Bible mɛnyaka ɔnɛ dia nkotsha lolango laki Nzambi, andjelo wakakokɛka atɛmɔdi wa mɛtɛ waki Nzambi lo tena dimɔtshi. (Osambo 34:7) Ɛnyɛlɔ:

• Etena kakalanya Jehowa osomba wa kɔlɔ wa Sɔdɔma la Ngɔmɔra, andjelo wakakimanyiya Lɔta laki onto ɔlɔlɔ la nkumbo kande dia vɔ ndawɔ.​—Etatelo 19:1, 15-26.

• Lo Babilɔna k’edjedja, etena kakawadjangɛ ɛlɔngɔlɔngɔ esato w’ase Hɛbɛru dilanya dia nyɔi lo nkuka ka dja, Nzambi ‘akatome ondjelo ande dia ndjotshungola ekambi ande.’​—Danyɛlɛ 3:19-28.

• L’ɔkɔngɔ wa Danyɛlɛ pami ka kɔlamelo mbetsha otsho w’otondo lo difuku dia ntambwɛ yaki la ndjala k’efula, nde akalembetshiya dia nde akahande nɛ dia ‘Nzambi akatome ondjelo ande ndo akadihe enyɔ wa ntambwɛ.’​—Danyɛlɛ 6:16, 22.

Lo tena dimɔtshi, andjelo wele akɛndji wa Nzambi wakekɛ lonya l’elimu wa etshumanelo k’Akristo ka lo ntambe ka ntondo etena kaki ohomba dia nkotsha sangwelo diaki Jehowa. Ɛnyɛlɔ:

• Ondjelo akadihola nkuke ya lokanu ndo akalɔmbɔla apɔstɔlɔ wanɛ wakadjama lo lokanu lɛkɔ dia totetemala la nsambisha lo tɛmpɛlɔ.​—Etsha 5:17-21.

• Ondjelo akalɔmbɔla Filipɛ laki osambisha dia nde ntshɔ l’oswe wa shɛnga waki oma la Jɛrusalɛma polo la Ngaza dia tosambisha ose Etiyɔpiya ɔmɔtshi lakatshu dia tɔtɛmɔla la Jɛrusalɛma.​—Etsha 8:26-33.

• Etena kakɔshi Nzambi yɛdikɔ ya oyadi wanɛ waki komonga ase Juda dia vɔ nkoma Akristo, ondjelo ɔmɔtshi akɛnama le Kɔnɛliyo laki owandji w’alembe w’ase Rɔmɔ lo ɛnɛlɔ ndo akawotɛ dia nde tohomana la ɔpɔstɔlɔ Petero lakande.​—Etsha 10:3-5.

• Etena kakadjama ɔpɔstɔlɔ Petero lo lokanu, ondjelo akɛnama le nde ndo akootondja oma lo lokanu.​—Etsha 12:1-11.

Ndooko djembetelo yɛnya dia Nzambi ekɔ lo nkamba la andjelo nshi nyɛ dia nkimanyiya ekambi ande lo yoho ya dihindo lo ndjela toho tatɛkɛtama lo Bible. Koko, lo kɛnɛ kendana la nshi yaso nyɛ, Yeso akate ate: “Lokumu l’ɔlɔlɔ lɔnɛ la Diolelo layosambishama lo nkɛtɛ k’otondo oko ɔmɛnyi le anto wa lo wedja tshɛ, ko oma laasɔ ekomelo kayoya.” (Mateo 24:14) Onde wɛ mbeyaka dia ambeki wa Kristo wekɔ lo nsala olimu ɔsɔ l’ɛlɔmbwɛlɔ ka andjelo?

Dibuku dia Ɛnyɛlɔ mɛnyaka dia andjelo wayoyasha l’etete dia nkimanyiya anto wa la nkɛtɛ k’otondo dia vɔ mbeka akambo wendana la Jehowa Nzambi ndo sangwelo diande lo dikambo di’anto. Ɔpɔstɔlɔ Joani akafunde ate: “Lakɛnyi ondjelo okina atafumbɔ l’atei w’olongo ndo nde aki la lokumu l’ɔlɔlɔ la pondjo lakandahombe mbewoya wanɛ wodjashi la nkɛtɛ, wedja tshɛ ndo waoho tshɛ ndo ɛtɛkɛta tshɛ ndo weho w’anto tshɛ. Nde akate la dui dia wolo ate: ‘Nyoke Nzambi wɔma ndo nyootombole, nɛ dia wonya wa kilombo k’oma le nde wambokoka. Nyɔtɛmɔlɛ Ɔnɛ lakatonge olongo la nkɛtɛ la ndjale ndo tɔkɔkɔ t’ashi.’” (Ɛnyɛlɔ 14:6, 7) Bɛnyɛlɔ efula dia nshi nyɛ diekɔ tolembetelo tɛnya ɔnɛ andjelo wekɔ lo nsukɛ olimu w’esambishelo ka Diolelo wasalema l’andja w’otondo. Ndo, kaanga etena kayatshumoya otshi wa pɛkato ɔtɔi ndo kakalolande le Jehowa, “andjelo wa Nzambi mongaka la ɔngɛnɔngɛnɔ.”​—Luka 15:10.

Kakɔna kayotomba etena kayoshidiyama olimu w’esambishelo? Oma laasɔ, andjelo wele “alembe wa l’olongo” wayosukɛ Yeso Kristo lele Nkumekanga ka waa nkumi ya dikanga dia ndɔsha “ta dia lushi la woke la Nzambi Kanga-Wolo-Tshɛ” lo Aramangɛdɔna. (Ɛnyɛlɔ 16:14-16; 19:14-16) Andjelo wa wolo wayonga wanɛ wayela kilombo ka Nzambi etena ‘kayɔsɔmbɔya Nkumadiɔndjɔ Yeso wanɛ wahakitanyiya lokumu l’ɔlɔlɔ lendana la Nkumɛso Yeso.’​—2 Tɛsalɔnika 1:7, 8.

Ɔnkɔnɛ, eya dia andjelo ndjashaka le yɛ. Vɔ ndjakiyanyaka efula dikambo dia ɔlɔlɔ wa wanɛ wakombola nkambɛ Nzambi ndo mbala efula Jehowa kambaka la wɔ dia nkeketsha ndo nkokɛ ekambi ande wa kɔlamelo lanɛ la nkɛtɛ.​—Hɛbɛru 1:14.

Ɔnkɔnɛ, ɔmɔmɔ la l’atei aso ekɔ l’ɔsɔnwɛlɔ w’ohomba wahombande nsɔna. Onde tayohokamɛ ndo nkitanyiya lokumu l’ɔlɔlɔ lele lo tasambishama lo nkɛtɛ k’otondo? Ɛmɛnyi wa Jehowa wa lo ngelo kanyu wayonga l’ɔngɛnɔngɛnɔ dia kokimanyiya dia wɛ nkondja wahɔ oma lo ekimanyielo ka la ngandji ka andjelo wa wolo waki Nzambi.