ETENA KATOMBA MPOKOSO, ONDE WƐ TOYAMBOLAKA ƆNƐ: ‘NZAMBI LENDE AKINDE?’ KO KANA LO LƆSƐNƆ LAYƐ HITA, ONDE DUI DIMƆ DIAKOTSHINDJA WƆƆNGƆ DIAKAKOKONYA DIA NDJAMBOLA DIA KANA NZAMBI NDJAKIYANYAKA DIKAMBO DIAYƐ?

Ondo wɛ ekɔ lo ndjaoka oko woho wakayaoke Sheila ladjasɛ l’États-Unis. Nde akodiama lo nkumbo kayasha l’awui w’ɔtɛmwɛlɔ, nde mbutaka ate: “Ntatɛ oma ko dikɛnda diami, lakakutɔma le Nzambi dikambo nde kele Otungi aso. Koko, dimi kondjaokaka dia laki ma ma la nde. Lakafɔnyaka dia nde ekɔ lo mendami, koko paka oma lo tshalola. Dimi kondjaokaka dia Nzambi ekɔ lo petshami, koko dimi kɔfɔnyaka dia nde ndjakiyanyaka dikambo diami.” Lande na kaki Sheila la taamu ɔnɛ Nzambi hawoke ngandji? Nde mbutaka ate: “Nkumbo kami kakahomana la mpokoso ombikɔ kokɔ, ndo akɛnama dia Nzambi kotokimanyiyaka kaanga yema.”

L’ɛnyɛlɔ ka Sheila, ondo wɛ koka ndjaoka dia Nzambi Kanga-Wolo-Tshɛ mɛtɛ ekɔ. Koko wɛ koka ndjambola dia kana nde mɛtɛ ndjakiyanyaka dikambo diayɛ. Jɔbɔ pami ka kɔlamelo kaki la mbetawɔ lo wolo ndo lomba laki Otungi, nde la wɔ aki la taamu ta woho akɔ waamɛ. (Jɔbɔ 2:3; 9:4) L’ɔkɔngɔ wa Jɔbɔ mɛna shila kodje la mpokoso, mbuta ate aha monga la elongamelo k’ekimanyielo, nde akambola Nzambi ate: “Lande na kashɛyɛ elungi kayɛ ndo kambɔsayɛ oko otunyi ayɛ?”​—Jɔbɔ 13:24.

Kakɔna kata Bible? Onde Nzambi mbele l’onongo etena katomba mpokoso? Onde ekɔ tolembetelo tɛnya dia Nzambi ndjakiyanya dikambo di’anto lo tshɛ kawɔ ndo dikambo di’ɔmɔmɔ la l’atei aso l’onto ndo l’onto? Lo wedi aso, onde ɔmɔmɔ la l’atei aso koka mbeya dia kana Nzambi todjaka yimba, teyaka, ndjadjaka lo dihole diaso kana onde nde tokimanyiyaka l’ekakatanu aso?

Lo asawo wayela, tayɔsɛdingola kɛnɛ katetsha etongelo lo woho wayakiyanya Nzambi lo dikambo diaso. (Rɔmɔ 1:20) Oma laasɔ, tayoyɔsɛdingola kɛnɛ katotɛ Bible lo woho wayakiyanya Nzambi. Etena tshɛ kayoyotalekaka ‘mbeeya’ oma lo tshimbo ya etongelo ndo Ɔtɛkɛta ande, mbayoyotalekaka monga l’eshikikelo dia nde ‘ndjakiyanyaka dikambo diayɛ.’​—1 Joani 2:3; 1 Petero 5:7.