Miliyɔ y’anto wa l’andja w’otondo mbetawɔka dia Nɔɛlɛ ekɔ fɛtɛ ka eotwelo ka Yeso Kristo. Ko onde wɛ akasɛdingola dia mbeya kana Akristo wa lo ntambe ka ntondo wanɛ waki suke suke la Yeso wakasalaka fɛtɛ ka Nɔɛlɛ? Onde wɛ mbeyaka kɛnɛ kata Bible lo dikambo dia fɛtɛ ya eotwelo? Naka sho nkondja ekadimwelo lo ambola asɔ, kete kɛsɔ ayotokimanyiya dia mbeya kana Nɔɛlɛ ekɔ fɛtɛ k’Akristo.

Ntondotondo, Bible hatɛkɛta dia fɛtɛ ka eotwelo ka Yeso kana ka ɔtɛmɔdi ɔmɔtshi wa kɔlamelo waki Nzambi. Afundelo tɛkɛtaka paka dia anto ahende wakasale fɛtɛ yawɔ ya eotwelo. Ndooko ɔtɔi la l’atei awɔ laki ɔtɛmɔdi wa Jehowa, Nzambi katɛkɛtama lo Bible ndo etena kakawasale fɛtɛ yawɔ ya eotwelo, awui amɔ wa kɔlɔ wakasalema. (Etatelo 40:20; Makɔ 6:21) Lo ndjela dibuku dimɔ, (Encyclopædia Britannica) Akristo wa lo ntambe ka ntondo wakalɔshana la “mbekelo k’apanganu k’osalelo wa fɛtɛ ya eotwelo.”

Bible hate etena shikaa kakotɔ Yeso. Lo ndjela dibuku Cyclopedia (Angɛlɛ) diaki yɔnɛ McClintock nde la yɔnɛ Strong, “lushi lakotɔ Kristo hatanema lo D[aka dia] O[yoyo] kana lo dihole dimɔ.” Lo mɛtɛ, otondonga Yeso akalange dia ambeki ande nsala fɛtɛ ka eotwelo kande, tshike nde otosala dia vɔ mbeya datɛ diakandotɔ.

Dui dia hende, Bible hate dia Yeso kana ombeki ande ɔmɔ akasale fɛtɛ ka Nɔɛlɛ. Lo ndjela dibuku dimɔ, (New Catholic Encyclopedia) osalelo wa fɛtɛ ka Nɔɛlɛ wakatɛkɛtama ntondo “lo Chronographe kaki Philocalus, mbuta ate alamanaka w’ase Rɔmɔ wa lo 336 [T.D.].” Mbokɛmaka hwe dia dui sɔ diakayosalemaka l’ɔkɔngɔ wa Bible shila la fundama ndo ntambe efula l’ɔkɔngɔ wa etena kaki Yeso la nkɛtɛ. Ɔnkɔnɛ, McClintock nde la Strong wakate dia “osalelo wa fɛtɛ ka Nɔɛlɛ hatumbi oma le Nzambi kana oma lo D[aka dia] O[yoyo].” *

Oko Ombetsha a Woke, Yeso akasha ɛlɔmbwɛlɔ lo kɛnɛ kakandalange ambeki ande nsala, ndo ɛlɔmbwɛlɔ ɛsɔ tanemaka lo Bible. Ɔnkɔnɛ, osalelo wa fɛtɛ ka Nɔɛlɛ komonga l’atei wa ɛlɔmbwɛlɔ ɛsɔ. L’ɛnyɛlɔ k’ombetsha wa lo kalasa lahalange dia ambeki ande ntamba elelo lo kɛnɛ kakaweke, Yeso halange dia ambeki ande ‘ntamba kɛnɛ kofundami’ lo Afundelo w’ekila.​—1 Kɔrɛtɔ 4:6.

Lo wedi okina, ekɔ dui dimɔ di’ohomba diele Akristo wa lo ntambe ka ntondo wakadieyaka dimɛna efula, mbuta ate osalelo wa Eohwelo ka nyɔi ka Yeso. Yeso ndamɛ akatɛ ambeki ande etena ka nsala dui sɔ ndo ndamɛ akawaɛnya woho wa disala. Ɛlɔmbwɛlɔ w’eshika ɛsɔ ndo datɛ shikaa dia nyɔi kande fundama lo Bible.​—Luka 22:19; 1 Kɔrɛtɔ 11:25.

Oko wambotodiɛna, Nɔɛlɛ ekɔ fɛtɛ ka eotwelo ndo Akristo wa lo ntambe ka ntondo kosalaka mbekelo k’apanganu kɛsɔ. Laadiko dia laasɔ, Bible hatɛkɛta dia Yeso kana onto okina akasale fɛtɛ ka Nɔɛlɛ. L’ɔtɛ w’awui asɔ mbele miliyɔ y’Akristo wa l’andja w’otondo wakɛnyi dia fɛtɛ ka Nɔɛlɛ bu fɛtɛ kawɔ.