Lokumu l’ɔlɔlɔ la Diolelo lekɔ lo sambishama lo nkɛtɛ k’otondo paka oko wakate Yeso. (Mateo 24:14) Dibuku dia lo Bible dia Danyɛlɛ totɛka ɔnɛ Diolelo sɔ diekɔ lowandji l’oma le Nzambi. Tshapita 2 ya dibuku sɔ yekɔ la prɔfɛsiya kɛnya wahɔnelo wa mandji kana waolelo w’anto, ntatɛ oma lo Babilɔna k’edjedja polo ndo nshi yaso nyɛ. Lo tewoyisha kɛnɛ kayosalema otsha la ntondo, divɛsa 44 mbutaka ɔnɛ:

“Nzambi ka l’olongo ayotondja Diolelo diahalanyemaki pondjo. Diolelo diakɔ hadiotoshama le anto akina. Diɔ diayominola waolelo akɔ tshɛ ndo diayowashila oshiki, ko diɔ diɔamɛ diayotshikala pondjo.”

Prɔfɛsiya kɛnɛ ndo kina ya lo Bible mbewoyaka dia Diolelo diaki Nzambi diayɔhɛna ɛlɔmbwɛlɔ tshɛ k’anto, diayoshikikadia ndo diayodja akambo l’ɔnɔngɔ le anto wa la nkɛtɛ. Ngande wayonga lɔsɛnɔ l’ɛlɔmbwɛlɔ ka Diolelo diaki Nzambi? Alaka amɔtshi wa diambo wayanga kotshama keem’edja vɔ anɛ.

• ATA HAWOTONGA NTO

  Osambo 46:9: “[Nzambi] ekɔ lo nkomiya ata lo nkɛtɛ k’otondo. Nde ambɔkɔla ota ndo ambohembola dikɔnga; nde ambotshumba pusupusu y’asɔlayi lo dja.”

  Ohokanyiya woho wayonga andja naka vɔ mbɔsa falanga tshɛ ndo diewo diakamba la anto ɛlɔ kɛnɛ dia ntshula ekoma ko vɔ nkamba lo awui wakoka mbela anto wahɔ lo dihole dia mbadiaka! Daka sɔ diayokotshama l’ɛlɔmbwɛlɔ ka Diolelo diaki Nzambi.

• HEMƆ HATONGA NTO

  Isaya 33:24: “Ndooko onto lodjashi lɛkɔ layota ate: ‘Dimi lekɔ la hemɔ.’”

  Ohokanyiya dikambo di’andja wele ndooko onto layotata hemɔ ka lo doyi, kansɛrɛ, malariya kana oseka hemɔ kekina tshɛ. Hatonga ohomba wa pitadi ndo ekanga. Anto tshɛ wa la nkɛtɛ wayonga la yoonge ya kokele.

• NDJALA HATONGA NTO

  Osambo 72:16: “Mbo ya ndɛ yayoyala efula la nkɛtɛ; yɔ yayonga tshavutshavu lo tɔsɔdi t’akona.”

  Nkɛtɛ yayotondja diangɔ dia ndɛ efula dikambo di’onto tshɛ, ndo onto tshɛ ayodikondja. Ndjala ndo oleelo wa kɔlɔ hatonga nto.

• KANDJI, LONYANGU, NDO NYƆI HATONGA NTO

  Ɛnyɛlɔ 21:4: “[Nzambi] ayokitola asɔyi tshɛ oma lo washo awɔ, nyɔi hatoyala nto, otanda hatoyala nto, delo hatoyala nto, kaanga kandji hatoyala nto. Akambo wa ntondo wamboshila.”

   Kɛsɔ mɛnyaka dia ayonga lɔsɛnɔ laha l’ekomelo la kokele lo paradiso ka la nkɛtɛ! Kɛsɔ mbakatolake Otungi aso wa ngandji, Jehowa Nzambi.

Onde mɛtɛ akambo w’amɛna asɔ tshɛ wayokotshama? Kaanga mbele anto efula mbetawɔka esadi eto dia lɔsɛnɔ lo ndjela woho wɛnyishami lo Bible ekɔ dimɛna efula, anto akina l’ɔtɛ w’ɛkɔkɔ ɛmɔtshi wotshikitanyi mɛnaka dia kanyi ya nsɛna pondjo pondjo ekɔ wolo nshihodia. Ɔsɔ bu dui dia diambo, nɛ dia ndooko osekaso onto lakasɛnɛ woho wa lɔsɛnɔ la ngasɔ lakoka totɛ woho we lɔ.

Anto wakonge lo lɔhɔmbɔ la pɛkato la nyɔi ndo wambodiɛnɛ la kandji, asui ndo paa l’edja k’ɛnɔnyi efula diakɔ diele anto amɔ wambokoma polo lo mbekɛ yoho ya lɔsɛnɔ shɔ ndo wooliɛna dimɛna. Koko kɛsɔ ntshikitana etale la sangwelo diaki Otungi aso, Jehowa Nzambi lo dikambo di’anto.

Dia tokimanyiya dia mɛna dia kɛnɛ tshɛ kakandalake kekɔ mɛtɛ, Nzambi akatɔtɔmiya lo dikambo dia ɔtɛkɛta ande ate: “Vɔ hawotokalola le mi okalolakalola, koko ndooko onyake vɔ wayokotsha kɛnɛ tshɛ kalangami, ndo wayoshidiya mɛtɛ kɛnɛ kakamotome dia tosala.”​—Isaya 55:11.

Lo Bible, vɔ mɛnyaka dia Jehowa ekɔ Nzambi ‘kahakoke mbuta kashi.’ (Tito 1:2) Lam’ele nde akalake akambo wa diambo dikambo dia nshi yayaye, ayonga dimɛna sho ndjambola ɔnɛ: Onde mɛtɛ anto koka nsɛna pondjo pondjo lo nkɛtɛ kakalakema dia nkoma Paradiso? Ahombaso nsala dia nkondja wahɔ oma lo daka diaki Nzambi? Lo ndjɛkɛ yayela ya okanda ɔnɛ, wɛ ayokondja awui w’eshika dia nkadimola lo ambola ango.