RƐBƐKA akendaka ɛtshi ka nkɛtɛ ka dimɛna efula kaki la alɛdi. L’ɔkɔngɔ wa mingu ngana ya lɔkɛndɔ, nde akatatɛ ndjaekesanyiya la lɔkɛndɔ la kamɛlɔ yele hayosembɔ la mboka lam’ele nde akahema laadiko atɔ. Harana ngelo kande ka lootɔ ambotshikala etale l’ɔkɔngɔ ande, kilɔmɛtrɛ nkama lo lɛkɛ la nɔrdɛ ɛstɛ. Ondo takandakoke mɛna nkumbo kande nto. Ambola wendana la nshi yande y’otsha la ntondo wakahombe mɛtɛ mbotshindja wɔɔngɔ, djekoleko etena kɛnɛ kakinde suke la nkoma lɛnɛ akandatatshɔka.

Olui w’anto wakatandaka lɔkɛndɔ waketeta efula l’ɛtshi ka nkɛtɛ ka Kanana ndo wakete lo ɛtshi ka nkɛtɛ ka shɛnga ka Nɛngɛbɛ. (Etatelu 24:62) Ondo Rɛbɛka akɛnyi ɛkɔkɔ. Ondo wodja ɔsɔ waki shɛnga ndo komonga l’adiyo efula dikambo dia dongalonga di’efula, koko vɔ wakikɔ la yema y’adiyo wa ndeshaka waa nyama. Ɔnɛ lakatawalɔmbɔlaka akeyaka ɛtshi ka nkɛtɛ shɔ dimɛna. Nde aki la nsango y’amɛna efula ya totɛ nkumɛnde, mbuta ate towotɛ ɔnɛ lambokela Rɛbɛka wa wadɛyɛ. Koko Rɛbɛka akayakiyanyaka dia mbeya woho wa lɔsɛnɔ wayangande tɔsɛna lo wodja ɔsɔ. Otshuki ande, Isaka ayonga ngande? Laasɔ ko watahomana ndooko lushi. Onde Isaka ayɔngɛnangɛna etena kayondowɛna? Ndo ngande wakayaoke Rɛbɛka lo dikambo dia Isaka?

Ɛlɔ kɛnɛ, lo ahole efula, awala wa lokongɛ koka mɛnama oko dui di’oyoyo. Lo ahole akina, awala wa ngasɔ wekɔ lo salema. Oyadi onto lakɔna le yɛ, ondo wɛ mbeyaka mbetawɔ dia Rɛbɛka akatatshɔka lo dihole diahandeye. Lo mɛtɛ, nde aki womoto laki la dihonga ndo la mbetawɔ ka mamba. Sho pombaka monga la waonga asɔ ahende etena kahomanaso la etshikitanu lo lɔsɛnɔ. Ekɔ waonga akina w’amɛna wahaleke anto monga lawɔ wokakatanyi la mbetawɔ kaki Rɛbɛka.

Otshikitanu wa woke wakasalema lo lɔsɛnɔ laki Rɛbɛka wakatatɛ lo dui dimɔtshi diakɛnamaka le nde oko dui di’anyanya. Nde akole la Harana kana suke la lɛkɔ, osomba wa la Mezɔpɔtamiya. Ambutshi ande wakatshikitana l’anto efula wakadjasɛka la Harana. Vɔ kɔtɛmɔlaka Sinɛ, jambizambi ngɔndɔ. Koko, Jehowa mbaki Nzambi kawɔ.​—Etatelu 24:50.

Rɛbɛka akikɔ osekaseka w’olangala efula, koko nde komonga kanga nɛndɛ, ndo olangala ande komonga w’anyanya. Nde aki womoto lakakambaka olimu efula ndo nde aki la lɔkɛwɔ la pudipudi. Nkumbo kande kaki la ekondjelo k’efula diakɔ diakiwɔ l’ase olimu, koko Rɛbɛka kondjadiya kana ndjaɔsa oko ɔnaki nkumekanga, lo dodia diande, wakawɛnya ohomba w’olimu. L’ɛnyɛlɔ ka wamato efula wa lo nshi shɔ, Rɛbɛka aki la elimu efula wa wolo wa nsala, ɛnyɛlɔ oko mɛmba ashi lo wahɔ w’ase nkumbo. Etena kakatatɛka dikɔlɔ, nde akatshɔka la mbaka kande l’ahɛka dia tɛmba ashi oma l’ɛtɛkɔ.​—Etatelu 24:11, 15, 16.

La dikɔlɔ dimɔtshi, l’ɔkɔngɔ wa nde ndodia mbaka kande la ashi, pami kɛmɔtshi k’opalanga akalawɔ dia ndjohomana la nde. Nde akawotɛ ate: ‘Lam’alangayɛ, ombisha yema y’ashi wa nnɔ oma lo mbaka kayɛ.’ Nde akɔlɔmbɛ dui sɔ la okitshakitsha ndo la loshilambo tshɛ. Rɛbɛka akakoke mɛna dia pami kɛsɔ ambonda lɔkɛndɔ l’otale efula. Diakɔ diele, nde akatshu esadi esadi ko akatotahola ashi lo mbaka kande kakandɛmbɛ lo dihɛka ko akayosha pami kɛsɔ dia nnɔ, aha ashi w’anyanya koko ashi w’amɛna ndo wa tshitshi. Nde akɛnyi dia pami kɛsɔ aki la kamɛlɔ dikumi yakakelekama suke la wɔ ndo nde akɛnyi dia dihole diadjɛwɔ waa nyama ashi diatalole dia yɔ nnɔ ashi. Nde akakoke mɛna dia washo wa pami kɛsɔ wakawendaka la yambalo tshɛ, ndo nde aki suke dia mɛnya lokaho lande ndo kɛsɔ mbakandasale. Nde akate ate: ‘Layanga totahola ndo ashi wa kamɛlɔ yayɛ nnɔ polo ndo yɔ yambondoya mposa.’​—Etatelu 24:17-19.

Tolembete dia Rɛbɛka kombisha kamɛlɔ dikumi yema y’ashi tshitshɛ koko ashi wa yɔ nnɔ ko mondoya  mposa. Naka kamɛlɔ kekɔ la mposa k’efula, kete kamɛlɔ ɔtɔi koka nnɔ ndekana litrɛ 95 y’ashi. Naka kamɛlɔ yakɔ dikumi y’akikɔ la mposa, kete Rɛbɛka akahombe mbɔsa wenya efula dia nsala olimu wa wolo. Akɛnama dia kamɛlɔ yakikɔ la mposa k’ashi efula. * Ko onde Rɛbɛka akeyaka ngasɔ etena kakandawashaka ashi? Ndooko. Nde aki suke, aki ndo la nsaki dia nkamba olimu wa wolo dia nde mɛnya lokaho lande le ɔngɛndangɛnda w’opalanga ɔsɔ. Ɔngɛndangɛnda ɔsɔ aketawɔ ekimanyielo kaki Rɛbɛka. Nde akawendaka la yambalo tshɛ etena kakandɛmbɛmbaka ashi mbala ko mbala dia ndodia mbaka.​—Etatelu 24:20, 21.

Ɛnyɛlɔ kaki Rɛbɛka toshaka wetshelo w’ohomba efula ɛlɔ kɛnɛ. Tekɔ lo nsɛna lo etena kele lokaki lambokita dikuma. Oko wakadiatatami la ntondo, anto wekɔ lo ‘ndjalanga,’ ndo vɔ bu suke dia nkimanyiya anto akina. (2 Timɔte 3:1-5) Akristo wanɛ wasala la wolo dia ndɔshana la shɛngiya ya l’andja ɔnɛ, kondjaka wetshelo lo dikambo dia osekaseka wa womoto watɛkɛtama lo Bible ɔnɛ lakakɛlakɛlaka mbala la mbala dia nsala kɛnɛ kele ɔlɔlɔ.

Rɛbɛka akɛnyi dia pami k’opalanga kɛsɔ akawendaka tɛɛ. Ndooko dui dia kɔlɔ diakikɔ lo wendelo ande, koko nde akambe ndo akangɛnangɛna. Etena kakashidiya Rɛbɛka olimu, nde akawosha weshasha mbuta ate, azama w’oshinga wolo. Oma laasɔ, nde akawombola ate: ‘Lam’alangayɛ, dimi nte kombole: Wɛ ɔna aki na? Onde sho kokaka ntana dihole dia ndala lo luudu la shɔ?’ Etena kakawotɛ Rɛbɛka dikambo dia nkumbo kande, pami kɛsɔ akaleke monga l’ɔngɛnɔngɛnɔ. Ondo dia mɛnya osalosalo ande, Rɛbɛka akawotɛ ate: ‘Tekɔ la dihole dia nyama ndala ndo adiyo efula dia yɔ ndɛ. Tekɔ ndo la dihole dia nyu ndala,’ ɔsɔ aki ekimanyielo k’oshika nɛ dia pami k’opalanga kɛsɔ akatatshɔka ndo la anto akina. Oma laasɔ, Rɛbɛka akalawɔ ko akatotɛ nyango kɛnɛ kakatombe.​—Etatelu 24:22-28, 32.

Mbokɛmaka hwe dia Rɛbɛka akodiama dia monga la lokaho. Ɔsɔ ekɔ dui dimɔtshi di’ohomba diɛnama oko diotashishɔ ɛlɔ kɛnɛ, ndo ekɔ ohomba mbokoya mbetawɔ kaki la ɔna womoto ɔsɔ laki la otema w’ɔlɔlɔ. Mbetawɔ kele laso le Nzambi pombaka totshutshuya dia sho nongolaka anto. Jehowa nongolaka anto, nɛ dia nde ekɔ la lokaho le anto tshɛ ndo nde nangaka dia atɛmɔdi ande nsala woho akɔ waamɛ. Etena kalongolaso anto kaanga wanɛ wele ondo  hawotoyotofuta, sho ngɛnyangɛnyaka Shɛso lele l’olongo.​—Mateo 5:44-46; 1 Petero 4:9.

Pami k’opalanga kɛsɔ akinde? Nde aki okambi waki Abrahama, ɔnango aki tshɛnde la Rɛbɛka la pami. Ɔnkɔnɛ, nde akalongɔma lo nkumbo kaki Bɛtuɛlɛ, ka she aki Rɛbɛka. Ondo pami kɛsɔ lokombo lande Eliɛzɛrɛ. * Wanɛ wakalongolaka angɛndangɛnda wakawashaka diangɔ dia ndɛ, koko Eliɛzɛrɛ akatone edja ndo nde amboshidiya mbuta ɔkɔkɔ wa lɔkɛndɔ lande. (Etatelu 24:31-33) Ondo sho koka nkanyiya woho wakandatɛkɛtaka l’ɔngɛnɔngɛnɔ tshɛ, nɛ dia nde aki oma la mɛna djembetelo ya shikaa dia Jehowa Nzambi kande akɔtshɔkɔla l’olimu w’ohomba ɔsɔ. Lo ngande?

Ohɔsɔ dia wɛ ekɔ lo mɛna Eliɛzɛrɛ akɔndɔlɛ Bɛtuɛlɛ ya she aki Rɛbɛka ndo Labana y’ɔnango ɔkɔndɔ etena kohokamɛwɔ la yambalo tshɛ. Nde akawatɛ dia Jehowa akatshɔkɔla Abrahama efula la Kanana ndo Abrahama la Sara wakote ɔna pami, Isaka ɔnɛ lakahombe ndjonga okitɔ wa diangɔ tshɛ. Abrahama akasha okambi ande ɔkɛndɛ w’ohomba efula: Nde akahombe nyangɛ Isaka wadi l’atei wa ewotɔ waki Abrahama la Harana.​—Etatelu 24:34-38.

Abrahama akalɔmbɛ Eliɛzɛrɛ dia nde ntshiba dia nde hatoyangɛ Isaka wadi l’atei wa wamato w’ase Kanana. Lande na? Nɛ dia ase Kanana kɔnɛmiyaka ndo kɔtɛmɔlaka Jehowa Nzambi. Abrahama akeyaka dia keema edja, Jehowa ayosha anto asɔ dilanya l’ɔtɛ w’awui awɔ wa kɔlɔ. Abrahama konangaka dia Isaka ɔnande la ngandji monga la diɔtɔnganelo l’anto asɔ ndo la mbekelo yawɔ ya mindo. Nde akeyaka nto dia ɔnande aki la ɔkɛndɛ wa woke wa nkotsha lo ekotshamelo k’alaka waki Nzambi.​—Etatelu 15:16; 17:19; 24:2-4.

Eliɛzɛrɛ akatɛ wanɛ wakalongolaka angɛndangɛnda dia etena kakandakome suke la Harana, nde akalɔmbɛ Jehowa Nzambi. Nde akalɔmbɛ Jehowa dia nde nsɔna osekaseka wa womoto dia nde tshukama la Isaka. Lo ngande? Eliɛzɛrɛ akalɔmbɛ Nzambi dia nde mboshikikɛ dia ɔna womoto lalangande dia Isaka ntshuka ayoya lo ɛtɛkɔ. Etena kayondɔlɔmba ashi wa nnɔ, nde ayoyakimɔ la lolango aha paka dia mbisha Eliɛzɛrɛ oto ashi koko ndo lo dikambo dia kamɛlɔ yande. (Etatelu 24:12-14) Onto akɔna akasale akambo asɔ tshɛ? Rɛbɛka. Ohokanyiya woho wakayaoke Rɛbɛka naka nde akokaka kɛnɛ kakatɛka Eliɛzɛrɛ ase nkumbo kande.

Bɛtuɛlɛ nde la Labana wakanandema oma lo ɔkɔndɔ waki Eliyɛzɛrɛ. Vɔ wakate vate: ‘Dikambo nɛ ndja oma le Jehowa.’ Oko waki mbekelo kawɔ, wakadje sheke ya diwala ndo Rɛbɛka akonge wadi aki Isaka. (Etatelu 24:50-54) Onde kɛsɔ nangaka mbuta dia Rɛbɛka kombuta ndooko dui lo dikambo sɔ?

Mingu ngana la ntondo ka laasɔ, Eliɛzɛrɛ akonyiya dui di’ohomba le Abrahama lo mombola ɔnɛ: ‘Ayomosala naka womoto akɔ halangi ndja la mi?’ Abrahama akokadimola ate: ‘Wɛ hatonga la onongo l’ɔtɛ wa etshibelo kamboyontshibɛ.’ (Etatelu 24:39, 41) Lo luudu laki Bɛtuɛlɛ, osekaseka wa womoto aketawɔ awui asɔ. Eliɛzɛrɛ akonge la ɔngɛnɔngɛnɔ hakoke lo menda dia ɔkɛndɛ wakawawosha wambolowana ndo la pindju kayela, nde akalɔmbɛ dia kana nde ayokoka ntshɔ kaamɛ la Rɛbɛka la Kanana aha la tshimbatshimba. Nkumbo lo wedi awɔ, wakalange dia nde tokotshikala la wɔ naka edja efula kete nshi kina dikumi. L’edjedja ka wonya, vɔ wakayɔlɔngɔsɔlaka akambo lo yoho nyɛ: ‘Ndeka dimɛna sho mbelɛ Rɛbɛka kele towombole ndamɛ.’​—Etatelu 24:57.

Ɔsɔ aki okandokando wa wolo wakahomana la Rɛbɛka lo lɔsɛnɔ lande. Kakɔna kakandahombe mbita? Onde nde akahombe mboka she la ɔnango nkɛtshi, ko mbetawɔ mɛna paa la lɔkɛndɔ otsha lo dihole diahandeye? Ko kana onde nde akɛnyi dia ɔsɔ akikɔ diɛsɛ dia mbisha lonya lo awui wakɛnama hwe dia wakalɔmbwama oma le Jehowa? Etena kakandashaka okadimwelo, nde akakɛnɛmɔla woho wakandayaokaka lo kɛnɛ kendana la dui dia shashimoya sɔ, ondo otshikitanu wa diambo lo lɔsɛnɔ lande. Nde akate tsho ate: ‘Dimi mbetawɔka ntshɔ.’​—Etatelu 24:58.

Ande yimba ya dimɛna yaki la nde lee! Ɛlɔ kɛnɛ, mbekelo yaso yendana la diwala mbeyaka ntshikitana, koko sho koka nkondja wetshelo w’efula oma le Rɛbɛka. Oyadi dui diakɔna tshɛ diakahombe monga ohomba le nde, nde kombetsha awui ande lo dihole dia ntondo, koko nde aketsha wahɔ wa Jehowa Nzambi lo dihole dia ntondo. Ɛlɔ kɛnɛ lo kɛnɛ kendana la diwala, Ɔtɛkɛta wa Nzambi tetemalaka tosha ɛlɔmbwɛlɔ koleki dimɛna lo kɛnɛ kendana la woho w’olonganyi wahombaso nsɔna ndo woho wa monga omi kana wadi l’ɔlɔlɔ. (2 Kɔrɛtɔ 6:14, 15; Ɛfɛsɔ 5:28-33) Tayosala kɛnɛ kele ɔlɔlɔ naka sho ndjela  ɛnyɛlɔ kaki Rɛbɛka ndo nyanga dia nsala kɛnɛ katɔlɔmba Nzambi.

Nkumbo kaki Bɛtuɛlɛ kakatshɔkɔla Rɛbɛka ɔnawɔ la ngandji. Oma laasɔ Rɛbɛka nde la Dɛbɔra ɔnɛ lakawawosha oko okimanyedi ndo ekambi ɛmɔtshi wa wamato wakatshu kaamɛ la Eliɛzɛrɛ ndo anto ande. (Etatelu 24:59-61; 35:8) La ntondo ka laasɔ, Harana aki etale la wɔ. Lɔkɛndɔ laki otale efula, kilɔmɛtrɛ oko 800 ndo wakahombe mbɔsa ondo mingu shato. Ɔsɔ komonga yana ya lɔkɛndɔ. Rɛbɛka akɛnyi kamɛlɔ lo lɔsɛnɔ lande koko hatokoke mfɔnya dia nde aki ombahemi wa kamɛlɔ wa manamana. Bible mbutaka dia ase nkumbo kande waki alami w’ɛkɔkɔ, koko vɔ komonga amundji w’okanda wakatakotolaka pusupusu lo kamɛlɔ. (Etatelu 29:10) Wanɛ wakeke woho wa mbahema kamɛlɔ mbala efula mongaka la ɔlɛmbɛlɔ kaanga l’ɔkɔngɔ wa vɔ mbahema yema tshitshɛ.

Aha la taamu, yimba yaki Rɛbɛka yaki paka lo kɛnɛ kaki la ntondo kande ndo nde akalangaka mbekakɛnɛ tshɛ kakandakoke mbeka oma le Eliɛzɛrɛ lo dikambo dia Isaka ndo nkumbo kande. Ohɔsa dia wɛ ekɔ lo mɛna pami k’opalanga atɛkɛta la Rɛbɛka la dikɔlɔ, awotɛ alaka waki Jehowa otsha le Abrahama y’ɔngɛnyi Ande. Nzambi akahombe ntondja kanula yakahombe mbela ɛtshɔkɔ le anto wa lo andja w’otondo oma lo ɔlɔndji wa lo nkumbo kaki Abrahama. Ohokanyiya diambo diakalole l’otema waki Rɛbɛka etena kakandeye dia daka diaki Jehowa diayokotshama oma lo tshimbo yaki Isaka y’omɛnde hita, ndo oma lo tshimbo yande.​—Etatelu 22:15-18.

L’edjedja ka wonya, lushi lakatatɛkɛtshi lo etatelo ka sawo nɛ lakakoke. Etena kakatetaka pusupusu lo lɛkɛ la Nɛngɛbɛ, ndo etena kakatatɛ wonya mbidja lo ɛtshi ka kɛtɛ kɛsɔ, Rɛbɛka akɛnyi pami kɛmɔtshi ayakɛndakɛnda lo dikambɔ. Nde akawende tɛɛ. Sho mbadiaka ɔnɛ ‘nde akaholɔ esadi esadi oma lo kamɛlɔ,’ ondo aha la nkonga kaanga dia nyama nkita lo nkɛtɛ, ko nde akambola ate: ‘Pami kakɔna kayaye dia ndjohomana la so kengo?’ Etena kakandeye dia aki Isaka, nde akayafɛ dihɔndɔ lo ɔtɛ. (Etatelu 24:62-65) Lande na? Ɔsɔ aki djembetelo ya mɛnya dilɛmiɛlɔ otsha le ɔnɛ lakahombe monga omɛnde. Yoho ya dilɛmiɛlɔ shɔ koka mbɔsama nshi nyɛ oko yambeta loowe. Koko lo mɛtɛ, apami ndo wamato koka nkondja wetshelo oma lo okitshakitsha waki Rɛbɛka, nɛ dia onto akɔna l’etei aso lahalange monga la dionga dia dimɛna dia ngasɔ?

Isaka, pami kaki la ɛnɔnyi suke la 40, akatetemala monga la kandji l’ɔtɛ wakandavusha Sara ya nyango ɔnɛ lakavu ambeta suke la ɛnɔnyi esato lo etena kɛsɔ. Sho koka mfɔnya dia ondo Isaka aki la wasaso ndo akokanaka kɛtshi. Ande diɛsɛ diaki la pami kɛsɔ dia nkondja wadi lakakambaka olimu efula, lakalongɔnaka ndo laki la okitshakitsha lee! Ngande wakawakomɛ vɔ akɔ ahende? Bible mbutaka ɔnɛ: ‘Isaka akoolange efula.’​—Etatelu 24:67; 26:8.

Kaanga lo dikambo diaso, ntambe oko 39 l’ɔkɔngɔ, ekɔ dui dia wɔdu dia mboka Rɛbɛka ngandji. Ngande wakokaso nkimanyiya koko ndo ngɛnangɛna oma lo dihonga diande, woho wakinde la wolo, lokaho lande ndo okitshakitsha ande? Sho tshɛ, mbuta ate, akɛnda la epalanga, apami la wamato, atshukanyi ndo enyemba, tosale la wolo dia mbokoya mbetawɔ kande.