ANDE ELONGAMELO KA DIAMBO LEE! Otungi aso akalake dia tosha lɔsɛnɔ la pondjo paka lanɛ la nkɛtɛ. Koko, anto efula mɛnaka dia ekɔ wolo mbetawɔ dui sɔ. Vɔ mbutaka ɔnɛ: ‘Onto tshɛ pombaka mvɔ l’etena kɛmɔtshi. Ɔsɔ ekɔ awui wasalema lo lɔsɛnɔ l’onto, mbuta ate mbotɔ, nsɛna ndo mvɔ.’ Akina mbetawɔka dia lɔsɛnɔ la pondjo koka monga, koko aha lanɛ la nkɛtɛ. Vɔ mbutaka dia lɔsɛnɔ la pondjo mongaka paka l’ɔkɔngɔ w’onto mvɔ ndo ntshɔ l’olongo. Naa kanyi yayɛ?

La ntondo ka wɛ nkadimola lo dimbola sɔ, lande na kahayasɛdingola okadimwelo washa Bible lo ambola asato anɛ: Kakɔna kɛnya yoho yakatongama onto lo kɛnɛ kendana la edja kahombande nsɛna? Naa sangwelo diaki Nzambi di’oma l’etatelo lo dikambo dia nkɛtɛ ndo anto? Ngande wakayɔtɔ nyɔi lo nkumbo k’anto?

L’atei wa ditongami tshɛ diele la lɔsɛnɔ diakatonge Nzambi la nkɛtɛ, anto mɛtɛ wakatongama lo yoho ya laande. Lo woho akɔna? Bible mɛnyaka dia paka anto ato mbakatongama lo “efanelo” ka Nzambi ndo lo ndjela ‘woho wende.’ (Etatelo 1:26, 27) Kakɔna kalanga dui sɔ nembetshiya? Dui sɔ nembetshiyaka dia anto wakatongama la waonga wafɔna la waki Nzambi, ɛnyɛlɔ oko ngandji ndo losembwe.

Laadiko dia laasɔ, anto wakatongama la dikoka dia nkanyiya kaamɛ ndo dikoka dia mbeya ntshikitanya ɔlɔlɔ la kɔlɔ ndo nsaki ka mbeya ndo monga la diɔtɔnganelo dia dimɛna la Nzambi. Diakɔ diele, sho koka ngɛnangɛna lo menda dimɛna dia loowa ndo diangɔ dia diambo diakatongama, ndo awui wele oko disɛlasɛla, mishiki ndo ɛtɛkɛta wa lɔlɛnga. Laadiko dia laasɔ, anto wakatongama la dikoka dia laande dia ntɛmɔla Otungi. Waonga wa ngasɔ mbasala di’anto tshikitana etale la ditongami dikina diele la lɔsɛnɔ la nkɛtɛ.

Ɔnkɔnɛ, toyambole ɔnɛ: Onde Nzambi akakoke ntonga anto la waonga wa diambo wa ngasɔ, kaamɛ ndo dikoka diɛnama oko bu la elelo dia monga la waonga asɔ ndo mpama, naka nde akalange dia paka sho sɛnaka ɛnɔnyi yema tshitshɛ tsho? Kɛnɛ kele mɛtɛ ele Nzambi akasha anto waonga ndo akoka wa laande asɔ dia sho ngɛnangɛna la lɔsɛnɔ paka lanɛ la nkɛtɛ pondjo pondjo.

Koko, anto amɔtshi mbutaka dia Nzambi kotonga pondjo anto dia vɔ nsɛna la nkɛtɛ pondjo pondjo. Vɔ mbutaka dia nkɛtɛ akatongama oko edjaselo  ka lo tshanda mɔtshi tsho, dia menda anto akɔna l’atei wa nkumbo k’anto wakoka ntshɔ l’olongo dia tɔsɛna pondjo pondjo kaamɛ la Nzambi. Ko naka dui sɔ diekɔ mɛtɛ, shi kete kɛsɔ ayɛnya dia Nzambi mbele lo kiɔkɔ ya awui tshɛ wa kɔlɔ wambolola la nkɛtɛ? Dui sɔ hadiɔtɔnɛ la woho mɛtɛ wele Nzambi. Lo dikambo diande, Bible mbutaka ɔnɛ: “Nɛ dia mboka yande tshɛ yekɔ losembwe. Nzambi ka kɔlamelo kele keema la wɛngɛngɛ; nde ekɔ ɔlɔlɔ ndo osembɔki.”​—Eohwelo k’Ɛlɛmbɛ 32:4.

Bible mɛnyaka hwe sangwelo diaki Nzambi di’oma l’etelo lo dikambo dia nkɛtɛ lo mbuta ɔnɛ: “Lo kɛnɛ kendana la olongo, vɔ wekɔ waki Jehowa, koko nde akasha ana w’anto nkɛtɛ.” (Osambo 115:16) Eelo, Nzambi akatonge nkɛtɛ dia tɔ monga dihole di’olangala efula, dia monga edjaselo ka pondjo dikambo di’anto ndo kilodia l’ɛngɔ tshɛ keso l’ohomba dia sho monga la lɔsɛnɔ lele l’oyango ndo laha l’ekomelo.​—Etatelo 2:8, 9.

“Lo kɛnɛ kendana la olongo, vɔ wekɔ waki Jehowa, koko nde akasha ana w’anto nkɛtɛ.”​—Osambo 115:16

Bible mbutaka nto akambo hwe lo kɛnɛ kendana la sangwelo diaki Nzambi lo dikambo dia nkɛtɛ. Nde akasha atshukanyi wa ntondo ɔkɛndɛ wa ‘ndodia nkɛtɛ ndo mbolɛ ditongami tshɛ diele la lɔsɛnɔ diakɛndakɛnda la nkɛtɛ.’ (Etatelo 1:28) Ande diɛsɛ diaki la wɔ dia nkokɛ ndo nunya edjaselo kawɔ ka Paradiso ka la nkɛtɛ ka woke lee! Lo mɛtɛ, elongamelo kaki la Adama la Eva ndo tokanula tawɔ aki dia sɛnaka pondjo pondjo la nkɛtɛ koko aha l’olongo.

Ko laasɔ, lande na kavɔso? Bible mɛnyaka dia ekɔ etongami kɛmɔtshi kaki Nzambi ka lo nyuma, lakayeyamaka oko ɔtɔmbɔki Satana Diabolo, akasale dia mɔnyɔla kɛnɛ kakakongɛ Nzambi lo Ɛdɛna. Lo ngande?

Satana akatshutshuya ambutshi aso wa ntondo, Adama la Eva dia vɔ mbɔtɔ l’ɔnɔngɔ ande dia tɔmbɔkwɛ Nzambi. Etena kakate Satana dia Nzambi ekɔ lo dima anto ɛngɔ kɛmɔtshi ka dimɛna, mbuta ate lotshungɔ la vɔamɛ nshikikɛ kɛnɛ kele ɔlɔlɔ ndo kɛnɛ kele kɔlɔ, vɔ wakasɔnɛ dia mbeta lo wedi wa Satana ndo wakatɔmbɔkwɛ Nzambi. Etombelo akɔna wakonge? L’edjedja ka wonya, vɔ wakavu, paka oko wakaahɛmɔla Nzambi. Vɔ wakashisha elongamelo ka sɛnaka pondjo pondjo lo Paradiso ka la nkɛtɛ.​—Etatelo 2:17; 3:1-6; 5:5.

Ɔtɔmbɔkwɛlɔ w’Adama la Eva wakonge la shɛngiya le anto tshɛ polo ɛlɔ kɛnɛ. Ɔtɛkɛta wa Nzambi mbutaka ɔnɛ: ‘Pɛkato kakɔtɔ l’andja oma le onto ɔtɔi Adama ndo nyɔi oma lo pɛkato, ɔnkɔnɛ nyɔi kakadiangana le anto tshɛ.’ (Rɔmɔ 5:12) Tekɔ lo mvɔ nɛ dia takahowɔ pɛkato la nyɔi oma le ambutshi aso wa ntondo, koko aha l’ɔtɛ w’ɔnɛ Nzambi akakongɛ awui amɔtshi la ntondo kana l’ɔtɛ wa ‘dikongelo’ dimɔtshi diaki Nzambi diele wolo nshihodia.

Ɔtɔmbɔkwɛlɔ waki lo Ɛdɛna koshimba sangwelo diaki Nzambi di’oma l’etatelo lo dikambo di’anto ndo nkɛtɛ. Ngandji ndo losembwe laki Nzambi lakotshutshuya dia nde mona woho wa totshungola oma lo lɔhɔmbɔ la pɛkato la nyɔi lakatahowɔ. Ɔpɔstɔlɔ Pɔɔlɔ akate ate: “Difuto dia pɛkato ele nyɔi, koko woshasha washa Nzambi ele lɔsɛnɔ la pondjo oma le Kristo Yeso Nkumɛso.” (Rɔmɔ 6:23) La ngandji tshɛ, Nzambi akakimɔ “Ɔnande ɛtɔi lakandote, [Yeso Kristo] dia onto tshɛ longa la mbetawɔ le nde atovɔke, koko akondja lɔsɛnɔ la pondjo.” (Joani 3:16) Lo ndjakimɔ ndamɛ la lolango oko oshinga w’etshungwelo, Yeso akafute kɛnɛ tshɛ kakashisha Adama. a

Keem’edja, daka diaki Nzambi dia paradiso ka la nkɛtɛ diayanga kotshama. Wɛ koka monga la nshi yayaye ya diambo shɔ naka wɛ ndjela ɔhɛmwɛlɔ wa Yeso wata ɔnɛ: “Nyɔtɔ lo soko dia tshitshɛ, nɛ dia soko dia woke ndo di’enanɔnanɔ ekɔ mboka katɔla lo elanyelo. Anto efula mbɔtɔka lɔkɔ. Koko soko dia tshitshɛ la mboka ka tshitshɛ tɔlaka lo lɔsɛnɔ. Anto yema tshitshɛ tsho mbatokiɛnaka.” (Mateo 7:13, 14) Eelo, nshi yayɛ yayaye nemanɛka la tɛdikɔ tɔsayɛ. Ayoyosala?