Eelo, andjelo wa kɔlɔ wekɔ. Oma lende akawaye? Tohɔ dia Nzambi akatonge andjelo la lotshungɔ la nsɔna kɛnɛ kalangawɔ. Yema tshitshɛ l’ɔkɔngɔ wa pami ka ntondo la womoto la ntondo tongama, mbuta ate Adama la Eva, etongami kɛmɔtshi ka lo nyuma ka kokele akakambe lo yoho ya kɔlɔ la lotshungɔ lande la nsɔna ndo akɔtshiya ɔtɔmbɔkwɛlɔ la nkɛtɛ. Nde akatondoya lo nkonya Adama la Eva dia vɔ tɔmbɔkwɛ Nzambi. (Etatelo 3:1-7; Ɛnyɛlɔ 12:9) Bible hate shikaa lokombo la etongami ka lo nyuma kɛsɔ kana dihole diaki la nde l’olongo la ntondo ka nde ntɔmbɔkɔ. Koko l’ɔkɔngɔ w’ɔtɔmbɔkwɛlɔ ande, Bible akayowelɛka ɔnɛ Satana, kitshimudi ate “Ɔndɔshi” ndo Diabolo, kitshimudi ate “Omamanyishi.”​—Mateo 4:8-11.

Lonyangu ko, ɔtɔmbɔkwɛlɔ ɔsɔ kokomɛ lasɔ ato. Lo nshi ya Nɔa lofulo laheyama mbadia l’andjelo “wakatshike ahole awɔ hita wa mbidjasɛ” lo nkumbo ka l’olongo ka Nzambi. Vɔ wakaholɔ oya la nkɛtɛ ndo wakalɔtɛ alemba w’anto ndo wakawese kɛnɛ kele kɔlɔ ndo mboka ya mindo, lo nsala awui wahɔtɔnɛ l’oyango wakawatongama.​—Judɛ 6; Etatelo 6:1-4; 1 Petero 3:19, 20.

Kakɔna kakakomɛ andjelo wa kɔlɔ asɔ? Etena kakela Nzambi elola ka woke dia mbɛdia nkɛtɛ, vɔ wakakolola alemba awɔ w’anto ndo wakakalola l’olongo. Koko, Nzambi kombetawɔ dia andjelo wakatɔmbɔkɔ asɔ nkalola lo “ahole awɔ wa ntondo.” Lo dihole dia nde nsala ngasɔ, nde akawadje lo dihole dia “wodjima wa tshududu” dielamɛ ɔnɛ Tartara. (Judɛ 6; 2 Petero 2:4) Ɛdiɛngɛ ɛsɔ wakete lo wedi wa Satana Diabolo “owandji w’ɛdiɛngɛ,” ɔnɛ ‘layaetɛ oko ondjelo w’osase.’​—Mateo 12:24; 2 Kɔrɛtɔ 11:14.

Bible mbetshaka dia Diolelo diaki Nzambi diayɔlɔmbwama oma le Mɛsiya, mbuta ate lowandji la l’olongo, diakashikikɛma oma lo 1914. * Lo ndjela akambo wa diambo wakasalema lo etena kɛsɔ, Satana la ɛdiɛngɛ ande wakakashema oma l’olongo oya la nkɛtɛ lɛnɛ akawashimbama dia nsala awui amɔtshi. Awui wa kɔlɔ wakakite dikuma ndo awui wa mindo wakafulanɛ lo okama aso wa nkɛtɛ asɔ wekɔ djembetelo ya shɔmbɔya ndo shɛngiya yawɔ ya kɔlɔ.​—Ɛnyɛlɔ 12:9-12.

Koko, ohamelo w’awui wa mindo ndo wa ngala washa paa efula, shikikɛka dia ekomelo ka ɛlɔmbwɛlɔ kawɔ ka kɔlɔ kayasuke. Keema edja, shɛngiya ya kɔlɔ yele la ditongami dia lo nyuma sɔ yayanga nkomɛ. L’ɔkɔngɔ wa Diolelo diaki Nzambi mbolɛ, nkɛtɛ k’otondo kayokadimɔ paradiso l’edja ka ɛnɔnyi 1 000, ditongami dia lo nyuma dia kɔlɔ sɔ diayonga la etenyi ka mondo, mbuta ate diaaso di’ekomelo dia mpemba anto. Oma laasɔ, diɔ diayolanyema lo pondjo.​—Mateo 25:41; Ɛnyɛlɔ 20:1-3, 7-10.