Ndooko onto lele la foto ka Yeso. Nde komemala dia vɔ mbonda foto kana mboosanga. Koko, nde mɛnamaka lo asango w’asangi waheyama mbadia l’edja ka ntambe efula.

Lo mɛtɛ, asangi w’asango asɔ kombeyaka mɛtɛ nganɛ waki Yeso. Mbala efula mbekelo yeyama, waetawɔ w’ɛtɛmwɛlɔ ndo anto amɔtshi nɔmbaka asangi w’asango dia vɔ nsanga Yeso lo ndjela woho wakombolawɔ. Kaanga mbediɔ ngasɔ, asango awɔ koka nsɛngiya ndo kaanga ntshindja anto wɔɔngɔ lo woho wɔsawɔ Yeso ndo wetshelo ande.

Asangi w’asango amɔ sangaka Yeso oko onto lele bu la demba dia wolo la divo di’etale ndo la lɔlɛdu la tshitshɛ kana oko onto lele la lonyangu l’efula. Lo asango akina, Yeso mɛnamaka oko etongami ka lo nyuma kele la osase l’ɔtɛ kana kahadje anto akina yimba. Onde woho wawosangawɔ ɔsɔ mbaki Yeso mɛtɛ? Ngande wakokaso mbeya awui wendana la nde? Yoho mɔtshi ele nsɛdingola ɛtɛkɛta watanema lo Bible wakoka tokimanyiya dia nshihodia woho waki Yeso mɛtɛ. Vɔ koka nto tokimanyiya dia monga la kanyi ya dimɛna lo dikambo diande.

Ɔsɔ ekɔ ɛtɛkɛta wakate Yeso lo dɔmbɛlɔ ondo lo batisimu kande. (Hɛbɛru 10:5; Mateo 3:13-17) Ngande waki demba dia Yeso? Ɛnɔnyi 30 la ntondo, ondjelo Ngabriyɛlɛ akasholɛ Mariya ɛtɛkɛta ɛnɛ: “Wɛ ayotshɔ diemi, ayota ɔna pami, . . . Ɔna Nzambi.” (Luka 1:31, 35) Ɔnkɔnɛ, Yeso aki onto la kokele oko waki Adama lam’akandatongama. (Luka 3:38; 1 Kɔrɛtɔ 15:45) Yeso akahombe mɛtɛ monga pami k’olangala, ndo ondo nde akafɔnaka la Mariya wa nyango, laki ose Juda.

Yeso aki la ndɛdu, oko waki mbekelo k’ase Juda otshikitanyi l’ase Rɔmɔ. Ndɛdu shɔ yaki didjidji dia kɛnɛmɔ ndo dilɛmiɛlɔ, yɔ komonga etale kana epakapaka. Aha la taamu, Yeso akanyaka ndɛdu ndo akalɔngɔsɔlaka divo diande dimɛna. Paka anto waki Akidiami, ɛnyɛlɔ oko Samisɔna, mbaki kominyaka divo diawɔ.​—Walelo 6:5; Embadi 13:5.

Suke l’ɛnɔnyi 30 w’etondo, Yeso aki otshudi w’abaya, wakakambaka aha l’ekimanyielo ka dihomɔ dia wolo dia shi nyɛ. (Makɔ 6:3) Ɔnkɔnɛ, nde mɛtɛ akahombe monga la demba dia wolo. L’etatelo k’olimu ande aha l’ekimanyielo k’onto ɔmɔtshi, Yeso “akatshanya wanɛ tshɛ waki la ɛkɔkɔ ndo la ngɔmbɛ lo tɛmpɛlɔ, akatshola falanga y’ekenga y’amengodi wa falanga ndo akasokola mɛsa awɔ.” (Joani 2:14-17) Nɔmbamaka monga la wolo ndo monga pami ka lokalo efula dia nsala dui sɔ. Yeso akakambe la demba diakawɔlɔngɔsɔlɛ Nzambi dia nkotsha ɔkɛndɛ wakandawosha lo mbuta ɔnɛ: “Dimi pombaka mbewoya lokumu l’ɔlɔlɔ la Diolelo dia Nzambi ndo l’esomba ekina, nɛ dia l’ɔtɛ wa dikambo sɔ mbakamatomama.” (Luka 4:43) Akalɔmbamaka mbidja welo efula dia nkindjakindja Palɛstinɛ k’otondo l’ekolo ndo dia nsambisha losango lɔsɔ.

Elungi ka wɔlamu ka Yeso ndo dionga diande diakutola anto akahombe mbetɛ leeta la laande lɔsɔ dui dia dimɛna efula le anto “wele la paa ndo wele la wetsho.” (Mateo 11:28-30) Wangasanu ndo ɔlɔlɔ ande wakaleke ntɔtɔmiya daka diande di’ekeketshelo le wanɛ wakalangaka mbeka awui oma le nde. Oyadi kaanga ana w’akɛnda wakalangaka monga suke suke la Yeso, nɛ dia Bible mbutaka  ɔnɛ: “Nde akɛmbɛ ana akɔ l’anya ande.”​—Makɔ 10:13-16.

Yeso akahomana la lɔkɔnyɔ l’efula la ntondo ka nyɔi kande, koko nde komonga oko onto laki la lonyangu l’efula. Ɛnyɛlɔ, nde akasha lonya lo fɛtɛ ka diwala kakasalema la Kana lo nkadimola ashi wanu w’amɛna. (Joani 2:1-11) L’ahole akina wakasanganaka anto, nde aketsha wetshelo wahohamamɛki pondjo.​—Mateo 9:9-13; Joani 12:1-8.

Laadiko dia laasɔ, Yeso akasambisha lo yoho yakakimanyiya onto tshɛ dia monga l’ɔngɛnɔngɛnɔ w’elongamelo ka lɔsɛnɔ la pondjo. (Joani 11:25, 26; 17:3) Lam’akayowosha ambeki ande 70 alapɔlɔ w’olimu w’esambishelo wakawasale, nde “akangɛnangɛna efula” ndo akate ate: “Nyɔngɛnɛngɛnɛ lo woho wele nkombo yanyu yambofundama l’olongo.”—Luka 10:20, 21.

Ewandji w’ɛtɛmwɛlɔ wa lo nshi ya Yeso wakakutolaka yambalo y’anto lewɔ vɔamɛ ndo wakalekaka mɛnya woho wakiwɔ la lowandji. (Walelo 15:38-40; Mateo 23:5-7) Otshikitanyi la wɔ, Yeso aketsha apɔstɔlɔ ande diaha vɔ “mbahemɛka” anto akina. (Luka 22:25, 26) Lo mɛtɛ, Yeso akahɛmɔla ɔnɛ: “Nyewɔ afundji watolangaka mbeteta l’atei w’anto wɔlɔtshi ekutu ndo watolangaka anto mbasha mɔyɔ lo bingu.”​—Makɔ 12:38.

Lo diaaso dimɔ, Yeso akasɔsɔmɛ l’olui w’anto ndo vɔ kombeya. (Joani 7:10, 11) Oyadi kaanga lam’akinde l’atei w’apɔstɔlɔ ande 11 wa kɔlamelo, nde kɔmɛnamaka dia nde mbaaleka oma lo eongelo kande ka demba. Judasɛ laki ofungi akawosha bizɛ, ‘djembetelo ya diokanelo’ dia mɛnyanya Yeso le afungi.​—Makɔ 14:44, 45.

Kaanga mbele awui efula haweyama, mɛnamaka dia Yeso hafɔnɛ la woho wosangawɔ tena efula. Kɛnɛ koleki ohomba ele woho wawɔsaso ɛlɔ kɛnɛ lo dihole dia woho wakinde mɛtɛ.

Wenya ɛmɔtshi l’ɔkɔngɔ wa nde mbuta ɛtɛkɛta ɛnɛ, Yeso akavu ndo akakundɛma. (Joani 14:19) Nde akakimɔ lɔsɛnɔ lande “oko oshinga w’etshungwelo dikambo di’anto efula.” (Mateo 20:28) Lo lushi la sato la nyɔi kande, Nzambi akawolola “lo nyuma” ndo “akawosha lotshungɔ la nde mɛnama” le ambeki ande amɔ. (1 Petero 3:18; Etsha 10:40) Ko ngande waki Yeso etena kakandɛnama le ambeki ande? Ondo nde akatshikitana efula la ɛnamelo kakawɛnaka anto ntondo, nɛ dia kaanga ambeki ande kombeya mbala kakɔ ɔtɔi. Mariya w’ose Mangadala akawɔshi oko okambi w’ekambɔ ndo ambeki ahende wakatatshɔka lo mboka k’otsha la Emayo wakawɔshi oko ɔngɛndangɛnda.​—Luka 24:13-18; Joani 20:1, 14, 15.

Ngande wakokaso mbɔsa woho wele Yeso ɛlɔ kɛnɛ? Ndekana ɛnɔnyi 60 l’ɔkɔngɔ wa nyɔi ka Yeso, Joani laki ɔpɔstɔlɔ ande wakandokaka ngandji efula akɛnyi waɛnɛlɔ wa Yeso. Joani kɔmɛna odo wa elungi kande lo kurusɛ. Koko, nde akɛnyi “Nkumekanga ka nkumi ya dikanga ndo Nkumi ka waa nkumi,” mbuta ate Nkumekanga ka Diolelo diaki Nzambi, kayanga nɛndja atunyi wa Nzambi keema edja, mbidja ndo ɛdiɛngɛ ndo anto ndo kayanga mbela ɛtshɔkɔ wa pondjo le anto tshɛ wa la nkɛtɛ​—Ɛnyɛlɔ 19:16; 21:3, 4.