Wɛdikelo woleki dimɛna wakokayɛ nsala

MPOKAMƐ LO

ONDE WƐ ndjaɔsaka oko Okristo? Naka ngasɔ, kete wɛ ekɔ l’atei wa miliyɔ ndekana hiende y’anto wa la nkɛtɛ yele suke l’onto 1 l’anto 3 ndjataka ɔnɛ wekɔ ambeki wa Kristo. Ɛlɔ kɛnɛ, nunu di’anto wayata ɔnɛ Akristo mbewɔ, wambatɔna lo woho wewɔ la waetawɔ ndo la tokanyi totshikitanyi. Diakɔ diele, dietawɔ diayɛ mbeyaka ntshikitana efula la waetawɔ w’anto akina wayata ɔnɛ Akristo mbewɔ. Onde dui sɔ mendanaka mɛtɛ la kɛnɛ ketawɔyɛ? Eelo, ekɔ ngasɔ, naka wɛ nangaka nkamba la kɛnɛ ketsha Lokristo la mɛtɛ kotumbi oma lo Bible.

Ambeki wa ntondo wa Yeso Kristo wakayokomaka lo mbelamɛ ‘Akristo.’ (Etsha 11:26) Komonga ohomba wa vɔ monga la nkombo kina dia mbaeya nɛ dia vɔ wakikɔ paka la dietawɔ di’Akristo. Akristo wele kaamɛ ndjelaka wetshelo ndo atɔndɔ waki Yeso Kristo watanema lo Lokristo la mɛtɛ. Kakɔna kayotota dia ɔtɛmwɛlɔ anyu? Onde wɛ mbetawɔka dia wetshelo wa lɔkɔ wekɔ wetshelo waketshaka Kristo ndo kɛsɔ mbaketawɔka ambeki wa Kristo wa lo nshi ya ntondo? Ngande wakokayɛ mbeya kɛnɛ kele mɛtɛ? Yoho tshɔi ya mbeya dia awui asɔ wekɔ mɛtɛ ele lo nkamba la Bible.

Tɔsɛdingole dui nɛ: Yeso Kristo akalɛmiyaka Afundelo efula oko wewɔ Ɔtɛkɛta wa Nzambi. Nde kombetawɔ pondjo wanɛ waketawɔka wetshelo wa lo Bible lo mbetsha mbekelo y’ashidi y’ana w’anto lo dihole dia ntondo. (Makɔ 7:9-13) Sho kokaka nkomiya lo mbuta la eshikikelo tshɛ ɔnɛ dietawɔ di’ambeki wa mɛtɛ wa Yeso diakahombe pikama lo Bible. Diakɔ diele oseka Kristo tshɛ pombaka ndjambola ɔnɛ: ‘Onde wetshelo wa l’ɔtɛmwɛlɔ ami mbɔtɔnɛka la Bible?’ Dia nkondja okadimwelo lo dimbola sɔ, lande na kahayɛdika kɛnɛ ketsha ɔtɛmwɛlɔ ayɛ la kɛnɛ kata Bible ɛlɔ kɛnɛ?

Yeso akate dia ɔtɛmwɛlɔ aso le Nzambi pombaka pikama lo mɛtɛ, mbuta ate mɛtɛ katanema lo Bible. (Joani 4:24; 17:17) Ndo ɔpɔstɔlɔ Pɔɔlɔ akate dia panda kaso nemanɛka lo woho wambotokoma lo ‘ewo k’oshika k’akambo wa mɛtɛ.’ (1 Timɔte 2:4) Diakɔ diele, ekɔ ohomba efula dia dietawɔ diaso mbika etshina lo akambo wa mɛtɛ wa lo Bible. Lande na kele panda kaso kekɔ lo waale?

WOHO WAKOKASO MBƐDIKA DIETAWƆ DIASO LA BIBLE

Tambokɔlɔmba dia wɛ mbadia ambola asamalo ndo mfunda ekadimwelo washa Bible lo ambola akɔ. Enda avɛsa woshilami lo Bible ndo ntana ekadimwelo. Kele yambola wate: ‘Onde wetshelo wa lo ɔtɛmwɛlɔ ami mbɔtɔnɛka la kɛnɛ ketsha Bible?’

Dimbola dia mondo sɔ diayokokimanyiya dia wɛ nyomoleka nsala wɛdikelo wa dimɛna efula weyɛ atasalaka. Onde wɛ ekɔ suke dia mbɛdika wetshelo ekina wa l’ɔtɛmwɛlɔ ayɛ la kɛnɛ ketsha Bible? Ɛmɛnyi wa Jehowa wayonga l’ɔngɛnɔngɛnɔ dia kokimanyiya dia wɛ nsɛdingola dimɛna dimɛna akambo wa mɛtɛ wa lo Bible. Lande na keyɛ hambola Ɔmɛnyi wa Jehowa ɔmɔtshi dia wɛ mbeka la nde Bible ofele? Wɛ kokaka mbɔtɔ lo sitɛ kaso k’Ɛtɛrnɛtɛ ka jw.org.

1 DIMBOLA: Ele Nzambi?

OKADIMWELO: Jehowa, She Yeso, mbele Nzambi ka pondjo ndo kanga wolo Ɔnɛ lakatonge diangɔ tshɛ.

KƐNƐ KATA BIBLE:

‘Nshi tshɛ sho mbishaka Nzambi, She Nkumɛso Yeso Kristo losaka etena kalɔmbaso dikambo dianyu.’—Kɔlɔsayi 1:3.

‘Wɛ Jehowa Nzambi kaso, wɛ kasungana nongola lotombo, kɛnɛmɔ ndo wolo, nɛ dia wɛ kakatonge diangɔ tshɛ, ndo oma lo lolango layɛ mbakadionge ndo mbakadiatongama.’—Ɛnyɛlɔ 4:11.

Enda nto lo Rɔmɔ 10:13; 1 Timɔte 1:17.

2 DIMBOLA: Ele Yeso Kristo?

OKADIMWELO: Yeso ekɔ Ɔna Nzambi l’enondo. Yeso akatongama ndo nde ekɔ la etatelo. Yeso nɛmbɛka Nzambi ndo nde mbokitanyiyaka lo nsala lolango Lande.

KƐNƐ KATA BIBLE:

‘Papa ndekami’—Joani 14:28.

‘[Yeso] ekɔ efanelo ka Nzambi kahɛnama, enondo wa diangɔ tshɛ diakatongama.’—Kɔlɔsayi 1:15.

Enda nto lo Mateo 26:39; 1 Kɔrɛtɔ 15:28.

3 DIMBOLA: Nyuma k’ekila kɛdikɛdi na?

OKADIMWELO: Nyuma k’ekila ekɔ wolo wakamba la Nzambi dia nkotsha lolanga lande. Nyuma k’ekila keema onto. Anto koka ndodiama la nyuma k’ekila ndo monga la wolo diɛsɛ la tɔ.

KƐNƐ KATA BIBLE:

‘Lam’akoke Elizabɛtɛ mɔyɔ waki Mariya, ɔna laki l’otema ande akakunyɔkunyɔ ndo Elizabɛtɛ akalodiama la nyuma k’ekila.’—Luka 1:41.

‘Nyu nyayolongola wolo lam’ayoya nyuma k’ekila le nyu.’—Etsha 1:8.

Enda nto lo Etatelo 1:2; Etsha 2:1-4; 10:38.

4 DIMBOLA: Diolelo diaki Nzambi kɛdikɛdi na?

OKADIMWELO: Diolelo diaki Nzambi diekɔ lowandji la l’olongo. Yeso kele Nkumekana ka Diolelo diaki Nzambi. Keem’edja Diolelo sɔ diayosala dia lolango laki Nzambi salema lo nkɛtɛ k’otondo.

KƐNƐ KATA BIBLE:

‘Ondjelo wa 7 akade dimama diande. Ko awui wa wolo wakokɛma l’olongo, wata vate: “Diolelo dia l’andja ɔnɛ diaya Diolelo dia Nkumɛso ndo dia Kristo kande ndo nde ayongaka nkumekanga pondjo pondjo.”’—Ɛnyɛlɔ 11:15.

Enda nto lo Danyɛlɛ 2:44; Mateo 6:9, 10.

5 DIMBOLA: Onde anto w’ɛlɔlɔ tshɛ wayodɛ l’olongo?

OKADIMWELO: Ndooko. Paka djui ya tshitshɛ y’anto wa kɔlamelo welamɛ ɔnɛ ‘leemba la tshitshɛ l’ɛkɔkɔ’ wakasɔnama oma le Nzambi mbayodɛ l’olongo. Vɔ wayolɛ kaamɛ la Yeso oko nkumi ya dikanga dia nɔmbɔla anto wa l’andja w’otondo.

KƐNƐ KATA BIBLE:

‘Tanyokake wɔma, nyu leemba la tshitshɛ l’ɛkɔkɔ, nɛ dia Shɛnyu aketawɔ nyosha Diolelo.’—Luka 12:32.

‘Vɔ wayoyala ɛlɔmbɛdi waki Nzambi ndo waki Kristo, ndo vɔ wayolɛ kaamɛ la nde oko nkumi ya dikanga.’—Ɛnyɛlɔ 20:6.

Enda nto lo Ɛnyɛlɔ 14:1, 3.

6 DIMBOLA: Sangwelo diakɔna diele la Nzambi lo dikambo dia nkɛtɛ ndo di’anto tshɛ?

OKADIMWELO: L’ɛse ka Diolelo diaki Nzambi, nkɛtɛ kayokoma paradiso ndo anto wa kɔlamelo wayɔngɛnangɛna la yonge ya kokele, wɔladi wa pondjo ndo la lɔsɛnɔ laha la ekomelo.

KƐNƐ KATA BIBLE:

‘Akanga wa memakana wayokita nkɛtɛ, ndo vɔ wayɔngɛnangɛnaka heyama la wɔladi w’efula.’—Osambu 37:10, 11.

‘Nde ayokitola asɔyi tshɛ oma lo washo awɔ, nyɔi hatoyala nto, otanda hatoyala nto, delo hatoyala nto, kaanga kandji hatoyala nto. Akambo wa ntondo wamboshila.’—Ɛnyɛlɔ 21:3, 4.

Enda nto lo Osambu 37:29; 2 Petero 3:13.