ONDE ndooko lushi lakayayaoke kɔlɔ efula polo ndo lo wɛ mɛna dia wɛ aya bu l’ohomba wa lɔsɛnɔ? Naka wɛ amboyaokaka ngasɔ, kete wɛ koka nshihodia woho wakayaoke Adriana. Nde aki l’ɔkɛyi w’efula, akayaoke kɔlɔ efula ndo akashisha elongamelo. Aseka enganga wakashola dia Adriana aki la hemɔ k’ɔkɔmwɛlɔ w’efula.

Tɔtɛkɛtɛ ndo dia pami kɛmɔtshi k’ose Japon kelɛwɔ Kaoru, lakakokɛka esombe w’ambutshi ande waki la hemɔ. Nde mbutaka ate: “Tena dimɔtshi, lakakomaka ewo lo menda efula k’awui kakahomanaka la mi l’olimu. Tena dimɔtshi, dimi kombokaka mposa ka ndɛ ndo lakalalaka engondo. Lakayotatɛ nkanyiya dia naka dimi mvɔ, kete ekakatanu ami wayokomɛ.”

Pami kɛmɔtshi k’ose Nigéria kelɛwɔ Ojebode mbutaka ate: “Laki wonya tshɛ ɔkɛtshi oto, lakalelaka, ko lakayange woho wa ndjadiaka.” Diɛsɛ ko, Ojebode, Kaoru, ndo Adriana kondjadiaka. Koko ɔnɔnyi tshɛ, anto nunu nkama ndjadiakaka.

Apami mbaleka ndjadiaka ndo efula ka l’atei awɔ kɔnɔmba ekimanyielo nɛ dia waki ɛsɔnyi efula. Yeso akate di’anto wele la hemɔ mbele l’ohomba w’onganga. (Luka 5:31) Laasɔ, naka ɔkɔmwɛlɔ wele layɛ wokokonya dia nkombola nyɔi, kete lam’alangɛ, tokake nsɔnyi dia nɔmba ekimanyielo. Efula k’anto wadiɛnɛ l’ɔkɔmwɛlɔ wakɛnyi di’osakelo w’aseka enganga mbakimanyiyaka dia ndjaoka dimɛna ndo dia mbikikɛ. Ojebode, Kaoru, ndo Adriana wakalongola ekimanyielo oma le enganga ndo wamboleka ndjaoka dimɛna nshi nyɛ.

Adɔkɔtɛlɛ koka nkamba l’ekanga kana la sawo kana la toho takɔ tohende dia nsakɛ onto lambɔkɔmɔ. Wanɛ wambɔkɔmɔ nangaka di’ase nkumbo ndo angɛnyi awɔ ndjadja lo dihole diawɔ, monga la solo dia lotutsha, mbakanɛ ndo mbasukɛ. Koko ɔngɛnyi woleki tshɛ dimɛna ko Jehowa Nzambi, ɔnɛ lasha ekimanyielo ka diambo, oma lo tshimbo y’Ɔtɛkɛta ande Bible.

Wanɛ wele la hemɔ k’ɔkɔmwɛlɔ mongaka mbala efula l’ohomba wa sakemɛ l’etena k’otale ndo vɔ koka monga l’ohomba wa ntshikitanya mbekelo yawɔ. Koko naka wɛ ekɔ la hemɔ k’ɔkɔmwɛlɔ, kete wɛ koka nongamɛ nshi yayaye y’ɔngɛnɔngɛnɔ oko wakasale Ojebode. Nde mbutaka ate: “Lekɔ lo nongamɛ dia ndjɛna ekotshamelo ka Isaya 33:24, divɛsa diatɛkɛta di’etena kele ndooko onto la la nkɛtɛ layota ate: ‘Lekɔ la hemɔ.’” L’ɛnyɛlɔ ka Ojebode, nkondja ekeketshelo oma lo daka diaki Nzambi diendana la “nkɛtɛ k’oyoyo,” lɛnɛ ele “kandji” hatoyala nto. (Ɛnyɛlɔ 21:1, 4) Daka sɔ mendanaka ndo la ekomelo ka paa tshɛ ya lo yimba ndo ya longandji. Paa tshɛ ya lo tokanyi yayoshila lo pondjo. Paa yayɛ ya lo tokanyi ‘hayotohɔma nto ndo hayotoya lo otema ayɛ nto’ pondjo.​—Isaya 65:17.