“Wɛ latokaka dɔmbɛlɔ le, le yɛ mbayoyaka weho w’anto tshɛ.”​—Osambo 65:2.

Amɔtshi nɔmbaka nɛ dia vɔ mbutaka dia dui sɔ mbakimanyiyaka dia vɔ ndjaoka dimɛna kaanga mbahawafɔnya di’onto ɔmɔtshi ekɔ mɛtɛ lo mbaahokamɛ. Koko, dɔmbɛlɔ ndeka kaanga dui diatokimanyiya dia sho ndjaoka dimɛna, nɛ dia diɔ tokimanyiyaka dia sho ndɔshana l’ekakatanu. Bible toshikikɛka dia “Jehowa * ekɔ suke la wanɛ tshɛ wawelɛ, wanɛ tshɛ wawelɛ lo mɛtɛ. . . . Nde mbokaka delo diawɔ dialɔmbawɔ ekimanyielo.”​—Osambo 145:18, 19.

Sho koka monga l’eshikikelo dia Jehowa Nzambi pokamɛka alɔmbɛlɔ w’atɛmɔdi ande. La ngandji tshɛ, nde mbutaka ate: “Nyu nyayombelɛ, nyayoya ndo nyayɔnɔmba, ko dimi layonyohokamɛ.”​—Jɛrɛmiya 29:12.

“Nyotetemale nɔmba.”​—Rɔmɔ 12:12.

Lo Bible, sho keketshamaka dia ‘ntetemala nɔmba’ ndo ‘nɔmbaka lo diaaso tshɛ.’ Mbokɛmaka hwe dia Jehowa Nzambi nangaka dia sho mbɔlɔmba.​—Mateo 26:41; Ɛfɛsɔ 6:18.

Lande na kalanga Nzambi dia sho mbɔlɔmba? Tɔsɛdingole dui nɛ: Ombutshi akɔna wahalange ɔnande lawotɛ ɔnɛ: “Ipa onde wɛ koka kimanyiyami”? Eelo, ombutshi mbeyaka nshihodia ehomba w’ɔnande kana woho wayaokande, koko etena kokande weho w’ɛtɛkɛta wa ngasɔ, dui sɔ mbowɛnyaka dia ɔnande ndjaɛkɛka le nde ndo ndjasukanyaka nsuke nsuke la nde. Woho akɔ waamɛ mbele, etena kalɔmbaso Jehowa Nzambi, sho mbowɛnyaka dia sho ndjaɛkɛka le nde ndo sho nangaka ndjasukanya nsuke nsuke la nde.​—Tokedi 15:8; Jakɔba 4:8.

“Nyokitsha ekiyanu anyu tshɛ le nde, nɛ dia nde ndjakiyanyaka dikambo dianyu.”​—1 Petero 5:7.

Nzambi nangaka dia sho mbɔlɔmba nɛ dia nde tookaka ngandji ndo nde ndjakiyanyaka lo dikambo diaso. Nde mbeyaka awui tshɛ wendana la ekakatanu aso ndo nde nangaka tokimanyiya.

Lo edja ka lɔsɛnɔ lande, Nkumekanga Davidɛ akalɔmbɛ Jehowa Nzambi ekimanyielo ndo nde akawotɛ tokanyi tande ndo woho wayaokande. (Osambo 23:1-6) Ngande wakayaoke Nzambi lo dikambo dia Davidɛ? Nzambi akokaka Davidɛ ngandji ndo nde akahokamɛka alɔmbɛlɔ ande w’efula. (Etsha 13:22) Woho akɔ waamɛ mbele, Nzambi pokamɛka alɔmbɛlɔ aso nɛ dia nde ndjakiyanyaka lo dikambo diaso.

Ɔsɔ ekɔ ɛtɛkɛta w’ofundji ɔmɔtshi w’esambo wa lo Bible. Nde aki l’eshikikelo dia Nzambi pokamɛka alɔmbɛlɔ ande ndo dui sɔ diakokimanyiya efula. Nde akayaoke dia nde ekɔ nsuke nsuke la Nzambi ndo nde akakondja ekeketshelo dia ndɔshana l’asui ndo la shɔkɔ ya lo lɔsɛnɔ lande.​—Osambo 116:1-9.

Etena keso l’eshikikelo dia Nzambi pokamɛka alɔmbɛlɔ aso, dui sɔ diayotokimanyiya dia sho ntetemala nsawola la nde. Tɔsɛdingole kɛnɛ kakakomɛ Pedro, ɔnɛ lakadjasɛka lo nɔrdɛ ka wodja w’Espagne. Nde akavusha ɔnande la pami l’ɛnyɔnyi 19 lo aksida wa mutuka. La ɔkɛyi ande ɔsɔ tshɛ, Pedro akadiholɛ Nzambi otema ande tshɛ ndo nde akalɔmbaka mbala la mbala dia nkondja esambelo ndo osukɔ. Kakɔna kakatombe? Pedro mbutaka ate: “Jehowa akakadimola lo alɔmbɛlɔ ami lo tshimbo ya esambelo ndo osukɔ wakamakondja oma le wadɛmi ndo oma le asekami Akristo.”

Kaanga mbele alɔmbɛlɔ ande kombolola ɔnande ɔsɔ, alɔmbɛlɔ asɔ wakakimanyiya Pedro la nkumbo kande lo toho t’ohomba. María Carmen ka wadɛnde, mbohɔka ɔnɛ: “Alɔmbɛlɔ wakakimanyiya dia dimi mbikikɛ ɔkɛyi ami. Lakeyaka dia Jehowa Nzambi mbeyaka woho wayaokami, nɛ dia etena kakamawɔlɔmbaka, lakayaokaka lo wɔladi ndo nde akatutadia asolo ami.”

Bible ndo kɛnɛ tshɛ kakahomana la wɔ lo lɔsɛnɔ, mɛnyaka hwe dia Nzambi pokamɛka alɔmbɛlɔ. Koko, mɛnamaka dia Nzambi hakadimola alɔmbɛlɔ tshɛ. Lande na kakadimola Nzambi alɔmbɛlɔ amɔtshi ko hakadimola akina?