LUZIA EKƆ LO TƐNGUNA LO LOKOLO LANDE LA LƆMƆSƆ. Lam’akinde dikɛnda, nde akoke hemɔ ka muyɛkɛ, mbuta ate hemɔ ka wolo kasambemɛ ndo kalanya demba. Etena kakandakotsha ɛnɔnyi 16, womoto ɔmɔtshi lele Luzia akookambɛka olimu akawotɛ ate: “Nzambi kambokosha dilanya lo kotatsha hemɔ ka muyɛkɛ l’ɔtɛ wakiyɛ l’ohendodi ndo wakiyɛ kɔnɛnyaka nyɔ.” L’ɔkɔngɔ w’ɛnɔnyi efula, Luzia aakatetemala mbohɔ woho wakawosha dui sɔ paa.

LAM’AKEYE DAMARIS DIA NDE AKI LA KANSƐRƐ KA LO WƆƆNGƆ, papa kande akawombola ɔnɛ: “Kakɔna kakayasale kambokokomɛ dui dia nganɛ? Weho akɔ tshɛ wɛ akasale dui dimɔtshi dia kɔlɔ efula. Diakɔ diambokosha Nzambi dilanya nɛ.” Damaris akayakiyanya efula oma lo kɛnɛ kakawawotɛ kɛsɔ.

Anto wokɔfɔnyaka l’edja k’ɛnɔnyi nunu dia hemɔ kekɔ dilanya di’oma le Nzambi. Dibuku dimɔtshi (Manners and Customs of Bible Lands) mbutaka dia anto efula wa lo nshi ya Kristo wakafɔnyaka dia “hemɔ kakayaka oma lo pɛkato kakasalaka onto laki la hemɔ, kana ose nkumbo, diakɔ diakawotomɛka dilanya l’ɔtɛ wa pɛkato kakɔ.” Lo Moyen Âge, dibuku dimɔtshi (Medieval Medicine and the Plague) mbutaka dia “anto wakafɔnyaka dia Nzambi mbelaka mpokoso dia mbisha anto dilanya l’ɔtɛ wa pɛkato yawɔ.” Ko etena kakavu miliyɔ y’anto l’Erɔpɛ lo ntambe ka 14, onde Nzambi mbakela elombwelo kande dia ndanya akanga wa kɔlɔ? Ko kana mpokoso kɛsɔ kakaye tsho oma lo mikrɔbɛ ɔmɔtshi, lo ndjela eyangelo wakasale aseka enganga? Anto amɔtshi mbeyaka ndjambola ɔnɛ, onde Nzambi mɛtɛ kambaka la hemɔ dia nsoya anto l’ɔtɛ wa pɛkato yawɔ? *

OHOKANYIYA DUI NƐ: Lande na kakakɔnɔla Yeso wanɛ waki la hemɔ naka hemɔ ndo asui waki dilanya di’oma le Nzambi? Shi dui sɔ diotodinyadinya losembwe ndo ɔlɔlɔ wa Nzambi? (Mateo 4:23, 24) Yeso takandakoke pondjo nshimba ɛlɔlɔ wa Nzambi. Nde akate ate: “Dimi tosalaka nshi tshɛ kɛnɛ kawɔngɛnyangɛnya” ndo ɔnɛ, “oko wakambidjangɛ Papa dia nsala mbasalami.”​—Joani 8:29; 14:31.

Bible mɛnyaka hwe. Jehowa Nzambi ‘keema pondjo la wɛngɛngɛ.’ (Eohwelo k’Ɛlɛmbɛ 32:4) Ɛnyɛlɔ, Nzambi hakoke monga pondjo lo kiɔkɔ y’olanelo w’aviyɔ wadiaka nkama y’anto waha l’onongo, l’ɔtɛ walangande ndjaka paka onto ɔtɔi oto la lo aviyɔ akɔ! Woho akɔ waamɛ mbele lo ndjela losembwe laki Nzambi, Abrahama, okambi waki Nzambi wa kɔlamelo, akate dia Nzambi ‘halanyaki pondjo anto w’ɛlɔlɔ kaamɛ l’anto wa kɔlɔ.’ Nde akate dia dui sɔ ‘hakoke fɔnyama.’ (Etatelo 18:23, 25) Bible mbutaka nto dia “Nzambi . . . bu la kanyi ya nsala akambo lo yoho ya kɔlɔ”; ndo ɔnɛ nde ‘hasale kɔlɔ.’​—Jɔbɔ 34:10-12.

Asui wahomana la so bu dilanya di’oma le Nzambi l’ɔtɛ wa pɛkato kɛmɔtshi shikaa. Yeso ndamɛ akɛnya dui sɔ hwe etena kakandɛnyi nde la ambeki ande pami kɛmɔtshi kakotɔ tshungu. “Ambeki ande wakawombola vate: ‘Rabi, akasale pɛkato dia nde mbotɔ tshungu, onde ndamɛ kana ambutshi ande?’ Yeso akaakadimola ate: ‘Aha pami kɛnɛ kana ambutshi ande mbakasale pɛkato, koko nde ekɔ tshungu dia etsha waki Nzambi mɛnama lo sɛkɛ lo dikambo diande.’”​—Joani 9:1-3.

Lo menda tokanyi ta kɔlɔ takekɔnɛ, ambeki wa Yeso wakahombe mamba etena kakandawatɛ dia oyadi pami kakɔ kana ambutshi ande ndooko onto lakasale pɛkato kamboyokonya dia monga la hemɔ kɛsɔ. Yeso kɔkɔnɔla tsho pami ka tshungu kɛsɔ, koko lo nsala ngasɔ nde akanya tokanyi ta kɔlɔ tɛnya dia asui wekɔ dilanya di’oma le Nzambi. (Joani 9:6, 7) Wanɛ  wasowa la hemɔ ya wolo ɛlɔ kɛnɛ koka nkondja esambelo lo mbeya dia Nzambi keema lo kiɔkɔ ya asui awɔ.

Afundelo toshikikɛka

• “Nzambi hakoke pembama l’akambo wa kɔlɔ ndo nde hahembe ndooko onto.” (JAKƆBA 1:13) Lo mɛtɛ, “[akambo] wa kɔlɔ” wambɛnya anto paa l’edja ka ntambe efula, mbidja ndo hemɔ, kandji ndo nyɔi, wayanga nshila keem’edja.

• Yeso Kristo “akakɔnɔla wanɛ tshɛ waki la hemɔ.” (MATEO 8:16) Lo nkɔnɔla anto tshɛ wakayaka oya le nde, Ɔna Nzambi akɛnya kɛnɛ kayosala Diolelo diaki Nzambi l’andja w’otondo.

• “Nde [Nzambi] ayokitola asɔyi tshɛ oma lo washo awɔ, nyɔi hatoyala nto, otanda hatoyala nto, delo hatoyala nto, kaanga kandji hatoyala nto. Akambo wa ntondo wamboshila.”​—ƐNYƐLƆ 21:3-5.

Ko laasɔ, lande na kɛna anto paa ndo kasowawɔ efula? Anto wokoyambolaka dimbola sɔ l’edja ka ntambe efula. Naka Nzambi bu lo kiɔkɔ y’asui aso tshɛ, ko onto akɔna lele lo kiɔkɔ? Ekadimwelo lo ambola asɔ wayɔsɛdingɔma lo sawo diayela.