ONDE WƐ EKƆ L’ƆSƆNWƐLƆ ƆMƆ WA DIMƐNA WA NSALA LO WOHO WAYONGA NSHI YAYƐ YAYAYE? Anto amɔtshi mbutaka dia ekɔ awui amɔ wakomɛ anto kana ekɔ awui amɔtshi wakakongɛma la ntondo walɔmbɔla nsɛnɔ yawɔ koko aha ɛsɔnwɛlɔ wasala anto. Etena kahawakotsha eyango ɛmɔtshi, vɔ minyaka tsho yimba ndo mbutaka ɔnɛ ongo ekɔ awui wahakoke mbewɔ. Vɔ mbutaka ɔnɛ: “Akafundama dia dimi hakotshaki oyango ami pondjo!”

Anto akina kɔmɔka etena kɛnawɔ dia ndooko kɛnɛ kakokawɔ nsala l’andja wasɛnaso ɔnɛ wambolola l’awui wa wɛngiya ndo wa ngala. Vɔ koka nsala dia nsɛnɔ yawɔ ndeka monga amɛna, koko awui wele oko ata, diakatanelo, mpokoso y’oma lo diangɔ diakatongama ndo hemɔ ndanyaka kɛnɛ kakawakongɛ mbala la mbala. Vɔ ndjambolaka ɔnɛ: ‘Lande na nganɛ?’

Kɛnɛ kele mɛtɛ ele, ekɔ awui amɔtshi wa lo lɔsɛnɔ wakoka ntshikitanya tshɛ lo tshɛ kɛnɛ kakongɛyɛ. (Ondaki 9:11) Koko, lo kɛnɛ kendana la nshi yayɛ yayaye ya pondjo, wɛ ekɔ l’ɔsɔnwɛlɔ wa dimɛna wakokayɛ nsala. Lo mɛtɛ, Bible mɛnyaka dia nshi yayɛ yayaye nemanɛka l’ɔsɔnwɛlɔ ayɛ. Tɔsɛdingole kɛnɛ katatɔ.

Mɔsɛ, laki ɔnɔmbɔdi wa wodja wa Isariyɛlɛ w’edjedja akatɛ anto etena kakiwɔ suke la mbɔtɔ lo Nkɛtɛ ya Daka ɔnɛ: “Lambokitsha lɔsɛnɔ la nyɔi ndo ɔtshɔkɔ la mananu la ntondo kanyu. Nyu pombaka nsɔna lɔsɛnɔ dia nyu ntshikala la lɔsɛnɔ nyu la tokanula tanyu, lo nanga Jehowa Nzambi kanyu, lo mpokamɛ dui diande ndo lo mbomamema.”​—Eohwelo k’Ɛlɛmbɛ 30:15, 19, 20.

“Lambokitsha lɔsɛnɔ la nyɔi ndo ɔtshɔkɔ la mananu la ntondo kanyu. Nyu pombaka nsɔna lɔsɛnɔ.”​—Eohwelo k’Ɛlɛmbɛ 30:19

Eelo! Nzambi akatshungola ase Isariyɛlɛ oma lo lɔhɔmbɔ la l’Edjibito ndo akakitsha la ntondo kawɔ elongamelo ka lɔsɛnɔ la hwe ndo l’ɔngɛnɔngɛnɔ lo Nkɛtɛ ya Daka. Koko awui asɔ tshɛ takawahombe nkoma le wɔ oko lo dihindo. Dia vɔ nkondja ɛtshɔkɔ ɛsɔ, vɔ wakahombe “nsɔna lɔsɛnɔ.” Lo ngande? ‘Lo mboka Nzambi ngandji, lo mpokamɛ dui diande ndo lo mbomamema.’

Ɛlɔ kɛnɛ, woho w’ɔsɔnwɛlɔ wa ngasɔ wekɔ la ntondo kayɛ ndo ɔsɔnwɛlɔ ayɛ mbayoshikikɛ woho wayonga nshi yayɛ yayaye. Lo nsɔna dia mboka Nzambi ngandji, lo mbidja yimba lo kɛnɛ katotɛnde ndo lo mbomamema, wɛ ayɔsɔna lɔsɛnɔ, mbuta ate lɔsɛnɔ la pondjo lo paradiso ka la nkɛtɛ. Ko kakɔna kalɔmbama lo wanya asɔ tshɛ?

Ngandji ekɔ dionga dia ntondo diaki Nzambi. L’ɛlɔmbwɛlɔ ka nyuma k’ekila, ɔpɔstɔlɔ Joani akafunde ate: “Nzambi ekɔ ngandji.” (1 Joani 4:8) L’ɔtɛ w’ɔkɔkɔ ɔsɔ mbele, etena kakawawombola dia mbeya ɔlɛmbɛ akɔna woleki woke l’atei w’ɛlɛmbɛ, Yeso akate ate: “Langa Jehowa Nzambi kayɛ la otema ayɛ tshɛ ndo la anima ayɛ tshɛ ndo la yimba yayɛ tshɛ.” (Mateo 22:37) Diɔtɔnganelo dia dimɛna la Jehowa Nzambi pombaka pikama aha lo wɔma wele oko kanga tshungu, koko lo ngandji. Ko lande na kahombaso nsɔna dia mboka Nzambi ngandji?

Ngandji ka Jehowa otsha le anto ekɔ oko ngandji ka ambutshi wa ngandji otsha le anawɔ. Kaanga mbewɔ anto wele keema kokele, ambutshi wele la ngandji mbetshaka, keketshaka, sukɛka ndo pokolaka anawɔ nɛ dia vɔ nangaka dia anawɔ monga l’ɔngɛnɔngɛnɔ ndo mpama dimɛna. Ko kakɔna kalongamɛ ambutshi lo wedi awɔ? Vɔ nangaka dia anawɔ mbaoka ngandji ndo nkitanyiya kɛnɛ ketshawɔ anawɔ lo wahɔ awɔ. Shi ekɔ dimɛna dia Shɛso ka kokele  lele l’olongo nongamɛ dia sho mboka ngandji ndo monga la lowando lo kɛnɛ tshɛ kakandatosalɛ?

Lo ɔtɛkɛta wakafundama Bible ntondo, tshɛkɛta “mpokamɛ” mbelaka mbala efula kanyi ya “nkitanyiya.” Shi kɛsɔ mbatotolangaka mbuta etena katototɛka ɔna ɔnɛ: “Hokamɛ ambutshi ayɛ”? Ɔnkɔnɛ, mpokamɛ dui dia Nzambi nɔmbaka mbeka ndo nkitanyiya kɛnɛ katande. Lam’ele hatokoke mboka dui dia Nzambi lo yoho ya mɛtɛ mɛtɛ, sho mbohokamɛka lo mbadia ndo lo nkamba la kɛnɛ kele l’Ɔtɛkɛta ande, Bible.​—1 Joani 5:3.

Dia mɛnya ohomba wa mpokamɛ dui dia Nzambi, Yeso akate lo diaaso dimɔtshi ate: “Onto hayala la lɔsɛnɔ oma lo mbo ya ndɛ tsho, koko ndjalaka la lɔ oma lo ɔtɛkɛta tshɛ watomba oma l’onyɔ wa Jehowa.” (Mateo 4:4) Oko wele diangɔ dia ndɛ diekɔ ohomba le so dia monga la yoonge ya dimɛna, mbele ndo mbeya Nzambi ndeka monga ohomba efula. La nde na? Sɔlɔmɔna nkumekanga ka lomba akate ate: “Lomba kokɛka oko wakokɛ falanga, koko wahɔ wele la ewo vɔ ɔnɛ: Lomba namaka lɔsɛnɔ la ɔnɛ lele la lɔ.” (Ondaki 7:12) Ewo ndo lomba l’oma le Nzambi koka tokokɛ ɛlɔ kɛnɛ ndo tokimanyiya dia sho nsala ɛsɔnwɛlɔ wa lomba wakonya lo lɔsɛnɔ la pondjo lo nshi yayaye.

Ohɔ wɛɛla waki Yeso wakatasɛdingodi lo sawo dietshi, lɔkɔ nde akate ate: “Soko dia tshitshɛ la mboka ka tshitshɛ tɔlaka lo lɔsɛnɔ. Anto yema tshitshɛ tsho mbatokiɛnaka.” (Mateo 7:13, 14) Naka sho nkɛndakɛnda lo mboka ka ngasɔ, kete tayokondja mɛtɛ wahɔ wa monga ndo ntshikala suke suke la ɔnɔmbɔdi wa manyi naka talanga nkoma lɛnɛ atatatshu, mbuta ate nkondja lɔsɛnɔ la pondjo. Diakɔ diele, tekɔ l’ɔkɔkɔ w’oshika wa ntshikala suke suke la Nzambi. (Osambo 16:8) Ko, ngande wasalaso dui sɔ?

Lushi tshɛ, tekɔ l’awui efula wahombaso nsala ndo awui akina efula wakombolaso nsala. Awui wa ngasɔ koka nsala dia sho ndjashaka paka lɔkɔ kana tekola yimba ndo kɛsɔ ayosala dia sho monga paka la wenya yema tshitshɛ kana pomba etena ka nkana yimba lo kɛnɛ kalanga Nzambi dia sho nsala. Diakɔ diatohola Bible ate: “Nyendake dimɛna woho wakɛndakɛndanyu, aha oko akanga wa dinginya, koko oko akanga wa tomba. Nyokambe la wenya anyu lo yoho yoleki dimɛna, nɛ dia nshi nyɛ yekɔ kɔlɔ.” (Ɛfɛsɔ 5:15, 16) Sho tshikalaka suke la Nzambi lo nsala dia diɔtɔnganelo diasaso la nde monga dui dioleki ohomba lo nsɛnɔ yaso.​—Mateo 6:33.

Kaanga mbele ndooko kakokayɛ nsala dia ntshikitanya kɛnɛ kakakokomɛ lo nshi yakete, ekɔ awui amɔ wakokayɛ nsala dia wɛ ndo wanɛ wokayɛ ngandji monga la nshi yayaye y’amɛna. Bible tɛnyaka ɔnɛ Shɛso lele l’olongo, Jehowa Nzambi tokaka ngandji ka mamba ndo nde mbetawɔka dia sho mbeya kɛnɛ kakombolande tɛna tasala. Tolembete ɛtɛkɛta wa omvutshi Mika:

“Wɛ onto, nde akakotɛ kɛnɛ kele ɔlɔlɔ. Ko kakɔna kakɔlɔmba Jehowa? Paka dia monga la losembwe, dia nanga kɔlamelo, ndo dia nkɛndakɛnda la okitshakitsha kaamɛ la Nzambi kayɛ!”​—Mika 6:8.

Onde wɛ ayetawɔ leeta la Jehowa dia nkɛndakɛnda kaamɛ la nde ndo nkondja lɔsɛnɔ la ɛtshɔkɔ wa pondjo wamondɔlɔngɔsɔlɛ wanɛ wakitanyiya dui diande? Ɛsɔnwɛlɔ wekɔ l’anya ayɛ!