ASAWO wetshi mɛnyaka woho wakoka awui efula wa kandji mbetɛ lɔsɛnɔ ololo. Etena kakikɛyɛ ekakatanu ayɛ hita, wɛ mbeyaka ndjambola dia kana ekɔ ohomba ntetemala nsɛna ndo dia kana onto ɔmɔtshi ndjakiyanyaka dikambo diayɛ. Yashikikɛ dia Nzambi ndjakiyanyaka dikambo di’ekiyanu wele layɛ. Wɛ ekɔ la nɛmɔ lo washo ande.

Ofundji w’​Osambo 86 akɛnya woho wakandayaɛkɛka le Nzambi lo mbuta ate: “Dimi kelɛka lo lushi lemi l’asui, nɛ dia wɛ ayonkadimola.” (Osambo 86:7) Koko wɛ mbeyaka ndjambola ɔnɛ: ‘Ngande wakoka Nzambi kadimolami “lo lushi lemi l’asui”?’

Kaanga mbahatokonyɛ Nzambi ekakatanu ayɛ mbala kakɔ ɔtɔi, Ɔtɛkɛta ande, Bible koshikikɛka dia nde kokaka kosha wɔladi wa l’etei k’otema wayokokimanyiya dia ndɔshana l’ekakatanu akɔ. Vɔ mbutaka ɔnɛ: “Lo oseka dikambo tshɛ, tanyoyakiyanyake, koko nyote Nzambi ehomba anyu lo dɔmbɛlɔ la ɛsɛngɔsɛngɔ kaamɛ ndo la eokelo ka losaka, ko wɔladi wa Nzambi woleki tokanyi tshɛ wayolama etema anyu la timba tanyu.” (Filipɛ 4:6, 7, nɔtɛ) Tɔsɛdingole woho watosha avɛsa wayela anɛ eshikikelo k’ɔnɛ Nzambi ndjakiyanyaka mɛtɛ dikambo diaso.

“Nzambi hohɛ kaanga [ɛsɔlɛ] ɔtɔi l’atei adiɔ. . . . Nyu ndeka lemba la sɔlɛ nɛmɔ.”​—Luka 12:6, 7, nɔtɛ.

OHOKANYIYA YEMA: Tofudu tele oko anyanya lo washo w’anto tɔsɔ tekɔ ohomba lo washo wa Nzambi. Nzambi mɛnaka kaanga ɛsɔlɛ ka tshitshɛ; ɛsɔlɛ tshɛ kekɔ ɛngɔ kasɛna ka nɛmɔ. Lo washo wa Nzambi, anto ndeka nsɔlɛ nɛmɔ la fwa. L’atei wa diangɔ diakatonge Nzambi la nkɛtɛ, anto wekɔ ditongami dioleki diambo. Vɔ wakatongama lo “efanelo” kande ndo wekɔ l’akoka wa monga ndo nkɛnɛmɔla waonga ande wa diambo.​—Etatelo 1:26, 27.

“Jehowa le, wɛ akansɛdingola ndo wɛ mbeyakami. . . . Wɛ shihodiaka tokanyi tami . . . Ɔsɛdingole ndo eya tokanyi tankiyanya.”​—Osambo 139:1, 2, 23.

OHOKANYIYA YEMA: Nzambi keyaka dimɛna efula. Nde mbeyaka tokanyi tayɛ t’oma k’ɛse otema ndo ekiyanu ayɛ dimɛna. Etena kele anto akina haweye ekakatanu ndo ekiyanu wele layɛ, Nzambi ndjakiyanyaka dikambo diayɛ ndo nangaka kokimanyiya. L’ɔtɛ wa dikambo sɔ, ekɔ ohomba wɛ ntetemala nsɛna.

“Jehowa le, ooke dɔmbɛlɔ diami; delo diami diayangami ekimanyielo diakome le yɛ. . . . Ohokɛ toyi diayɛ le mi; onkadimole yema esadi etena kelɛmi. . . . Nde ayodja yimba lo dɔmbɛlɔ dia ahombi.”​—Osambo 102:1, 2, 17.

OHOKANYIYA YEMA: Ekɔ oko oma ko etatelo k’asui w’anto, Jehowa ekɔ lo mɛna asɔyi tshɛ wakɛdia anto l’ɔtɛ w’asui awɔ. (Osambo 56:8) Nde mɛnaka ndo asɔyi ayɛ. Nzambi mbohɔka ehemba ndo asɔyi ayɛ tshɛ nɛ dia wɛ ekɔ la nɛmɔ lo washo ande.

“Toyakiyanyake, nɛ dia dimi kele Nzambi kayɛ. Dimi layokokeketsha, eelo, dimi layokokimanyiya . . . Dimi Jehowa Nzambi kayɛ, . . . dimi kotɛka nte: ‘Tokake wɔma. Dimi layokokimanyiya.’”​—Isaya 41:10, 13.

OHOKANYIYA YEMA: Nzambi ekɔ suke dia kokimanyiya. Naka wɛ ambɔkɔ, nde ayoketola.

“Nzambi akalange andja lo yɛdikɔ y’efula, diakɔ diakandakimɔ Ɔnande ɛtɔi lakandote, dia onto tshɛ longa la mbetawɔ le nde atovɔke, koko akondja lɔsɛnɔ la pondjo.”​—Joani 3:16.

OHOKANYIYA YEMA: Wɛ ekɔ la nɛmɔ efula lo washo wa Nzambi, diakɔ diakandakimɔ Ɔnande, Yeso oko olambo lo wahɔ ayɛ. Olambo ɔsɔ koshaka elongamelo ka ndjonga la lɔsɛnɔ l’ɔngɛnɔngɛnɔ ndo la pondjo. *