DIENDJA DIA TƆƆTƆ: Amɔtshi mbetawɔka dia woho wakongɛma tɔɔtɔ etena kotɔ onto mbashikikɛ nshi yayaye y’onto akɔ. Amɔtshi tshɔka le ambeyi wa tɔɔtɔ kana salaka diendja dia tɔɔtɔ, dia mbeya kɛnɛ kayowakomɛ lo nshi yayaye ndo oma laasɔ, ko vɔ mbewɔ waale kana ntana yoho mɔtshi ya ntondoya.

FENG SHUI: Akina mbetawɔka dia naka vɔ mbika mvudu yawɔ lo yoho mɔtshi, kete dui sɔ diayowakimanyiya dia vɔ monga l’ɔngɛnɔngɛnɔ. Lo Wing, * ladjasɛ la Hong Kong mbutaka ate: “Manyi mɔtshi ya feng shui akambutɛ dia naka dimi nkitsha lowolo lɔmɔtshi la laande la pɛsɔ pɛsɔ lo dihole dimɔtshi shikaa lo makashinyi ami, dui sɔ diayokimanyiya dia nkondja falanga efula.”

ƆTƐMWƐLƆ W’ASHIDI: Amɔtshi fɔnyaka dia vɔ pombaka ntɛmɔla watshɛwɔ wakavu kana tozambizambi totshikitanyi dia vɔ nkondja ekokelo ndo tshɔkwama. Van ladjasɛ la Vietnam mbutaka ɔnɛ, “Iakafɔnyaka dia naka dimi ntɛmɔla watshɛmi wakavu, kete layonga la lɔsɛnɔ la dimɛna nshi nyɛ ndo layonga la nshi yayaye y’amɛna dimi l’anami.”

LOOTƆ LOKINA: Anto efula fɔnyaka dia etena kavɔ onto, nde nyomototɔka nto ndo dui sɔ salemaka mbala la mbala. Vɔ mbetawɔka dia awui w’ɛlɔlɔ ndo wa kɔlɔ wahomana la wɔ l’etena kɛnɛ, ekɔ etombelo w’awui wakawasale lo lɔsɛnɔ lakete.

Kaanga mbata anto efula dia hawetawɔ awui asɔ, vɔ tetemalaka ndjasha l’awui wele oko diendja dia l’anya, diendja dia tɔɔtɔ ndo vɔ tshɔka le waa wetshi. Vɔ fɔnyaka ɔnɛ ondo vɔ koka nkondja diɛsɛ dia mbekelo shɔ mbakimanyiya dia vɔ mbeya nshi yawɔ yayaye.

Onde wanɛ wayaɛkɛ lo waetawɔ ndo mbekelo shɔ, wambotana lɔsɛnɔ la dimɛna ndo nshi yayaye y’amɛna?

Tɔsɛdingole kɛnɛ kakakomɛ Hào, ladjasɛ la Vietnam. Nde akayashaka lo diendja dia tɔɔtɔ, lo feng shui ndo akayashaka l’ɔtɛmwɛlɔ w’ashidi dia mbɔlɔmbɔla. Onde nde akatondoya? Hào mbutaka ɔnɛ, “lakashisha falanga efula, lakɔtɔ abasa, lakahomana l’ekakatanu lo nkumbo kami ndo laki l’ɔkɔmwɛlɔ.”

Qiuming oma la Taïwan, nde lawɔ akayashaka lo diendja dia tɔɔtɔ, aketawɔka di’awui wakakongɛma la ntondo, akayashaka lo feng shui ndo l’ɔtɛmwɛlɔ w’ashidi. L’ɔkɔngɔ wa nde nsɛdingola la yambalo tshɛ waetawɔ asɔ, nde mbutaka ɔnɛ: “Lakashihodia dia wetshelo ndo mbekelo shɔ hayɔtɔnɛ lam’asayɔ ndo mbidjaka anto l’okandokando. Lakayoshola dia kɛnɛ kata ambeyi wa tɔɔtɔ hatongaka mɛtɛ. Lo kɛnɛ kendana la lootɔ lokina, naka wɛ hayohɔ kɛnɛ kakayasale lo lɔsɛnɔ lakete, ngande wakokayɛ ntshikitana ndo nsala kɛnɛ kele ɔlɔlɔ otsha la ntondo lo lɔsɛnɔ layɛ?”

L’ɛnyɛlɔ ka Hào, Qiuming ndo anto akina efula, wakayoshihodia dia nshi yaso yayaye halemanɛ tsho lo ntshɔ le wetshi, mbetawɔ ɔnɛ awui wakakongɛma la ntondo, nsala diendja dia tɔɔtɔ, ndjasha l’ɔtɛmwɛlɔ w’ashidi kana mbetawɔ dia lootɔ lokina lekɔ. Onde kɛsɔ nangaka nembetshiya ɔnɛ sho hatokoke ndowanya nshi yaso yayaye?

Anto efula fɔnyaka dia yoho yoleki dimɛna ya ndjaombɛ nshi yayaye y’amɛna ele mbɔtɔ kalasa efula ndo monga l’ɔngɔnyi. Etombelo akɔna wambonga le anto amɔtshi wakasale ɛsɔnwɛlɔ ɛsɔ?