGƆLƆNGƆ WEKƆ LO NDJAMBOLA
Lande na kahombami nɔmba?
Onde dɔmbɛlɔ ekɔ dui diakimanyiya dia mbɔdja wɔɔngɔ, koko diɔ diekɔ dui dimɔtshi di’ohomba efula?
