Wɛ koka nsɔna woho wakoka monga nshi yayɛ yayaye
Aya oko ɛnɔnyi 3 500 wambeta, Jehowa Nzambi akatɛ wanɛ wakɔtɛmɔlaka kɛnɛ kakawahombaka nsala dia monga la nshi yayaye y’amɛna: “Lambokitsha lɔsɛnɔ la nyɔi ndo ɔtshɔkɔ la mananu la ntondo kanyu. Nyu pombaka nsɔna lɔsɛnɔ dia nyu ntshikala la lɔsɛnɔ nyu la tokanula tanyu.”—Eohwelo k’Ɛlɛmbɛ 30:19.
Dia monga la nshi yayaye y’amɛna, anto asɔ wakahombe nsala ɛsɔnwɛlɔ w’amɛna. Sho lawɔ salaka ɛsɔnwɛlɔ akɔ waamɛ ɛlɔ kɛnɛ. Bible nembetshiyaka woho wakokaso nsala ɛsɔnwɛlɔ wayotokimanyiya dia monga la nshi yayaye y’amɛna: “Lo nanga Jehowa Nzambi kanyu, lo mpokamɛ dui diande.”—Eohwelo k’Ɛlɛmbɛ 30:20.
NGANDE WAKOKASO NANGA JEHOWA NDO MPOKAMƐ DUI DIANDE?
EKA AWUI OMA LO BIBLE: Dia nanga Jehowa, ntondotondo wɛ pombaka mbeka awui wendana la nde oma lo Bible. Etena kayoyosala dui sɔ, wɛ ayoshola dia nde ekɔ Nzambi ka ngandji lakombola kɛnɛ koleki dimɛna le yɛ. Nde kɔlɔmbaka dia wɛ mbɔlɔmba “nɛ dia nde ndjakiyanyaka lo dikambo diayɛ.” (1 Petero 5:7) Bible ndakaka dia naka nyu mbidja welo dia ndjasukanya la nde, kete nde “ayoyasukanya la nyu.”—Jakɔba 4:8.
KAMBA LA KƐNƐ KEKAYƐ: Mpokamɛ Nzambi nembetshiyaka ndjela ɛlɔmbwɛlɔ kande katanema lo Bible. Naka wɛ nsala ngasɔ, kete wɛ “[a]yotondoya mboka kayɛ ndo [a]yoyosala akambo la lomba.”—Jashua 1:8.