Naka asui hawoye oma le Nzambi, lande na kele wola wahɛnɛ pe, ata wadiaka anto, hemɔ yatshika anto la dikɔmɔ ndo mpokoso y’oma lo diangɔ diakatongama? Ɔtɛkɛta wa Nzambi, mbuta ate Bible, tɛnyaka awui asato wa weke wele lo kiɔkɔ ya asui w’anto:

1. Lokaki ndo lohetsho. ‘Onto mbolɛka wonyande onto dia mbosalɛ kɔlɔ.’ (Ondaki 8:9) Mbala efula anto sowaka l’ɔtɛ wele anto wele keema kokele, wa lokaki, kana wa ngala wekɔ lo mbasalɛ akambo aha la losembwe.

2. Tena ndo awui wasalema aha la kongɛma la ntondo. Anto sowaka mbala efula “nɛ dia tena ndo awui wa shashimoya mbakomɛka vɔ tshɛ.” (Ondaki 9:11) Mbuta ate, etena konga anto lo dihole dia kɔlɔ l’etena ka kɔlɔ, aksida salemaka, kana anto minyaka yimba l’awui amɔtshi kana salaka dindja.

3. Ɔnɔmbɔdi wa kɔlɔ wa andja ɔnɛ. Bible mɛnyaka hwe ɔnɛ lele ntondotondo lo kiɔkɔ y’asui w’anto. Tɔ mbutaka ɔnɛ: “Andja w’otondo wekɔ lo nɔmbɔma oma le kanga kɔlɔ.” (1 Joani 5:19) “Kanga kɔlɔ” ele Satana Diabolo, etongami kɛmɔ ka lo nyuma kele la wolo kaki ntondotondo ondjelo waki Nzambi, koko “nde koshikikala lo mɛtɛ.” (Joani 8:44) Ditongami dikina dia lo nyuma diakɔtɔ l’ɔnɔngɔ waki Satana ndo wakatɔmbɔkwɛ Nzambi l’oyango wa vɔ nkotsha eyango awɔ wa lokaki, diakɔ diakawayakonya vɔamɛ ɛdiɛngɛ. (Etatelo 6:1-5) Tatɛ lam’akawatɔmbɔkɔ, Satana la ɛdiɛngɛ ande wakonge la shɛngiya ya wolo ndo ya kɔlɔ y’awui weta l’andja ɔnɛ. Shɛngiya shɔ yamboleka nkita dikuma lo nshi yaso nyɛ. Nshi nyɛ, Diabolo ekɔ la nkɛlɛ k’efula ndo ‘ekɔ lo minganyiya nkɛtɛ k’otondo,’ etombelo wambonga la dui sɔ ele ‘mananu kekɔ la nkɛtɛ.’ (Ɛnyɛlɔ 12:9, 12) Lo mɛtɛ, Satana ekɔ kanga ngala k’efula. Nde ngɛnangɛnaka etena kasowa anto. Satana mbele lo kiɔkɔ y’asui w’anto koko aha Nzambi.

OHOKANYIYA DUI NƐ: Paka ɔnɛ laha bu l’otema w’ɔlɔlɔ, mbuta ate Diabolo lele kanga kɔlɔ mbele lo kiɔkɔ y’asui w’anto waha la onongo. Koko, Bible mbutaka ɔnɛ: “Nzambi ekɔ ngandji.” (1 Joani 4:8) Lo ndjela kɛnɛ kɔtɔnɛ la lonto lakinde la ngandji, “Nzambi ka mɛtɛ bu la kanyi ya nsala akambo lo yoho ya kɔlɔ, Kanga-Wolo-Tshɛ bu la kanyi ya nsala kɔlɔ!”​—Jɔbɔ 34:10.

Ɔnkɔnɛ, wɛ koka ndjambola dimbola nɛ ɔnɛ: ‘Edja ka ngande kele Nzambi Kanga-Wolo-Tshɛ ayotshikaka Satana dia nde ntetemala nɔmbɔla lo yoho ya kɔlɔ?’ Oko wakatɛnyi, Nzambi petshaka akambo wa kɔlɔ ndo asui aso mboshaka paa k’efula. Laadiko dia laasɔ, Ɔtɛkɛta ande mbutaka ɔnɛ: “Nyokitsha ekiyanu anyu tshɛ le nde, nɛ dia nde ndjakiyanyaka dikambo dianyu.” (1 Petero 5:7) Nzambi tokaka ngandji ndo nde ekɔ la wolo wa minya asui ndo awui wa wɛngiya tshɛ, ndo kɛsɔ kayolembetshiyama lo sawo diayela. *