ETENA kashisha onto kɔlamelo le olonganyi ande, dui sɔ mbishaka paa k’efula. Lo mɛtɛ, atshukanyi amɔtshi wakɛnyi dia vɔ kokaka dimanyiya elonganyi awɔ waki la ndjatshumoya, ko nyomonga nto la diɔtɔnganelo dia dimɛna. * Koko oyadi diwala mvɔ kana bu, onto lashola di’olonganyi ande bu la kɔlamelo le nde, mongaka la kandji k’efula. Ngande wakoka onto la ngasɔ ndɔshana l’okakatanu ande?

Kaanga mbongawɔ l’ɔkɛyi w’efula, atshukanyi efula wele elonganyi awɔ wakashisha kɔlamelo wakakondja ekeketshelo oma l’Afundelo. Vɔ wakeye dia Nzambi mɛnaka asɔyi wakɛdiawɔ ndo nde kahanaka la wɔ paa kawɔ.​—Malaki 2:13-16.

“Etena kakamamɛnama la ekiyanu, wɛ akansambe ndo akambɔladia.”​—Osambo 94:19.

Bill mbutaka ate: “Etena kakamadiaka divɛsa nɛ, lakakanyiyaka woho wakatutadiaka Jehowa kandji kami la ngandji, oko ombutshi wa pami wa kɛtshi.”

“Le kanga kɔlamelo, wɛ mbosalɛka akambo la kɔlamelo.”​—Osambo 18:25.

Carmen lele omɛnde komonga la kɔlamelo l’edja ka ngɔndɔ efula mbutaka ate: “Omɛmi komonga la kɔlamelo, koko lakayaɛkɛ lo kɔlamelo yaki Jehowa. Nde hakalɛki pondjo.”

“Lo oseka dikambo tshɛ, tanyoyakiyanyake, koko nyote Nzambi ehomba anyu lo dɔmbɛlɔ la ɛsɛngɔsɛngɔ . . . ko wɔladi wa Nzambi woleki tokanyi tshɛ wayolama etema anyu.”​—Filipɛ 4:6, 7.

Sasha mbutaka ate: “Dimi mbadiaka divɛsa nɛ mbala la mbala. Lam’ele lakalɔmbaka efula, Nzambi akambisha wɔladi lo lɔsɛnɔ lami.”

Lo tena dimɔtshi, anto tshɛ wakatashidi awui awɔ la diko ango wakayaoke dia wayanga mpekɔ. Koko vɔ wakayaɛke le Jehowa Nzambi ndo wakakondja wolo oma l’Ɔtɛkɛta ande. Bill mbutaka ate: “Mbetawɔ kami kakakimanyiya dia monga la lɔsɛnɔ lele l’oyango etena kakamɛnyi oko awui tshɛ wa lo lɔsɛnɔ lami wambolana. Kaanga mbakamakɛndakɛnda l’etena kɛmɔtshi ‘l’okidi wa wodjima hitɔɔ,’ Nzambi aki kaamɛ la mi.”​—Osambo 23:4.