“Kiti kɛmɔtshi ka lowandji kaki lo dihole diatɔ l’olongo ndo onto ɔmɔtshi akadjasɛ lo kiti kakɔ. Ɔnɛ lakadjasɛ lɔkɔ aki la ɛnamelo kele oko lɔwɔkɔ la jaspɛ ndo oko lɔwɔkɔ la sardɔyinɛ ndo ngolo kele oko emɛrɔdɛ kakadinge kiti kakɔ ka lowandji.”—Ɛnyɛlɔ 4:2, 3.

“Ngaingai kaki lo otshimbedi ande tshɛ. Ngasɔ mbakɛnama esase wa ngaingai wakoodinge. Aki oko ɛnamelo ka lotombo la Jehowa.”—Ɛzɛkiyɛlɛ 1:27, 28.

Waɛnɛlɔ wakawɛnya Joani nde la omvutshi Ɛzɛkiyɛlɛ asɔ mɛnyaka lotombo la Jehowa Nzambi Nkum’Olongo, ndo diangɔ diakokaso nkɔmiya esadi eto, ɛnyɛlɔ dɛngalɛnga dia mbɔkɔ dia ngaingai, ngolo ndo woke woke wa kiti. Vɔ tɛnyaka dia ɛnamelo ka Jehowa kekɔ diambo, ɔngɛnɔngɛnɔ ndo wɔlamu.

Waɛnɛlɔ wendana la Nzambi asɔ mbɔtɔnɛka l’ɛtɛkɛta w’omembi w’esambo lakafunde ɔnɛ: “Jehowa ekɔ woke ndo nde kaleka nsungana tombɔma. Nde ndeka tozambizambi tokina tshɛ mbokama wɔma. Tozambizambi tshɛ t’anto tekɔ tozambizambi t’anyanya, koko Jehowa kakasale olongo. Lalende kele lɔnɛnɛ ndo lotombo; wolo ndo olangala wekɔ lo tɛmpɛlɔ kande k’ekila.”—Osambo 96:4-6.

Kaanga mbele Jehowa ekɔ Omboledi-Waheme-Tshɛ, nde tɔlɔmbaka dia sho ndjasukanya la nde lo dɔmbɛlɔ ndo toshikikɛka dia nde tohokamɛka. (Osambo 65:2) Nzambi tolangaka ndo tokokɛka lo yɛdikɔ y’efula, diakɔ diakafunde ɔpɔstɔlɔ Joani l’eshikikelo tshɛ ɔnɛ: “Nzambi ekɔ ngandji.”—1 Joani 4:8.

“[Ombeki Stɛfano laki Okristo] akalodiama la nyuma k’ekila, nde akende l’olongo ko akɛnyi lotombo la Nzambi ndo Yeso emadi lo lonya l’omi la Nzambi. Ko nde akate ate: ‘Ohonyenda, dimi lambɛna olongo wambodihɔ ndo Ɔna onto emadi lo lonya l’omi la Nzambi.’”—Etsha 7:55, 56.

Yema tshitshɛ la ntondo ka Stɛfano mɛna ɛnɛlɔ kɛsɔ, Yeso akadiakema l’ɛlɔmbwɛlɔ k’anto waamɛ wakatɛkɛta Stɛfano dikambo diawɔ, mbuta ate ɛnɔmbɔdi w’ase Juda. Ɛnɛlɔ kɛsɔ kakashikikɛka dia Yeso aki la lɔsɛnɔ ndo ɔnɛ nde akolɔma ndo  akashama kɛnɛmɔ. Lo kɛnɛ kendana la dui sɔ, ɔpɔstɔlɔ Pɔɔlɔ akafunde ate: “[Jehowa akolola Yeso] oma lo nyɔi ndo [akawodjashiya] lo lonya lande l’omi lo ahole wa l’olongo, mangana etale efula la waolelo tshɛ, mandji tshɛ, welo tshɛ, dɔmbwɛlɔ tshɛ ndo lokombo tshɛ lakoka shilama, aha paka lo dikongɛ nɛ di’akambo, koko ndo lo nɛ diayaye.”—Ɛfɛsɔ 1:20 21.

Laadiko dia ntɛkɛta dia dihole diande dia laadiko, Afundelo mɛnyaka dia l’ɛnyɛlɔ ka Jehowa, Yeso ndjakiyanyaka efula dikambo di’anto. Etena kakandasambishaka lanɛ la nkɛtɛ, Yeso akakɔnɔla akanga wa hemɔ, dikɔmɔ ndo akolola edo. Woho wakandayakimɔ dia mvɔ mɛnyaka ngandji k’efula kokande Nzambi ndo anto. (Ɛfɛsɔ 2:4, 5) Oko wemadinde lo lonya l’omi laki Nzambi, keema edja Yeso ayanga nkamba la lowandji lande ndo ayanga mbela ɛtshɔkɔ wa diambo le akanga w’okitanyiya ahole tshɛ.

“Dimi [omvutshi Danyɛlɛ] lakatetemala menda polo lam’akakitshama kiti ya lowandji ko Tango Andja akadjasɛ. . . . Nunu nunu wakatetemalaka mbokambɛ ndo nunu dikumi (10 000) mbala nunu dikumi (10 000) wakemala la ntondo kande.”—Danyɛlɛ 7:9, 10.

Lo ɛnɛlɔ kɛnɛ kendana la olongo, Danyɛlɛ akɛnyi aha ondjelo ɔtɔi koko nyemba nyemba. Ɔsɔ mɛtɛ ekɔ ɛnɛlɔ ka diambo efula. Andjelo wekɔ anto wa lo nyuma wa diambo efula, wele la timba ndo la wolo. L’atei awɔ mbele ndo olui w’asarafu la akɛruba. Bible tɛkɛtaka dia andjelo ndekana mbala 250.

Andjelo komonga anto wakasɛnɛ la nkɛtɛ ntondo. Nzambi akatonge andjelo edja efula la ntondo k’anto ndjotongama. Etena kakatongama nkɛtɛ, andjelo wakɛnaka ndo wakade ekoko w’ɔngɛnɔngɛnɔ.—Jɔbɔ 38:4-7.

Yoho mɔtshi yakambɛ andjelo wa kɔlamelo Nzambi olimu ele lo mbisha lonya l’olimu woleki ohomba wakambema la nkɛtɛ ɛlɔ kɛnɛ, mbuta ate esambishelo ka lokumu l’ɔlɔlɔ la Diolelo diaki Nzambi. (Mateo 24:14) Woho wayashawɔ l’olimu ɔsɔ akɛnyama lo ɛnɛlɔ kakawɛnya ɔpɔstɔlɔ Joani ɔnɛ lakafunde ate: “Dimi lakɛnyi ondjelo okina atafumbɔ l’atei w’olongo ndo nde aki la lokumu l’ɔlɔlɔ  la pondjo lakandahombe mbewoya wanɛ wodjashi la nkɛtɛ, wedja tshɛ ndo waoho tshɛ ndo ɛtɛkɛta tshɛ ndo weho w’anto tshɛ.” (Ɛnyɛlɔ 14:6) Kaanga mbele andjelo hawɔtɛkɛta l’anto ɛlɔ kɛnɛ oko wakadiasalemaka lo tena dimɔtshi lo nshi yakete, vɔ mbishaka ekimanyielo lo nɔmbɔla wanɛ wasambisha lokumu l’ɔlɔlɔ otsha le anto wele la etema w’ɛlɔlɔ.

“Ta diakatombe l’olongo: Mikayɛlɛ l’andjelo ande wakalɔ la dragɔ, ko dragɔ l’andjelo ande wakaalɔsha, koko vɔ kombaleka wolo ndo vɔ komonga la dihole nto l’olongo. Ko wakakasha dragɔ dia woke, oloyi akɔ w’edjedja welamɛ Diabolo ndo Satana, ɔnɛ langanyiya nkɛtɛ k’otondo. Wakawokasha la nkɛtɛ nde l’andjelo ande.”—Ɛnyɛlɔ 12:7-9.

Aha nshi tshɛ mbaki wɔladi l’olongo. L’etatelo k’ɔkɔndɔ w’ana w’anto, ondjelo ɔmɔtshi akalodiama la nsaki ka tɛmɔma, akatɔmbɔkwɛ Jehowa ko akakome Satana, kitshimudi ate “Ɔndɔshi.” L’ɔkɔngɔ diko, andjelo akina wakayoyela lokolo lande l’ɔtɔmbɔkwɛlɔ ko wakakome ɛdiɛngɛ. La mayɛlɛ tshɛ, vɔ wakalɔshana la Jehowa wolo efula ndo wakakonya anto efula lo mboka kahɔtɔnɛ l’ɛlɔmbwɛlɔ kaki Jehowa ka la ngandji.

Satana l’ɛdiɛngɛ ande wekɔ atshi w’akambo wa kɔlɔ ndo ngala. Vɔ wekɔ atunyi w’anto ndo vɔ wekɔ lo kiɔkɔ y’asui efula wa la nkɛtɛ. Ɛnyɛlɔ, Satana akadiake dongalonga ndo ekambi waki Jɔbɔ kanga kɔlamelo. Oma laasɔ, nde akadiake ana dikumi tshɛ waki Jɔbɔ lo mbela “lɔpɛpɛ la wolo” dia mpandjola luudu lakiwɔ. L’ɔkɔngɔ wa laasɔ, Satana akakɔmɔla Jɔbɔ la “atshutshu wa kandji oma lo dikaka dia lo lokolo polo lo shɔdi y’ɔtɛ.”—Jɔbɔ 1:7-19; 2:7.

Keema edja Satana ayanga minyɛma. Ntatɛ lam’akawawokasha lo tokoma ta nkɛtɛ, nde mbeyaka dia “etena kambootshikalɛ kaya mondo.” (Ɛnyɛlɔ 12:12) Satana ayanga nanyema, ɔsɔ mɛtɛ ekɔ losango la dimɛna.

“Wɛ [Yeso] akasombɛ Nzambi anto w’oma lo waoho tshɛ, ɛtɛkɛta tshɛ, weho w’anto tshɛ ndo wedja tshɛ, ndo wɛ akawaetɛ diolelo ndo ɛlɔmbɛdi wa Nzambi kaso ndo vɔ wayolɛ nkɛtɛ oko nkumi ya dikanga.”—Ɛnyɛlɔ 5:9, 10.

Oko wakolɔma Yeso oma la nkɛtɛ otsha lo lɔsɛnɔ la l’olongo, mbayodionga ndo le anto amɔtshi. Yeso akatɛ apɔstɔlɔ ande wa kɔlamelo ate: “Dimi lotatshu dia tonyɔlɔngɔsɔlɛ dihole. Ndo nto, . . .  dimi layokalola ndo layoyonyolongola dia ndo nyu ndjala lɛnɛ ayomoyala.”—Joani 14:2, 3.

Wanɛ watshɔ otsha l’olongo wekɔ lo ntshɔ la oyango ɔmɔtshi. Kaamɛ la Yeso, vɔ wayokenga lowandji la Diolelo diayɔlɔmbɔla wanɛ wayodjasɛ lo nkɛtɛ k’otondo ndo mbaela ɛtshɔkɔ. Ɔsɔ mbele Diolelo diakatɛ Yeso ambeki ande dia dilɔmba lo dɔmbɛlɔ di’ɛnyɛlɔ ɔnɛ: “Shɛso lele l’olongo, lokombo layɛ lakidiame. Diolelo diayɛ diaye. Lolango layɛ latshame la nkɛtɛ oko watshamalɔ l’olongo.”—Mateo 6:9, 10.

“Lakoke [ɔpɔstɔlɔ Joani] dui dia wolo oma lo kiti ka lowandji diata ɔnɛ: ‘Eenda! Luudu la dipɛma laki Nzambi laya kaamɛ la anto, . . . nde ayokitola asɔyi tshɛ oma lo washo awɔ, nyɔi hatoyala nto, otanda hatoyala nto, delo hatoyala nto, kaanga kandji hatoyala nto. Akambo wa ntondo wamboshila.’”—Ɛnyɛlɔ 21:3, 4.

Ɛnɛlɔ kɛnɛ ka prɔfɛsiya mɛnyaka etena kayokomiya Diolelo diaki Nzambi diokengami la Yeso ndo wanɛ wayolɔ oma la nkɛtɛ ɛlɔmbwɛlɔ kaki Satana ndo mbetɛ nkɛtɛ paradiso. Awui washa anto paa k’efula ndo lonyangu hawotonga nto. Kaanga nyɔi hatonga nto.

Ko kayotota dia miliyara y’anto wakavu yele hawotolɔma dia ntshɔ otsha l’olongo? Lo nshi yayaye, vɔ wayolɔma la elongamelo ka sɛnaka pondjo pondjo lo Paradiso ka la nkɛtɛ.—Luka 23:43.