Weshasha ɛmɔ mongaka la nɛmɔ l’ɔtɛ wele ɔnɛ lotoshawɔ ekɔ la lowandji kana onto lele sho mbɔɔsaka la nɛmɔ efula. Koko weshasha ekina wele bu oshinga wolo mbɔsamaka la nɛmɔ l’ɔtɛ wele ose nkumbo lokaso ngandji kana ɔngɛnyi aso ɔmɔ wayaɛkɛso le nde mbakatoshawɔ. Ngasɔ mbediɔ ndo lo kɛnɛ kendana la woshasha wakalongola Jordan oma le Russell wakatatɛkɛtshi lo sawo di’etshi. Ngande wɔtɔnɛ dui sɔ la woshasha w’oshinga w’etshungwelo?

Dui dia ntondo, Bible mbutaka ɔnɛ: “Nzambi akatome Ɔnande ɛtɔi lakandote l’andja dia sho nkondja lɔsɛnɔ lo tshimbo yande.” (1 Joani 4:9) Dui sɔ mbetɛka woshasha ɔsɔ ɛngɔ ka nɛmɔ. Ndooko onto lele la lowandji loleki Nzambi. Lo kɛnɛ kendana la nde, omembi w’esambo ɔmɔ w’ose Hɛbɛru akafunde ate: “Wɛ, lele lokombo layɛ Jehowa, wɛmɛ kele Ɔnɛ-Laheme-Tshɛ lo nkɛtɛ k’otondo.” (Osambo 83:18) Sho kosungana nongola woshasha oma le onto la laadiko la ngasɔ.

Dui dia hende, Nzambi ekɔ “Shɛso.” (Isaya 63:16) Lo ngande? Nde akatosha lɔsɛnɔ. Ndo nto, la kɔlamelo tshɛ nde tokokɛka oko ombutshi wayasha dia nkokɛ anande. Etena kakandatɛkɛtaka di’ekambi ande ɛmɔtshi wa lo nshi y’edjedja ɛnyɛlɔ oko Efrayimɛ, Nzambi akambola ate: “Onde Efrayimɛ bu ɔna la nɛmɔ le mi, ɔna lalangema? . . . Tokanyi tami tambonandema lo dikambo diande. Ndo dimi mɛtɛ layowoka kɛtshi.” (Jɛrɛmiya 31:20) Nzambi ndjaokaka woho akɔ waamɛ lo dikambo di’atɛmɔdi ande ɛlɔ kɛnɛ. Nde bu tsho Otungi aso wele Kanga-Wolo-Tshɛ koko ndo Shɛso ka kɔlamelo ndo Ɔngɛnyi aso. Onde dui sɔ hetɛ woshasha tshɛ w’oma le nde ɛngɔ ka nɛmɔ efula?

Weshasha ɛmɔ wekɔ la nɛmɔ l’ɔtɛ wahawatshutshuyisha ɔnɛ lawokimɔ koko nde akasadi dui sɔ l’ɔtɛ wa ngandji kande ka l’otema ɔtɔi. Ɔnɛ lakimɔ l’otema ɔtɔi halongamɛ difuto l’ɔtɛ w’ɔlɔlɔ ande.

Nzambi akakimɔ Ɔnande lo wahɔ aso nɛ dia nde akatoke ngandji. Bible mbutaka ɔnɛ: “Oma lo dikambo nɛ mbakɛnama ngandji ka Nzambi le so: Nzambi akatome Ɔnande ɛtɔi lakandote.” Lande na? “Dia sho nkondja lɔsɛnɔ lo tshimbo yande.” (1 Joani 4:9) Onde Nzambi akahombe paka nsala dui sɔ? Bu. “Oshinga w’etshungwelo wakafute Kristo Yeso” ekɔ djembetelo ya “ɔlɔlɔ [waki Nzambi] waheyama mbɛdika.”—Rɔmɔ 3:24.

Lande na kele woshasha wa Nzambi ɔsɔ wekɔ ‘ɔlɔlɔ waheyama mbɛdika’? Bible mbutaka ɔnɛ: “Nzambi akatɛnya ngandji kande hita lo yoho nyɛ: Kaanga mbakiso atshi wa pɛkato, Kristo akavu dikambo diaso.” (Rɔmɔ 5:8) Ngandji ka l’otema ɔtɔi kakakonya Nzambi dia nsala dui sɔ lo wahɔ w’anto wa wɔdu, wele bu l’ekimanyielo ndo atshi wa pɛkato. Sho kosungana mbokama ngandji kɛsɔ ndo hatokoke mbofuta tɔ. Woshasha ande ɔsɔ ekɔ djembetelo yoleki woke ya ngandji lo ɔkɔndɔ.

Weshasha ɛmɔ mongaka la nɛmɔ l’ɔtɛ wele ɔnɛ lakawokimɔ akayahombia efula. Etena katosha onto ɛngɔ kande kele la nɛmɔ efula, sho mbɔsaka woshasha ɔsɔ la nɛmɔ nɛ dia onto akɔ amboyahombia.

Nzambi akakimɔ “Ɔnande ɛtɔi lakandote.” (Joani 3:16) Takandakoke tosha ɔnande la nɛmɔ. Etena kakatongaka Nzambi andja, Yeso akakambe kaamɛ la nde ndo akakome ‘ɔnɛ lakandangɛnangɛnaka lo yoho ya laande.’ (Tokedi 8:30) Yeso ekɔ ‘Ɔnaki Nzambi la ngandji’ ndo “efanelo ka Nzambi kahɛnama.” (Kɔlɔsayi 1:13-15) Diɔtɔnganelo dia dimɛna dia ngasɔ diatongaka lam’asa ditongami pende diele la tomba.

Koko, Nzambi “kopandja kaanga Ɔnande hita.” (Rɔmɔ 8:32) Jehowa akatosha kɛnɛ kaki la nde koleki dimɛna. Nde bu la woshasha wele la nɛmɔ dioleki wɔsɔ.

Weshasha ɛmɔ mongaka la nɛmɔ l’ɔtɛ wakotshawɔ ohomba ɔmɔ shikaa, oyadi wa wanyandja. Ɛnyɛlɔ, shi wɛ ayonga la lowando l’efula otsha le onto layakimɔ la lolango dia mfuta falanga yeyɛ bu l’akoka wa mfuta la lopitadi dia nkokɛ lɔsɛnɔ layɛ. Woshasha ɔsɔ wayonga mɛtɛ la nɛmɔ efula, shi ngasɔ?

“Oko wavɔ anto tshɛ oma le Adama, mbele ndo anto tshɛ wayonga la lɔsɛnɔ oma le Kristo.” (1 Kɔrɛtɔ 15:22) Oko weso tokanula taki Adama, sho tshɛ tekɔ lo ‘mvɔ’ ndo hatokoke mbewɔ hemɔ la nyɔi kana mbokana shoamɛ la Nzambi ko monga aha l’onongo la ntondo kande. Oko weso anto w’anyanya, hatokoke monga la “lɔsɛnɔ” oma lo akoka aso shoamɛ kana mbisha anto akina lɔsɛnɔ. Bible mbutaka ɔnɛ: “Ndooko onto l’atei awɔ lakoka ntshungola ɔnango kana mbisha Nzambi oshinga w’etshungwelo dikambo diande . . . Vɔ hawokokaki pondjo mfuta.” (Osambo 49:7, 8) Tekɔ mɛtɛ l’ohomba w’ekimanyielo nɛ dia hatokoke mfuta oshinga w’etshungwelo. Otondongaka sho takendɛ le so shoamɛ tshike sho bu la ekimanyielo.

L’ɔtɛ wa ngandji kande k’efula, Jehowa akafute la lolango tshɛ ‘oshinga’ wa shimbɛ nsɛnɔ weso lawɔ ohomba dia “anto tshɛ [monga] la lɔsɛnɔ” lo tshimbo ya Yeso. Ngande wakotsha oshinga w’etshungwelo oyango ɔsɔ? “Dikila dia Yeso Ɔnande diekɔ lo tɛdia oma lo pɛkato tshɛ.” Eelo, monga la mbetawɔ lo dikila diaki Yeso diakatshulɔma diholaka mboka lo edimanyielo ka pɛkato ndo lo  lɔsɛnɔ la pondjo. (1 Joani 1:7; 5:13) Kakɔna kayosalɛ oshinga w’etshungwelo wakiso wa ngandji wakavu? “Lam’ele nyɔi kakaye oma le onto ɔtɔi, eolwelo k’anto wavɔ ndja oma le onto ɔtɔi [Yeso].”—1 Kɔrɛtɔ 15:21. *

Ndooko woshasha wakakimɔma oma le onto la laadiko kana wakakimɔma la ngandji k’efula ko ndeka olambo wa Yeso. Ndooko onto lambotosalɛ akambo efula ko ndeka Jehowa Nzambi. Ndo ndooko woshasha wakakotsha ohomba woleki woke ko ndeka wɔnɛ watotshungola oma lo pɛkato la nyɔi. Eelo, ndooko woshasha wakoka kaanga nsukana la nɛmɔ di’efula diele la oshinga w’etshungwelo