Sho koka ndjaoka esadi eto diele oko tambokoma ewo etena kasowa ɔngɛnyi aso ɔmɔtshi la hemɔ ka lo yimba. Koko sho koka mɛnya polo lo yɛdikɔ yakɔna yayakiyanyaso lo dikambo di’ɔngɛnyi aso dia nde ndɔshana la hemɔ ka lo yimba. Lo ngande?

“Onga suke dia mpokamɛ.”—JAKƆBA 1:19.

Yoho mɔtshi yoleki dimɛna ya nkimanyiya ɔngɛnyi ayɛ ele lo mbohokamɛ etena katɛkɛtande. Bu ohomba wɛ nkadimola l’oseka dui tshɛ diatɛkɛtande. Ɛnyande dia wɛ ekɔ lo mbohokamɛ ndo wɛ ekɔ lo ndjakiyanya lo dikambo diande. Sala la wolo dia wɛ nshihodia woho wayaokande ndo toolomboshake. Ohɔ dia nde koka mbuta dui dimɔtshi diende hakombodi mbuta ndo diayondoyonyanga l’ɔkɔngɔ.—Jɔbɔ 6:2, 3.

“Nyokambe la ɛtɛkɛta w’esambelo.”—1 TƐSALƆNIKA 5:14.

Ɔngɛnyi ayɛ koka monga l’ekiyanu kana mbeyaka monga ko nde ekɔ lo ndjaɔsa dia nde bu ohomba. Naka wɛ mboshikikɛ dia wɛ ndjakiyanyaka lo dikambo diande, kete wɛ koka monga kiɔkɔ y’esambelo ndo y’ekeketshelo le nde, kaanga naka wɛ heye shikaa kɛnɛ kakokayɛ mbuta.

“Ɔngɛnyi wa mɛtɛ mbokanaka ngandji tena tshɛ.”—TOKEDI 17:17.

Sha ekimanyielo ka shikaa. Lo dihole dia mbɔsaka dia wɛ mbeyaka kɛnɛ kakokayɛ mbokimanyiya, mbolande kɛnɛ kakokayɛ nsala. Naka ɔngɛnyi ayɛ ekɔ l’okakatanu wa kotɛ kɛnɛ kende la tɔ ohomba, kete hemba mbotɛ dui dimɔtshi shikaa diahombanyu nsala kaamɛ, ɛnyɛlɔ oko tasembolaka ekolo.  Kana wɛ koka mbokimanyiya dia tosomba diangɔ, nsola ahɔndɔ kana elimu ekina.—Ngalatiya 6:2.

“Nyonge la solo dia lotutsha.”—1 TƐSALƆNIKA 5:14.

Mbeyaka monga ko aha mbala tshɛ mbayongaka ɔngɛnyi ayɛ suke dia ntɛkɛta. Shikikɛ ɔngɛnyi ayɛ dia wɛ ayowohokamɛ la lolango tshɛ etena kalangande kotɛ woho wayaokande. L’ɔtɛ wa hemɔ kande, ɔngɛnyi ayɛ mbeyaka mbuta kana nsala dui dimɔtshi diayokonyangiya. Nde mbeyaka mbitola awui amɔtshi wakanyakongɛ kana nde mbeyaka momala. Onga la solo dia lotutsha ndo onga suke dia nshihodia kɛnɛ kende la tɔ ohomba.—Tokedi 18:24.

“Lekɔ l’eshikikelo dia dimi kele ɔngɛnyi ande wakokande mbɛkɛ otema. Kaanga naka dimi handeye woho wa nkandola ekakatanu ande, dimi salaka la wolo dia mpokamɛ kɛnɛ kalande mbutɛmi. Ntena dimɔtshi kɛnɛ tshɛ kele la nde ohomba ele, mbohokamɛ la yambalo tshɛ woho wayaokande ko oma laasɔ nde ndjaoka dimɛna.”—Farrah, a lele ɔngɛnyi ande ekɔ diɛnɛ la okakatanu wendana la olelo, ekiyanu ndo hemɔ k’ɔkɔmwɛlɔ keke oma la mbishola aseka enganga.

“Ɔngɛnyi ami ɔmɔtshi ekɔ ɔlɔlɔ ndo nde keketshakami. Nde akambelɛ lakawɔ dia tɔlɛ yangɔ ya dimɛna efula. Lo diaaso dia dimɛna ndo dia longandji sɔ, lakawotɛ nsaki yami. Dui sɔ diakakeketsha mɛtɛ!”—Ha-eun, la diɛnɛ la hemɔ k’ɔkɔmwɛlɔ keke oma la mbishola aseka enganga.

“Solo dia lotutsha diekɔ ohomba. Etena kasala wadɛmi dui dimɔtshi dianyangiya, dimi mbohɔka dia ɔsɔ ekɔ djembetelo ya hemɔ kande, koko aha kɛsɔ mbele l’etei kande. Dui sɔ kimanyiyakami dia mbewɔ momala ndo ndeka mbɔɔsa la nɛmɔ.”—Jacob, lele wadɛnde ekɔ lo diɛnɛ la hemɔ k’ɔkɔmwɛlɔ keke oma la mbishola aseka enganga.

“Wadɛmi okongaka tshondo y’osukɔ ndo y’esambelo k’efula le mi. Etena kayaokami dia lambɔmɛnama l’ekiyanu, nde hatshutshuya dia nsala dui dimɔtshi diemi bu la wolo wa nsala. Ntena dimɔtshi dui sɔ nembetshiyaka dia nde hakoke nsala dui dimɔtshi diakombolande disala. Nde ekɔ onto la laande le mi, nɛ dia nde ekɔ la yimba ya lokaho ndo ya ndjahondja.”—Enrico, ladiɛnɛ l’ekiyanu.