SHƆNGƆLA kidiyɔ yele oko masuwa yele l’anya waki Jordan mɛnamaka oko yangɔ y’anyanya. Koko le nde, yɔ yekɔ l’atei wa diangɔ diande dia nɛmɔ efula. Jordan mbutaka ate: “Russell laki ɔngɛnyi ami w’opalanga wa lo nkumbo mbakambishayɔ lakimi dikɛnda.” L’ɔkɔngɔ wa nyɔi ka Russell, Jordan akayeya dia Russell akakimanyiya watshɛnde ndo ambutshi ande efula lo mbakeketshaka lo tena dia wolo. Jordan mbutaka ate: “Lam’ele lambeya awui efula wendana la Russell, le mi woshasha wa tshitshɛ ɔnɛ wekɔ la nɛmɔ efula ndeka ɛngɔ tshɛ.”

Oko wadiɛnya kɛnɛ kakakomɛ Jordan, le anto amɔ woshasha ɔmɔ koka monga la yema ya nɛmɔ kana bu. Le onto lele la lowando lo woshasha wolongodinde, vɔ koka monga la nɛmɔ kana oshinga wolo. Bible tɛkɛtaka dia woshasha ɔmɔ w’oshinga wolo waheyama mbɛdika lo nkamba la ɛtɛkɛta weyama dimɛna wata ɔnɛ: “Nzambi akalange andja lo yɛdikɔ y’efula, diakɔ diakandakimɔ Ɔnande ɛtɔi lakandote, dia onto tshɛ longa la mbetawɔ le nde atovɔke, koko akondja lɔsɛnɔ la pondjo.”—Joani 3:16.

Woshasha ɔsɔ koka mbisha ɔnɛ lawolongola lɔsɛnɔ la pondjo. Onde ekɔ woshasha ɔmɔ wakoka monga la nɛmɔ di’efula dia ngasɔ? Kaanga mbakoka anto amɔ monga ko haweye nɛmɔ diele la woshasha ɔsɔ, Akristo wa mɛtɛ mbɔɔsaka la “nɛmɔ di’efula.” (Osambo 49:8; 1 Petero 1:18, 19) Ko lande na kakakimɔ Nzambi lɔsɛnɔ l’Ɔnande oko woshasha dikambo di’andja?

Ɔpɔstɔlɔ Pɔɔlɔ nembetshiyaka dui sɔ lo mbuta ɔnɛ: “Oko wakɔtɔ pɛkato l’andja oma le onto 1 ndo nyɔi oma lo pɛkato, ɔnkɔnɛ nyɔi kakadiangana le anto tshɛ.” (Rɔmɔ 5:12) Adama pami ka ntondo akasale pɛkato l’okonda lo pindolɛ Nzambi ndo oma laasɔ, nde akalongola dilanya dia nyɔi. Lo tshimbo y’Adama, nyɔi  kakadiangana le tokanula tande tshɛ, mbuta ate le anto tshɛ wa l’andja w’otondo.

“Difuto dia pɛkato ele nyɔi, koko woshasha washa Nzambi ele lɔsɛnɔ la pondjo oma le Kristo Yeso Nkumɛso.” (Rɔmɔ 6:23) Dia ntshungola anto oma lo lɔhɔmbɔ la nyɔi, Nzambi akatome Ɔnande Yeso Kristo oya la nkɛtɛ dia ndjolambola lɔsɛnɔ lande la kokele dikambo di’andja. Diɛsɛ la olambo ɔsɔ weyama oko “oshinga w’etshungwelo,” wanɛ wele la mbetawɔ le Yeso wayokondja lɔsɛnɔ la pondjo.—Rɔmɔ 3:24.

Lo kɛnɛ kendana la ɛtshɔkɔ tshɛ washa Nzambi atɛmɔdi ande lo tshimbo ya Yeso Kristo, Pɔɔlɔ akate ate: “Losaka le Nzambi l’ɔtɛ wa losha la woshasha ande waheyama mbuta.” (2 Kɔrɛtɔ 9:15) Lo mɛtɛ, oshinga w’etshungwelo wekɔ diambo efula, diakɔ diele sho bu l’akoka wa mbolembetshiya dimɛna dimɛna. Ko l’atei wa weshasha wa diambo tshɛ wakasha Nzambi anto, lande na kele oshinga w’etshungwelo ekɔ woshasha wa laande? Lo yoho yakɔna yotshikitanyiwɔ la weshasha ekina tshɛ wa Nzambi? * Ndo ngande wahombaso mɛnya lowando lɔkɔ? Tambokɔlɔmba dia mbadia ekadimwelo washa Bible lo ambola asɔ lo asawo ahende wayela.